Aju tkꞌijlalil oc tul Kman
4
Chi Kman aju Tajaw Tcyakil: Nlakꞌex ttzaj tkꞌijlalil castiw in cꞌant ic tzaꞌn kꞌakꞌ tuj jorni ex atzun che oquex kꞌot cycyakil keju in jaw cyniman cyib ex ke binchal mya baꞌn, ex che bajel tzꞌeꞌy tuꞌn ic tzaꞌn ttxa triw, ex mi chꞌin cytxꞌakan cyjel ten. 2 Atzun cyeye akeye in che niman weye tzul jun colol cyeye tzꞌaklxix, ic tten ic tzaꞌn tkan kꞌij in che banix xjal tuꞌn. Che jawil tꞌicpaje tuꞌn tzalajbil ic tzaꞌn ke tal wacẍ in che etz tuj cypeꞌn. 3 Ke xjal binchal mya baꞌn che bajel cywabane tjakꞌ cykane ic tzaꞌn tkukil txꞌotxꞌ tuj kꞌij oc tbant tcyakil jlu wuꞌne, chi Kman aju Tajaw Tcyakil.4 Cynaꞌntze aju ley xi nkꞌoꞌne te nmajene Moisés twi witz Horeb. Xi nkꞌoꞌne ke ley ex ke mandamayent cye cycyakil aj Israel.
5 Cybintze: Cxel nsamaꞌne nsanjele Elías cyucꞌile naꞌnxtok tul canun tkꞌijlalil tuꞌn tcub nkꞌoꞌne cycastiw xjal, aju kꞌij lu maꞌxix t-xilen ex xobajilxix. 6 Ex tuꞌn Elías cbantel cyten mambaj cyucꞌil cycꞌwaꞌl ex ke cꞌwaꞌlbaj cbantel cyten cyucꞌil cyman. Katzun mintiꞌ ma txi cyniman, ctzajel nsamaꞌne mya baꞌn cyibaj ex cbajel nxitune cytanmi, chi Kman.