11
Aya txꞌotxꞌ Líbano, jakom ke tpwertila ex e cycub baj tzꞌeꞌy tuꞌn kꞌakꞌ ke tkan wiꞌten ateꞌ tiꞌja. 2 Cyjaw okꞌe akeye tzeꞌ tzaj, tuꞌnju ma che icꞌ tzꞌak ke wiꞌten ex ma che cub baj tilj ke tzeꞌ tbanilxix che queꞌyin. Che wuyine akeye tzeꞌ cꞌol tuj txꞌotxꞌ Basán, tuꞌnju ma baj naj aju chcꞌul pim. 3 Nim in che okꞌ ke pastor porque ma baj naj cywabl ke alumaj aju tbanilxix. In binjtz tkꞌajkꞌajel cywiꞌ ke balun in che tzanun tuꞌnju ma baj naj tpimil chcꞌul at ttzi nima Jordán.Ke cabe pastor
4 Atzun jlu tzaj tmaꞌn Kman Dios weye: Che tcwentin oca ke ẍneꞌl banimaj cyiꞌj tuꞌn cycub byoꞌn. 5 In che cub byoꞌn cyuꞌn ke lakꞌol cye ex mintiꞌ nnuꞌl tiꞌj cycꞌuꞌj ka at cyil tiꞌj, ex ke cꞌayil cye in cymaꞌn cyjaꞌ: Chjonte Kman, ma ko oque kꞌinun, che chi. Ke pastoril cye misicyer in tzꞌeꞌy cycꞌuꞌj cyiꞌj. 6 Tuꞌntzun jlu mlay tzaj kꞌakꞌan ncꞌuꞌje cyiꞌj ke xjal najlke tuj txꞌotxꞌ lu, nok oꞌcx cxel nkꞌoꞌne teyle junjun tuj tkꞌab tucꞌil ex tuj tkꞌab t-rey. Atzun ke jlu che bajel xitunte cytxꞌotxꞌ ex mi jun ccletel wuꞌne tuj cykꞌab. Akine Dios in chin kꞌmante jlu.
7 In octzun tene cwentil cye ke ẍneꞌl banimaj cyiꞌj tuꞌn cycub byoꞌn, akeju tuj bis ateꞌ. Tzaj njyoꞌne cabe cyꞌakoꞌch; jun oc nkꞌoꞌne tbi Xtalbil ex atzun juntl oc nkꞌoꞌne tbi Mojbabl Tibil. 8 Ex tuj junx xjaw el wiꞌne cyakꞌun ox pastor otok baj npasense cyuꞌn ex in che icꞌuntok wiꞌje.
9 Xi nmaꞌne cye ke ẍneꞌl cyjaꞌ: Mlay chin octle te pastor cyiꞌje. Ka at jun ma cyim, e tcyim. Ka at jun ma cub naj, e tcub tnaj. Atzun keju che cyjel ten, e tbaj cychyon cyib, nchiye cye.
10 Tzajtzun wiꞌne aju ncyꞌakoꞌche toctok tbi Xtalbil ex cub ntokine te jun techal ka otok cub tkꞌuchin Dios tyol aju otok cyaj bant tiꞌj tuꞌn cyucꞌil cycyakil nasyon. 11 Tuj kꞌij lu cub kꞌuchj aju yol otok cyaj bant tiꞌj ex ke lakꞌol ẍneꞌl, akeju in che queꞌyintok wiꞌje, el cynicꞌ tiꞌj ka a Kman kꞌmante aju in banttok wuꞌne. 12 Xitzun nmaꞌne cye cyjaꞌ: Ka baꞌn tuj cywitze, cychjontze twi ncꞌuꞌje, ex ka miꞌn, cucxju, nchiye. Ex tzaj cykꞌoꞌn 30 sak pwak twi ncꞌuꞌje.
13 Tzaj tmaꞌn Kman weye cyjaꞌ: Kꞌinxa pwak lu ex kꞌoꞌn cuꞌxa tuj tcubil kꞌinumabl tuj njaye. Xitzun wiꞌne keju 30 sak pwak ex cuꞌx nkꞌoꞌne tuj tcubil kꞌinumabl tuj tja Kman, oꞌcxtzun chꞌin twi ncꞌuꞌje tzaj cykꞌoꞌn. 14 Te tibajxi cub ntokine aju tcabin cyꞌakoꞌch, aju toctok tbi Mojbabl Tibil, te jun techal ka otok cub xitj aju cymojbabl cyib aj Judá cyucꞌil aj Israel. 15 Tzaj tmaꞌn Kman weye cyjaꞌ: Atzun jaꞌlo, kꞌoꞌnc tiba ic tzaꞌn jun pastor mintiꞌ tnabl. 16 Porque cꞌoquel nkꞌoꞌne jun pastor tuj tnam lu, aju pastor lu mintiꞌ taj cyiꞌj ẍneꞌl tzpetni ke, ex miꞌn jyon cyiꞌj keju o cheꞌx naj ex miꞌn che oc tkꞌanan keju o che cꞌixbi ex miꞌn txi tkꞌoꞌn cywa keju ocni cyiꞌj, nok oꞌcx cxel tchyoꞌn cychibjal keju mas ulni cynabl ex cꞌelel tcowpiꞌn tpas cykan. 17 Ay becꞌbil twitz ju pastor mintiꞌ tnabl, in che cyaj tcolin ke ẍneꞌl. Cuchiwt cꞌixbi tkꞌab ex tbakꞌ twitz tuj tbankꞌab tuꞌn spad. Cuchiwt tzꞌoc tzkij tkꞌab ex biꞌxwit cyaj moẍix tbakꞌ twitz te jumajx.