Banix jun xjal tzkijtok tkꞌab
3
Ocx juntl maj Jesús tuj ja te cꞌulbil ex otok pon jun xjal tzkij jun tkꞌab.
2 In che kꞌon xjal cwent tiꞌj Jesús ka tuꞌn tbant ju xjal tuꞌn tuj kꞌij te ojlabl,
tuꞌntzun tcub tzꞌak Jesús tuj jun til cyuꞌn.
3 Xitzun tmaꞌn Jesús teju xjal tzkij tkꞌab:
—Weꞌctza ex weꞌcuya cyxol xjal.
4 Xitzun tkanin Jesús cye mastl xjal:
—¿Kꞌoꞌnpelo tuꞌn ley tuꞌn kbinchante jun baꞌn tuj kꞌij te ojlabl ex ka tuꞌn kbinchante jun mya baꞌn?
¿Kꞌoꞌnpelo tuꞌn tclet jun xjal ex ka tuꞌn tnaj?
Chi Jesús cye.
Atzun cye mintiꞌ e kꞌajt.
5 Xi tqueꞌyin Jesús cywitz cycyakil tiꞌjele,
tzaj tkꞌoj,
ex tzaj nim tbis tuꞌn tlaj cyuw cyanmi.
Xi tmaꞌn Jesús te xjal tzkij tkꞌab:
—Nukpiꞌmil tkꞌaba.
Atzunte xjal el tnukpiꞌn tkꞌab,
ex cyaj banix tkꞌab.
6 Tejtzun cyetz ke parisey,
e yolin tiꞌj cyucꞌil ke tpartid Herodes,
bant tiꞌj cyuꞌn tzaꞌn tten tuꞌn tcub Jesús cyuꞌn.
Nim xjal e pon ttzi laguna
7 Atzunte Jesús el tpaꞌn tib,
xiꞌ ttzi laguna cyucꞌix ke t-xnakꞌtzben,
ex nim xjal e oc lpeꞌ tiꞌj e tzaj tuj txꞌotxꞌ Galiley.
8 Ax icx e tzaj tuj txꞌotxꞌ Judey,
ex tuj tnam Jerusalén,
ex tuj txꞌotxꞌ Idumea,
ex e tzaj jlajxi nima Jordán,
ex e tzaj cyuj ke lugar tiꞌjele tnam Tiro ex tnam Sidón,
porque o cybi nimcu tbinchben Jesús in bant tuꞌn,
cyjaꞌtzun e pon nim xjal tucꞌil.
9 Xitzun tmaꞌn Jesús cye t-xnakꞌtzben tuꞌn tbant tten jun barc tuꞌn tlaj nimcu xjal,
tuꞌntzun miꞌn toc betzꞌan Jesús cyuꞌn xjal.
10 Porque nimcu xjal otok che banix tuꞌn,
cyjaꞌtzun e pon tilj xjal tiꞌj Jesús,
akeju at cyyabil,
tuꞌn toc cymacoꞌn tiꞌj Jesús.
11 Atzun ke juꞌẍ,
tej tilwaj Jesús cyuꞌn e cub ẍmejeꞌ twitz,
in che schꞌin wen:
—Aya Tcꞌwaꞌl Dios,
che chi.
12 Pero cyuw xi tmaꞌn Jesús cye juꞌẍ tuꞌn miꞌn t-xi cymaꞌn alcyete Jesús.
E jaw t-scꞌoꞌn Jesús cablaj t-xnakꞌtzben
13 Tbajlenxi jlu jax Jesús twi witz,
ex e tzaj ttxcoꞌn alcye keju at tgan cyiꞌj;
e pontzun tucꞌil.
14 Ex jaw t-scꞌoꞌn Jesús cablaj t-xnakꞌtzben tuꞌn cyten tucꞌil,
ex tuꞌn cyxi t-samaꞌn pacbal;
15 ex xi tkꞌoꞌn cyoclen tuꞌn cybanix ke yab cyuꞌn,
ex tuꞌn cyetz ke juꞌẍ tuj cyanmi xjal cyuꞌn.
16 Akeju e jaw t-scꞌoꞌn atzun ke jlu:
Simón,
aju Pedro tcabin tbi oc tkꞌoꞌn Jesús;
17 tucꞌix Jacobo aju tcyꞌajal Zebedey,
tucꞌix Juan aju titzꞌin Jacobo,
ake jlu Boanerges tcabin cybi oc tkꞌoꞌn Jesús,
atzun in tmaꞌn,
ic cymod ic tzaꞌn kꞌancyok;
18 tucꞌix Andrés,
tucꞌix Pelip,
tucꞌix Bartolomé,
tucꞌix Matey,
tucꞌix Tomás,
tucꞌix Jacobo aju tcyꞌajal Alfeo,
tucꞌix Tadeo,
tucꞌix Simón aju toctok te tajlal cyxol jun partid xjal cananist cybi,
19 ex tucꞌix Judas Iscariote,
aju xi kꞌonte Jesús tuj cykꞌab xjal.
In tzaj tkꞌoꞌn juꞌẍ tipumal Jesús, che chi parisey
20 Ultzun Jesús tuj ja jatum in posadiyin cyucꞌix ke t-xnakꞌtzben.
Oc cychmon cyib juntl maj ke xjal,
cyjaꞌtzun mintiꞌ tumel tuꞌn twaꞌn Jesús cyucꞌix t-xnakꞌtzben.
21 Tejtzun cybinte ke terman Jesús,
e ul kꞌil te porque in cymaꞌn ka otok tzꞌoc te tzcaj.
22 Ax icx cye xnakꞌtzal tiꞌj ley otok che tzaj tuj Jerusalén in cymaꞌn:
—Ate xjal lu at Belsebú tuj tanmi,
ex tuꞌn Belsebú aju nejenel cye juꞌẍ in tzaj kꞌoꞌn tipumal xjal lu tuꞌn cyetz ke juꞌẍ tuj cyanmi xjal tuꞌn,
che chi.
23 E tzajtzun ttxcoꞌn Jesús,
ex xi tmaꞌn jun techal cye.
Chi cyjaꞌ:
—¿Tzaꞌn tten tuꞌn tetz tlajon tib Satanás tuꞌnx tib?
24 Ka at jun cawbil at pabl tib tuj ex in che kꞌojin xjal cyxolx,
aju cawbil lu mya cucx ctel.
25 Ax icx jun ja xjal ka in che kꞌojin cyxolx,
aju ja xjal lu mlay che ten junx.
26 Ax icx te Satanás ka ma tzꞌoc ten kꞌojlel tiꞌjx,
ex ka tpaꞌn tib tcawbil,
mlay bant cucx tuꞌn tten,
cnajeltzun tipumal.
27 Mlay tzꞌocx jun xjal tuj tja juntl xjal at tipun ex mlay tzꞌetz telkꞌaꞌn aju at tuj tja,
oꞌcx ka ma cub tcꞌaloꞌn ju xjal nej,
entons jaculo tzꞌetz telkꞌaꞌn tcyakilju at tuj tja.
28 Ax toc cxel nmaꞌne cyeye,
jacu najset tcyakil cyil xjal tucꞌix tcyakilju mya baꞌn in cymaꞌn,
29 pero alcye jun xjal ma yolin mya baꞌn tiꞌj Xewbaj Xjan,
mlay cub najset til te jumajx,
cbel t-sentens te jumajx tuꞌn tlaj til,
chi Jesús cye xnakꞌtzal tiꞌj ley.
30 Xi tmaꞌn Jesús jlu cye porque in cymaꞌntok ka at juꞌẍ tuj tanmi.
Pon ttxuꞌ Jesús tucꞌil, cyucꞌix ke titzꞌin
31 Tbajlenxi jlu pon ttxuꞌ Jesús cyucꞌix ke titzꞌin,
ax e cyaj ten ttxaꞌn peꞌn,
ex ocx txocbaj Jesús cyuꞌn.
32 Atzun ke xjal kꞌukl keꞌtok tiꞌjele Jesús xi cymaꞌn te:
—Lu ttxuꞌya ex ke titzꞌina ateꞌ ttxaꞌn peꞌn,
in che jyon tiꞌja,
che chi.
33 Xitzun tmaꞌn Jesús cye:
—¿Alcyetzun ntxuꞌye,
ex alcyetzun ke witzꞌine?
34 Xitzun tqueꞌyin cywitz keju kꞌukl keꞌtok tiꞌjele.