2 —Aju cawbil in tzaj tuj cyaꞌj ic tten ic tzaꞌn jun rey tbincha jun nintz waꞌn tej tmojeꞌ tcꞌwaꞌl.

3 Xi t-samaꞌn rey ke tmajen txcol cye xjal otok txi kꞌmaꞌn cye tuꞌn cyul tuj mejebleꞌn;

pero akeju xjal lu mintiꞌ cub tuj cywitz tuꞌn cytzaj.

4 Xitzun t-samaꞌn rey junjuntl tmajen ex xi tmaꞌn cye:

Cymanxe cye ke xjal txcoꞌmaj ke:

Lu ma bant wabj wuꞌne;

ma che cub nbyoꞌne wacẍ cyucꞌix ke walune ulni cynabl,

tcyakil ma bant tten;

cytzaje tuj mejebleꞌn,

che chicuye.

5 Atzun cye xjal mintiꞌ xi cybiꞌn.

At jun xiꞌ akꞌnal tiꞌj tawal,

ex juntl xiꞌ cꞌayil;

6 ex txkantl xjal e tzyet ke majen cyuꞌn,

e oc ten yasul cyiꞌj,

ex e cub cybyoꞌn.

7 Tejtzun tbinte rey jlu,

tzaj nim tkꞌoj;

e jeꞌx t-samaꞌn ke t-soldad,

biꞌx cub cybyoꞌn soldad keju byol xjal,

ex cub cypatun cytanmi.

8 Xitzun tmaꞌn rey cye tmajen:

Aju nintz waꞌn te mejebleꞌn ma bant tten tcyakil;

pero ke xjal xi kꞌmet cye tuꞌn cyul,

mya baꞌn ke.

9 Cyxiꞌtzune jatum in che mojeꞌ be,

ex cytxcontze cycyakil xjal alcyex ma che cnet cyuꞌne,

tuꞌn cyul tuj mejebleꞌn,

chi rey.

10 E jeꞌxtzun ke majen tuj be,

e tzaj cychmoꞌn cycyakil xjal e cnet cyuꞌn,

ke xjal mya baꞌn ex ke xjal baꞌn;

cyjaꞌtzun aju ja jatum oc mejebleꞌn o noj cyuꞌn xjal otok che tzaj txcoꞌn.

11 Ocxtzun rey queꞌyil cye xjal otok che tzaj txcoꞌn,

o til rey jun xjal mya t-xbalun toc aju in ajben te mejebleꞌn.

12 Xi tmaꞌn rey te xjal:

Aya wucꞌil,

¿tzaꞌn tten soctza tzalu ex mya t-xbaluna toc aju in ajben te mejebleꞌn?

Atzunte xjal mintiꞌ kꞌajt.

13 Xitzun tmaꞌn rey cye keju in che sipan wabj:

Cycꞌalome tkan tucꞌix tkꞌab,

ex cyxoꞌmixe tuj klolj ttxaꞌn peꞌn;

atzun ctzajel okꞌel ex ckitxꞌitxꞌil t-xe cyeꞌ xjal,

chi rey.

14 Porque nimcu in che tzaj txcoꞌn,

pero nicꞌxi keju scꞌoꞌmaj ke,

chi Jesús.

15 E jeꞌxtzun ke parisey,

ex e yolin tiꞌj cyxolx tzaꞌn tten tuꞌn tcub tzꞌak Jesús cyuꞌn tiꞌj jun tyol.

16 E jeꞌx cysamaꞌn parisey cyxnakꞌtzben tucꞌil Jesús cyucꞌix keju in che oc lpeꞌ tiꞌj Herodes ex xi cymaꞌn te:

—Xnakꞌtzal,

biꞌn ke kuꞌn aya ax toc tyola,

ex in tkꞌoꞌna xnakꞌtzbil tuj tumelxix tzaꞌn tten tuꞌn kbet twitz Dios,

ex mintiꞌ in xoba cywitz xjal,

porque mintiꞌ nnoꞌc tqueꞌyina aju t-xilen xjal.

17 Kꞌmantza keye,

¿chi toc tuꞌna?

¿Baꞌnpe tuꞌn t-xi kkꞌoꞌne chojbil nneꞌl tkanin gobierni ex ka miꞌn?

Che chi.

18 Pero el tnicꞌ Jesús tiꞌj cyximbetz mya baꞌn ex xi tmaꞌn cye:

—¿Tikuꞌn in che jyone tumel wiꞌje tuꞌn ncub tzꞌake tuj jun wile?

Xmletzꞌ keye.

19 Cyyecꞌuntze jun pwak weye aju in xi kꞌot te chojbil.

Xitzun cyyecꞌun jun denari pwak.

20 Xitzun tkanin Jesús cye:

—¿Al etzun tilbilal toc twitz pwak ex al etzun biybaj tzꞌiban twitz?

21 —Te gobierni,

che chi.

Xitzun tmaꞌn Jesús cye:

—Pwes cykꞌonxe te gobierni aju te gobierni,

ex cykꞌonxe te Dios aju te Dios.

22 Tej cybinte jlu,

e labin tiꞌj,

cyajtzun ten Jesús cyuꞌn,

ex e icꞌtzun.

23 Tujx kꞌij lu e ul junjun sadusey tucꞌil Jesús,

akeju in cymaꞌn ka mlay jatz ankꞌin jun xjal cyxol cyimni,

ex xi cykanin te:

24 —Xnakꞌtzal,

che chi,

at jun yol cyaj tmaꞌn Moisés:

Ka at jun xjal ma cyim ex mintiꞌ jun tcꞌwaꞌl otok tzaj,

axju titzꞌin cmojebel tucꞌil t-xuꞌjil ktzan ttzic,

tuꞌntzun tcyaj jun t-xel ktzan ttzic tuꞌn,

tuꞌn miꞌn tnaj tiyjil.

25 At wuk xjal e ten kxole cyitzꞌin cyib.

Cnettzun t-xuꞌjil ju tnejel,

ex cyim;

ex tuꞌnju mintiꞌ jun tcꞌwaꞌl cyaj,

cyaj ten ju t-xuꞌjil te t-xuꞌjil tcab cꞌwaꞌl.

26 Ax icx o baj tiꞌj tcab cꞌwaꞌl ex tiꞌj toxin,

ax icx baj cyiꞌj cywukil,

e baj cyim.

27 Cycyimlenxi cycyakil,

ax icx te xuꞌj cyim.

28 Tuj tkꞌijlalil oc cyjatz ankꞌin cyimni,

¿alcyetzun coquel te tchmil xuꞌj cyxol keju wuk xjal cyitzꞌin cyib tuꞌnju cywukil e xujlante te?

Che chi Sadusey.

29 Xitzun ttzakꞌweꞌn Jesús:

—Ma che el tzpete tiꞌj porque mintiꞌ nneꞌl cynicꞌe tiꞌj ju in tmaꞌn tuj Tuꞌjil,

ex mintiꞌ nneꞌl cynicꞌe tiꞌj tipumal Dios.

30 Porque tuj tkꞌijlalil oc cyjatz ankꞌin xjal cyxol cyimni mintiꞌ cyxuꞌjil xinak cnetel ex mintiꞌ cychmil xuꞌj cnetel,

porque cycyakil ic che oquel ic tzaꞌn ke t-anjel Dios ateꞌ tuj cyaꞌj.

31 Pero tiꞌj ju tuꞌn cyjatz ankꞌin xjal cyxol cyimni,

¿bajxpe jaw cyschꞌiꞌne aju o tma Dios cyeye,

chi cyjaꞌ?:

32 Akine Tdios Abraham,

ex Tdios Isaac,

ex Tdios Jacob,

chi Dios.

Ate Dios mya Cydios cyimni,

nok oꞌcx Cydios itzꞌ,

chi Jesús cye.

33 Tej cybinte xjal jlu,

e labin tiꞌj t-xnakꞌtzbil Jesús.

34 Atzun cye parisey,

tej cybinte ka mintiꞌ e kꞌajt sadusey tuꞌn Jesús,

baj cychmon cyib.

35 Ex at jun chicꞌbal tiꞌj ley cyxol o tajbe tuꞌn toc Jesús tuj joybil tiꞌj tuꞌn,

xi tkanin te:

36 —Xnakꞌtzal,

¿alcye jun mandamyent mas maꞌ toclen tuj ley?

Chi xjal.

37 Xi tmaꞌn Jesús te:

—Cycꞌujlame Kman Dios tuꞌn tcyakil cyanmiye ex tuꞌn tcyakil cycꞌuꞌje ex tuꞌn tcyakil cynable.

38 Atzun tnejel mandamyent jlu maꞌxix toclen.

39 Ex aju tcabin mandamyent icx tten ic tzaꞌn tnejel,

in tmaꞌn:

Cycꞌujlame ke cyucꞌile ic tzaꞌnx cyeye in cycꞌujlan cyibe.

40 Akeju cabe mandamyent lu,

atzun ttxuylal tley Moisés ex ttxuylal cyyol ke t-sanjel Dios,

chi Jesús te xjal.

41 Axtok cychmon cyib ke parisey,

xi tkanin Jesús cye:

42 —¿Chi toc cyuꞌne tiꞌj ju Crist aju at toclen tuꞌn Dios?

¿Al e cꞌwaꞌlbaj?

Xi cymaꞌn te:

—Te David.

43 Xitzun tmaꞌn Jesús cye:

—¿Tzaꞌntzun tten in yolin David tiꞌj tuꞌn Xewbaj Xjan,

in tmaꞌn ka a Crist Tajaw?

Porque chi David:

45 [Ka in tmaꞌn David ka a Crist Tajaw,

¿tzaꞌntzun tten tuꞌn toc Crist te tcꞌwaꞌl David?]

Chi Jesús cye.

46 Ex mi jun cye cnet yol tuꞌn tuꞌn t-xi ttzakꞌweꞌn;

ya mintiꞌtl oc cynimarin cyib tuꞌn t-xi cykanin juntl yol te.