13
Tuj tkꞌijlalil tzul cjaketel jun twi aꞌ tuꞌn ttxꞌjet cyil ex cytzꞌilil ke tiyjil David ex keju najl tuj Jerusalén. 2 Ex cyuj cycyakil cytanmi aj Israel che elel wiꞌne ke tilbilal tuꞌntzun miꞌn ttzaj naꞌntl cybi. Ax icx cꞌelel wiꞌne tuj cytanmi akeju nnoꞌc cykꞌon cyib te nsanjele ex cycyakil keju cyajbil tuꞌn cycꞌulun cywitz tilbilal. Akine Dios in chin kꞌmante jlu.3 Entons, ka at jun ma tzꞌoc tkꞌon tib te nsanjele, ax ke tman che kꞌmalte te cyjaꞌ: Il tiꞌj cymela tuꞌnju ma yolina nicꞌaj yol tuj tbi Kman, che chilo. Ax ke tman che oquel xayunte te tuꞌn tcyim oc toc tkꞌon tib te nsanjele. 4 Tuj tkꞌijlalil tzul, akeju nnoꞌc cykꞌon cyib te nsanjele ctzajel cychꞌixwi oc cypacban tiꞌj ju in tzaj yecꞌun cye mer ic tzaꞌn tuj witzicꞌ. Mi jun cꞌoquel tkꞌoꞌn t-ẍjoꞌw tuꞌn t-sbun ic tzaꞌn ẍjoꞌw in ajben cyuꞌn ke nsanjele, 5 nok oꞌcx teylex te junjun cxel tmaꞌn cyjaꞌ: Mya t-sanjel Dios we kin, nok jun akꞌnal xjal kine. Atxix tej cꞌwaꞌlxtok kine in chin akꞌnane tuj cojbil, che chilo. 6 Katzun at jun ma tzaj kaninte te: ¿Ti cyxilen ke tbantlen ẍil ateꞌc tiꞌj t-ximlala? ka chi, atzun te cxel ttzakꞌweꞌn: O chin oc cꞌixbisaꞌne tuj cyja ke wamiwoye.
Cbel byoꞌn aju xjal toc te pastor tuꞌn Dios
7 Ate Kman aju Tajaw Tcyakil chi in tmaꞌn cyjaꞌ: Weꞌctza aya spad, toc tzokpaja tiꞌj ju xjal toc te pastor wuꞌne ex toc te onil weye. Byoncuya ju pastor, atzun ke ẍneꞌl che elel sputj ex atzun weye chin oquel tzokpaje cyiꞌj ke tal ẍneꞌl. 8 Keju najl tuj txꞌotxꞌ lu che elel paꞌn tuj ox cꞌloj, cabe cꞌloj che najel, atzun toxin cꞌloj cyjel ankꞌin. 9 Cꞌoquex nkꞌoꞌne toxin cꞌloj tuj kꞌakꞌ, che bajel nsaksaꞌne ic tzaꞌn in baj sakset sak pwak, ex cꞌicꞌel nwitze cyiꞌj ic tzaꞌn nneꞌl nicꞌbaj tiꞌj kꞌan pwak. Octzun che cubsal nwitze ex atzun weye ctzajel ntzakꞌweꞌne. Cxel nmaꞌne cye cyjaꞌ: Akeye xjal etzan wuꞌne, ex atzun cye ctzajel cytzakꞌweꞌn cyjaꞌ: Ate Kman, atzun Kdios, che chilo. Akine Dios in chin kꞌmante jlu.