2 Ex tma Jesús:

—Attok jun jwes tuj jun tnam,

mintiꞌ in xob twitz Dios ex mintiꞌ tilwi jun xjal te.

3 Ax icx at jun meba xuꞌj tujx ju tnam lu,

cucx in xi aj tucꞌil jwes tuꞌn ttzaj binchaꞌn tiꞌj tuꞌn tclet twitz aj kꞌoj tiꞌj.

4 Atzunte jwes elaꞌ maj mintiꞌ xi tbiꞌn tyol xuꞌj;

pero yajxitl cub t-ximan:

Masque mintiꞌ in chin xobe twitz Dios ex mintiꞌ tilwi jun xjal tuj nwitze,

5 pero tuꞌnju cucx in wulin meba xuꞌj lu wiꞌje,

cxel nbinchaꞌne tiꞌj,

tuꞌntzun miꞌn tultl sicsal weye,

chi jwes.

6 Xitzun tmaꞌn Kajaw cye t-xnakꞌtzben:

—Atzun jlu o tma aju jwes mya baꞌn.

7 ¿Yajtzunlo te Dios,

mlaypelo tzaj tbiꞌn cyyol keju scꞌoꞌmaj tuꞌn,

akeju in che cubsan twitz kꞌijtl ex konicꞌan?

¿Ex mlaypelo che tzaj tbiꞌn naj?

8 Cxel nmaꞌne cyeye:

Juratlo che tzajel tbiꞌn.

Pero octzun wule juntl maj,

akine scꞌoꞌmaj kine tuꞌn Dios tuꞌn ntene cyucꞌil xjal,

¿atxpelo cyocslabl xjal twitz txꞌotxꞌ?

9 Ax icx xi tmaꞌn Jesús juntl techal cye junjun xjal,

akeju tuj cynabl ka tzꞌaklxix ke ex nneꞌl cyicꞌun ke txkantl.

Chi Jesús cyjaꞌ:

10 —At cabe xinak e jeꞌx naꞌl Dios tuj tja Dios,

jun parisey ex jun peyil pwak.

11 Aju parisey waꞌl tten tej toc ten naꞌl Dios ex tma cyjaꞌ:

Dios,

cxel nkꞌoꞌne chjonte teya porque mya ic kine ic tzaꞌn ke txkantl xjal,

elekꞌ ke,

mya baꞌn ke,

aj pajil ke;

ex mya ic kine ic tzaꞌn jun peyil pwak lu.

12 Cab maj in cub nyoꞌne weꞌyaj tuj seman,

ex in xi nkꞌoꞌne tlajiꞌn teya tiꞌj tcyakilju in ncambaꞌne,

chi parisey.

13 Atzunte peyil pwak najchak xi weꞌ,

mintiꞌ o tajbe tuꞌn tjaw tqueꞌyin twitz cyaꞌj,

oꞌcx oc tkꞌoꞌn tkꞌab ttzi t-xuꞌc,

ex tma cyjaꞌ:

Dios,

cuchiwt tuꞌn ttzaj kꞌakꞌan tcꞌuꞌja wiꞌje,

aj il kine,

chi peyil pwak.

14 Cxel nmaꞌne cyeye:

Aju peyil pwak lu xiꞌ tja najsaꞌmajtl til;

atzunte parisey mintiꞌ;

porque alcye jun xjal ma jaw tniman tib,

cꞌoquel kꞌoꞌn te chꞌin;

ex alcye ma tzꞌoc tkꞌon tib te chꞌin,

cjawil nimsaꞌn.

15 Ex tzaj cyiꞌn xjal ke cꞌwaꞌl twitz Jesús tuꞌn cyoc tmacoꞌn;

tejtzun cyqueꞌyinte ke t-xnakꞌtzben jlu,

e mayet ke xjal cyuꞌn,

akeju e tzaj kꞌinte cye cꞌwaꞌl.

16 E tzajtzun ttxcoꞌn Jesús ke t-xnakꞌtzben,

ex tma:

—Cykꞌonxe ambil cye cꞌwaꞌl tuꞌn cytzaj wucꞌile ex miꞌn cheꞌx cymayoꞌne;

porque aju tcawbil Dios cyecye xjal akeju nnoꞌc cykꞌon cyib ic tzaꞌn ke cꞌwaꞌl.

17 Ax toc cxel nmaꞌne cyeye,

alcye mintiꞌ ma tzꞌoc ic tzaꞌn jun cꞌwaꞌl tuꞌn t-xi tniman tcawbil Dios,

mlay bant tuꞌn tocx tuj.

18 At jun nejenel cye xjal xi tkanin te Jesús cyjaꞌ:

—Xnakꞌtzal baꞌn,

¿ti oc nbinchaꞌye tuꞌn ncambanteye chwinklal te jumajx?

19 Xi tmaꞌn Jesús te:

—¿Tikuꞌn in chin oc tkꞌoꞌna te baꞌn?

Mi aꞌl jun xjal baꞌn,

oꞌcxte Dios baꞌn.

20 Baꞌn ke mandamyent tuꞌna:

Miꞌn cybinchaye aj pajil;

miꞌn che biyune;

miꞌn che elkꞌane;

miꞌn jaw cynicꞌane yol tiꞌj juntl;

cynimanxe cymane ex cytxuye,

chi tuj Tuꞌjil.

21 Atzunte nejenel xi tmaꞌn:

—Tcyakil jlu o japun wuꞌne ntzajlenxe matok cꞌwaꞌlx kine.

22 Tej tbinte Jesús jlu,

xi tmaꞌn te:

—At jun atx taj teya:

Cꞌaꞌyinxa tcyakilju at teya,

ex kꞌonxa cye meba,

cteltzun tkꞌinumabla tuj cyaꞌj;

ex tzaja,

lpeꞌca wiꞌje.

23 Tej tbinte nejenel tcyakil jlu,

tzaj nimxix tbis,

porque nimtok tkꞌinumabl at.

24 Ex tej tqueꞌyinte Jesús in bisunxix nejenel,

tma:

—Cyuw tuꞌn cyocx tuj tcawbil Dios keju at cykꞌinumabl.

25 Mas jurat jacu tzꞌex jun chej camey tuj toyꞌ jun bak,

twitzju tuꞌn tocx jun kꞌinun tuj tcawbil Dios.

26 Cymatzun keju e binte:

—Ka icju,

¿alcyetzun jacu clet?

27 Ex tma Jesús cye:

—Aju mlay bant cyuꞌn xjal,

in bant tuꞌn Dios.

28 Xitzun tmaꞌn Pedro te:

—Tat,

quina koꞌye ma cyaj kkꞌoꞌne tcyakilju at keye ex ma ko oc lpeꞌye tiꞌja.

29 Ex tma Jesús cye:

—Ax toc in xi nmaꞌne cyeye,

ka at jun xjal ma cyaj tkꞌoꞌn tja,

ex ka tman,

ex ka ttzic ex ka titzꞌin,

ex ka t-xuꞌjil,

ex ka tcꞌwaꞌl,

tuꞌn tlaj tcawbil Dios,

30 oc tcꞌmaꞌ nimxix t-xel tuj tkꞌijlalil jaꞌlo,

ex tuj tkꞌijlalil tzul oc tcꞌmaꞌ tchwinklal te jumajx.

31 E jeꞌx tucꞌin Jesús keju cablaj t-xnakꞌtzben cyjunalx ex tma cye:

—Cybintze,

jaꞌlo ko jawix tuj tnam Jerusalén,

ex cjapunel tcyakilju tzꞌibamaj wiꞌje cyuꞌn t-sanjel Dios,

akine scꞌoꞌmaj kine tuꞌn Dios tuꞌn ntene cyucꞌil xjal.

32 Chin xel kꞌoꞌne tuj cykꞌab stranjer xjal,

ex chin oquel xmayine cyuꞌn,

ex chin oquel yasoꞌne,

ex cꞌoquel tzuban tuj nwitze.

33 Ex nbajlenxi cꞌixbisaꞌne,

chin bel byoꞌne cyuꞌn;

pero tuj toxin kꞌij chin jawil ankꞌine.

34 Atzun cye t-xnakꞌtzben mintiꞌ el cynicꞌ tiꞌj jlu,

porque myaxix clar eꞌla tuj cywitz,

ex mintiꞌ ex tuj cywiꞌ aju tzaj kꞌmaꞌn cye.

35 Tejtzun tpon lakꞌeꞌ Jesús ttxaꞌn tnam Jericó,

at jun moẍ kꞌukltok ttzi be,

in kanin tcotz.

36 Tej tbinte moẍ nim xjal in che bet tuj be,

xi tkanin cye xjal ti t-xilen jlu.

37 Xitzun cymaꞌn xjal te:

—Tzul Jesús aj Nazaret,

che chi.

38 Atzunte moẍ jaw schꞌin:

—Jesús,

Tcꞌwaꞌl David,

kꞌakꞌantz tcꞌuꞌja wiꞌje,

chi xjal.

39 Ex akeju nejni twitz Jesús e oc ten ilil tiꞌj moẍ tuꞌn miꞌn tkꞌajt;

atzunte moẍ mas jaw schꞌin cyuwxix,

ex tma:

—Aya Tcꞌwaꞌl David,

kꞌakꞌantz tcꞌuꞌja wiꞌje.

40 Weꞌtzun Jesús ex xi tmaꞌn cye xjal tuꞌn ttzaj kꞌiꞌn moẍ.

Tejtzun tul lakꞌeꞌ moẍ,

xi tkanin Jesús te:

41 —¿Alcye tajbila tuꞌn nbinchanteye teya?

Atzunte moẍ tma:

—Tat,

wajbile tuꞌn tjaket nwitze.

42 Xitzun tmaꞌn Jesús te:

—Ma jaket twitza;

tuꞌnju ma tocslaya ma banixa.

43 Jurat jaket twitz moẍ;

ex oc lpeꞌ tiꞌj Jesús ex jaw tnimsaꞌn tbi Dios;

ex cycyakil xjal tej cylonte jlu,

xi cykꞌoꞌn chjonte te Dios.