In tmaꞌn Jesús ka cbel xitj tja Dios
13
Tej tetz Jesús tuj tja Dios,
xi tmaꞌn jun t-xnakꞌtzben te:
—Xnakꞌtzal,
quina ke abj tbanilxix ex ke ja tbanilxix,
chi t-xnakꞌtzben.
2 Pero xi tmaꞌn Jesús te:
—¿Mape tzꞌoc tqueꞌyina ke nmak ja lu?
Mlay cyaj ten abj tibaj juntl abj,
tcyakil cbel tilj.
Ke señ naꞌnxtok tjapun mancbil tkꞌijlalil
3 E jeꞌxtzun twi witz Olivos tbi,
jlajtzi tja Dios;
tejtzun tcub keꞌ Jesús,
xi tkanin Pedro te,
tucꞌix Jacobo,
tucꞌix Juan,
tucꞌix Andrés cyjunalx:
4 —Kꞌmantza keye,
che chi,
¿jtoj ban tjapun jlu?
¿Ex alcye jun señ tzul chꞌixtok tjapun tcyakil jlu?
5 Xi ttzakꞌweꞌn Jesús:
—Ten cycwente cyiꞌje tuꞌn miꞌn cycub sbuꞌne cyuꞌn xjal.
6 porque che ul nimcu xjal,
ax nbiye cꞌoquel cykꞌoꞌn te cybi,
in cymaꞌn:
Akine ju Crist,
che chilo;
ex nimcu xjal che bel sbuꞌn cyuꞌn.
7 Octzun cybinteye oc toc kꞌoj ex ka tkanil tiꞌj kꞌoj,
miꞌn che jaw secꞌpaje,
porque ilxix tiꞌj tuꞌn tjapun tcyakil jlu,
pero myatzun a mancbil tkꞌijlalil tuꞌn tjapun baj tcyakil.
8 Porque che oquel ten nasyon kꞌojlel cyiꞌj txkantl nasyon,
ex ke tnam che oquel ten kꞌojlel cyiꞌj txkantl tnam;
ex nok jachak tzul cyaknajnab,
tzul weꞌyaj,
ex che jawil tilj xjal;
tcyakil jlu atzun tnejel cꞌixbisabl.
9 Atzun cyeye ten cycwente cyiꞌje;
porque che xel kꞌoꞌne tuj cykꞌab aj sanjelal,
ex oc che bajel asyaline cyuj ja te cꞌulbil.
Che xel kꞌiꞌne cywitz ke gobernador ex cywitz ke rey tuꞌn nlaje tuꞌn cyoque te testiw wiꞌje cywitz.
10 Pero naꞌnxtok tul mancbil tkꞌijlalil ilxix tiꞌj tuꞌn t-xi pacbet tkanil jun colbil cye xjal cyuj cycyakil nasyon.
11 Pero oc cytzyete cyuꞌn xjal tuꞌn cyxi kꞌiꞌne cywitz aj sanjelal,
miꞌn baj cycꞌuꞌje tiꞌj alcye tuꞌn t-xi cymaꞌne,
ex miꞌn che ximane tiꞌj,
porque alcye ctzajel tmaꞌn Dios cyeye,
atzunju cxel cymaꞌne oc cytzyete;
porque mya akeye che yolil,
ate Xewbaj Xjan c-yolil.
12 Che xel kꞌoꞌn ke xjal cyuꞌn cyerman tuꞌn cycyim;
icx ke cꞌwaꞌlbaj che xel kꞌoꞌn cyuꞌn cyman tuꞌn cycyim;
ex ke cꞌwaꞌlbaj che oquel ten kꞌojlel cyiꞌj cyman ex che xel cykꞌoꞌn tuꞌn cycub byoꞌn.
13 Ex che elel icꞌune cyuꞌn cycyakil xjal tuꞌn tlaj ocslal keye wiꞌje,
pero alcyeju cucx ma tzicꞌx tuꞌn ex mintiꞌ ma cub numj,
atzunju oc cletel.
14 At jun yol cyaj ttzꞌiban Daniel aju t-sanjel Dios.
Cꞌoquex cykꞌoꞌn xjal jun tilbilal icꞌbilxix ax tuj tja Dios,
chi Daniel.
Alcye ma jaw schꞌinte jlu,
tzꞌelx tnicꞌ tiꞌj.
Cyjaꞌtzun,
oc cylonteye tocx tilbilal lu tuj lugar jatum mya kꞌoꞌn te,
entons ke xjal ateꞌ tuj txꞌotxꞌ Judey,
cyxi ok twi witz.
15 Ex ka at jun xjal tjax twi tja oc tpon kꞌij lu,
oc tcuꞌtz,
miꞌn tzꞌocx kꞌil jun tiꞌxti tuj tja;
16 ex ka at jun xjal tuj cojbil,
miꞌn tzꞌajtz meltzꞌaj tja kꞌil t-xbalun.
17 Becꞌbil cywitz ke xuꞌj chꞌixtok tul itzꞌj cyal tuj tkꞌijlalil tzul,
ex becꞌbil cywitz ke xuꞌj cucx cychꞌuꞌn cyal.
18 Cyjaꞌtzun,
che naꞌne Dios myawt tuj jbalil tuꞌn cyel oke.
19 Porque tuj tkꞌijlalil tzul,
tzul jun cꞌixbisabl nimxix,
bajx tzaj jun cꞌixbisabl ic tzaꞌn jlu atxix t-xe tnejel tej tbant tcyakil tuꞌn Dios,
ex mlay tzaj juntl maj.
20 Porque nokwit mintiꞌ tuꞌn tajtz lakꞌeꞌ tiꞌj tkꞌijlalil cꞌixbisabl tuꞌn Kman,
miwtlo jun xjal tuꞌn tcyaj ankꞌin;
pero tuꞌn cylaj ke xjal scꞌoꞌmaj tuꞌn Dios,
cꞌajetz lakꞌeꞌ tiꞌj tkꞌijlalil cꞌixbisabl.
21 Entons ka at jun xjal ma tzaj tmaꞌn cyeye:
Lu Crist at tzalu,
aju at tulel ka chi,
ex ka lu Crist taꞌ ma chixin ka chi,
miꞌn txi cyocslaꞌne tyol.
22 Porque che ul ke xjal nicꞌal yol,
cꞌoquel cykꞌon cyib ic tzaꞌn Crist ke,
ex cꞌoquel cykꞌon cyib ic tzaꞌn t-sanjel Dios;
ex che bantel ke señ cyuꞌn cyucꞌix ke binchben nim cyipumal,
tuꞌn cysbunjtz ke xjal cyuꞌn,
ax icx jacu cyajbe tuꞌn cysbun cyiꞌj keju scꞌoꞌmaj tuꞌn Dios,
nokwit at tumel.
23 Cyjaꞌtzun,
ten cycwente cyiꞌje;
lu ma txi nmaꞌne tcyakil cyeye naꞌnxtok tul canun jlu.
Tzaꞌn tten tzul Jesucrist juntl maj
24 Tbajlenxitzun yajbil tuj tkꞌijlalil tzul,
cꞌoquel klolj twitz kꞌij,
ex ju xjaw mlay cꞌant t-spicꞌumal.
25 Ke cheꞌw che tzajel tzꞌak twitz cyaꞌj,
ex keju at cyipumal tuj cyaꞌj oc che yucchtel.
26 Octzun cyilaꞌ xjal oc ntzaje tuj muj,
akine scꞌoꞌmaj kine tuꞌn Dios tuꞌn ntene cyucꞌil xjal,
ex oc cyilaꞌ at nim wipumale ex in koptzꞌaj wiꞌje.
27 Che tzajeltzun nsamaꞌne ke n-anjele,
ex cbajel cychmoꞌn keju scꞌoꞌmaj wuꞌne tuj tcyakil twitz txꞌotxꞌ,
ctzajelx keꞌ ttxaꞌnpun txꞌotxꞌ ex cpol baj max t-xe cyaꞌj.
28 Cyiꞌmele nicꞌ tiꞌj tkan higo:
Oc in chaꞌxix tkꞌab,
ex oc in tzaj t-xul,
nneꞌl cynicꞌe tiꞌj in lakꞌeꞌx ttzaj ttzi jbalil.
29 Icxtzun cyeye,
oc cylonteye oc tjapun tcyakil jlu,
tzꞌelx cynicꞌe tiꞌj,
nikayin taꞌ tkꞌijlalil tuꞌn wule,
mer ic tzaꞌn otok chin pone ttzi ja.
30 Ax toc cxel nmaꞌne cyeye,
ke xjal ateꞌ tuj tkꞌijlalil jaꞌlo naꞌnxtok cycyim oc tjapun tcyakil jlu.
31 Cnajel cyaꞌj tucꞌix txꞌotxꞌ,
atzunwe nyol mlay naj.
32 Pero mi aꞌl jun bilte alcye kꞌij ex alcye or tuꞌn wule;
mi ke anjel ateꞌ tuj cyaꞌj mintiꞌ biꞌn cyuꞌn,
ax icx weye Tcꞌwaꞌl Dios kine mintiꞌ biꞌn wuꞌne.
Oꞌcx te Dios Mambaj baꞌn tuꞌn.
33 Cyjaꞌtzun,
ten cycwente cyiꞌje,
che xkꞌukine ex che naꞌne Dios;
porque mintiꞌ biꞌn cyuꞌne jtoj ban tjapun tkꞌijlalil.
34 Ic tten ic tzaꞌn jun xjal xiꞌ tuj jun tbe najchak;
naꞌnxtok tetz tuj tja,
cyaj tkꞌoꞌn cyoclen ke tmajen ex xi tmaꞌn te teyle junjun alcye takꞌun,
ex cyaj tmaꞌn te cwentil ttzi ja tuꞌn t-xkꞌukin.
35 Cyjaꞌtzun,
che xkꞌukine porque mintiꞌ biꞌn cyuꞌne jtoj ban tul ju tajaw ja,
ka otok koc yupj oc tul,
ka te tmij akꞌbil,
ka oc ttzaj okꞌ tzecꞌ,
ex ka chꞌixtok kskix.
36 Cyjaꞌtzun,
che xkꞌukine,
mya yajcu tzul cuchiwt miꞌn che cnete tuꞌn in che tane.
37 Aju in xi nmaꞌne cyeye,
cye cycyakil in xi nmaꞌne:
Che xkꞌukine.