2 Ex ultzun jun xjal twitz Jesús,

at mal tiꞌj.

3 Xitzun tkanin Jesús cye chicꞌbal tiꞌj ley ex cye parisey:

—¿Kꞌoꞌnpelo tuꞌn ley tuꞌn tkꞌananjtz jun xjal tuj kꞌij te ojlabl ex ka miꞌn?

Chi Jesús.

4 Atzun cye mintiꞌ e kꞌajt.

Tzajtzun ttzyuꞌn Jesús aju xjal at mal tiꞌj ex banix tuꞌn,

ex xi tmaꞌn te tuꞌn taj tja.

5 Xitzun tmaꞌn Jesús cye parisey:

—¿Alcye jun cyxole,

ka ma cuꞌx tzꞌak jun tcꞌwaꞌl ex ka jun tchej tuj jun jul,

mlaypelo jatz tiꞌn naj masquelo tuj kꞌij te ojlabl?

6 Ex mintiꞌ bant ttzakꞌwenjtz jlu cyuꞌn.

7 Tej tqueꞌyinte Jesús tzaꞌn tten mas cyajbil xjal tuꞌn cycub keꞌ tuj jun kꞌukbil tbanilxix,

xi tmaꞌn jun yol cye keju otok che txconjtz:

8 —Oc ttxconjtza tuꞌn jun xjal tuꞌn t-xiꞌya tuj mejebleꞌn,

miꞌn cub keꞌya tuj ju kꞌukbil tbanilxix,

mya yajcu otok txconjtz juntl mas maꞌ toclen twitza,

9 ex octzun tul ju otok tzaj txconte cyeye oc tmaꞌ teya cyjaꞌ:

Ticꞌ lakꞌeꞌya tuj kꞌukbil lu ex kecuya tuj juntl kꞌukbil.

Cjawiltzun chꞌixwiya,

ex cbel keꞌya tuj mancbil kꞌukbil.

10 Pero oc ttxconjtza,

txiꞌya ex kecuya tuj mancbil kꞌukbil;

octzun tul aju cxel txconte teya oc tmaꞌ teya cyjaꞌ:

Amiw,

lakꞌetz chꞌintla ntxlaje;

entons maꞌlo t-xilena cywitz keju in che cub keꞌ tucꞌila tiꞌj mes.

11 Porque alcye jun xjal in jaw tniman tib,

cꞌoquel kꞌoꞌn te chꞌin;

ex alcye ma tzꞌoc tkꞌon tib te chꞌin,

cjawil nimsaꞌn.

12 Ex xi tmaꞌn Jesús teju xinak xi txconte te:

—Ka ma tbinchaya jun nintz waꞌn,

ex ka taja tuꞌn cyul xjal waꞌl tucꞌila,

miꞌn che tzaj ttxcoꞌna ke tamiwoya,

ke termaniya,

ke xjal at t-xilena cyucꞌil ex ke tvesina kꞌinun;

porque jaculo txi txcoꞌntla cyuꞌn tuꞌn twaꞌna cyucꞌil,

atzun t-xelju tzul kꞌoꞌn teya.

13 Oc tcub ticꞌsaꞌna jun ninkꞌij,

txcontza ke meba,

ke xjal tzcaj cyten,

ke cox,

ex ke moẍ;

14 at tzalajbil teya icju,

porque mlay bant cyuꞌn tuꞌn ttzaj cykꞌoꞌn t-xel teya,

maxitzun ctzajel kꞌoꞌn t-xel teya ocxi cyjatz ankꞌin ke xjal tzꞌaklxix.

15 At jun xjal kꞌukltok tiꞌj mes,

tej tbinte jlu xi tmaꞌn te Jesús:

—At tzalajbil te jun xjal cwaꞌl tuj tcawbil Dios.

16 Xitzun tmaꞌn Jesús te:

—At jun xjal o tbincha jun nintz waꞌn,

ex e tzaj ttxcoꞌn nimcu xjal.

17 Tej tpon or te wabl,

xi t-samaꞌn xjal jun tmajen kꞌmalte cye keju otok che txconjtz:

Cytzaje,

porque ma bant tten tcyakil,

chicuya,

chi xjal.

18 Pero cycyakil tzaj cymaꞌn tikuꞌn mlay che tzaj.

O tma ju tnejel:

Ma lakꞌet chꞌin ntxꞌotxꞌe,

ex il tiꞌj tuꞌn nxiꞌye queꞌyilte;

chin cubsale twitza mlay chinxe.

19 Ex o tma juntl:

Ma lakꞌet jweꞌ moj nwacẍe,

ma chinxe akꞌnal cyucꞌil tuꞌntzun ticꞌ nwitze cyiꞌj ka baꞌn ke;

chin cubsale twitza mlay chinxe.

20 Ex o tma juntl:

Ma ẍin mojeꞌye,

tuꞌntzun jlu mlay chinxe.

21 Tej tul meltzꞌaj ju majen,

xi tmaꞌn tcyakil jlu te tpatrón.

Tzajtzun tkꞌoj patrón,

ex xi tmaꞌn te tmajen:

Juratx t-xiꞌya cyuj plas ex cyuj cay tuj tnam,

ex kꞌintza ke meba,

ke xjal tzcaj cyten,

ke cox,

ex ke moẍ,

chi xjal.

22 Tejtzun tul meltzꞌaj majen,

xi tmaꞌn te tpatrón:

Tat,

ma bant wuꞌne ic tzaꞌn saj tmaꞌna,

ex atx lugar.

23 Xitzun tmaꞌn patrón te tmajen:

Txiꞌya cyuj be ex cyuj tal tkꞌab be ex kꞌonca il cyiꞌj xjal tuꞌn cytzaj,

tuꞌn tnoj njaye.

24 Porque cxel nmaꞌne cyeye,

ke xjal e tzaj ntxcoꞌne nej,

mi jun cxel nicꞌbente wabj ma bant wuꞌne,

chi patrón.

25 Nimcu xjal lepchkeꞌc tiꞌj Jesús;

ex ajtz meltzꞌaj twitz cyucꞌil xjal,

ex xi tmaꞌn cye:

26 —Ka at jun xjal ma tzꞌoc lpeꞌ wiꞌje,

ex ka oꞌcx toc tcꞌuꞌj tiꞌj tman,

tiꞌj ttxuꞌ,

tiꞌj t-xuꞌjil,

cyiꞌj ke tcꞌwaꞌl,

cyiꞌj ke ttzic ex ke titzꞌin,

ax icx tiꞌj tchwinklal,

mlay tzꞌoc te nxnakꞌtzbene.

27 Ex alcye jun xjal mya kꞌiꞌn tcrus ex mya lepchoꞌc wiꞌje,

mlay tzꞌoc te nxnakꞌtzbene.

28 Porque alcye jun cyxole,

ka taj tuꞌn tbant jun ja tuꞌn,

¿mlaypelo cub keꞌ ximal tiꞌj nej nicꞌpun cnajel tuꞌn,

ka acux aju pwak tuꞌn tbant ja?

29 Mya yajcu mlay japun baj tuꞌn,

ex otok cub keꞌ t-simyentil ja,

entons cycyakil keju in che queꞌyin tiꞌj che oquel ten tzeꞌl tiꞌj,

30 ex oc cymaꞌ:

Ate xjal lu oc ten binchal tja ex ma cyaj txꞌakeꞌ tuꞌn,

che chilo.

31 Ex alcye jun rey,

ka ma txiꞌ kꞌojlel tiꞌj juntl rey,

¿mlaypelo cub keꞌ ximal tiꞌj nej ka jacu xcyeꞌ tiꞌj winkin mil t-soldad juntl rey in tzaj kꞌojlel tiꞌj,

atzun te nok laj mil kꞌiꞌn tuꞌn?

32 Ex ka mlay xcyeꞌ tiꞌj,

naꞌnxtok tul canun juntl,

che xel t-samaꞌn cabe t-sanjel kanilte te juntl alcye taj tuꞌn t-xi kꞌot te tuꞌntzun tweꞌ kꞌoj.

33 Cyjaꞌtzun,

alcye jun cyxole ka mintiꞌ xcyaj tkꞌoꞌn tcyakilju at te,

mlay tzꞌoc te nxnakꞌtzbene.

34 Baꞌn te atzꞌan;

pero ka ma naj taꞌw,

¿tzaꞌn tten tuꞌn toctl taꞌw?

35 Mintiꞌtl tajben,

mi te txꞌotxꞌ,

mi te t-samel tzꞌis,

oꞌcx tuꞌn tex xoꞌt.

Alcye at t-ẍcyin,

binx aju yol lu.