In tchicꞌbaꞌn Jesús cyakꞌunben parisey mya baꞌn, cyucꞌix ke xnakꞌtzal tiꞌj ley
23
Octzun ten Jesús yolil cyucꞌil xjal ex cyucꞌil t-xnakꞌtzben ex xi tmaꞌn cye:
2 —Ke xnakꞌtzal tiꞌj ley ex ke parisey nnoꞌc cykꞌon cyib te xnakꞌtzal tuꞌn cykꞌonte xnakꞌtzbil tiꞌj tley Moisés.
3 Cyjaꞌtzun,
tcyakilju ctzajel cymaꞌn cyeye tuꞌn tjapun cyuꞌne,
japunx cyuꞌne ex cybinchame;
pero miꞌn cybinchaye ic tzaꞌn cye in cybinchaꞌn,
porque in cymaꞌn alcye tuꞌn tbant ex ax ke mintiꞌ in bant cyuꞌn.
4 Porque in baj cycꞌaloꞌn ke iktz alxix,
ex mintiꞌ in cꞌisj cyuꞌn xjal,
ex in cymaꞌn tuꞌn tjaw cyikan xjal;
atzun cye mlay tzꞌoc cykꞌoꞌn jun tal cykꞌab tiꞌj iktz tuꞌn tjaw lamoꞌn iktz tiꞌj xjal.
5 Tcyakilju cybinchben in bant nok oꞌcx tuꞌn toc cyqueꞌyin xjal.
Porque in cub cytzꞌiban tyol Dios twitz jun piẍ tzꞌuꞌm maꞌ twitz,
nnoꞌc cycꞌaloꞌn tiꞌj cykꞌab ex ka tibaj cywitz,
ex nnoꞌc cykꞌoꞌn cyxbalun ẍjoꞌw ẍliꞌjin ttxaꞌn.
6 Ex cyajbil tuꞌn cycub keꞌ tuj tnejel kꞌukbil tuj nintz waꞌn,
ex tuꞌn cycub keꞌ tuj tnejel kꞌukbil cyuj ja te cꞌulbil.
7 Ex cyajbil tuꞌn cyoc kꞌolbeꞌn tuj plas ex tuꞌn toc kꞌoꞌn cybi xnakꞌtzal cyuꞌn xjal.
8 Atzun cyeye miꞌn cub tuj cywitze tuꞌn toc kꞌoꞌn cybiye xnakꞌtzal,
porque junx xnakꞌtzal cyeye,
aju Crist,
atzun cyeye cyitzꞌin cyibe cycyakile.
9 Ex miꞌn tzꞌoc cykꞌoꞌne te cymane jun xjal tzalu twitz txꞌotxꞌ;
porque junx Cymane at,
aju at tuj cyaꞌj.
10 Ex miꞌn tzꞌoc kꞌoꞌn cybiye nejenel cyuꞌn xjal,
porque junx nejenel cyeye at,
atzun kine aju Crist.
11 Aju mas maꞌ toclen cyxole,
atzunju cꞌoquel te cymajene.
12 Porque alcye ma jaw tniman tib cꞌoquel te chꞌin;
pero alcye ma tzꞌoc tkꞌon tib te chꞌin oc cjawil nimsaꞌn.
13 Pero ay becꞌbil cywitze,
akeye xnakꞌtzal tiꞌj ley ex akeye parisey xmletzꞌ keye,
porque in xi cymayoꞌne tuꞌn cyocx xjal tuj cawbil in tzaj tuj cyaꞌj;
mi akeye mintiꞌ in che ocxe,
ex miꞌn cyaje tuꞌn cyocx ke xjal,
akeju cyajbil tuꞌn cyocx.
14 [Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye,
porque nneꞌl cyiꞌne cyja meba xuꞌj,
ex in che naꞌne Dios nim tuj tuꞌn tcub ewat cybinchbene cywitz xjal.
Tuꞌntzunju cbel jun cysentense mas cyuwxix.]
15 Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye.
In baj cybetine tibaj mar ex twitz txꞌotxꞌ tuꞌn toc jun xjal te cyxnakꞌtzbene;
octzun toc xjal te cyxnakꞌtzbene,
mas aj il nnoꞌc cywitze,
ex mas in xiꞌ tuj il cyuꞌne tuꞌn t-xiꞌ tuj infierni.
16 Ay becꞌbil cywitze,
ẍaklul xjal keye pero moẍ keye.
In cymaꞌne:
Ka at jun xjal ma txi ttziyan jun yol ex ka ma tzaj tnaꞌn tja Dios tiꞌj,
mya il tiꞌj tuꞌn tjapun tyol;
pero ka at jun xjal ma txi ttziyan jun yol ex ka ma tzaj tnaꞌn kꞌan pwak tocx tuj tja Dios tiꞌj tyol,
il tiꞌj tuꞌn tjapun tyol,
che chiye.
17 Mintiꞌ cynable ex moẍ keye.
¿Alcye mas at toclen,
ape kꞌan pwak,
ex ka a tja Dios aju nnoꞌc kꞌan pwak te xjan tuꞌn?
18 Ax icx in cymaꞌne:
Ka at jun xjal ma txi ttziyan jun yol ex ka ma tzaj tnaꞌn altar tiꞌj tyol,
mya il tiꞌj tuꞌn tjapun tyol;
pero ka at jun xjal ma txi ttziyan jun tyol ex ka ma tzaj tnaꞌn oyaj tiꞌj,
aju tcub tibaj altar,
il tiꞌj tuꞌn tjapun tyol,
che chiye.
19 Mintiꞌ cynable ex moẍ keye.
¿Alcye mas at toclen,
apeju oyaj,
ex ka a altar aju nnoꞌc oyaj te xjan tuꞌn?
20 Porque alcye jun xjal ma txi ttziyan jun yol ex ka ma tzaj tnaꞌn altar tiꞌj tyol,
ax icx in tzaj tnaꞌn tiꞌj tcyakilju tcub tibaj altar.
21 Ex alcye jun xjal ma txi ttziyan jun yol ex ka ma tzaj tnaꞌn tja Dios tiꞌj tyol,
ax icx in tzaj tnaꞌn Dios aju najl tuj.
22 Ex alcye jun xjal ma txi ttziyan jun yol ex ka ma tzaj tnaꞌn cyaꞌj tiꞌj tyol,
ax icx in tzaj tnaꞌn tkꞌukbil Dios jatum in cawin,
ex in tzaj tnaꞌn Dios aju kꞌukl tibaj.
23 Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye.
In xi cykꞌoꞌne tlajiꞌn te Dios tiꞌj tal cꞌul alwen tbi,
ex tiꞌj tal cꞌul anís tbi,
ex tiꞌj tal cꞌul comino tbi,
atzunju mas at toclen in tmaꞌn tuj ley in cyaj cykꞌoꞌne;
mintiꞌ in cybinchaꞌne aju tzꞌaklxix,
ex mintiꞌ in kꞌakꞌan cycꞌuꞌje cyiꞌj xjal,
ex mintiꞌ in japun cyuꞌne aju in xi cytziyane.
Atzun jlu ilxix tiꞌj tuꞌn cybinchanteye,
ax icx tuꞌn t-xi cykꞌoꞌne tlajiꞌn.
24 Akeye ẍaklul xjal keye,
pero moẍ keye,
in jatz cyiꞌne jun tal us tuj cycꞌaye,
ex in xi cybalkꞌuꞌne jun chej camey.
25 Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye.
Porque nneꞌl cytxꞌjoꞌne tiꞌjtzi vas ex tiꞌjtzi lak,
atzun tuj cyanmiye oꞌcx in che ximane tiꞌj tuꞌn cyelkꞌane ex in pon cycꞌuꞌje tiꞌj nimcu.
26 Aya parisey moẍa.
Nej txꞌjoꞌmela tuj vas ex tuj lak,
ax icx tuꞌn t-sakix tiꞌjtzi.
27 Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye.
Porque ic cytene ic tzaꞌn ke pantyón kꞌoꞌmaj txun cyiꞌj,
tbanil che queꞌyin tiꞌjtzi,
atzunju cyujxi nojni tuꞌn cybakil cyimni ex tuꞌn tcyakil ttzꞌilil.
28 Icxtzun cyeye,
in cyyecꞌun cyibe cywitz xjal mer ic tzaꞌn tzꞌaklxix keye,
atzun tuj cyanmiye nojni tuꞌn xmletzꞌil ex tuꞌn mya baꞌn.
29 Ay becꞌbil cywitze akeye xnakꞌtzal tiꞌj ley ex akeye parisey xmletzꞌ keye.
Porque in jaw cybinchaꞌne cypantyón ke t-sanjel Dios,
ex in baj cybinchaꞌne cypantyón ke tzꞌaklxix tuꞌn tcyaj tbanil che queꞌyin,
30 ex in cymaꞌne:
Nokwit atoꞌye tuj tkꞌijlalil tej cyten kchmane ojtxi,
miwtlo oc kkꞌon kibe cyucꞌil tuꞌn cycub byet ke t-sanjel Dios,
che chiye.
31 Cyjaꞌtzun nnoꞌc cykꞌon cyibe testiw cyiꞌjxe,
ka akeye cyiyjil keju e cub byonte ke t-sanjel Dios.
32 Japunxtzun cyuꞌne aju cyaj yecꞌun cyeye cyuꞌn cychmane.
33 Lobaj keye ex tiyjil kꞌantiꞌ keye ¿tzaꞌntzun tten tuꞌn cycoꞌpje tuꞌn miꞌn tcub cysentense tuꞌn cyxiꞌye tuj infierni?
34 Cyjaꞌtzun cxel nsamaꞌne ke nsanjele cyucꞌile,
cyucꞌix keju at cynabl,
cyucꞌix ke xnakꞌtzal;
cyxoltzun jlu at junjun cbel cybyoꞌne ex cjawil cykꞌoꞌne twitz crus,
ex junjuntl cbajel cycꞌixbisaꞌne tuj ja te cycꞌulbile,
ex oc cyel ok cywitze che xel lpeꞌye cyiꞌj tuj junjun tnam tuꞌn cyyajlanjtz cyuꞌne;
35 cyjaꞌtzun ctzajel castiw cyibaje tuꞌn cylaj ke xjal e cub byoꞌn mintiꞌ cyil ex el cychcꞌel twitz txꞌotxꞌ,
tzajnix bant atxix ojtxi tej tcub byoꞌn Abel,
ate xjal lu tzꞌaklxix,
atzunju mancbil cub byoꞌn,
atzun Zacarías tcyꞌajal Berequías,
aju cub cybyoꞌne tiꞌjxi altar twitz tja Dios.
36 Ax toc cxel nmaꞌne cyeye,
tuꞌn tlaj tcyakil jlu ctzajel castiw cyibaj xjal ateꞌ tuj tkꞌijlalil jaꞌlo.
Jaw okꞌ Jesús tiꞌj tnam Jerusalén
37 Akeye aj Jerusalén in che cub cybyoꞌne ke t-sanjel Dios ex in che oc cyxoꞌne tuꞌn abj keju in che tzaj t-samaꞌn Dios cyucꞌile.
Nimcu maj o wajbeye tuꞌn cyoc nchmoꞌn keye ic tzaꞌn jun ttxu ecꞌ in che oc tchmoꞌn ke tal tjakꞌ t-xicꞌ,
pero mintiꞌ o cyajbeye.
38 Cybintze,
aju tja Dios at cyxole cyjel colin tuꞌn Dios.
39 Porque cxel nmaꞌne cyeye,
mlay chin oc cyqueꞌyintle jaꞌlo,
maxitzun chin oquel cyqueꞌyintle ocxi cymanteye:
Cyꞌiwlaꞌn teju tzul,
aju ctzajel samaꞌn tuꞌn Kman.