Aju tpacbabl Juan, aju in che byan xjal tuꞌn tuj aꞌ
3
Tuj tkꞌijlalil lu ul Juan aju in che byan xjal tuꞌn tuj aꞌ,
o pacban tuj Judey tuj lugar tzkij txꞌotxꞌ,
2 in tmaꞌn cye xjal:
—Tajtz tiꞌj cyanmiye,
porque ma tzul lakꞌeꞌ ju cawbil in tzaj tuj cyaꞌj,
chi Juan.
3 Ate Juan o yolin Isaías tiꞌj,
aju t-sanjel Dios.
Tma Isaías:
In jaw tkꞌajkꞌajel twiꞌ jun xjal tuj lugar tzkij txꞌotxꞌ,
in tmaꞌn:
Cybinchame tbe Kman,
cybinchame jun tbe jikun tiꞌj.
4 Aju t-xbalun Juan toc,
ttzmal chej camey,
ex tzꞌuꞌm cꞌalbil tcꞌuꞌj,
ex ẍplon twa tucꞌix taꞌl cab tuj tzeꞌ.
5 Ex e pon xjal tucꞌil Juan,
in che tzaj tuj Jerusalén ex tuj tcyakil Judey ex tuj tcyakil lugar ttziꞌyile nima Jordán;
6 ex tej tjatz cypaꞌn cyil,
e byan tuꞌn Juan tuj nima Jordán.
7 Pero tej tlonte Juan nimcu ke parisey cyucꞌix ke sadusey e pon tucꞌil tuꞌn cybyan tuj aꞌ,
xi tmaꞌn cye:
—Akeye tiyjil kꞌantiꞌ.
¿Alcye ma kꞌmante cyeye tuꞌn cyel oke twitz ju castiw maꞌxix tzul tuꞌn Dios?
8 Cybinchame baꞌn,
tuꞌntzun tyecꞌunjtz ka otok tzꞌajtz tiꞌj cyanmiye.
9 Ex miꞌn cub cyximane tuj cyanmiye tuꞌn cymanteye:
Tiyjil Abraham koꞌye;
porque cxel nmaꞌne cyeye,
jacu bant tuꞌn Dios tuꞌn cyoc ke abj lu te tiyjil Abraham.
10 Aju siꞌwbil cꞌuxbil ya ma pon t-xe tlocꞌ tzeꞌ;
cyjaꞌtzun tcyakil tzeꞌ mintiꞌ in tkꞌoꞌn twitz baꞌn,
cjawil txꞌemit,
ex cꞌoquex kꞌot tuj kꞌakꞌ.
11 Ax toc in che byane tuj aꞌ wuꞌne tuꞌnju ma tzꞌajtz tiꞌj cyanmiye;
pero aju lepchix ttzaj wiꞌje,
oc che byale tuꞌn tuꞌn Xewbaj Xjan ex tuꞌn kꞌakꞌ;
porque mas at tipumal nwitze,
ex mintiꞌ woclene tiꞌj tuꞌn t-xi wiꞌne t-xajab.
12 Tzyuꞌn xupbil triw tuꞌn,
ex cꞌelel t-xupin ttzꞌisil triw tuj tpeꞌn;
cꞌoquex tcꞌuꞌn triw tuj ttxꞌutxꞌ,
atzun ttzꞌisil triw cbel tpatun tuꞌn kꞌakꞌ mlay yupj.
Tej tbyan Jesús
13 Etztzun Jesús tuj Galiley,
ul tucꞌil Juan ttzi nima Jordán tuꞌn tbyan tuꞌn Juan.
14 Mintiꞌ cub tuj twitz Juan tuꞌn tbyan Jesús tuꞌn,
ex xi tmaꞌn te:
—Akine il tiꞌj tuꞌn nbyane tuꞌna;
¿tikuꞌn ma tzula wucꞌile tuꞌn tbyana wuꞌne?
15 Pero xi ttzakꞌweꞌn Jesús:
—E tbant jaꞌlo,
tuꞌntzun tjapun kuꞌn tcyakilju in tmaꞌn Dios.
—Baꞌn,
chi Juan.
16 Tej tbyan Jesús,
jatz tuj aꞌ ex jaket ttzi cyaꞌj,
ex o til Jesús T-xew Dios cuꞌtz tuj cyaꞌj ic queꞌyin ic tzaꞌn jun paloma,
cubil tibaj Jesús.
17 Ex tzaj kꞌajt Dios tuj cyaꞌj in tmaꞌn:
—Atzun Ncꞌwaꞌle jlu cꞌujlaꞌnxix wuꞌne,
in chin tzalaje tiꞌj.