Tej tocx Jesús tuj tnam Jerusalén
21
Chꞌixtok cycanun tuj Jerusalén,
e pon tuj tal tnam Betfagé t-xe witz Olivos tbi,
xi t-samaꞌn Jesús cabe t-xnakꞌtzben
2 ex xi tmaꞌn cye:
—Cyxiꞌye tuj tal tnam tocx chixin;
atzun cnetel jun ttxu bur cyuꞌne cꞌaloꞌn tucꞌix jun tal bur;
cypajuꞌmile ex cyintze tzalu.
3 Ka at jun xjal ma tma jun yol cyeye,
cymanxe te:
Cꞌajbel te Kajaw,
ex jurat che ajetz tkꞌoꞌn.
che chicuye,
chi Jesús.
4 Tcyakil jlu o bant tuꞌntzun tjapun aju yol kꞌmaꞌmaj tuꞌn t-sanjel Dios,
chi cyjaꞌ:
5 Cymanxe cye xjal aj Sión:
Lu tzul Cyreye cyucꞌile,
mans ex tjax tibaj jun ttxu bur,
tjax tibaj jun tal bur,
tal jun ttxu bur,
chi t-sanjel Dios.
6 E jeꞌxtzun ke xnakꞌtzben,
ex o cybincha ic tzaꞌn tzaj kꞌmaꞌn cye tuꞌn Jesús.
7 Ultzun cyiꞌn ju ttxu bur tucꞌix ju tal bur,
jax cykꞌoꞌn cyxbalun cyibaj;
jaxtzun keꞌ Jesús tibaj tal bur.
8 Atzun cye tnam xjal cub cylicꞌun cyxbalun tuj be;
ex junjuntl el cytxꞌemin tkꞌab tzeꞌ,
cub cykꞌoꞌn tuj be.
9 Atzun ke xjal nejni twitz Jesús cyucꞌix keju lepchix tiꞌj in che schꞌin ex in cymaꞌn:
—Kkꞌonx kꞌolbebl te Tcꞌwaꞌl rey David.
Cyꞌiwlaꞌn teju tzul,
tuꞌn Kman ma tzaj samaꞌn.
Nimanxwit tbi Dios tuj cyaꞌj.
10 Tejtzun tocx Jesús tuj tnam Jerusalén,
cycyakil xjal tuj tnam e jaw tilj ex in cymaꞌn:
—Ate jlu Jesús t-sanjel Dios,
aju aj Nazaret tuj txꞌotxꞌ Galiley.
E etz tlajoꞌn Jesús ke cꞌayil tuj tja Dios
12 Ocxtzun Jesús tuj tja Dios,
e bjeꞌtz tlajoꞌn cycyakil keju in che cꞌayin ex in che lokꞌon tuj tja Dios;
ex jaw tpichꞌkꞌuꞌn cymes ke chꞌexpul twitz pwak,
tucꞌix cykꞌukbil keju in che cꞌayin paloma.
13 Xi tmaꞌn cye:
—At jun yol in tmaꞌn tuj Tuꞌjil chi cyjaꞌ:
We nja,
ja te nabl Dios tbi cꞌoquel,
chi tuj Tuꞌjil;
atzun cyeye ma tzꞌoc cykꞌoꞌne te cyjul elekꞌ,
chi Jesús.
14 E ultzun ke moẍ cyucꞌix ke cox tucꞌil Jesús tuj tja Dios,
ex e banix tuꞌn.
15 Atzun cye nejenel cye pal cyucꞌix ke xnakꞌtzal tiꞌj ley,
tzaj cykꞌoj tej cylonte ke tbinchben Jesús nim tipumal,
ex tej cybinte in che schꞌin ke cꞌwaꞌl tuj tja Dios ex in cymaꞌn:
Kkꞌonx kꞌolbebl te Tcꞌwaꞌl rey David,
che chi cꞌwaꞌl.
16 Ex xi cymaꞌn nejenel cye pal te Jesús:
—¿Mape tbiya aju in cymaꞌn jlu?
—Ma nbiye,
chi Jesús.
Yajtzun cyeye,
¿bajxpe jaw cyschꞌiꞌne tuj Tuꞌjil jatum in yolin tiꞌj jlu?
Chi cyjaꞌ:
Ma tzaj tmaꞌna tuꞌn tjaw nimsaꞌn tbiya cyuꞌn tal cꞌwaꞌl ex cyuꞌn keju in che chꞌuꞌn,
chi tuj Tuꞌjil.
17 E cyajtzun tkꞌoꞌn Jesús ke xjal,
etz tiꞌjtzi tnam Jerusalén,
pon tuj tnam Betania ex axtzun cyaj ten te konicꞌan.
Biꞌx tzkij tkan higo tuꞌn tyol Jesús, tuꞌnju mintiꞌ twitz
18 Te juntl kꞌij te prim,
cyjaꞌtok t-xiꞌ Jesús tuj tnam Jerusalén,
tzaj el tcꞌuꞌj.
19 Ex o til Jesús jun tkan higo tcub ttzi be,
xiꞌtzun t-xe tkan higo,
pero mintiꞌ cnet jun twitz higo tuꞌn,
oꞌcx t-xak at.
Xitzun tmaꞌn Jesús te tkan higo:
—Te jumajx mlay tzꞌoc jun twitza,
chi Jesús.
—¿Tzaꞌntzun tten biꞌx ma tzkij tkan higo?
Che chi.
21 Xi ttzakꞌweꞌn Jesús:
—Ax toc cxel nmaꞌne cyeye,
ka at cyocslable ex ka mintiꞌ ma jawjeꞌ cycꞌuꞌje,
mya nok oꞌcx jacu bant tuꞌn ttzkij tkan higo cyuꞌne,
ax icx jacu txi cymaꞌne teju witz lu:
Ticꞌa ex xoꞌnx tiba tuj mar,
ka che chiye,
ex cbanteltzun aju cxel cymaꞌne.
22 Ex tcyakilju cxel cykanine tuj naꞌj Dios,
ex ka ma keꞌ cycꞌuꞌje tiꞌj Dios,
oc cycꞌmaꞌye.
Aju toclen Jesús
23 Tej tocx Jesús tuj tja Dios,
e pon lakꞌeꞌ ke nejenel cye pal cyucꞌix ke cytijil xjal judiy;
matok in tkꞌoꞌn Jesús xnakꞌtzbil xi cykanin te:
—¿Ti toclena tuꞌn tbinchanteya tcyakil jlu?
¿Alcye ma tzaj kꞌonte toclena?
Che chi.
24 Xi ttzakꞌweꞌn Jesús:
—Icx weye at jun yol cxel nkanine cyeye;
ka ma tzaj cytzakꞌweꞌne,
ax icx weye cxel nmaꞌne cyeye ti woclene tuꞌn nbinchanteye tcyakil jlu.
25 ¿Alcye tzaj kꞌonte toclen Juan tuꞌn cybyan xjal tuꞌn?
¿Tuꞌnpe Dios ex ka cyuꞌn xjal?
Chi Jesús cye.
Atzun cye e oc ten yolil tiꞌj cyxolx in cymaꞌn:
—Ka ma txi kmaꞌn,
tuꞌn Dios tzaj kꞌoꞌn toclen,
ctzajeltzun tmaꞌn ke:
¿Tikuꞌntzun mintiꞌ xi cyocslaꞌne?
Chilo.
26 Ex ka ma txi kmaꞌn,
cyuꞌn xjal tzaj kꞌoꞌn toclen,
jaculo tzaj kxobil cywitz xjal porque cycyakil in che yolin tiꞌj ka ate Juan t-sanjel Dios.
27 Xitzun cymaꞌn te Jesús:
—Mintiꞌ biꞌn kuꞌne.
Icx te Jesús xi tmaꞌn cye:
—Icx weye mlay txi nmaꞌne cyeye ti woclene tuꞌn nbinchanteye tcyakil jlu.
Aju techal cyiꞌj cabe cꞌwaꞌlbaj
28 Pero ¿chi toc cyuꞌne?
At jun xjal attok cabe tcꞌwaꞌl;
pon xjal tucꞌil ju tzicbaj ex xi tmaꞌn te:
Ncꞌwaꞌl,
txiꞌya akꞌnal jaꞌlo tuꞌn tcub twitz uva.
29 Tzaj ttzakꞌweꞌn ju tcꞌwaꞌl:
Mlay chinxe.
Pero te yajxitl ajtz tiꞌj tanmi ex xiꞌtzun.
30 Ax icx pontl ju mambaj tucꞌil ju tzꞌinbaj,
ax ju yol xi tmaꞌn te;
atzunte tzꞌinbaj tzaj ttzakꞌweꞌn:
Chin xeꞌle,
Tat.
Pero mintiꞌ xiꞌ.
31 ¿Alcyetzun cyxol cabe cꞌwaꞌlbaj lu tbincha aju tajbil tman?
Chi Jesús cye.
Xi cytzakꞌweꞌn xjal:
—Aju tzicbaj.
Xi tmaꞌntl Jesús cye:
—Ax toc cxel nmaꞌne cyeye:
Ke peyil pwak ex ke xuꞌj aj pajil nej che oquex cywitze tuj tcawbil Dios.
32 Porque ul Juan cyucꞌile,
aju e byan xjal tuꞌn,
in tmaꞌn tuꞌn cybinchanteye aju tzꞌaklxix,
ex mintiꞌ xi cyocslaꞌne;
atzun cye peyil pwak ex ke xuꞌj aj pajil xi cyocslaꞌn;
atzun cyeye o cyile jlu,
pero mintiꞌ ajtz tiꞌj cyanmiye ex mintiꞌ xi cyocslaꞌne.
Aju techal cyiꞌj ke akꞌnal mya baꞌn
33 Cybintze juntl techal:
At jun patrón cuꞌx tawaꞌn tkan uva,
oc tkꞌoꞌn peꞌn tiꞌj,
cuꞌx tlacuꞌn jun jul jatum tuꞌn tel ptzꞌet taꞌl uva,
jaw tbinchaꞌn jun ja te cwentbil tkan uva,
cyajtzun tkꞌoꞌn txꞌotxꞌ te majen cye junjun akꞌnal ex xiꞌtzun tuj jun lugar najchak.
34 Tejtzun tul tkꞌijlalil tuꞌn tcub twitz awal,
e tzajtzun t-samaꞌn patrón ke tmajen cyucꞌil majenal txꞌotxꞌ tuꞌn tcꞌmonte chꞌin twitz awal te taꞌl ttxꞌotxꞌ.
35 Atzun cye majenal txꞌotxꞌ e tzyet ke majen cyuꞌn;
jun baj cycꞌixbisaꞌn,
juntl cub cybyoꞌn,
ex juntl oc cyxoꞌn tuꞌn abj.
36 E tzajtzun t-samaꞌntl patrón txkantl tmajen,
mas elaꞌ cybet cywitz keju e tzaj t-samaꞌn nej;
atzun cye majenal txꞌotxꞌ icx cybincha cyiꞌj ic tzaꞌn cybincha nej.
37 Te mancbilxitzun tzaj t-samaꞌn patrón tcꞌwaꞌl:
Kapelo at chꞌin tchi ncꞌwaꞌle tuj cywitz,
chi patrón.
38 Atzun cye majenal txꞌotxꞌ,
tej cylonte cyjaꞌ ttzaj tcꞌwaꞌl patrón,
cyma cyxolx:
Atzunte etzal jlu;
chux keye kbyoncu ex ktzyum aju tetzbil,
tuꞌntzun tcyaj ten tetzbil te ke,
che chi.
39 Tzyettzun cyuꞌn,
ex cyiꞌn tiꞌjxi tkan awal,
ex cub cybyoꞌn.
40 Octzun tul tajaw tkan awal,
¿chi toc cyuꞌne,
ti oc tbinchaꞌ cyiꞌj ke majenal txꞌotxꞌ lu?
Chi Jesús cye.
41 Xitzun cymaꞌn:
—Oc che bel tbyoꞌn ke xjal lu mya baꞌn ke,
mlay tzaj kꞌakꞌan tcꞌuꞌj cyiꞌj;
atzun tkan uva cxel tkꞌoꞌn te majen cye txkantl akꞌnal,
tuꞌntzun t-xi cykꞌoꞌn chꞌin twitz awal te oc tul tkꞌij,
che chi xjal.
42 Entons xi tmaꞌn Jesús cye:
—¿Bajxpe jaw cyschꞌiꞌne ti in tmaꞌn tuj Tuꞌjil?
Chi cyjaꞌ:
Aju abj el cyicꞌun ke binchal ja ma tzꞌoc te scyini te simyent.
Tuꞌn Kman ma bant jlu,
ex maꞌ t-xilen jlu tuj kwitz,
chi tuj Tuꞌjil.
43 Cyjaꞌtzun cxel nmaꞌne cyeye,
cꞌelel kꞌiꞌn cyoclene tuꞌn miꞌn cyocxe tuj tcawbil Dios,
ex cxel tkꞌoꞌn Dios cyoclen juntl cꞌloj xjal,
tuꞌn t-xi cykꞌoꞌn chꞌin twitz awal teju tajaw awal.
44 Alcye jun xjal ma jaw tolj ex ma cub tzꞌak tibaj abj lu,
biꞌx cbajel tokj;
ex alcye jun xjal ka ma cub tzꞌak abj lu tibaj,
biꞌx cbajel buchj xjal tuꞌn,
chi Jesús cye.