El cyiꞌn t-xnakꞌtzben Jesús triw twi tkan tuj kꞌij te ojlabl
6
In bettok Jesús cyxol awal tuj jun kꞌij te ojlabl,
cyucꞌix ke t-xnakꞌtzben;
in che bettok ex e oc ten kꞌilte triw twi tkan,
ex cub cyxkꞌuchin tuj cykꞌab,
ex xi cywaꞌn.
Lucas 6.1-16
—¿Tikuꞌn in cybinchaꞌne jlu,
aju mya kꞌoꞌn tuꞌn ley tuꞌn tbinchanjtz tuj kꞌij te ojlabl?
3 Xi ttzakꞌweꞌn Jesús:
—¿Bajxpe jaw cyschꞌiꞌne tuj Tuꞌjil ti o tbincha David tej ttzaj el tcꞌuꞌj cyucꞌix ke tucꞌil?
4 Ocx tuj tja Dios,
e jaw ttzyuꞌn ke pan cyꞌiwlaꞌmaj ex xi twaꞌn,
ex xi tkꞌoꞌn cye tucꞌil,
masque mintiꞌ cyoclen tiꞌj tuꞌn t-xi cywaꞌn ke pan lu,
porque oꞌcx ke pal cye judiy at cyoclen tiꞌj.
5 Ex xi tmaꞌntl cye:
—Akine tajaw kꞌij te ojlabl,
akine scꞌoꞌmaj kine tuꞌn Dios tuꞌn ntene cyucꞌil xjal.
Banix jun xjal tzkijtok tkꞌab
6 Tuj juntl kꞌij te ojlabl ocx Jesús tuj ja te cꞌulbil in tkꞌoꞌn xnakꞌtzbil cye xjal.
Axtok taꞌ jun xinak tzkijtok tbankꞌab.
7 Atzun cye xnakꞌtzal tiꞌj ley ex ke parisey in che queꞌyintok tiꞌj ka tuꞌn tbant tkꞌab xjal tuꞌn Jesús tuj kꞌij te ojlabl,
in che jyon tumel tuꞌn tcub tzꞌak tuj cyley.
8 Atzunte Jesús el tnicꞌ tiꞌj cyximbetz,
ex xi tmaꞌn te xinak tzkij tkꞌab:
—Weꞌctza ex weꞌcuya cyxol xjal.
—At jun yol cxel nxjeline cyeye:
¿Kꞌoꞌnpelo tuꞌn ley tuꞌn tbinchet baꞌn tuj kꞌij te ojlabl,
ex ka tuꞌn tbinchet mya baꞌn?
¿Kꞌoꞌnpelo tuꞌn ley tuꞌn tclet jun xjal ex ka tuꞌn tnaj?
10 Xitzun tqueꞌyin Jesús cywitz cycyakil tiꞌjele,
ex xi tmaꞌn te xinak:
—Nukpiꞌmil tkꞌaba.
Atzunte xinak el tnukpiꞌn,
ex banttzun tkꞌab.
11 Atzun cye parisey tzaj nim cykꞌoj,
in che yolintok cyxolx alcye tuꞌn cybinchante tiꞌj Jesús.
E jaw t-scꞌoꞌn Jesús ke cablaj t-xnakꞌtzben
12 Ax tkꞌijlalil lu xi aj Jesús twi witz naꞌl Dios,
ex jun konicꞌan tuꞌn in naꞌn Dios.
13 Tejtzun tjawil kꞌij e tzaj ttxcoꞌn ke t-xnakꞌtzben,
ex e jaw t-scꞌoꞌn cablaj cyxol ex oc tkꞌoꞌn cybi apostl.
14 Atzun ke jlu:
Simón aju oc kꞌoꞌn tbi Pedro,
tucꞌix Andrés aju titzꞌin Pedro,
tucꞌix Jacobo,
tucꞌix Juan,
tucꞌix Pelip,
tucꞌix Bartolomé,
15 tucꞌix Matey,
tucꞌix Tomás,
tucꞌix Jacobo aju tcyꞌajal Alfeo,
tucꞌix Simón aju toctok te tajlal cyxol jun partid xjal Cananist cybi,
16 tucꞌix Judas aju titzꞌin Jacobo,
tucꞌix Judas Iscariote aju xi kꞌonte Jesús tuj cykꞌab xjal.
Xi tkꞌoꞌn Jesús xnakꞌtzbil cye nimcu xjal
17 Cuꞌtz Jesús twi witz cyucꞌix apostl ex cub ten tuj jun tal chkꞌajlaj cyucꞌil t-xnakꞌtzben ex cyucꞌil nim xjal tzajni ke tuj txꞌotxꞌ Judey ex tuj tnam Jerusalén ex tuj mlaj te tnam Tiro ex te tnam Sidón,
otok che tzaj bilte tyol Jesús,
ex tuꞌn cybanix ke yab.
Lucas 6.17-36
18 Akeju in che yajlanjtz cyuꞌn juꞌẍ ax icx e bant.
19 Ex cycyakil xjal oc tilil cyuꞌn tuꞌn toc cymacoꞌn Jesús,
porque tuꞌn tipumal Jesús in che banix cycyakil yab.
Ke xjal at tzalajbil cye ex keju becꞌbil cywitz
20 Xitzun tqueꞌyin Jesús cywitz ke t-xnakꞌtzben ex xi tmaꞌn cye:
—At tzalajbil cyeye akeye meba,
porque cyeye aju tcawbil Dios.
21 At tzalajbil cyeye,
akeye nneꞌl cycꞌuꞌje jaꞌlo,
porque oc che nojele.
At tzalajbil cyeye,
akeye in che okꞌe jaꞌlo,
porque oc che jawil tzeꞌne.
22 At tzalajbil cyeye oc cyel icꞌune cyuꞌn xjal tuꞌn nlaje,
akine scꞌoꞌmaj kine tuꞌn Dios tuꞌn ntene cyucꞌil xjal,
ex oc cyex lajoꞌne cyxol,
ex oc cyyasun cyiꞌje,
ex oc cyyolin cyiꞌje ka mya baꞌn keye.
23 Che tzalajxe tuj ju kꞌij oc tbinchanjtz jlu cyiꞌje,
ex che tenxe alegr,
porque maꞌ t-xilen jun oyaj tzul kꞌoꞌn cyeye tuj cyaꞌj;
porque icx cybincha ke cyxeꞌchel ojtxi cyiꞌj t-sanjel Dios.
24 Pero,
becꞌbil cywitze akeye kꞌinun,
porque oꞌcx jaꞌlo ma kꞌukbanjtz cycꞌuꞌje.
25 Becꞌbil cywitze akeye ma noj cycꞌuꞌje jaꞌlo,
porque ctzajel el cycꞌuꞌje.
Becꞌbil cywitze akeye in che tzeꞌne jaꞌlo,
porque oc che wuꞌyile ex oc che okꞌele tuꞌn bis.
26 Becꞌbil cywitze oc cyyolin cycyakil xjal baꞌn cyiꞌje,
porque icx o cybincha ke cyxeꞌchel ojtxi cyiꞌj ke pacbal nicꞌal yol.
Aju tuꞌn kcꞌujlante ke aj kꞌoj kiꞌj
27 Atzun cyeye,
akeye in che bin tiꞌj nyole,
cxel nmaꞌne cyeye:
Cycꞌujlame ke aj kꞌoj cyiꞌje,
cybinchame baꞌn cye keju in che el icꞌun te cyeye;
28 cykaninxe cyꞌiwbil cyibaj keju in tzaj cykanin mya baꞌn cyibaje ex che naꞌne Dios cyiꞌj keju in che yasun cyiꞌje.
29 Ex ka at jun xjal ma tzꞌoc jun tkꞌoꞌtxa tuꞌn,
kꞌonxa juntl tkꞌoꞌtxa ka taj xjal tuꞌn toc juntl;
ex ka at jun xjal ma tzꞌel kꞌinte tchicyeta,
ax icx kꞌonxa tcamiẍa te,
miꞌn cub t-xcꞌayina.
30 Ka at jun xjal ma tzaj tkanin jun tiꞌxti teya,
kꞌonxa te;
ex ka at jun xjal ma tzꞌel kꞌinte jun tiꞌxti teya,
miꞌn txi tkanintla.
31 Ic tzaꞌn cyaje tuꞌn cybinchante xjal cyeye,
icxtzun cyeye cybinchame cye.
32 Ka ma cycꞌujlaye oꞌcx keju in che cꞌujlan cyeye,
¿alcye jun baꞌn in cybinchaꞌne icju?
Porque icx ke xjal mya baꞌn in cycꞌujlaꞌn keju in che cꞌujlan cye.
33 Ex ka oꞌcx ma cybinchaye baꞌn cye keju in che binchan baꞌn cyeye,
¿alcye jun baꞌn in cybinchaꞌne icju?
Porque icx ke xjal mya baꞌn in cybinchaꞌn icju.
34 Ex ka ma txi cykꞌoꞌne cychꞌex xjal oꞌcx cye keju at tumel tuꞌn tchjet cyuꞌn,
¿alcye jun baꞌn in cybinchaꞌne icju?
Porque icx ke xjal mya baꞌn in xi cykꞌoꞌn cychꞌex xjal mya baꞌn tuꞌnju baꞌn cyuꞌn ka oc cycmaꞌ t-xel.
35 Cycꞌujlamtzune ke aj kꞌoj cyiꞌje ex cybinchame baꞌn,
ex cykꞌonxe cychꞌex xjal,
ex miꞌn che ayone tuꞌn tajtz kꞌoꞌn t-xel;
cyjaꞌtzun maꞌ t-xilen jun oyaj tzul kꞌoꞌn cyeye,
ex che oquele tcꞌwaꞌl Dios,
aju Dios Maꞌxix Toclen;
porque ate Dios in tzaj kꞌonte ju baꞌn cye keju mintiꞌ in xi cykꞌoꞌn chjonte te ex cye keju mya baꞌn ke.
36 Tzaj kꞌakꞌan cycꞌuꞌje cyiꞌj xjal ic tzaꞌn te Cymane in kꞌakꞌan tcꞌuꞌj cyiꞌj.
Miꞌn che yoline mya baꞌn cyiꞌj cyucꞌile
37 Miꞌn che yoline cyiꞌj cyucꞌile ka mya baꞌn ke,
tuꞌntzun miꞌn cyoque tuj xjel tuꞌn Dios.
Miꞌn cub cykꞌoꞌne cysentens mastl,
tuꞌntzun miꞌn tcub kꞌoꞌn cysentense tuꞌn Dios.
Cynajsame aju mya baꞌn in cybinchaꞌn xjal cyiꞌje,
ex cnajseteltzun cyile tuꞌn Dios.
Lucas 6.37-49
38 Cykꞌonxe chꞌin cye mastl ex ctzajel tkꞌoꞌn Dios chꞌintl cyeye;
jun malbil tzꞌaklxix ctzajel tkꞌoꞌn Dios cyeye,
nojnixix wen ex nneꞌl tilj.
Porque ax ju malbil cꞌajbel tuꞌn Dios cyeye jatum in xi cymaloꞌne te juntl.
39 Ax icx xi tmaꞌn Jesús jun techal cye:
—¿Jacupe bant tuꞌn jun moẍ tuꞌn t-xi tyecꞌun tbe juntl moẍ?
¿Mlaypelo cheꞌx tzꞌak tuj jul cycabil?
40 Aju xnakꞌtzben mya mas toclen twitz ju xnakꞌtzal te;
maxitzun cꞌoquel ic tzaꞌn te xnakꞌtzal te ocxi tjapun baj xnakꞌtzbil tuꞌn.
41 ¿Tikuꞌn nnoꞌc cyqueꞌyine aju tal tzꞌis tocx tuj twitz cyermaniye,
ex mintiꞌ nnoꞌc cykꞌoꞌne cwent tiꞌj ju viga tocx tuj cywitze?
42 ¿Tzaꞌntzun tten tuꞌn t-xi cymaꞌne te cyermaniye:
Cꞌeletz kiꞌne ju tal tzꞌis tocx tuj twitza erman,
ex lu ju viga tocx tuj cywitze?
Xmletzꞌ keye.
Nej cyiꞌmetze aju viga tocx tuj cywitze,
entons kꞌanchaꞌlxix oc cyilaꞌye tuꞌn tetz cyiꞌne ju tal tzꞌis tocx tuj twitz cyermaniye.
Nneꞌl knicꞌ tiꞌj tzeꞌ nok tuꞌn twitz
43 Porque jun tzeꞌ baꞌn mintiꞌ in tkꞌoꞌn twitz mya baꞌn;
ex jun tzeꞌ mya baꞌn mintiꞌ in tkꞌoꞌn twitz baꞌn.
44 Porque teyle junjun tzeꞌ nneꞌl knicꞌ tiꞌj tuꞌn twitz;
mlay tzꞌel ktuxin kloꞌ higo tiꞌj chꞌiꞌx,
ex mlay tzꞌel ktuxin kloꞌ uva tiꞌj chꞌiꞌx cꞌul.
45 Aju xjal baꞌn,
in tbinchaꞌn ju baꞌn porque atzun taꞌ ju baꞌn tuj tanmi;
atzunte xjal mya baꞌn in tbinchaꞌn mya baꞌn porque atzun taꞌ ju mya baꞌn tuj tanmi;
porque ic tzaꞌnx tten tcyakilju at tuj cyanmi xjal,
axtzunju in che yolin tiꞌj.
In yolin Jesús cyiꞌj cabe simyent
46 ¿Tikuꞌn nnoꞌc cymaꞌne weye:
Tat,
Tat,
che chiye,
ex mintiꞌ in cybinchaꞌne aju in xi nmaꞌne cyeye?
47 Tcyakilju nnuꞌl wucꞌile ex in xi tbiꞌn nyole ex in tbinchaꞌn aju in xi nmaꞌne,
cxel nmaꞌne cyeye tzaꞌn tten.
48 Ic tten ic tzaꞌn jun xinak jaw tbinchaꞌn tja,
nej cuꞌx tlacuꞌn maꞌ t-xeꞌ tcubil tja ex cub tkꞌoꞌn ju simyent tibaj pcꞌat.
Tejtzun ttzaj jun nintz aꞌ,
pon tilj nimxix tiꞌj ja,
pero mintiꞌ o yucch,
porque tcub t-simyentil tibaj pcꞌat.
49 Pero alcye ma binte nyole ex mintiꞌ in tbinchaꞌn aju in xi nmaꞌne,
ic tten ic tzaꞌn jun xinak jaw tbinchaꞌn tja tibaj txꞌotxꞌ mintiꞌ t-simyentil cub tkꞌoꞌn;
ex pon tilj nimxix aꞌ tiꞌj,
ex cub tilj naj;
ex biꞌx cub xitj ju ja tcyakil.