Aju tzokpibl te tnam Jerusalén
12
Atzun jun tkanil lu tuꞌn Kman cyiꞌj aj Israel. Aju Kman o binchante cyaꞌj ex o cub tkꞌoꞌn tkꞌukbil txꞌotxꞌ ex o tzaj tkꞌoꞌn cychwinklal xjal, chi in tmaꞌn cyjaꞌ: 2 Aju tnam Jerusalén cꞌoquel wuꞌne ic tzaꞌn jun copa kꞌeꞌn ex cchyoꞌmil cywiꞌ cycyakil ke nasyon tuꞌn, akeju cyvesin cyib tucꞌil Jerusalén. Octzun tbaj cytxolban cyib tiꞌj tnam Jerusalén, ax icx che oquel tzokpaj cyiꞌj txkantl tnam tuj Judá. 3 Tuj tkꞌijlalil tzul cꞌoquel tnam Jerusalén wuꞌne ic tzaꞌn jun abj nimxix talil wen te cye cycyakil nasyon. Ka at jun taj tuꞌn tjaw tyucun, biꞌx ctzaꞌwtel tuꞌn. Cꞌoquel cychmon cyib cycyakil nasyon tuꞌn cyoc tzokpaj tiꞌj Jerusalén, 4 pero che oquel nsecꞌpuꞌne cycyakil cychej, ex ke soldad cyjax cyibaj che oquel loc wuꞌne. Atzun ke tiyjil Judá che oquel ncwentine ex cycyakil cychej nasyon cbel moẍix cywitz wuꞌne. 5 Oc toc cyqueꞌyin ke nejenel tuj Judá jlu, oc cymaꞌ tuj cyanmi: Ate Kman aju Tajaw Tcyakil atzun Cydios keju najlke tuj Jerusalén, ex atzunju in kꞌonte cyipun, che chilo. 6 Tuj tkꞌijlalil tzul ke nejenel tuj Judá che oquel ic tzaꞌn txkan xkꞌaꞌl in cꞌant cyxol ttxan siꞌ, ex ic tzaꞌn jun ttxan tzaj in cꞌant cyxol junjun cheꞌl triw. Ex cyuꞌn che bajel tzꞌeꞌy cycyakil ke nasyon ateꞌ tuj cybankꞌab ex tuj cynayaj, akeju cyvesin cyib cyucꞌil, ex atzun ke xjal aj Jerusalén ax che najal juntl maj tuj cytanmi, chi Dios.7 Pero tnejel che cletel ke tiyjil Judá wuꞌne, akine Cyman, tuꞌntzun mi tjaw cyniman cyib ke tiyjil David ex ke xjal najlke tuj Jerusalén cywitz mastl tiyjil Judá. 8 Wuꞌne che cletel ke xjal najlke tuj Jerusalén. Keju mintiꞌ cyipun ateꞌ cyxol cꞌoquel mas cyipun ic tzaꞌn te rey David, ex ke tiyjil David che oquel ic tzaꞌn te Dios, ic tzaꞌn t-anjel Kman in cub nej cywitz. 9 Tuj tkꞌijlalil tzul cbel nxitune cycyakil nasyon che oquel tzokpaj kꞌojlel tiꞌj tnam Jerusalén.
10 Ctzajel nkꞌoꞌne Nxewe cyibaj ke tiyjil David ex keju najl tuj Jerusalén; cnojel tuj cyanmi tuꞌn xtalbil tuꞌntzun tbant cycubsan nwitze. Cꞌoquel cyqueꞌyin aju xjal o baj xayuꞌn cyuꞌn, che oquel ten bisul ex che jawil okꞌ tiꞌj ic tzaꞌn in che jaw okꞌ oc tcyim aju oꞌcxcu jun cycꞌwaꞌl ex ka oc tcyim ju tnejel cycyꞌajal. 11 Cꞌoquel jun matij bis tuj Jerusalén ic tzaꞌn bis oc tuj Hadad-rimón tuj chkꞌajlaj Meguido. 12 Ex cycyakil aj Israel che okꞌel, teylex te junjun cꞌloj tiyjil tuj cyeylex cylugar: Ke tiyjil David che bel ten jun pacꞌ ex ke cyxuꞌjil tuj juntl pacꞌ; ke tiyjil Natán jun pacꞌ ex ke cyxuꞌjil tuj juntl pacꞌ: 13 ke tiyjil Leví jun pacꞌ ex ke cyxuꞌjil tuj juntl pacꞌ; ke tiyjil Semei jun pacꞌ ex ke cyxuꞌjil tuj juntl pacꞌ; 14 ax icx che okꞌel txkantl cꞌloj cyiyjil, teylex junjun cꞌloj jun pacꞌ ex ke cyxuꞌjil tuj juntl pacꞌ.