Aju techal cyiꞌj ke akꞌnal
20
Aju cawbil in tzaj tuj cyaꞌj ic tten ic tzaꞌn jun patrón,
te prim ex jyol majen tuꞌn cyakꞌnan tuꞌn tcub twitz uva.
2 Banttzun tiꞌj tuꞌn cyucꞌil majen,
jun denari pwak twi cycꞌuꞌj jun kꞌij,
e jeꞌxtzun t-samaꞌn akꞌnal.
3 Tej tpon las nueve ex patrón juntl maj,
o til junjun xjal ateꞌ tuj plas mintiꞌ cyakꞌun.
4 Xi tmaꞌn cye:
Ax icx cyeye cyxiꞌye akꞌnal wucꞌile,
jacu chjet cykꞌije wuꞌne,
chi patrón.
E jeꞌxtzun ke majen akꞌnal.
5 Ex patrón juntl maj te chilcukꞌij ex juntl maj te las tres te kale,
ax icx o tbincha.
6 Extzun juntl maj chꞌixtok tpon las sinco,
e cnet junjuntl xjal tuꞌn mintiꞌ cyakꞌun ex xi tmaꞌn cye:
¿Tikuꞌn nok nneꞌx cykꞌije tzalu mintiꞌ in che akꞌnane?
7 Xitzun cymaꞌn te:
Porque mi aꞌl jun saj kꞌmante kakꞌune.
Xitzun tmaꞌn patrón cye:
Ax icx cyeye cyxiꞌye akꞌnal wucꞌile,
jacu chjet twi cycꞌuꞌje wuꞌne.
8 Tejtzun tkokax,
xi tmaꞌn patrón te tmayordom:
Txcontza ke majen ex kꞌonxa twi cycꞌuꞌj;
nej kꞌonxa twi cycꞌuꞌj keju ẍe ul te mancbil,
te mancbiltzun kꞌonxa twi cycꞌuꞌj keju ẍe ul nej.
9 Tejtzun cypon keju e jeꞌx akꞌnal chꞌixtok tpon las sinco,
teyle junjun o tcꞌam jun denari pwak.
10 Tejtzun cypon keju e jeꞌx akꞌnal nej,
cub cyximan ka mas tuꞌn cychjet.
Pero ax icx teyle junjun o cycꞌam jun denari pwak.
11 Tejtzun cycꞌmonte twi cycꞌuꞌj,
tzaj jun cyyol tiꞌj patrón,
12 ex xi cymaꞌn:
Ke majen ẍe ul te mancbil nok jun or ma che akꞌnan,
ex ax twi cycꞌuꞌj ma chjet tuꞌna ic tzaꞌn keye ma ko sicte tiꞌj akꞌuntl ex ma tzicꞌx taꞌw kꞌij kuꞌne enter kꞌij.
13 Xi ttzakꞌweꞌn patrón ex xi tmaꞌn te jun majen:
Aya wucꞌil,
mintiꞌ jun mya baꞌn ma nbinchaye teya.
¿Myapetzun biꞌx xbant tiꞌj kuꞌn jun denari pwak twi tcꞌuꞌja?
14 Kꞌinxa twi tcꞌuꞌja ex txiꞌya.
Ic tzaꞌn ma txi nkꞌoꞌne teya,
ax icx waje tuꞌn t-xi nkꞌoꞌne te xjal lu aju sul te mancbil.
15 ¿Myapetzun baꞌn tuꞌn nbinchanteye alcye wajbile tiꞌj npwake?
¿Plojpe ma tzꞌel tuj twitza tuꞌnju baꞌn kiꞌne?
16 Cyjaꞌtzun,
keju ateꞌ te tnejel jaꞌlo,
che oquel te mancbil,
atzun keju ateꞌ te mancbil jaꞌlo che oquel te tnejel.
[Porque nimcu in che txconjtz,
pero nicꞌxi keju scꞌoꞌmaj],
chi Jesús,
baj tmaꞌn cye.
In yolin Jesús juntl maj tiꞌj tcamic
17 Tej cyjaꞌtok tjax Jesús tuj Jerusalén,
xi tucꞌin ke t-xnakꞌtzben tuj be junx cye ex xi tmaꞌn cye:
18 —Ko jawix tuj Jerusalén ex chin xel kꞌoꞌne tuj cykꞌab nejenel cye pal ex tuj cykꞌab xnakꞌtzal tiꞌj ley,
ex cbel kꞌoꞌn nsentense tuꞌn ncyime,
akine scꞌoꞌmaj kine tuꞌn Dios tuꞌn ntene cyucꞌil xjal,
19 ex chin xel kꞌoꞌne tuj cykꞌab stranjer xjal,
chin oquel xmayine cyuꞌn,
chin bajel cꞌixbisaꞌne,
ex chin jawil kꞌoꞌne twitz crus;
pero tuj toxin kꞌij chin jawil ankꞌine cyxol cyimni.
Aju tkanbetz ttxuꞌ Jacobo ex Juan
20 Pontzun lakꞌeꞌ t-xuꞌjil Zebedey cyucꞌix ke tal,
cub ẍmejeꞌ twitz Jesús tuꞌn t-xi tkanin jun xtalbil.
Atzunte Jesús xi tkanin te:
21 —¿Alcye taja?
Chi Jesús.
Xitzun tmaꞌn xuꞌj te:
—Kꞌontza cyoclen keju cabe wale lu tuꞌn cycub keꞌ ttxlaja oc tula tuꞌn tcawina,
jun tuj tbankꞌaba ex juntl tuj tnayaja.
22 Xitzun ttzakꞌweꞌn Jesús:
—Mintiꞌ nneꞌl cynicꞌe tiꞌj ju in tzaj cykanine.
¿Jacupe tzicꞌx cyuꞌne ic tzaꞌn weye ex tuꞌn t-xi cycꞌaꞌne aju cxel ncꞌaꞌne?
[¿Ex jacupe tzicꞌx nim cꞌixcꞌoj cyuꞌne ic tzaꞌn weye cꞌicꞌex wuꞌne?]
—Jacu bant kuꞌne,
che chi.
23 Xi tmaꞌn Jesús cye:
—Ax toc cꞌicꞌex yajbil cyuꞌne aju weye cꞌicꞌex wuꞌne;
[ex cꞌicꞌex nim cꞌixcꞌoj cyuꞌne ic tzaꞌn weye cꞌicꞌex wuꞌne,]
pero aju tuꞌn cycub keꞌye tuj nbankꞌabe ex tuj nnayaje,
mya tuj ncwente taꞌ,
banimaj tuꞌn Nmane alcye ke tuꞌn cycub keꞌ ntxlaje.
24 Tej cybinte keju lajtl t-xnakꞌtzben,
tzaj cykꞌoj cyiꞌj keju cabe cyitzꞌin cyib.
25 E tzajtzun ttxcoꞌn Jesús ex xi tmaꞌn cye:
—Biꞌn cyuꞌne,
ke nejenel cyxol ke nasyon,
in che cawin cyibaj xjal,
ex keju at cyoclen,
in che cyaj xjal tjakꞌ cycawbil.
26 Atzun cyxole mya ic ttenju.
Ka at jun cyxole taj tuꞌn tten mas toclen,
e toc te ajbel cyeye.
27 Ex alcye taj tuꞌn toc te nejenel cyxole,
e toc te cymajene.
28 Ic tzaꞌn weye,
scꞌoꞌmaj kine tuꞌn Dios tuꞌn ntene cyucꞌil xjal,
mintiꞌ ma chin ule tuꞌn cyajben mastl weye,
nok oꞌcx tuꞌn wajbene cye mastl ex tuꞌn t-xi nkꞌon wibe tuꞌn ncyime tuꞌn cycolpet nimcu xjal.
Cabe moẍ jaket cywitz tuꞌn Jesús
29 Tejtzun tetz Jesús cyucꞌix t-xnakꞌtzben tuj tnam Jericó,
e oc lpeꞌ nim xjal tiꞌj.
30 At cabe xjal moẍ kꞌukl ke ttzi be.
Tejtzun cybinte cyjaꞌ ttzaj Jesús,
e jaw schꞌin in cymaꞌn:
—Aya Tat Tcꞌwaꞌl David,
kꞌakꞌantz tcꞌuꞌja kiꞌje,
che chi.
31 Atzun cye xjal e oc ten ilil cyiꞌj,
xi cymayoꞌn tuꞌn miꞌn cykꞌajt;
atzun cye moẍ mas e jaw schꞌin cyuwxix,
in cymaꞌn:
—Aya Tat Tcꞌwaꞌl David,
kꞌakꞌantz tcꞌuꞌja kiꞌje.
32 Weꞌtzun Jesús,
e tzaj ttxcoꞌn ex xi tmaꞌn cye:
—¿Alcye cyajbile tuꞌn nbinchanteye cyeye?
Chi Jesús.
33 Xitzun cymaꞌn ke moẍ te:
—Tat,
kajbile tuꞌn tjaket kwitze,
che chi.
34 Tzajtzun kꞌakꞌan tcꞌuꞌj Jesús cyiꞌj,
oc tmacoꞌn tbakꞌ cywitz;
ex jurat naj jaket cywitz,
ex e oc lpeꞌ tiꞌj.