Jax Jesús twi witz tuꞌn t-xi tkꞌoꞌn xnakꞌtzbil cye xjal
5
Tejtzun tqueꞌyinte Jesús nim xjal,
jax twi witz;
tejtzun tcub keꞌ,
e pon lakꞌeꞌ ke t-xnakꞌtzben ttxlaj,
2 ex oc ten kꞌol xnakꞌtzbil cye ex tma:
Alcye ke at tzalajbil cye
3 At tzalajbil cye keju nneꞌl cynicꞌ tiꞌj ka at tajben Dios cye,
porque at cyoclen tiꞌj ju cawbil in tzaj tuj cyaꞌj.
4 At tzalajbil cye keju in che bisun,
porque oc ckꞌukbanjtzel cycꞌuꞌj.
5 At tzalajbil cye keju mans,
porque oc cycꞌmaꞌ ju txꞌotxꞌ te cyetzbil.
6 At tzalajbil cye keju nneꞌl cycꞌuꞌj ex in che txket tiꞌj tuꞌn cyoc te tzꞌaklxix,
porque ctzajel tkꞌoꞌn Dios aju cyajbil.
7 At tzalajbil cye keju in kꞌakꞌan cycꞌuꞌj tiꞌj juntl,
porque ctzajel kꞌakꞌan tcꞌuꞌj Dios cyiꞌj.
8 At tzalajbil cye keju sak tuj cyanmi,
porque cꞌoquel cyqueꞌyin Dios.
9 At tzalajbil cye keju nnoꞌc tilil cyuꞌn tuꞌn cyten xjal tuj tzalajbil cyxolx,
porque cꞌoquel kꞌoꞌn cybi tcꞌwaꞌl Dios.
10 At tzalajbil cye keju in che yajlanjtz tuꞌn tlaj ju in cybinchaꞌn aju tzꞌaklxix,
porque at cyoclen tiꞌj ju cawbil in tzaj tuj cyaꞌj.
11 At tzalajbil cyeye oc cyoc yasoꞌne ex oc cyyajlanjtze tuꞌn nlaje ex oc cymante xjal tcyakil mya baꞌn cyiꞌje mya ax toc.
12 Che tzalajxe ex che tenxe alegr,
porque aju oyaj ctzajel kꞌoꞌn cyeye tuj cyaꞌj,
maꞌxix;
porque icxtzun e yajlanjtz ke t-sanjel Dios cyuꞌn xjal ojtxi.
Akeye atzꞌan ex spicꞌun cyxol xjal
13 Akeye atzꞌan cyxol xjal;
katzun ma naj taꞌw atzꞌan,
¿tzaꞌn tten tuꞌn toctl taꞌw?
Mintiꞌtl tajben,
nok oꞌcx tuꞌn tex xoꞌt ex tuꞌn tbaj waban cyuꞌn xjal.
14 Akeye spicꞌun cyxol xjal.
Jun tnam tcub twiꞌ jun witz,
mlay bant tewit.
15 Ex oc toc txaket jun candil,
mlay tzꞌocx kꞌot tjakꞌ jun almi;
nok oꞌcx cbel kꞌot tibaj jun tcubil tuꞌntzun tkꞌonte spicꞌun cye cycyakil keju ateꞌ tuja.
16 Cyjaꞌxtzun tuꞌn tcꞌant cyspicꞌumale cywitz xjal,
tuꞌn cylonte aju cyakꞌunbene baꞌn ex tuꞌn tjaw cynimsaꞌn tbi Cymane aju at tuj cyaꞌj.
In tkꞌoꞌn Jesús xnakꞌtzbil tiꞌj tley Moisés
17 Miꞌn cub cyximane ka ma chin ule tuꞌn tnaj tley Moisés ex ka cyyol t-sanjel Dios;
mintiꞌ ma chin ule tuꞌn tnaj,
nok oꞌcx tuꞌn tjapun wuꞌne.
18 Porque ax toc cxel nmaꞌne cyeye,
ka naꞌnxtok tnaj cyaꞌj ex txꞌotxꞌ,
mlay naj jun tal punt ex ka jun tal letr chꞌin te ley ka naꞌnxtok tjapun tcyakil.
19 Cyjaꞌtzun alcye jun xjal ma tzicꞌ tibaj jun tal chꞌin mandamyent cyxol jlu,
ex ka ma txi tkꞌoꞌn xnakꞌtzbil cye xjal tuꞌn miꞌn tjapun cyuꞌn,
tal chꞌinxix cꞌoquel kꞌoꞌn tuj cawbil in tzaj tuj cyaꞌj.
Pero alcye ma che japun tuꞌn,
ex ka icx ma txi tkꞌoꞌn xnakꞌtzbil cye xjal tuꞌn tjapun cyuꞌn,
atzunju cꞌoquel kꞌoꞌn te maꞌxix tuj cawbil in tzaj tuj cyaꞌj.
20 Porque cxel nmaꞌne cyeye,
ka mintiꞌ ma che oque mas tzꞌaklxix cywitz ke xnakꞌtzal tiꞌj ley ex ke parisey,
mlay che ocxe tuj cawbil in tzaj tuj cyaꞌj.
In tkꞌoꞌn Jesús xnakꞌtzbil tuꞌn miꞌn kkꞌojin
21 O cybiye o kꞌmanjtz cye xjal ojtxi:
Miꞌn cye biyune;
ex alcye jun xjal ma biyun,
cꞌoquel tuj xjel twitz jwes,
chi tuj ley.
22 Atzun weye cxel nmaꞌne cyeye,
alcye jun xjal ma tzaj tkꞌoj tiꞌj terman,
cꞌoquel tuj xjel twitz jwes;
ex alcye ma tzꞌoc yasonte terman,
cꞌoquel tuj xjel cywitz aj Sanjelal mas maꞌ cyoclen;
ex alcye ma txi tmaꞌn tcꞌayil yol te terman,
mya yajcu jacu txi kꞌoꞌn tuj infierni tuj kꞌakꞌ.
23 Cyjaꞌtzun,
oc t-xiꞌya kꞌol toyaja twitz altar,
oc tpona ex ka ma tnaꞌya ka at jun tila twitz termaniya,
24 axtzun cyjel tkꞌoꞌna toyaja twitz altar,
ex nej txiꞌya tucꞌil termaniya tuꞌn tbant ttena tucꞌil,
maxitzun cxel tkꞌoꞌna toyaja.
25 Ka at jun xjal at tkꞌoj tiꞌja ex ma txiꞌ kꞌol part tuj jusgad,
tzꞌoc tililx tuꞌna tuꞌn tbant naj ttena tucꞌil atxtoka tucꞌil tuj be,
tuꞌntzun miꞌn tpon kꞌiꞌna twitz jwes tuꞌn aj kꞌoj tiꞌja,
ex tuꞌn miꞌn t-xi kꞌoꞌna te polisiy tuꞌn jwes,
ex tuꞌn miꞌn tocx kꞌoꞌna tuj pres.
26 Ax toc cxel nmaꞌne teya,
mlayx tzꞌetza tuj pres ka mya cabal tmulta cꞌoquex tkꞌoꞌna.
In tkꞌoꞌn Jesús xnakꞌtzbil tuꞌn miꞌn kbinchante aj pajil
27 O cybiye aju o kꞌmanjtz ojtxi:
Miꞌn tbinchaya aj pajil,
chi tuj ley.
28 Atzun weye cxel nmaꞌne cyeye,
alcye jun ma txi queꞌyinte jun xuꞌj ex in pon tcꞌuꞌj tiꞌj tuꞌn tbinchante mya baꞌn tucꞌil,
ma tbincha aj pajil tuj tanmi.
29 Ka tuꞌn tlaj tbakꞌ twitza tuj bankꞌabaj cbel tzꞌaka tuj il,
kꞌiꞌmetza ex xoꞌmixa;
porque mas baꞌn tuꞌn tnaj jun tbakꞌ twitza ex mya tuꞌn t-xi kꞌot tcyakil t-ximlala tuj infierni.
30 Ex ka tuꞌn tlaj tbankꞌaba cbel tzꞌaka tuj il,
txꞌemin ela ex xoꞌmixa;
porque mas baꞌn tuꞌn tnaj jun tkꞌaba ex mya tuꞌn t-xi kꞌot tcyakil t-ximlala tuj infierni.
In tkꞌoꞌn Jesús xnakꞌtzbil tuꞌn miꞌn tcub kpaꞌn kib tucꞌil kxuꞌjil
31 Ax icx o kꞌmanjtz ojtxi:
Alcye jun ma tzꞌel tlajoꞌn t-xuꞌjil,
kꞌonx jun uꞌj te jatum in tmaꞌn tiꞌj tcublen cypaꞌn cyib,
chi tuj ley.
32 Atzun weye cxel nmaꞌne cyeye,
ka at jun xjal ma cub tpaꞌn tib tucꞌil t-xuꞌjil ex ka mintiꞌ otok tbincha xuꞌj aj pajil,
tuꞌn tlaj xinak mya yajcu tbincha xuꞌj aj pajil;
ex ka ma mojeꞌ juntl xinak tucꞌil ju xuꞌj otok tzꞌel lajoꞌn,
ax icx in tbinchaꞌn aj pajil.
In tmaꞌn Jesús tuꞌn miꞌn t-xi kmaꞌn tzkan Dios
33 Ax icx o cybiye o kꞌmanjtz cye xjal ojtxi:
Miꞌn txi cymaꞌne tzkan Dios tiꞌj jun yol mya ax toc,
nok oꞌcx japunx cyuꞌne aju otok txi cytziyane te Kman,
chi tuj ley.
34 Atzun weye cxel nmaꞌne cyeye,
miꞌn txi cymane tzkan Dios,
miꞌn tzaj cynaꞌne cyaꞌj,
porque atzun tkꞌukbil Dios jatum in cawin,
35 ex miꞌn tzaj cynaꞌne txꞌotxꞌ,
porque tcub tkan Dios tibaj;
ex miꞌn tzaj cynaꞌne tnam Jerusalén,
porque atzun tnam etzan tuꞌn nintz Rey.
36 Miꞌn tzaj cynaꞌne cywiꞌye oc t-xi cytziyane jun yol,
porque mlay bant cyuꞌne tuꞌn toc jun ttzmal cywiꞌye sak ex ka kꞌek.
37 Nok oꞌcx tuꞌn t-xi cymaꞌne oc ex ka miꞌn;
porque ka ma tzꞌoc cykꞌoꞌne juntl yol tibaj jlu,
atzun in tzaj tucꞌil tajaw il.
In tmaꞌn Jesús tuꞌn miꞌn taj kkꞌoꞌn t-xel mya baꞌn
38 O cybiye o kꞌmanjtz cye xjal ojtxi:
Ka at jun ma jatz tbakꞌ twitz tucꞌil tuꞌn,
ax icx te tuꞌn tjatz tbakꞌ twitz,
ex ka ma tzꞌetz twitz teꞌ tucꞌil tuꞌn,
ax icx te il tiꞌj tuꞌn tetz jun twitz teꞌ.
39 Atzun weye cxel nmaꞌne cyeye:
Miꞌn tzꞌaj cymojtzaꞌne kꞌoj tucꞌil ju xjal mya baꞌn;
ex ka at jun xjal ma tzꞌoc jun tkꞌoꞌtxa tuꞌn,
kꞌonxa juntl pacꞌ tkꞌoꞌtxa,
ka taj xjal tuꞌn toc juntl.
40 Ex ka at jun xjal taj tuꞌn t-xi kꞌiꞌna tuꞌn twitz jwes tuꞌn tel kꞌiꞌn tcamiẍa,
ax icx tchicyeta kꞌonxa te.
41 Ex ka at jun xjal ma tzꞌoc jwersina tuꞌn tuꞌn t-xi tiꞌna tikatz tuꞌn tbeta mey ojlab tucꞌil,
txiꞌya tuꞌn tbeta jun ojlab tucꞌil.
42 Ka at jun xjal in tkanin jun tiꞌxti teya,
kꞌonxa chꞌin te;
ex ka at jun xjal in tkanin tchꞌex teya,
miꞌn cub t-xcꞌayina.
Cycꞌujlame aju aj kꞌoj cyiꞌje
43 O cybiye aju o kꞌmanjtz ojtxi:
Cycꞌujlame ke cyucꞌile,
atzunju aj kꞌoj cyiꞌje cꞌelel cyicꞌune,
chi tuj ley.
44 Atzun weye cxel nmaꞌne cyeye:
Cycꞌujlame ke aj kꞌoj cyiꞌje,
che yoline baꞌn cyiꞌj keju in che yasun cyiꞌje,
cybinchame baꞌn cye keju in che icꞌun cyeye,
ex che naꞌne Dios cyiꞌj keju in che ilin cyiꞌje ex in che yajlan cyeye.
45 Cycꞌujlamtzune,
tuꞌntzun tel nicꞌbaj cyiꞌje ka cꞌwaꞌlbaj keye te Cymane aju at tuj cyaꞌj;
porque tuꞌn in jaꞌwil kꞌij cyibaj ke xjal mya baꞌn ex ke xjal baꞌn,
ex ax in tzaj kꞌonte jbal cyibaj ke xjal tzꞌaklxix ex ke xjal mya tzꞌaklxix.
46 Katzun oꞌcx ma cycꞌujlaye keju in che cꞌujlan cyeye,
¿alcyetzun oyaj ctzajel kꞌoꞌn cyeye tiꞌj jlu?
¿Myapetzun icx in cybinchaꞌn ke peyil pwak?
47 Ex ka oꞌcx ke cyermaniye in cykꞌolbeꞌne,
¿alcyetzun in cybinchaꞌne aju mintiꞌ in bant cyuꞌn mastl xjal?
¿Myapetzun icx in cybinchaꞌn ke txkantl xjal mintiꞌ nneꞌl cynicꞌ tiꞌj Dios?
48 Cyjaꞌtzun,
che ocxe tzꞌaklxix ic tzaꞌn te Cymane aju at tuj cyaꞌj tzꞌaklxix te.