Jun xjal tzkijleꞌn tyabil banix tuꞌn Jesús
2
Cꞌitzketok tetzlen Jesús tuj tnam Capernaum,
pon juntl maj tuj tnam lu;
ex o cybi xjal otok pon Jesús tja.
2 Jurat naj baj cychmon cyib nimcu xjal,
mintiꞌ bant cyten xjal tuja,
mi ttzi ja mintiꞌ bant cyten,
ex xi tmaꞌn Jesús tyol Dios cye xjal.
3 E pontzun junjun xjal kꞌiꞌn jun yab cyuꞌn,
tzkijleꞌn tyabil,
ikan cyuꞌn cyaje xjal.
4 Tuꞌnju mintiꞌ tumel tuꞌn cypon twitz Jesús tuꞌn tlaj nim xjal,
cuꞌx cyjakoꞌn twi ja jatum taꞌ Jesús;
tejtzun tjaket cyuꞌn,
cuꞌx cykꞌoꞌn yab coẍl twitz tcoẍbil,
aju tzkijleꞌn tyabil.
5 Tejtzun tlonte Jesús ka at cyocslabl xjal lu,
xi tmaꞌn teju yab:
—Ncꞌwaꞌl,
ke tila ma che najset,
chi Jesús te.
6 Axtzun kꞌukl keꞌtok junjun xnakꞌtzal tiꞌj ley,
in che ximan tiꞌj tuj cyanmi:
7 ¿Tikuꞌn in yolin xjal lu icju?
Che chi.
In yolin mya baꞌn tiꞌj Dios.
¿Alcye baꞌn tcub najsante cyil xjal?
¿Myapelo oꞌcx Dios?
Che chi.
8 Jurattzun el tnicꞌ Jesús tiꞌj ju in che ximan tiꞌj tuj cyanmi ex xi tmaꞌn cye:
—¿Tikuꞌn in cub cyximane jlu tuj cyanmiye?
9 ¿Alcye mas jurat jacu bant?
¿Apeju tuꞌn t-xi nmaꞌne teju yab tzkijleꞌn tyabil:
Ke tila ma che najset,
ex ka aju tuꞌn t-xi nmaꞌne te:
Weꞌctza,
kꞌiꞌnctz tcoẍbila ex beta?
10 Cxeltzun nyecꞌune cyeye tuꞌntzun tel cynicꞌe tiꞌj,
akine scꞌoꞌmaj kine tuꞌn Dios tuꞌn ntene cyucꞌil xjal ex at woclene twitz txꞌotxꞌ tuꞌn tnajset cyil xjal.
Xitzun tmaꞌn Jesús teju xjal tzkijleꞌn tyabil:
11 —Teya cxel nmaꞌne:
Weꞌctza,
kꞌiꞌnctz tcoẍbila ex txiꞌya tjaya.
12 Jurattzun jaw weꞌ ju xjal,
jaw tiꞌn tcoẍbil,
etz cywitz cycyakil xjal;
cyjaꞌtzun e labin cycyakil xjal tiꞌj,
ex jaw cynimsaꞌn tbi Dios,
in cymaꞌn:
—Bajx kil jun binchben ic tzaꞌn jlu.
Txocbil te Leví tuꞌn Jesús
13 Etztzun Jesús,
xiꞌ juntl maj ttzi laguna;
cycyakil xjal e pon tucꞌil ex xi tkꞌoꞌn xnakꞌtzbil cye.
14 Cyjaꞌ t-xiꞌ Jesús tuj be,
o til Jesús Leví aju tcyꞌajal Alfeo kꞌukltok tuj ja jatum nneꞌl peyin pwak te gobierni.
Xi tmaꞌn Jesús te:
—Lpetza wiꞌje.
Jawtzun weꞌ Leví ex oc lpeꞌ tiꞌj Jesús.
15 Axtoktzun taꞌ Jesús tuj tja Leví kꞌukltok tiꞌj mes,
ax icx nimcu peyil pwak ex ke aj il kꞌukl keꞌtok tiꞌj mes junx tucꞌil Jesús ex cyucꞌix ke t-xnakꞌtzben;
porque nimcu xjal otok che oc lpeꞌ tiꞌj.
16 Tejtzun cylonte ke xnakꞌtzal tiꞌj ley ex ke parisey in waꞌn Jesús cyucꞌil peyil pwak ex cyucꞌil aj il,
xi cymaꞌn cye t-xnakꞌtzben:
—¿Ti tten jlu,
in waꞌn Jesús cyucꞌil peyil pwak ex cyucꞌil aj il,
ex in cꞌan cyucꞌil?
17 Tej tbinte Jesús ju yol lu,
xi tmaꞌn cye:
—Ke xjal baꞌn,
mya il tiꞌj jun kꞌanal cye,
nok oꞌcx ke xjal yab.
Mintiꞌ ma chin ule txcol cye xjal tzꞌaklxix,
nok oꞌcx ma chin ule txcol cye xjal aj il,
chi Jesús cye.
Tikuꞌn mintiꞌ in cub cyyoꞌn weꞌyaj ke t-xnakꞌtzben Jesús
18 Ke t-xnakꞌtzben Juan cyucꞌix ke cyxnakꞌtzben parisey in cub cyyoꞌntok weꞌyaj,
e ultzun junjun xjal tucꞌil Jesús,
xi cykanin te:
—¿Tikuꞌn in cub cyyoꞌn weꞌyaj ke t-xnakꞌtzben Juan cyucꞌix ke cyxnakꞌtzben parisey,
atzun ke teya t-xnakꞌtzben mintiꞌ in cub cyyoꞌn weꞌyaj?
Che chi.
19 Xi tmaꞌn Jesús cye:
—¿Jacupe cub cyyoꞌn weꞌyaj keju otok che txconjtz tuj mejebleꞌn atxtok chmilbaj cyucꞌil?
Ka atxtok chmilbaj cyucꞌil mlay cub cyyoꞌn weꞌyaj.
20 Pero tzul tkꞌijlalil cꞌelel kꞌiꞌn ju chmilbaj cyxol;
maxitzun cbel cyyoꞌn weꞌyaj.
21 Mintiꞌ jun xjal nnoꞌc tkꞌoꞌn jun piẍ xbalun acꞌaj te xbukbilte ju xbalun ma baj;
ka ma tzꞌoc tkꞌoꞌn,
cꞌelel sbitꞌj ju xbalun ma baj tuꞌnju xbukbil acꞌaj,
ex mas cbajel sbitꞌj ic tzaꞌn nej.
22 Ex mintiꞌ jun xjal in cuꞌx tkꞌoꞌn acꞌaj vin tuj jun bols tzꞌuꞌm ttxꞌakan;
ka ma cuꞌx tkꞌoꞌn,
cbajel sbitꞌj bols tzꞌuꞌm tuꞌn acꞌaj vin ex cbel kojl vin,
ex che najel ke bols tzꞌuꞌm,
cyjaꞌtzun il tiꞌj tuꞌn tcuꞌx kꞌot acꞌaj vin tuj bols tzꞌuꞌm acꞌaj.
Ke t-xnakꞌtzben Jesús el cyiꞌn triw twi tkan tuj kꞌij te ojlabl
23 In bettok Jesús cyxol awal tuj jun kꞌij te ojlabl cyucꞌix ke t-xnakꞌtzben;
in che bettok ex e oc ten kꞌilte triw twi tkan.
24 Atzun cye parisey xi cymaꞌn te Jesús:
—Quina,
¿tikuꞌn in cybinchaꞌn t-xnakꞌtzbena jlu tuj kꞌij te ojlabl,
aju mya kꞌoꞌn tuꞌn ley tuꞌn tbinchanjtz?
Che chi.
25 Xi tmaꞌn Jesús cye:
—¿Bajxpe jaw cyschꞌiꞌne tuj Tuꞌjil ti o tbincha David tej mintiꞌtok twa ex tzaj el tcꞌuꞌj cyucꞌix keju ateꞌtok tucꞌil?
26 Ocx David tuj tja Dios tej toctok Abiatar te tnejel pal,
xi twaꞌn David ke pan cyꞌiwlaꞌmaj,
aju pan lu mya kꞌoꞌn tuꞌn ley tuꞌn t-xi cywaꞌn xjal,
nok oꞌcx cye pal;
ax icx xi tkꞌoꞌn David cye keju ateꞌtok tucꞌil.
27 Ax icx xi tmaꞌn Jesús cye: