Aju yol tiꞌj tnam Jerusalén ex cyiꞌj txkantl nasyon
14
Aya tnam Jerusalén, lu tzul tkꞌijlalil castiw tuꞌn Kman, tujx tmija che bel sipan ke tiꞌxti otok che el kꞌiꞌn teya. 2 Tuj tkꞌijlalil tzul che oquel tchmoꞌn Kman cycyakil nasyon tuꞌntzun cykꞌojin tiꞌj tnam Jerusalén. Che oquel tzokpaj tiꞌj tnam, cꞌelex cyelkꞌaꞌn tcyakilju at tuj cyja aj Jerusalén, cbel cyxoꞌn ke xuꞌj tuꞌn cyoc ten cyiꞌj ex cxel cyiꞌn pres mijcu cybaj aj Jerusalén. Oꞌcx keju chꞌintl che cyjel ten, che tel tuj. 3 Atzunte Kman jurat tzul kꞌojlel cyiꞌj ke nasyon lu ic tzaꞌn o kꞌojin tuj tkꞌijlalil ojtxi. 4 Tuj kꞌij lu cbel weꞌ Kman twi witz Olivos, aju tcub twitz tnam Jerusalén tuj tumlal tjawitz kꞌij. Ate witz Olivos cbel pax tuj tmij, ctzajel tpaꞌxil tuj tumlal tjawitz kꞌij ex cxeꞌl tumlal telex kꞌij, ex cyjel ten jun matij chkꞌajlaj tuj tmij. Mij witz cꞌajel jawni ex atzun mijtl cꞌajel cubni. 5 Atzun cyeye che elex oke tuj chkꞌajlaj lu, aju cyjel ten cyxol ke witz, aju cpol baj max tuj lugar Azal tbi. Che elex oke tuj, ic tzaꞌn e ex ok ktzan cyxeꞌchele ojtxi tuꞌn tlaj cyaknajnab tzaj tej in cawintok rey Uzías tuj Judá. Tzul Kman aju Ndiose cyucꞌix cycyakil keju xjan ke.6 Tuj kꞌij lu mintiꞌ spicꞌun clarxix ex mya kloljxix. 7 Oꞌcxte Kman ojtzkilte aju kꞌij lu ex mintiꞌ juntl kꞌij icju. Mintiꞌ pabl tib kꞌij tiꞌj konicꞌan, porque oc toc konicꞌan cucx ttenx spicꞌun. 8 Cjawitz jlet jun twi aꞌ tuj Jerusalén ex cbetel tuj jbalil ex tuj coresma; mij aꞌ lu cyjaꞌ cxeꞌl tuj tumlal tjawitz kꞌij tuj Mar at nim Atzꞌan tuj, atzun mijtl cyjaꞌ cxeꞌl tuj tumlal telex kꞌij tuj Nintz Mar. 9 Atzun kꞌij lu, ccawil Kman tuj tcyakil twitz txꞌotxꞌ. Oꞌcx twitz che cꞌulul xjal, ex oꞌcx te tbi ctzajel cynaꞌn xjal oc cycubsan twitz. 10 Tcyakil txꞌotxꞌ cꞌoquel te jun chkꞌajlaj, cxelx keꞌ tuj tnam Geba ex cpol baj max tuj tnam Rimón aju tcub tuj txꞌotxꞌ te cubni tjakꞌxi Jerusalén. Aju tnam Jerusalén cjawil ten najchak ex che najal xjal tuj, cxelx keꞌ ttzi tpwertil tnam Benjamín tbi ex cpol baj max ttzi tnejel pwert (jatum ten ju Ojtxi Pwert nej), ex cxel keꞌ jatum tcub ju ja maꞌ twaꞌl te Hananeel ex cpol baj max jatum nneꞌl yatzꞌet taꞌl twitz uva te rey. 11 Ax toc che najal xjal tuj Jerusalén ex mlay cub xitun juntl maj. Ke xjal che najal tuj, segurxix che ankꞌil.
12 Atzun ke nasyon otok che kꞌojin tiꞌj tnam Jerusalén cbel cycastiw tuꞌn Kman: Itzꞌxke oc tel kꞌay cychibjal; cjawitz kꞌay tbakꞌ cywitz, ax icx cꞌeletz kꞌay cyakꞌ tuj cytziꞌ. 13 Tuj kꞌij lu ctzajel nimxix cyxobil tuꞌn Kman. Teylex te junjun ctzajel ttzyuꞌn tkꞌab tucꞌil ex che oquel tzokpaj cyiꞌj cyxolx. 14 Ax icxtzun ke aj Judá che kꞌojlel tuj Jerusalén, cꞌelel cyiꞌn nimxix cykꞌinumabl ke nasyon cyvesin cyib cyucꞌil, cꞌelel cyiꞌn sak pwak, kꞌan pwak ex xbalun. 15 Aju castiw ctzajel cyibaj ke xjal, axtzunju ctzajel cyibaj ke chej cabay, ke mul, ke chej camey, ke bur ex cyibaj cycyakil ke alumaj ateꞌ tuj cycampament aj kꞌoj.
16 Tbajlenxi jlu, cycyakil ke xjal che cyjel ankꞌin cyuj ke tnam e kꞌojin tiꞌj Jerusalén, cycyakil abkꞌi che xeꞌl cꞌulul twitz Rey, aju Kman Tajaw Tcyakil, ex cycyakil abkꞌi che xeꞌl icꞌsal ninkꞌij cyiꞌj ke tal ja t-xak tzeꞌyin cywiꞌ. 17 Ka at jun nasyon tuj tcyakil twitz txꞌotxꞌ mintiꞌ ma cheꞌx xjal tuj Jerusalén cꞌulul twitz Rey, aju Kman Tajaw Tcyakil, mlay tzajtl jbal tibaj cytxꞌotxꞌ xjal lu. 18 Ka mintiꞌ ma cheꞌx ke aj Ejipt, miꞌn tzajtl jbal tibaj cytxꞌotxꞌ, ax castiw ctzajel cyiꞌj ic tzaꞌn cyiꞌj mastl nasyon ka mintiꞌ ma cheꞌx icꞌsal ninkꞌij cyiꞌj ke tal ja t-xak tzeꞌyin cywiꞌ. 19 Atzun castiw ctzajel cyiꞌj aj Ejipt ex cyiꞌj cycyakil nasyon miꞌn cheꞌx icꞌsal ninkꞌij cyiꞌj ke tal ja t-xak tzeꞌyin cywiꞌ.
20 Tuj kꞌij lu cꞌoquel tzꞌibet tiꞌj cycampan chej jun yol cyjaꞌ: XJANSAMAJ TE JLU TE KMAN, ex ke cꞌil in che ajben tuj tja Kman che oquel xjan, ic tzaꞌn ke lak nmak ateꞌ twitz altar. 21 Cycyakil ke cꞌil ateꞌ tuj Jerusalén ex tuj Judá che xjansetel tuꞌn cyajben te Kman aju Tajaw Tcyakil. Ke xjal che xeꞌl kꞌolte chojbil che ajbel ke cꞌil lu cyuꞌn, ex cyuj cjawix cytzkꞌajsaꞌn cychibjal ke alumaj, akeju otok cheꞌx kꞌoꞌn te chojbil. Tuj kꞌij lu miꞌn che pontl ke comersyant cꞌayil tuj tja Kman aju Tajaw Tcyakil.