Cbel cycastiw ke nasyon cyvesin cyib cyucꞌil aj Israel
9
Atzun tkanil lu o tma Kman tiꞌj txꞌotxꞌ Hadrac ex tiꞌj tnam Damasco, porque toc twitz Kman cyiꞌj cycyakil xjal, ax icx cyiꞌj cycyakil cꞌloj cyiyjil aj Israel. 2 Ax icx tiꞌj tnam Hamat aju tvesin tib tucꞌil tnam Damasco, ax icx tiꞌj tnam Tiro ex Sidón, masque at nimxix cynabl. 3 Jaw cybinchaꞌn aj Tiro ja te cycolbil cyib ex baj cychmoꞌn nimxix kꞌan pwak ex sak pwak. 4 Pero cꞌelel tiꞌn Kman tcyakilju at cye, cbelex t-xoꞌn cykꞌinumabl tuj mar ex cꞌoquel tkꞌoꞌn tkꞌakꞌal tcyakil tnam.5 Octzun tcyil ke xjal ateꞌ tuj Ascalón, ctzajel nimxix cyxobil. Ax icx keju ateꞌ tuj tnam Gaza cbajel cyxkutzꞌin cyib tuꞌn taꞌw, ax icx keju ateꞌ tuj tnam Ecrón che tzajel luꞌlun tuꞌn tchi tuꞌnju otok naj aju kꞌukl cycꞌuꞌj tiꞌj. Cymel aju rey tuj tnam Gaza ex mintiꞌ xjal cyjel ten tuj tnam Ascalón. 6 Tuj tnam Asdod che najal ke xjal t-smon tib cyiyjil. Chi Kman in tmaꞌn cyjaꞌ: Cbel nkꞌoꞌne cycastiw aj Filistey tuꞌn miꞌn cucx tjaw cyniman cyib. 7 Mlay txi cychyoꞌntl chibj tucꞌix tchcꞌel, icx aju chibj mya kꞌoꞌn cye tuꞌn t-xi cychyoꞌn. Pero cyxol ke xjal lu at junjun che cyjel ten tuꞌn cycꞌulun weye ex che oquel te nejenel cyxol aj Judá ex che cꞌmetel aj Ecrón ic tzaꞌn o bant cyiꞌj aj Jebusey atxix ojtxi. 8 Atzun weye chin bel tene xkꞌukil tuꞌn tclet aju tnam etzan wuꞌne, tuꞌntzun miꞌn cyoctz ke aj kꞌoj cyxol aj Israel. Mlay che ajtz meltzꞌaj juntl maj ke xjal o che yajlante cye, porque akine chin bel tene xkꞌukil cyiꞌj, chi Kman.
Aju rey tzul
9 Chi Kman in tmaꞌn cyjaꞌ: Che tzalajxe nim akeye aj Sión. Che schꞌine tucꞌil tzalajbil akeye aj Jerusalén. Lu cyreye tzul cyucꞌile, in tbinchaꞌn aju tzꞌaklxix ex tzul clolte cyeye; mans ex tzul tjax tibaj jun bur, tal jun ttxu bur. 10 Tuꞌn che bajel naj ke carwaj in che ajben tuj kꞌoj cyuꞌn aj Efraín, ax icx ke chej in che ajben tuj kꞌoj cyuꞌn aj Jerusalén. Che bajel ttokin ke xobl plech in che ajben tuj kꞌoj. Che tel ke nasyon tuj txubtxaj tuꞌn cyreye. A ccawil tibaj tcyakil, ctzajelx keꞌ tcawbil ttziꞌ jun mar ex cpol baj ttziꞌ juntl, ctzajelx keꞌ ttzi nima Éufrates, cpol baj ttxaꞌnpun txꞌotxꞌ.
Che cꞌmetel aj Israel juntl maj
11 Chi Kman in tmaꞌn cyjaꞌ: Tuꞌnju o txi ntziyane jun nyole cyeye ex o cyaj bant tiꞌj tuꞌn cychcꞌel alumaj, che colpetele wuꞌne ex che eletz ntzokpiꞌne ke pres cycuꞌx tuj jul mintiꞌ aꞌ tuj. 12 Akeye o cheꞌx kꞌiꞌn pres tuj juntl part, ex lu keye in che ayon, jaꞌlo cyaj meltzꞌaje tuj cycolbil cyibe. Ex in xi nmaꞌne cyeye, mas nim ncyꞌiwbile cxel nkꞌoꞌne cyibaje tuꞌnju o tzicꞌx cyuꞌne. 13 Ic che oquel aj Judá wuꞌne ic tzaꞌn ke xobl plech in che ajben cyuꞌn soldad tuj kꞌoj, ex ic che oquel aj Efraín ic tzaꞌn ke plech. Ic che oquel aj Sión ic tzaꞌn spad, ex cxel nkꞌoꞌne cyipumal tuꞌn cyxiꞌ kꞌojlel cyucꞌil aj Grecia, chi Kman.
14 Cbel tyecꞌun tib Kman cyibaj ke xjal etzan tuꞌn ex che tzajel t-xoꞌn ke tplech ic tzaꞌn tkan kꞌancyok. Ate Kman Dios cꞌoquel kꞌajtzante chun ex tzul tuj jun cykꞌikꞌ nneꞌtz tuj tnayaj kꞌij. 15 Ate Kman aju Tajaw Tcyakil cꞌoquel tcwentin ke xjal etzan tuꞌn, ex che najel ke aj kꞌoj cyiꞌj cyuꞌn. Cbajel cywaban cyximlal ke aj kꞌoj, akeju in che tzaj xoꞌnte abj cyiꞌj, che jawil schꞌin mer ic tzaꞌn cꞌal kꞌeꞌn ke, ex cꞌelel cychcꞌel ke aj kꞌoj cyiꞌj cyuꞌn ic tzaꞌn tchcꞌel jun alumaj tcuꞌx tuj jun lak tuꞌn t-xi kꞌabaj twi altar te jun chojbil.
16 Tuj tkꞌijlalil tzul che cletel tuꞌn Kman Dios ke xjal etzan tuꞌn, ic tzaꞌn ke ẍneꞌl cwentin ke wen tuꞌnju pastoril cye. Che koptzꞌajel tuj ttxꞌotxꞌ Kman ic tzaꞌn ke tbanil abj in che koptzꞌaj tiꞌj tcoron jun rey. 17 Tbanilxix che oquel queꞌyin. Tuꞌnju nimxix twitz triw ex nimxix taꞌl twitz uva, che chꞌiyil ke cuꞌxun ax icx ke kꞌapoj.