Tej toc Jesús tuj joybil tiꞌj
4
Xitzun kꞌiꞌn Jesús tuꞌn Xewbaj Xjan tuj lugar mintiꞌ cynajbil xjal tuj,
tuꞌn toc tuj joybil tiꞌj tuꞌn tajaw il.
2 Ex tbajlenxitzun 40 kꞌij tucꞌix 40 konicꞌan tcublen tyoꞌn Jesús weꞌyaj,
tzajtzun el tcꞌuꞌj.
3 Pontzun tajaw il tucꞌil tuꞌn toc Jesús tuj joybil tiꞌj tuꞌn,
ex xi tmaꞌn te:
—Ka Tcꞌwaꞌl Diosa,
kꞌmanxa tuꞌn cyoc abj lu te wabj.
4 Xitzun ttzakꞌweꞌn Jesús:
—At jun yol in tmaꞌn tuj Tuꞌjil:
Mya nok oꞌcx tuꞌn wabj cꞌankꞌil xjal,
ax icx jacu tzꞌankꞌin xjal tuꞌn tcyakil yol in tmaꞌn Dios.
5 Xitzun kꞌiꞌn Jesús tuꞌn tajaw il tuj Jerusalén aju tnam xjan,
jax tkꞌoꞌn max twiꞌ tja Dios.
6 Ex xi tmaꞌn tajaw il te Jesús:
—Ka Tcꞌwaꞌl Diosa,
xon cuꞌx tiba twitz txꞌotxꞌ;
porque at jun yol in tmaꞌn tuj Tuꞌjil:
Cxel tmaꞌn Dios cye t-anjel tuꞌn toc cwentina cyuꞌn.
Ctzyetela cyuꞌn tuꞌn cykꞌab tuꞌn miꞌn toc tocpaj tkana tiꞌj abj,
chi tuj Tuꞌjil.
7 Xi ttzakꞌweꞌn Jesús te:
—Ax icx at jun yol in tmaꞌn tuj Tuꞌjil:
Miꞌn tzꞌoc cykꞌoꞌne Kman Dios tuj malbil.
8 Xi kꞌiꞌn Jesús juntl maj tuꞌn tajaw il,
pon kꞌiꞌn twiꞌ jun witz maꞌ twaꞌl,
ex xi tyecꞌun tajaw il te Jesús cycyakil tnam ateꞌ twitz txꞌotxꞌ,
tucꞌix cyoclen maꞌxix.
9 Ex xi tmaꞌn tajaw il te Jesús:
—Tcyakil jlu cxel nkꞌoꞌne teya ka ma cub ẍmejeꞌya cꞌulul nwitze.
10 Xitzun tmaꞌn Jesús te:
—Txiꞌya Satanás,
porque at jun yol in tmaꞌn tuj Tuꞌjil:
Twitz Kman tuꞌn cycꞌulune,
aju Cydiose,
ex oꞌcx te tuꞌn cyajbene.
11 Cyajtzun kꞌoꞌn Jesús tuꞌn tajaw il;
ex e ul ke anjel tucꞌil Jesús tuꞌn cyajben te.
Tej ttzyet takꞌun Jesús tuj Galiley
12 Tejtzun tbinte Jesús ka otok tzꞌocx Juan tuj pres,
xiꞌ tuj txꞌotxꞌ Galiley.
13 Cyaj tcolin Jesús aju tnam Nazaret,
ex xiꞌ tuꞌn tnajan tuj tnam Capernaum,
atzun tcub tnam lu ttzi laguna tuj cytxꞌotxꞌ aj Zabulón ex aj Neftalí.
14 Xiꞌ tuꞌntzun tjapun aju yol cyaj tmaꞌn Isaías aju t-sanjel Dios chi cyjaꞌ:
15 Aju txꞌotxꞌ Zabulón tucꞌix ju txꞌotxꞌ Neftalí,
jatum in xiꞌ be ttzi mar,
jlajxi nima Jordán,
aju txꞌotxꞌ Galiley jatum najl ke xjal mya judiy ke;
16 ke xjal ateꞌ tuj klolj o cyil jun spicꞌun maꞌxix;
ex ke xjal najlke tuj jun txꞌotxꞌ jatum taꞌ klolj ex camic,
cub koptzꞌaj jun spicꞌun cyibaj,
chi Isaías.
17 Biꞌxtzun xeꞌt takꞌun Jesús tuꞌn tpacban,
ex in tmaꞌn:
—Tajtz tiꞌj cyanmiye porque aju cawbil in tzaj tuj cyaꞌj ma tzul lakꞌeꞌ.
Tzaj ttxcoꞌn Jesús cyaje xjal tzyul cyiẍ ke
18 In bettok Jesús ttzi laguna tuj Galiley,
o til cabe xjal cyitzꞌin cyib:
Ate Simón aju Pedro tbi,
tucꞌix titzꞌin Simón aju Andrés tbi in cuꞌx cykꞌoꞌn xyub tuj aꞌ te tzuybil cyiẍ,
porque tzyul cyiẍ ke.
19 Xi tmaꞌn Jesús cye:
—Che lpetze wiꞌje,
ex che oquel nkꞌoꞌne tzyul xjal ic tzaꞌn in che tzyet cyiẍ.
20 Jurattzun naj cyaj cykꞌoꞌn cyxuyb ex e oc lpeꞌ tiꞌj Jesús.
21 Tej t-xi lakꞌeꞌ chꞌintl Jesús,
o til cabetl xjal cyitzꞌin cyib:
Ate Jacobo aju tcyꞌajal Zebedey,
tucꞌix Juan aju titzꞌin Jacobo ateꞌ tuj barc tucꞌix Zebedey aju cyman,
in che xbukin cyxuyb.
E tzajtzun ttxcoꞌn Jesús.
22 Jurattzun naj cyaj cykꞌoꞌn cybarc tucꞌix cyman ex e oc lpeꞌ tiꞌj Jesús.
Xi tkꞌoꞌn Jesús xnakꞌtzbil cye nimcu xjal
23 Bajtzun tbetin Jesús tuj tcyakil Galiley in tkꞌoꞌn xnakꞌtzbil cyuj ja te cꞌulbil cye judiy,
in pacban tiꞌj tkanil baꞌn tiꞌj tcawbil Dios,
ex in che banix ke yab tuꞌn nok alcyex cyyabil,
cyucꞌix ke xjal at cꞌixcꞌoj cyiꞌj.
24 Ex el tkanil Jesús tuj tcyakil txꞌotxꞌ Siria;
ex e ul kꞌiꞌn twitz Jesús cycyakil xjal at cꞌixcꞌoj cyiꞌj,
cyucꞌix keju in che yajlanjtz tuꞌn junxilchak yabil ex at in chyon cyiꞌj,
ex keju in che yajlanjtz cyuꞌn juꞌẍ,
ex keju toc tyab cywiꞌ,
ex keju tzkijleꞌn cyyabil;
cycyakil e banix tuꞌn Jesús.
25 Ex nim xjal e oc lpeꞌ tiꞌj Jesús,
e tzaj tuj Galiley ex cyuj ke tnam tuj txꞌotxꞌ Decápolis,
ex tuj Jerusalén,
ex tuj Judey,
ex at e tzaj jlajxi nima Jordán.