Aju tolsabl tuꞌn kcub tzꞌak tuj il
17
Xitzun tmaꞌn Jesús cye t-xnakꞌtzben:
—Mlay tzicꞌx tiꞌj,
atlo cbel kꞌonte tolsabl tuj cybeye tuꞌn cycub tzꞌake tuj il;
pero becꞌbil twitz aju xjal cbel kꞌonte.
Lucas 17.1-19
2 Mas baꞌnwtlo tuꞌn toc cꞌalet jun ma tij cyaꞌ tjakꞌ tkul ex tuꞌn t-xi xoꞌt tuj mar,
ex mya tuꞌn tcub tzꞌak jun tal chꞌin tuj il tuꞌn.
3 Ten cycwente cyiꞌje.
Ka at jun mya baꞌn ma tbincha termaniya tiꞌja,
cawinxa;
ex ka ma tzꞌajtz tiꞌj tanmi,
najsama til.
4 Ka ma tbincha wuk maj mya baꞌn tiꞌja tuj jun kꞌij,
ex ka ma tzul tucꞌila wuk maj tuj jun kꞌij ex ma tma:
Najsama wile,
mya baꞌn ma nbinchaye tiꞌja,
ka chi,
najsama til.
Nim jacu bant kuꞌn ka at kocslabl
5 Xitzun cymaꞌn apostl te Kajaw:
—Kꞌontza mastl kocslable.
6 Atzunte Kajaw xi tmaꞌn cye:
—Nokwit at cyocslable masque nok chꞌin ic tzaꞌn jun tal twitz mostaza,
jacwitlo txi cymaꞌne te tzeꞌ lu:
Bakoꞌnctz tiba tzalu ex awaꞌn cuꞌx tiba tuj mar;
ex jaculo txi tniman tzeꞌ cyyole.
Tzaꞌn tten tuꞌn tajben jun majen
7 Ic tzaꞌn cyeye ka at jun cymajene in chꞌoquin ex ka in cwentin wacẍ tuj cojbil,
oc tajtz meltzꞌaj cymajene ex oc tul ja,
¿jacupe txi cymaꞌne te:
Toctza ex keꞌcuya tuꞌn twaꞌna?
8 Mlay txi cymaꞌne icju,
oꞌcx cxel cymaꞌne:
Bincham ttena tuꞌn tbant nwaye,
ex tuꞌn ttzaj tlakꞌbaꞌna;
octzun nbaj waꞌne ex oc nbaj cꞌane,
maxitzun cwaꞌl teya ex ccꞌala,
che chiloye te.
9 ¿Jacupe txi cykꞌoꞌne chjonte te majen tuꞌnju otok tbincha aju otok txi cymaꞌne te?
Tuj nnable mlay.
10 Cyjaꞌtzun cxel nmaꞌne cyeye,
oc tbaj bant tcyakil aju otok txi kꞌmaꞌn cyeye,
cymanxe:
Majen koꞌye mintiꞌ in bant-xix kuꞌne,
porque oꞌcx ma bant kuꞌne aju tzaj kꞌmaꞌn keye.
Laj xinak at txꞌaꞌc cyiꞌj aju mintiꞌ kꞌanbil tiꞌj, e banix tuꞌn Jesús
11 Cyjaꞌtok t-xiꞌ Jesús tuj Jerusalén,
icꞌx t-xol txꞌotxꞌ Samaria tucꞌil txꞌotxꞌ Galiley.
12 Tej tpon tuj jun tal tnam,
at laj xinak at txꞌaꞌc cyiꞌj aju mintiꞌ kꞌanbil tiꞌj,
e tzaj canul tiꞌj,
pero e cub weꞌ najchak,
13 ex e jaw schꞌin:
—Jesús,
Xnakꞌtzal,
kꞌakꞌantz tcꞌuꞌja kiꞌje,
che chi.
14 Tejtzun t-xi tqueꞌyin Jesús ke xjal txꞌaꞌc cyiꞌj,
xi tmaꞌn cye:
—Cyxiꞌye,
ex cyyecꞌunx cyibe cye pal cye judiy.
Ex tej cyjaꞌtok cyxiꞌ tuj be,
e banix.
15 Tejtzun tnaꞌnte jun cye keju otok che banix,
ajtz meltzꞌaj in schꞌin wen,
in jaw tnimsaꞌn tbi Dios.
16 Ex cub ẍmejeꞌ t-xe tkan Jesús tejxi tpon tacl tibaj twitz twitz txꞌotxꞌ,
ex xi tkꞌoꞌn chjonte te.
Ex aju xjal lu,
aj Samaria.
17 Atzunte Jesús xi tmaꞌn:
—¿Myapetzun laj cybet keju ma che banix?
¿Yajtzun keju belajtl jatumtzun ateꞌ ke?
18 ¿Oꞌcxpe jun stranjer xjal ma tzꞌajtz meltzꞌaj kꞌolte chjonte te Dios?
19 Ex xi tmaꞌn Jesús te:
—Weꞌctza ex bet-xa;
tuꞌnju ma tocslaya ma banixa,
chi Jesús.
Tzaꞌn tten tzul tcawbil Dios
20 Xi cykanin parisey te Jesús jtoj ban tul tcawbil Dios;
atzunte Jesús xi ttzakꞌweꞌn:
—Aju tcawbil Dios mya kꞌanchaꞌl oc tul;
Lucas 17.20-37
21 ex mlay cyma xjal:
Lu lu,
ex ka,
max taꞌ ma chixin,
che chiwt;
porque aju tcawbil Dios ya at cyxole.
22 Xitzun tmaꞌn Jesús cye t-xnakꞌtzben:
—Tzul tkꞌijlalil oc cyajbeye tuꞌn wule jun kꞌij cyucꞌile,
akine scꞌoꞌmaj kine tuꞌn Dios tuꞌn ntene cyucꞌil xjal,
pero mlay chin cyile.
23 Ctzajel cymaꞌn xjal cyeye:
Lu at tzalu,
ex ka,
lu taꞌ ma chixin.
Pero miꞌn cheꞌxe,
ex miꞌn che oc lpeꞌye cyiꞌj.
24 Porque ic tzaꞌn xleꞌlaj cyaꞌj in jaw koptzꞌaj t-xe cyaꞌj ex in pon tuj juntl pacꞌ,
ictzun tten tkꞌijlalil oc wule juntl maj,
akine scꞌoꞌmaj kine tuꞌn Dios tuꞌn ntene cyucꞌil xjal.
25 Pero tnejel ilxix tiꞌj tuꞌn ticꞌx nimcu wuꞌne,
ex tuꞌn wel icꞌune cyuꞌn xjal ateꞌ tuj tkꞌijlalil jaꞌlo.
26 Ic tzaꞌn o baj tuj tkꞌijlalil tej tten Noé,
ax icxtzun cbajel tuj tkꞌijlalil oc wule,
akine scꞌoꞌmaj kine tuꞌn Dios tuꞌn ntene cyucꞌil xjal.
27 In che waꞌn xjal ex in che cꞌan;
in cnet cyxuꞌjil xinak ex in cnet cychmil xuꞌj,
ex cucx in cybinchaꞌn xjal jlu tej tocx Noé tuj barc;
tzajtzun kꞌekab ex e baj naj cycyakil.
28 Ax icxtzun o baj tuj tkꞌijlalil tej tten Lot;
in che waꞌn xjal ex in che cꞌan,
in che lakꞌon ex in che cꞌayin,
in che awan ex in che binchan cyja;
29 pero ax kꞌij tej tetz Lot tuj tnam Sodoma tzaj kꞌakꞌ tuj cyaꞌj tucꞌix tal abj azufre,
ex e baj naj cycyakil.
30 Ictzun cbajel tuj kꞌij oc wule juntl maj,
akine scꞌoꞌmaj kine tuꞌn Dios tuꞌn ntene cyucꞌil xjal.
31 Tuj kꞌij oc wule,
ka at jun xjal tjax twiꞌ tja,
miꞌn cuꞌtz kꞌilte aju at te tuj tja;
ex ka at jun xjal taꞌ tuj cojbil,
ax icx miꞌn tzꞌajtz meltzꞌaj tja.
32 Cynaꞌntze ti o baj tiꞌj t-xuꞌjil Lot.
33 Alcye jun xjal oꞌcx toc tcꞌuꞌj tiꞌj tuꞌn tten tchwinklal twitz txꞌotxꞌ,
mlay tcamba aju chwinklal in tzaj tkꞌoꞌn Dios;
ex alcye jun xjal tkꞌon tib tuꞌn tnaj tchwinklal twitz txꞌotxꞌ,
oc tcambaꞌ aju chwinklal in tzaj tkꞌoꞌn Dios.
34 Cxel nmaꞌne cyeye,
cabe xjal in che tan twiꞌ junx watbil tuj konicꞌan oc wule;
jun cxel kꞌiꞌn,
ex jun cyjel kꞌoꞌn.
35 Cabe xuꞌj in che cheꞌn junx;
jun cxel kꞌiꞌn,
ex jun cyjel kꞌoꞌn.
36 [Cabe xinak in che akꞌnan tuj cojbil;
jun cxel kꞌiꞌn,
ex jun cyjel kꞌoꞌn.]
37 Atzun cye xnakꞌtzben xi cykanin:
—¿Jatum cbajel jlu,
Tat?
Xi ttzakꞌweꞌn Jesús:
—Jatum taꞌ t-ximlal cyimni,
atzun che chmetel ke cꞌutz,
chi Jesús.