O tma Jesús ka tuꞌn tcub xitj tja Dios
24
Tej tetz Jesús tuj tja Dios cyjaꞌ t-xiꞌ tuj juntl lugar,
e pon lakꞌeꞌ ke t-xnakꞌtzben ttxlaj,
xi cyyecꞌun tja Dios te,
tzaꞌn tten binchben te.
2 Pero xi ttzakꞌweꞌn Jesús:
—¿Mape cyile tcyakil jlu?
Ax toc cxel nmaꞌne cyeye,
mlay cyaj ten abj tibaj juntl abj,
tcyakil cbel tilj.
Ke señ naꞌnxtok tjapun mancbil tkꞌijlalil
3 E jeꞌxtzun twi witz Olivos,
ex tejtzun tcub keꞌ Jesús e pon lakꞌeꞌ ke t-xnakꞌtzben ttxlaj junx cye,
ex xi cymaꞌn te:
—Kꞌmantza keye,
¿jtoj ban tjapun tcyakil jlu ex alcye señ tzul chꞌixtok tula ex chꞌixtok tjapun baj tkꞌijlalil?
Che chi.
4 Xi ttzakꞌweꞌn Jesús:
—Ten cycwente cyiꞌje tuꞌn miꞌn cycub sbuꞌne cyuꞌn xjal.
5 Porque nimcu xjal che ul ex cꞌoquel cykꞌon cyib ic tzaꞌn weye ex oc cymaꞌ:
Akine ju Crist at woclene tuꞌn Dios,
che chilo;
ex nimcu xjal che bel cysbuꞌn.
6 Oc cybiꞌye oc toc kꞌoj ex oc cybiꞌye tkanil tiꞌj kꞌoj,
cycwentin oc cyibe tuꞌn miꞌn cyjaw secꞌpaje,
porque il tiꞌj tuꞌn tjapun tcyakil jlu;
pero myatzun a mancbil tkꞌijlalil tuꞌn tjapun baj tcyakil.
7 Porque ke xjal tuj jun nasyon che kꞌojlel tiꞌj juntl nasyon,
ex che kꞌojlel ke tnam cyiꞌj mastl tnam;
ex nok jachak tzul txꞌuꞌj yabil ex weꞌyaj ex cyaknajnab.
8 Tcyakil jlu atzun tnejel cꞌixbisabl.
9 Entons che xel kꞌoꞌne tuj cykꞌab xjal tuꞌn cybaj cꞌixbisaꞌne,
ex che bel byoꞌne cyuꞌn,
ex che elel icꞌune cyuꞌn cycyakil xjal tuꞌn tlaj ocslal keye wiꞌje.
10 Tuꞌntzun jlu nimcu xjal cyjel cycolin cyocslabl;
ax ke cyucꞌil che oquel te aj kꞌoj cyiꞌj ex cꞌelel cyicꞌun cyib cyxolx.
11 Ex nimcu xjal che ul,
cꞌoquel cykꞌon cyib te t-sanjel Dios pero mya ax toc cyuꞌn,
ex nimcu xjal che bel cysbuꞌn.
12 Ex tuꞌnju otok chmet il,
nimcu xjal miꞌn tentl cycꞌujlalil cyxolx.
13 Pero alcye cucx ma tzicꞌx tuꞌn ex mintiꞌ ma cub numj,
atzunju oc cletel.
14 Aju tkanil baꞌn lu tiꞌj tcawbil Dios cxel pacbet tuj tcyakil twitz txꞌotxꞌ tuꞌntzun tchicꞌbanjtz ju yol lu cye cycyakil nasyon;
maxitzun tzul mancbil tkꞌijlalil.
15 At jun yol cyaj ttzꞌiban Daniel aju t-sanjel Dios;
cꞌoquex cykꞌoꞌn xjal jun tilbilal icꞌbilxix ax tuj tja Dios,
chi Daniel.
Alcye ma jaw schꞌinte jlu,
tzꞌelx tnicꞌ tiꞌj.
Cyjaꞌtzun oc cylonteye tocx tilbilal lu tuj lugar xjan,
16 entons ke xjal ateꞌ tuj txꞌotxꞌ Judey,
cyxi ok twi witz.
17 Alcye jun xjal tjax twi ja,
oc tcuꞌtz miꞌn tzꞌocx tuj tja tuꞌn tetz tiꞌn jun tiꞌxti;
18 ex alcye jun xjal at tuj cojbil,
miꞌn tzꞌajtz meltzꞌaj kꞌilte ttxoꞌw.
19 Pero becꞌbil cywitz ke xuꞌj chꞌixtok tul itzꞌj cyal tuj tkꞌijlalil tzul,
ex becꞌbil cywitz ke xuꞌj cucx cychꞌuꞌn cyal.
20 Cyjaꞌtzun,
che naꞌne Dios tuꞌntzun miꞌn cyel oke tuj jbalil ex tuj kꞌij te ojlabl;
21 porque tzul jun cꞌixbisabl maꞌxix,
bajx tzaj jun maj icju atxix tej tbant twitz txꞌotxꞌ,
ex mlay tzaj juntl maj ic tzaꞌn jlu.
22 Nokwit mintiꞌ tuꞌn tajtz lakꞌeꞌ tiꞌj tkꞌijlalil cꞌixbisabl,
miwtlo jun xjal tuꞌn tcyaj clet;
pero tuꞌn cylaj keju scꞌoꞌmaj tuꞌn Dios,
cꞌajetz lakꞌeꞌ tiꞌj tkꞌijlalil cꞌixbisabl.
23 Ka at jun xjal ma kꞌmante cyeye:
Lu Crist lu aju at tulel,
ka chi,
ex ka lu at ma chixin,
ka chi,
miꞌn txi cyocslaꞌne tyol.
24 Porque che ul xjal cꞌoquel cykꞌon cyib ic tzaꞌn Crist ke,
pero mya ax toc cyuꞌn,
ex che ul xjal cꞌoquel cykꞌon cyib te t-sanjel Dios,
pero mya ax toc cyuꞌn;
ex oc cybinchaꞌ ke señ maꞌxix ex ke binchben nim cyipumal tuꞌn cysbun cyiꞌj xjal,
ax icx oc cyajbe tuꞌn cysbun cyiꞌj keju scꞌoꞌmaj ke tuꞌn Dios,
nokwit at tumel.
25 Ya ma txi nmaꞌne tcyakil cyeye naꞌnxtok tul canun tcyakil jlu.
26 Cyjaꞌtzun,
ka ma cyma xjal:
Lu Crist at tuj lugar mintiꞌ cynajbil xjal tuj,
ka che chi,
miꞌn cheꞌxe queꞌyilte te;
ex ka ma cyma:
Lu Crist tocx tuja,
ka che chi,
miꞌn txi cyocslaꞌne cyyol.
27 Porque ic tzaꞌn xleꞌlaj cyaꞌj in jaw tuj tjawitz kꞌij ex in pon koptzꞌaj tuj telex kꞌij,
ictzun tten chin ule,
akine scꞌoꞌmaj kine tuꞌn Dios tuꞌn ntene cyucꞌil xjal.
28 Porque jatum taꞌ t-ximlal cyimni,
atzun che chmetel ke cꞌutz.
Tzaꞌn tten tzul Jesucrist juntl maj
29 Tbajlenxitzun yajbil tuj tkꞌijlalil tzul,
cꞌoquel klolj twitz kꞌij,
ex aju xjaw mlay cꞌant t-spicꞌumal,
ke cheꞌw twitz cyaꞌj che tzajel tzꞌak,
ex ke tipumal cyaꞌj che yucchtel.
30 Entons ctzajel yecꞌun jun techal tuj cyaꞌj tuꞌn wule,
akine scꞌoꞌmaj kine tuꞌn Dios tuꞌn ntene cyucꞌil xjal,
octzun che jawil okꞌ cycyakil xjal tuj junjun tnam twitz txꞌotxꞌ,
ex oc cyilaꞌ oc ntzaje tibaj muj twitz cyaꞌj tucꞌil wipumale nim ex in koptzꞌaj wiꞌje tuꞌn nspicꞌumale.
31 Che tzajel nsamaꞌne ke n-anjele,
cꞌoquel kꞌajtzaꞌn chun cyuw,
ex keju scꞌoꞌmaj wuꞌne che oquel chmoꞌn cyuꞌn anjel,
che tzajel chmoꞌn tuj tcyakil twitz txꞌotxꞌ ex max ttxaꞌnpun txꞌotxꞌ.
32 Cyiꞌmele techal tiꞌj tkan higo:
Oc in tzaj t-xul,
nneꞌl cynicꞌe tiꞌj chꞌix tul ttzi jbalil.
33 Ax icxtzun cyeye,
oc cylonteye tcyakil jlu,
tzꞌelx cynicꞌe tiꞌj,
nikayin taꞌ tkꞌijlalil tuꞌn wule,
mer ic tzaꞌn otok chin pone ttzi ja.
34 Ax toc cxel nmaꞌne cyeye,
naꞌnxtok cycyim ke xjal ateꞌ tuj tkꞌijlalil jaꞌlo oc tjapun tcyakil jlu.
35 Ate cyaꞌj cnajel tucꞌix txꞌotxꞌ,
atzun we nyol mlay naj.
36 Pero alcye kꞌij ex alcye or tuꞌn wule,
mi aꞌl jun xjal bilte,
mi ke anjel tuj cyaꞌj mintiꞌ biꞌn cyuꞌn,
ax icx weye mintiꞌ biꞌn wuꞌne,
akine Tcꞌwaꞌl Dios.
Oꞌcx Nmane baꞌn tuꞌn.
37 Aju tkꞌijlalil oc wule,
akine scꞌoꞌmaj kine tuꞌn Dios tuꞌn ntene cyucꞌil xjal,
ic tten ic tzaꞌn tuj tkꞌijlalil tej tten Noé.
38 Porque tuj tkꞌijlalil tej naꞌnxtok ttzaj kꞌekab,
in che waꞌn xjal ex in che cꞌan,
in che mojeꞌ xinak tucꞌil cyxuꞌjil ex ke xuꞌj tucꞌil cychmil,
cucxtok cybinchante jlu tuj kꞌij tej tocx Noé tuj matij barc;
39 ex mintiꞌtok toc cycwent tiꞌj tej ttzaj kꞌekab cyibaj;
cycyakiltzun e jeꞌx kꞌiꞌn tuꞌn aꞌ.
Icxtzun cbajelju oc wule akine scꞌoꞌmaj kine tuꞌn Dios tuꞌn ntene cyucꞌil xjal.
40 Ka at cabe xjal tuj cojbil,
jun cxel kꞌiꞌn ex juntl cyjel kꞌoꞌn.
41 Ka at cabe xuꞌj in che cheꞌn tiꞌj cyaꞌ,
jun cxel kꞌiꞌn ex juntl cyjel kꞌoꞌn.
42 Cyjaꞌtzun che xkꞌukine,
porque mintiꞌ biꞌn cyuꞌne alcye or tzul Cyajawe.
43 Pero tzꞌelx cynicꞌe tiꞌj yol lu,
nokwit biꞌn tuꞌn tajaw ja alcye or tzul elekꞌ,
jaculo cub ten xkꞌukil ex mlay txi tkꞌoꞌn ambil tuꞌn tocx tjakoꞌn elekꞌ tja.
44 Cyjaꞌtzun icx cyeye cybincham cytene;
porque chin ule tuj or aju mya ximan cyuꞌne,
akine scꞌoꞌmaj kine tuꞌn Dios tuꞌn ntene cyucꞌil xjal.
Aju majen in bant takꞌun tuꞌn ex aju majen mintiꞌ in bant takꞌun
45 Aju majen in bant takꞌun tuꞌn ex at tnabl,
cꞌoquel kꞌoꞌn tuꞌn tpatrón te cwentil cye keju ateꞌ tuj tja,
tuꞌn t-xi kꞌot cywa oc tpon or.
46 At tzalajbil teju majen lu ka in tbinchaꞌn alcye takꞌun oc tul tpatrón.
47 Ax toc cxel nmaꞌne cyeye,
cꞌoquel kꞌoꞌn majen lu tuꞌn tpatrón te cwentil te tcyakilju at te patrón.
48 Pero ka mya baꞌn ju majen lu,
ex ka ma tma tuj tanmi:
Yaj tzul we npatrón,
ka chi,
49 ex ka ma tzꞌoc ten cꞌixbisal cye mastl majen,
ex ka ma tzꞌoc ten waꞌl ex cꞌal cyucꞌil ke cꞌal kꞌeꞌn,
50 tzultzun tpatrón majen lu tuj kꞌij mintiꞌ in ayon tiꞌj,
ex tuj or mintiꞌ biꞌn tuꞌn;
51 ex cbel kꞌoꞌn nim tcastiw majen lu tuꞌn tpatrón,
ex atzun cxel kꞌoꞌn cyxol ke xmletzꞌ;
atzun ctzajel okꞌel ex atzun ckitxꞌitxꞌil t-xe cyeꞌ xjal.