Aju yol tzaj ttziyan Dios te tzokpibl
10
Cykaninxe jbal te Kman oc chꞌixtok tul ttziꞌ jbalil, ate Kman in tzaj kꞌonte kꞌancyok, ctzajel t-samaꞌn nimxix jbal ex ctzajel pokꞌl cꞌul tuꞌn tuj cojbil cye cycyakil xjal. 2 Mya ax toc cyyol ke tilbilal ex mya ax toc aju in cyil ke chman, nok tten aju nnoꞌc yecꞌun tuj cywitzicꞌ, ex nokx gan aju cyyol te kꞌukbabl cꞌuꞌjbaj. Cyjaꞌtzun, nok in che betjeꞌ xjal ic tzaꞌn jun cꞌloj ẍneꞌl, ex nnicꞌx nimcu cyuꞌn tuꞌn tlaj mintiꞌ jun pastor cyiꞌj.3 Cyjaꞌtzun in tmaꞌn Kman cyjaꞌ: Ma tzaj nimxix ntxꞌuꞌjile cyiꞌj ke pastor ex cbel nkꞌoꞌne cycastiw ke nejenel. Akine aju Tajaw Tcyakil che oquel ncwentine ke nẍneꞌle, akeju tiyjil Judá, ex che oquel nkꞌoꞌne ic tzaꞌn chej cyuwxix cyipun tuj kꞌoj. 4 Cyxol aj Judá che jawil jlet ke nejenel, ic che oquel ic tzaꞌn jun abj toc te scyini te simyent, ic tzaꞌn jun stac te tkan ja xbalun ja ex ic tzaꞌn jun xobl plech in ajben tuj kꞌoj. Ex cyxol che jawil jlet ke nejenel. 5 Che oquel ic tzaꞌn ke soldad at nim cyipun in cub cyiꞌj aj kꞌoj cyuꞌn, ic tzaꞌn in baj wabat xokꞌl tuj cay; che kꞌojel tuꞌnju atine cyucꞌil ex akeju cyjax cyibaj chej cbel cyiꞌj cyuꞌn.
6 Cxel nkꞌone cyipun ke tiyjil Judá ex che cletel ke tiyjil José wuꞌne. Che ajetz meltzꞌaj wuꞌne tuꞌn cyul tuj cytanmi tuꞌnju in kꞌakꞌan ncꞌuꞌje cyiꞌj. Che oquel mer ic tzaꞌn mintiꞌ otok che el wicꞌune, porque akine Cyman, aju Cydios ex cxel nbiꞌne cynaꞌj Dios. 7 Che oquel ke tiyjil Efraín ic tzaꞌn jun soldad cyuw tcꞌuꞌj tuj kꞌoj. Che tzalajel mer ic tzaꞌn otok txi cycꞌaꞌn vin ex oc tilwajtz jlu cyuꞌn cycꞌwaꞌl, ax icx cye che jawil tzalaj. Ctzalajel cyanmi tiꞌj Kman.
8 Che tzajel ntxcoꞌne ex che oquel nchmoꞌne, porque ma che colpet wuꞌne. Cchmetel nimxix cybaj ic tzaꞌn chmet nimxix cybaj ojtxi. 9 Masque o che baj nsputine cyxol ke nasyon ateꞌ najchak, pero chin tzajel naꞌne cyuꞌn. Che ankꞌil cyucꞌil cycꞌwaꞌl ex che ajetz meltzꞌaj. 10 Che ajetz wiꞌne tuj Ejipt, che ajetz wiꞌne tuj Asiria, ex che pol wiꞌne tuj Galaad ex tuj txꞌotxꞌ Líbano; nimxix cybaj ctel ex mlay canun lugar te cye. 11 Che icꞌetz tuj mar xobajilxix ex aju aꞌ in xtulkꞌin tibaj mar biꞌx cwebel. Bix ctzkijel nima Nilo, cnajel tnimbil tib Asiria ex cbajel cyipun aj Ejipt. 12 Wuꞌne cxel nkꞌoꞌne cyipun aj Israel ex che betel cwentin ke wuꞌne. Akine Dios in chin kꞌmante ju yol lu, chi Kman.