Tej cypon aj nabl cꞌulul twitz Jesús
2
Tej titzꞌj Jesús tuj tnam Belén tuj txꞌotxꞌ Judey,
tuj tkꞌijlalil tej tten rey Herodes,
at junjun xjal aj nabl e tzaj tuj tjawitz kꞌij e ul tuj Jerusalén.
2 Xi cykanin:
—¿Jatum taꞌ ju rey cye xjal judiy,
aju ma tzꞌitzꞌj?
Porque ma kile tcheꞌw tuj tjawitz kꞌij,
ex ma ko tzaje cꞌulul twitz,
che chi.
Visita de los magos (Mateo 2.1-23)
3 Tej tbinte rey Herodes jlu,
biꞌx naj tnabl cyucꞌix cycyakil xjal aj Jerusalén.
4 Octzun tchmoꞌn Herodes cycyakil nejenel cye pal cyucꞌix ke xnakꞌtzal tiꞌj ley cye tnam xjal,
xi tkanin cye jatum tuꞌn titzꞌj ju Crist aju at toclen tuꞌn Dios.
5 Xitzun cymaꞌn te:
—Tuj tnam Belén tuꞌn titzꞌj,
tuj txꞌotxꞌ Judey;
porque ictzun tten tzꞌiban tuꞌn t-sanjel Dios.
Chi t-sanjel Dios:
6 Aya tnam Belén tuj txꞌotxꞌ Judá,
mya mas chꞌin toclena cyxol mastl tnam tuj Judá;
porque atzun ctzajel jun nejenel tuja,
te cwentil cye xjal aj Israel,
akeju etzan wuꞌne.
7 E tzajtzun ttxcoꞌn Herodes ke xjal aj nabl tuj ewaj,
cheba xi t-xjelin cye jteꞌxi kꞌij ttzajlen tyecꞌun tib cheꞌw.
8 Xitzun t-samaꞌn Herodes ke xjal aj nabl tuj tnam Belén,
ex xi tmaꞌn cye:
—Cyxiꞌye tuj Belén,
cheba cybime tiꞌj tal neꞌ;
octzun tcnet cyuꞌne,
cytzaje kꞌmalte weye tuꞌntzun icx weye tuꞌn nxiꞌye cꞌulul twitz,
chi Herodes.
9 Tejtzun cybinte ke xjal aj nabl tyol rey e jeꞌxtzun.
Ex lu ju cheꞌw nejni cywitz,
aju otok cyil tuj tjawitz kꞌij.
Tejtzun tcanun cheꞌw jatum taꞌ tal neꞌ,
axtzun cub ten.
10 Tejtzun cylonte ke xjal aj nabl ju cheꞌw,
nimxix e jaw tzalaj.
11 E ocxtzun tuja ex o cyil ju tal neꞌ tucꞌix Mariy aju ttxuꞌ;
e cub ẍmejeꞌ ex e cꞌulun twitz neꞌ.
Jatztzun cyiꞌn cykꞌinumabl,
xi cykꞌoꞌn oyaj te,
ex atzun jlu:
Kꞌan pwak,
tucꞌix storac,
tucꞌix tkꞌolil tzeꞌ mirra tbi.
12 Pero tzaj kꞌmaꞌn cye xjal aj nabl tuꞌn Dios tuj witzicꞌ tuꞌn miꞌn cyaj meltzꞌaj tucꞌil Herodes;
e ajtzun tuj cytanmi cnet juntl cybe.
Tej cyel ok José, e pon tuj txꞌotxꞌ Ejipt
13 Cyajlenxitzun ke xjal aj nabl,
cub tyecꞌun tib jun t-anjel Kman twitz José tuj witzicꞌ.
Chi anjel:
—Weꞌctza ex kꞌinxa tal neꞌ tucꞌix ttxuꞌ,
ex t-xi oka tuj txꞌotxꞌ Ejipt,
axtzun tcyaj tena,
maxitzun cꞌajetza oc t-xi nmaꞌne teya;
porque ctzajel Herodes jyolte neꞌ tuꞌn tcub tbyoꞌn.
14 Tej tel twatl José,
xi tiꞌn tal neꞌ tucꞌix ttxuꞌ te konicꞌan ex xiꞌ tuj Ejipt.
15 Axtzun cyaj ten tuj Ejipt;
maxitzun ajtz tej tcyim Herodes,
tuꞌntzun tjapun ju yol kꞌmaꞌmaj tuꞌn Kman tzaj tmaꞌn tuꞌn t-sanjel:
Tuj Ejipt etz ntxcoꞌne Ncꞌwaꞌle,
chi t-sanjel Dios.
Xi tkꞌoꞌn Herodes orden tuꞌn cycub byoꞌn ke neꞌ
16 Tejtzun tel tnicꞌ Herodes tiꞌj otok cub sbuꞌn cyuꞌn xjal aj nabl,
tzaj nimxix tkꞌoj;
ex etz jun orden tuꞌn,
tuꞌn cybyet cycyakil tal kꞌa naꞌnx tjapun cabe abkꞌi cyuꞌn ateꞌ tuj Belén ex cyuj aldey tiꞌjele Belén;
el tnicꞌ tiꞌj tkꞌijlalil tuꞌnju yol tzaj kꞌmaꞌn te cyuꞌn aj nabl.
17 Japuntzun aju yol tzꞌiban tuꞌn Jeremías aju t-sanjel Dios.
Chi Jeremías:
18 O binjtz tkꞌajkꞌajel cywi xjal tuj Ramá in che wuyin,
in che okꞌ ex in che ayin;
in okꞌ Raquel cyiꞌj ke tal,
ex mintiꞌ o tajbe tuꞌn tkꞌukbanjtz tcꞌuꞌj,
porque otok che naj ke tal,
chi Jeremías.
19 Pero tcyimlenxitzun Herodes,
cub tyecꞌun tib jun t-anjel Kman twitz José tuj witzicꞌ tuj txꞌotxꞌ Ejipt ex tma anjel:
20 —Weꞌctza,
kꞌinxa tal neꞌ tucꞌix ttxuꞌ,
ex txiꞌya tuj cytxꞌotxꞌ aj Israel,
porque o che cyim keju oc tilil cyuꞌn tuꞌn tcub cybyoꞌn tal neꞌ.
21 Jawtzun weꞌ José,
xi tiꞌn tal neꞌ tucꞌix ttxuꞌ,
ex ul tuj cytxꞌotxꞌ aj Israel.
22 Pero tej tbinte José ate Arquelao in cawin tuj txꞌotxꞌ Judey te t-xel Herodes aju ktzan tman,
tzaj t-xobil José tuꞌn t-xiꞌ tuj Judey;
pero tzaj tmaꞌn Dios te tuj witzicꞌ tuꞌn t-xiꞌ tuj txꞌotxꞌ Galiley.
23 Ultzun ex najan tuj tnam Nazaret,
tuꞌntzun tjapun aju yol kꞌmaꞌmaj cyuꞌn t-sanjel Dios ka ate Jesús attok toquel kꞌoꞌn tbi aj Nazaret.