Xi tkꞌoꞌn Jesús xnakꞌtzbil cye xjal tuꞌn tten cycwent cyiꞌj te cyxmletzꞌil parisey
12
Baj cychmon cyib elaꞌ mil xjal,
baj cylamon cyib cyxolx.
Ex tnejel oc ten Jesús kꞌmalte cye t-xnakꞌtzben:
—Ten cycwente cyiꞌje teju t-samel pan cye parisey,
aju cyxmletzꞌil.
Lucas 12.1-31
2 Porque tcyakilju ewan,
cꞌelel tuj kꞌanchaꞌl;
ex tcyakilju at tuj ewaj,
oc cybiꞌ xjal.
3 Cyjaꞌtzun,
aju ma cymaye tuj klolj,
cbinjtzel tuj tkan kꞌij;
ex tcyakilju ma cymaye tuj ewaj tujxi ja,
ctzajel kꞌmaꞌn twi ja ex oc cybiꞌ cycyakil xjal.
Alcye tuꞌn kxob twitz
4 Cxel nmaꞌne cyeye akeye wucꞌile:
Miꞌn che xobe cywitz keju in cub cybyoꞌn t-ximlal xjal ex mintiꞌ mastl jacu bant cyuꞌn.
5 Cxel nmaꞌne cyeye alcye tuꞌn cyxobe twitz:
Che xobe twitzju at tipumal tuꞌn tcyim xjal tuꞌn ex at tipumal tuꞌn t-xi kꞌoꞌn xjal tuj infierni tcyimlenxi xjal;
cyjaꞌtzun in xi nmaꞌne cyeye,
che xobe twitz.
6 ¿Mintiꞌpe in che cꞌayinjtz jweꞌ tal chyuꞌj tuꞌn cabe sentav?
Pero mi jun cye nnicꞌ tnaꞌl tuꞌn Dios.
7 Tcyakil ttzmal cywiꞌye ajlaꞌmaj tuꞌn Dios.
Cyjaꞌtzun miꞌn che xobe;
akeye mas maꞌ cyxilene cywitz nimcu tal chyuꞌj.
Cxel kmaꞌn cye xjal ka ax toc ocslal koꞌ tiꞌj Jesucrist
8 Cxel nmaꞌne cyeye,
alcyeju mintiꞌ in cub tewan ex in tmaꞌn cye xjal ka ax toc ocslal wiꞌje,
ax icxtzun weye mlay cub wewane,
cxel nmaꞌne cywitz t-anjel Dios ka ax toc ocslal wiꞌje,
akine scꞌoꞌmaj kine tuꞌn Dios tuꞌn ntene cyucꞌil xjal.
9 Pero alcye ma cub tewan cywitz xjal ka mintiꞌ ojtzkiꞌn kine tuꞌn,
ax icx weye cbel wewane cywitz t-anjel Dios ka mintiꞌ ojtzkiꞌn wuꞌne.
10 Ex alcye jun xjal ma kꞌmante jun yol mya baꞌn wiꞌje,
akine scꞌoꞌmaj kine tuꞌn Dios tuꞌn ntene cyucꞌil xjal,
jacu najset til;
pero alcye ma yolin mya baꞌn tiꞌj Xewbaj Xjan,
mlay najset til.
11 Ex oc cyxi kꞌiꞌne tuj ja te cꞌulbil,
ex cywitz jwes ex cywitz aj sanjelal,
miꞌn baj cycꞌuꞌje tzaꞌn tten tuꞌn t-xi cytzakꞌweꞌne ex alcye yol tuꞌn t-xi cymaꞌne;
12 porque jurat ctzajel tmaꞌn Xewbaj Xjan cyeye alcye yol tuꞌn t-xi cymaꞌne.
Aju xobajil tuꞌn kꞌinumabl
13 At jun xinak cyxol xjal xi tmaꞌn te Jesús:
—Xnakꞌtzal,
kꞌmanxa te ntzique tuꞌn tcub tmij ketzbile.
14 Atzunte Jesús xi tmaꞌn te:
—¿Alcye ma tzꞌoc kꞌonte weye te jwes cyibaje ex tuꞌn tcub tmij cyetzbile wuꞌne?
15 Ex tmatl Jesús cye:
—Atx cynaꞌne tiꞌj,
ex ten cycwente cyiꞌje tuꞌn miꞌn tpon cycꞌuꞌje tiꞌj kꞌinumabl;
porque mya toc tchwinklal jun xjal tiꞌj nimcu at te.
16 Ax icx xi tmaꞌn Jesús jun techal cye:
—At jun xjal kꞌinun,
nim twitz awal o chmet tuj ttxꞌotxꞌ.
17 Cubtzun t-ximan kꞌinun ex tma:
¿Ti oc nbinchaꞌye?
Porque mintiꞌ jatum tuꞌn tocx ncꞌuꞌne twitz wawale.
18 Pero baꞌn wuꞌne alcye oc nbinchaꞌye.
Che bel nxitune ntxꞌutxꞌe,
ex che jawil nbinchaꞌne mas matijtl ke,
ex atzun cꞌoquex ncꞌuꞌne tcyakil twitz wawale ex tcyakilju at weye.
19 Entons cxel nmaꞌne te wanmiye:
Wanmi,
nimcu at teya cꞌuꞌn ke te nimcu abkꞌi;
tzꞌojlana,
waꞌna,
cꞌana,
ex tzalajxa,
chi kꞌinun.
20 Pero xi tmaꞌn Dios te xjal:
Mintiꞌ tnabla,
teju konicꞌan jaꞌlo cymela;
ex tcyakilju ma baj tcꞌuꞌna,
¿alcye cyjel tajwil?
21 Cyjaꞌtzun tten aju xjal in baj tchmoꞌn tkꞌinumabl te tex,
pero tuj twitz Dios meba te xjal lu.
Ke tcꞌwaꞌl Dios cwentin ke tuꞌn
22 Xitzun tmaꞌn Jesús cye t-xnakꞌtzben:
—Cyjaꞌtzun cxel nmaꞌne cyeye:
Miꞌn baj cycꞌuꞌje tiꞌj cychwinklale,
ti cxel cywaꞌne;
ex miꞌn baj cycꞌuꞌje tiꞌj cyximlale,
ti cꞌoquel cykꞌoꞌne cyiꞌje.
23 Aju cychwinklale mas maꞌ t-xilen twitz wabj,
ex aju cyximlale mas maꞌ t-xilen twitz xbalun.
24 Cyqueꞌyinxe ke joj,
mintiꞌ in che awan ex mintiꞌ in che chmon twitz awal;
mintiꞌ jun ja te cꞌubl cywa ex mintiꞌ cytxꞌutxꞌ,
pero ax Dios in cꞌaꞌchan cye.
¿Yajtzun cyeye,
myapelo mas maꞌ cyxilene cywitz ke joj?
25 ¿Ex alcyetzun jun cyxole jacu bant tuꞌn tuꞌn toc tkꞌoꞌn juntl kꞌij tchwinklal tuꞌnju nimxix in baj tcꞌuꞌj tiꞌj?
26 Ka mlayx bant aju chꞌin cyuꞌne,
¿tikuꞌntzun in baj cycꞌuꞌje tiꞌj txkantl?
27 Che ximane cyiꞌj bech tuj cꞌul tzaꞌn tten in che chꞌiy,
mintiꞌ in che akꞌnan ex mintiꞌ in che chkon;
pero cxel nmaꞌne cyeye tiꞌj rey Salomón,
masque tbanilxix t-xbalun oc tkꞌoꞌn,
pero mintiꞌ pon jun t-xbalun ic tzaꞌn cye tal bech lu.
28 Katzun ic in t-xbalumiꞌn Dios tal cꞌul tuj cojbil at jaꞌlo ex nchiꞌj tzꞌocx kꞌoꞌn tuj kꞌakꞌ,
¿yajtzunlo cyeye,
mlaypelo che xbaluminjtze tuꞌn,
akeye xinak chꞌin cyocslable?
29 Cyjaꞌtzun,
miꞌn baj cycꞌuꞌje tiꞌj cywaye ex tiꞌj cycꞌaye,
ex miꞌn che bisune tiꞌj.
30 Porque ke txkantl xjal tuj tcyakil twitz txꞌotxꞌ in che jyon tiꞌj tcyakil jlu;
atzun cyeye at jun Cymane ojtzkiꞌn tuꞌn ka at tajben tcyakil jlu cyeye.
31 Cynimanxe tnejelxix aju tcawbil Dios,
tcyakiltzun jlu ctzajel kꞌoꞌn cyeye.
Aju kꞌinumabl tuj cyaꞌj
32 Miꞌn che xobe akeye nẍneꞌle,
ichak nicꞌxi cybete,
porque ate Cymane baꞌn ela tuj twitz tuꞌn t-xi tkꞌoꞌn aju cawbil te cyeye.
Lucas 12.32-59
33 Tcyakilju at cyeye,
cycꞌayinxe ex cykꞌonxe cye meba;
cybinchame cychꞌuꞌẍe aju mlay baj,
cychmome cykꞌinumable tuj cyaꞌj aju mlay baj,
jatum mlay pon lakꞌeꞌ elekꞌ ex mlay naj tuꞌn pocꞌ.
34 Porque jatum taꞌ cykꞌinumable,
axtzun ctel cyanmiye.
Cybincham cytene
35 Cycꞌalomtzun cycꞌuꞌje wen,
ex cytxakoꞌnc cycandile.
36 Che ocxe ic tzaꞌn ke majen in che ayon tiꞌj cypatrón oc tajtz tuj mejebleꞌn,
tuꞌntzun tjaket naj ttzi ja cyuꞌn oc tul,
ex oc toc tkꞌajtzaꞌn ttzi ja.
37 At tzalajbil cye keju majen lu oc tul cypatrón in che ayon tiꞌj;
ax toc cxel nmaꞌne cyeye,
ate patrón cꞌoquel tcꞌaloꞌn tcꞌuꞌj ex cxel tmaꞌn cye tmajen tuꞌn cycub keꞌ tiꞌj mes,
ex cꞌoquel ten sipal cywa.
38 Ichak ka ma tzul tmij akꞌbil ex ka chꞌixtok kskix,
ka in che itzꞌlen majen tiꞌj oc tul,
at tzalajbil cye keju majen lu.
39 Pero tzꞌelx cynicꞌe tiꞌj jlu,
nokwit biꞌn tuꞌn tajaw ja alcye or tuꞌn tul elekꞌ,
jaculo cub ten xkꞌukil,
ex mlaylo tzꞌocx elekꞌ elkꞌal tuj tja.
40 Icxtzun cyeye,
nok banin cytene,
porque alcye or mintiꞌ in che ximane tiꞌj,
atzun or chin ule,
akine scꞌoꞌmaj kine tuꞌn Dios tuꞌn ntene cyucꞌil xjal.
Aju majen in bant takꞌun tuꞌn ex aju majen mintiꞌ in bant takꞌun
41 Xitzun tmaꞌn Pedro te Jesús:
—Tat,
¿oꞌcxpe keye in tmaꞌna aju techal lu,
ex ka cye cycyakil?
42 Xitzun tmaꞌn Kajaw cye:
—Aju mayordom in japunxix takꞌun tuꞌn ex at tnabl,
ctzajel tmaꞌn tpatrón te tuꞌn cyoc tcwentin keju ateꞌ tuj tja,
ex tuꞌn t-xi kꞌot cywa oc tpon or.
43 At-xix tzalajbil teju majen ka in tbinchaꞌn alcyeju takꞌun oc tul tpatrón.
44 Ax toc cxel nmaꞌne cyeye,
cꞌoquel kꞌoꞌn ju majen lu tuꞌn tpatrón te cwentil tcyakilju at te tpatrón.
45 Pero ka ma cub t-ximan ju majen tuj tanmi:
Yajxi tzulwe npatrón,
ka chi,
ex ka ma tzꞌoc ten cꞌixbisal cye mastl majen xinak ex majen xuꞌj,
ex ka ma tzꞌoc ten waꞌl ex cꞌal,
ex ka ma tzꞌoc ten cꞌal kꞌeꞌn,
46 tzultzun tpatrón majen lu tuj kꞌij mintiꞌ in ayon tiꞌj,
ex tuj or mintiꞌ biꞌn tuꞌn;
cbel kꞌoꞌn nim tcastiw ex cxel tkꞌoꞌn cyxol keju mya baꞌn.
47 Aju majen ojtzkiꞌn tuꞌn alcye tajbil tpatrón ex mya banin tten,
ex mintiꞌ in bant tuꞌn aju tajbil tpatrón,
ccꞌixbisetel elaꞌ maj tuꞌn asyal.
48 Atzunju majen naꞌnxtok tlonte tajbil tpatrón ex ka ma tbincha jun mya baꞌn,
nok chꞌin ccꞌixbisetel;
porque jun xjal ka nim ma txi kꞌoꞌn tuj tcwent,
ax nim cxel kanin te tiꞌj ju takꞌunben;
ex jun xjal ka ma txi okxenit nim te,
ax nim cxel kanit te.
Tuꞌn tlaj Jesús in tzaj pabl tib cyxol xjal
49 Akine ma chin ule kꞌol kꞌakꞌ twitz txꞌotxꞌ,
ex cuchiwt mawt jaw cꞌant.
50 Il tiꞌj tuꞌn wicꞌe tuj nim cꞌixcꞌoj,
ex nim in chin bisune ocxi tjapun baj tcyakil.
51 ¿Maj in che ximane tiꞌj ka ma chin ule twitz txꞌotxꞌ tuꞌn cyten xjal tuj tzalajbil?
Cxel nmaꞌne cyeye:
Miꞌn,
oꞌcx tuꞌn tten pabl tib cyxol.
52 Porque texju jaꞌlo,
jweꞌ xjal tuj jun ja cbel ten pabl tib cyxol,
cbel ten kꞌoj cyxol ox cyucꞌil cabetl,
ax icx cyxol cabe cyucꞌil oxtl.
53 Ctel kꞌoj cyxol mambaj tucꞌil tcꞌwaꞌl,
icx te cꞌwaꞌlbaj tucꞌil tman;
ctel kꞌoj cyxol txuybaj tucꞌil tal,
icx te txin tucꞌil ttxuꞌ;
ctel kꞌoj cyxol xuꞌj alibaj tucꞌil txin alibaj,
icx te txin alibaj tucꞌil xuꞌj alibaj.
Ke techal tiꞌj tkꞌijlalil
54 Ax icx xi tmaꞌn Jesús cye xjal:
—Oc in xi cyqueꞌyine muj in jaw tuj telex kꞌij,
jurat in cymaꞌne:
Tzul jbal ex in tzajtzun,
55 ex oc in tzaj cykꞌikꞌ elni,
in cymaꞌne:
Tzul cyak ex in tzajtzun.
56 Xmletzꞌ keye.
Nneꞌl cynicꞌe tiꞌj alcye ctzajel tuꞌnju techal in cyqueꞌyine twitz cyaꞌj ex twitz txꞌotxꞌ;
¿tzaꞌntzun tten mintiꞌ nneꞌl cynicꞌe tiꞌj alcye ctzajel tuj tkꞌijlalil lu tuꞌnju techal in cyqueꞌyine?
Bincham ttena tucꞌil aj kꞌoj tiꞌja
57 ¿Ex tikuꞌn mintiꞌ in cub cyximane cyuꞌnxe alcyeju tzꞌaklxix?
58 Ka ma txi kꞌiꞌna twitz jwes tuꞌn aj kꞌoj tiꞌja,
tzꞌoc tililx tuꞌna tuꞌn t-xi cybinchaꞌne tiꞌj tuj be,
tuꞌntzun miꞌn tpon kꞌiꞌna twitz jwes tuꞌn,
ex tuꞌn miꞌn t-xi kꞌoꞌna te polisiy tuꞌn jwes,
ex tuꞌn miꞌn tocx kꞌoꞌna tuj pres tuꞌn polisiy.
59 Cxel nmaꞌne teya,
mlay tzꞌetza tuj pres ka mya cabal tmulta cꞌoquex tchjoꞌna.