Jesús ex Zaquey
19
Ocxtzun Jesús tuj tnam Jericó,
ex o bet tuj tnam.
Lucas 19.1-27
2 Ex at jun xjal Zaquey tbi,
nejeneltok cye peyil pwak,
ex kꞌinuntok.
3 O tajbe Zaquey tuꞌn tqueꞌyinte alcye Jesús,
pero mintiꞌ tumel tuꞌn tlonte tuꞌn tlaj nim xjal,
porque chꞌintok twaꞌl Zaquey.
4 Xitzun nej cywitz xjal,
jaw kelan ex jax twiꞌ jun tzeꞌ sicómro tuꞌn tqueꞌyinte twitz Jesús;
porque cyjaꞌtok t-xiꞌ Jesús.
5 Tejtzun tcanun Jesús jatum taꞌ Zaquey,
jaw tqueꞌyin jawni,
o til,
ex xi tmaꞌn te:
—Jurat tcuꞌtza,
Zaquey,
porque ax chin cyjel tene tjaya jaꞌlo.
6 Jurattzun cuꞌtz Zaquey ex o cꞌmet Jesús tuꞌn tuj tja,
in tzalaj tiꞌj.
7 Tej cylonte xjal jlu,
cycyakil e jaw wululun cyxolx,
ex cyma:
—Ma tzꞌocx Jesús posadiyil tuj tja jun xjal aj il,
che chi.
8 Atzunte Zaquey cub weꞌ ex xi tmaꞌn te Kajaw:
—Tat,
mijcu at weye cxel nkꞌoꞌne cye meba;
ex ka at jun ma tzꞌel welkꞌaꞌne jun tiꞌxti te,
jacu tzꞌaj nkꞌoꞌne cyaje maj t-xel.
9 Xitzun tmaꞌn Jesús te:
—Jaꞌlo ma tzul ju colbil tuj ju ja lu;
porque ax tiyjil Abraham te xjal lu.
10 Porque akine,
scꞌoꞌmaj kine tuꞌn Dios tuꞌn ntene cyucꞌil xjal,
ma chin ule jyolte ex clolte aju tzpetnitok.
Aju techal tiꞌj laj pwak
11 Ex in che bintok xjal tiꞌj tcyakil jlu,
xi tmaꞌn Jesús juntl techal cye,
porque chꞌixtok tcanun tuj tnam Jerusalén,
ex tuj cynabl xjal ka tuꞌn tul naj tcawbil Dios.
12 Xitzun tmaꞌn Jesús:
—At jun xinak maꞌ toclen xiꞌ tuj jun txꞌotxꞌ najchak cꞌmolte toclen tuꞌn toc te rey ex tuꞌn tajtz meltzꞌaj.
13 Naꞌnxtok t-xiꞌ,
e tzaj ttxcoꞌn laj tmajen,
ex xi tkꞌoꞌn jun pwak maꞌ twitz te teyle junjun cye,
ex xi tmaꞌn:
Che negosyarine tiꞌj pwak lu acu in alin chꞌin oc wule.
14 Pero ke t-xjalil e oc ten icꞌul te,
ex lepchix t-xi cysamaꞌn jun comisyón kꞌmalte cyjaꞌ:
Miꞌn kaje tuꞌn toc jlu te rey tuꞌn tcawin kibaje,
che chi.
15 Tejtzun tcꞌmonte toclen,
ajtz meltzꞌaj tuj ttanmi tuꞌn toc te rey.
E jeꞌxtzun txocbaj ke majen tuꞌn,
akeju otok txi kꞌoꞌn pwak cye,
tuꞌn tbinte jteꞌ otok tcamba junjun.
16 Ul aju tnejel ex tma:
Tat,
aju tpwaka ma tcamba lajtl.
17 Xitzun tmaꞌn rey te majen:
Cu,
aya majen baꞌn;
chꞌin xi nkꞌoꞌne teya ex ma tzꞌakꞌnanxixa tiꞌj;
cyjaꞌtzun cxel nkꞌoꞌne toclena tuꞌn tcawina cyibaj laj tnam.
18 Ul juntl ex tma:
Tat,
aju tpwaka ma tcamba jweꞌtl.
19 Ax icx xi tmaꞌn rey te jlu:
Icx teya ccawila cyibaj jweꞌ tnam.
20 Ul juntl ex tma:
Lu tpwaka lu,
tat.
Biꞌx xi ncꞌuꞌne tuj jun tal cꞌalbil;
21 porque tzaj nxobile twitza,
aya jun xjal cyuw,
in xi ttzyuꞌna aju mintiꞌ in cub tkꞌoꞌna,
ex in jaw tchmoꞌna twitz awal aju mintiꞌ in cuꞌx tawaꞌna.
22 Atzunte rey xi tmaꞌn te:
Aya majen mya baꞌn,
tuꞌnx ju tyola cbel tcastiwoya wuꞌne.
Ka baꞌn tuꞌna akine jun xjal cyuwxix,
in jaw ntzyuꞌne aju mintiꞌ in cub nkꞌoꞌne,
ex in jaw nchmoꞌne aju mintiꞌ in cuꞌx wawaꞌne;
23 ¿tikuꞌntzun mintiꞌ ocx tkꞌoꞌna npwake tuj banc?
mawtlo ncꞌame chꞌin taꞌl tej ẍin ule.
24 Xitzun tmaꞌn rey cye keju ateꞌtok:
Cyiꞌmele pwak te jlu,
ex cykꞌonxe teju at laj pwak tucꞌil.
25 Atzun cye xi cymaꞌn te rey:
Tat,
pero at laj pwak tucꞌil.
26 Xitzun tmaꞌn rey:
Cxel nmaꞌne cyeye:
Alcyeju at chꞌin te,
mas cxel kꞌoꞌntl te;
atzun teju mintiꞌ te,
aju chꞌin at te,
cꞌelel kꞌiꞌn.
27 Ax icx keju e kꞌojin wiꞌje ex mintiꞌ o cyajbe tuꞌn woque te rey te cawil cyibaj,
cyiꞌntze ke tzalu,
ex cybyoncuye nwitze,
chi rey.
Tej tocx Jesús tuj tnam Jerusalén
28 Tej tbaj tmaꞌn Jesús jlu cub nej cywitz,
cyjaꞌ t-xiꞌ tuj tnam Jerusalén.
Lucas 19.28-48
29 Tej chꞌixtok tcanun cyuj ke tal tnam Betpagé tucꞌix Betania,
otok che pon t-xeꞌ jun witz Olivos tbi,
e jeꞌx t-samaꞌn Jesús cabe t-xnakꞌtzben,
30 ex xi tmaꞌn cye:
—Cyxiꞌye tuj tal tnam tocx chixin;
octzun cyocxe cnetel cyuꞌne jun tal bur cꞌaloꞌn,
aju naꞌnx tjax jun xjal chejil tibaj;
cypajuꞌmele,
ex cyiꞌntze.
31 Ex ka at jun xjal ma tzaj kaninte cyeye:
¿Tikuꞌn nneꞌl cypajuꞌne?
ka chi,
cytzakꞌwenxe te cyjaꞌ:
Cꞌajbel te Kajaw,
che chicuye.
32 E jeꞌxtzun ke t-xnakꞌtzben,
ex cnet tal bur cyuꞌn ic tzaꞌn otok tma Jesús.
33 Ex matok nneꞌl cypajuꞌn ju tal bur,
cyma ke tajwil cye:
—¿Tikuꞌn nneꞌl cypajuꞌne ju tal bur?
34 Xitzun cymaꞌn cye:
—Cꞌajbel te Kajaw.
35 Tzajtzun cyiꞌn ju tal bur,
ul cyiꞌn twitz Jesús;
jax cykꞌoꞌn cyxbalun tibaj tal bur tuꞌntzun tjax keꞌ Jesús tibaj.
36 Ex tej cyjaꞌtok t-xiꞌ Jesús,
cub cylicꞌun cyxbalun tuj be.
37 Tejtzun cycanun ttxaꞌn witz Olivos tbi tuꞌn cyxiꞌ cubl,
cycyakil t-xnakꞌtzben e jaw tzalaj,
in che schꞌin wen,
ex e oc ten nimsal tbi Dios tuꞌnju otok cyil tbinchben Jesús nim tipumal,
38 in cymaꞌn:
—Cyꞌiwlaꞌn teju rey aju ma tzul,
ma tzaj samaꞌn tuꞌn Kman.
Atwit tzalajbil tuj cyaꞌj,
ex nimanxwit tbi Dios tuj cyaꞌj.
39 At junjun parisey cyxol xjal xi cymaꞌn te Jesús:
—Xnakꞌtzal,
mayonxa ke t-xnakꞌtzbena.
40 Xitzun ttzakꞌweꞌn Jesús cye,
chi cyjaꞌ:
—Cxel nmaꞌne cyeye,
ka ma che kꞌajen ke xjal lu,
ake abj che jawil schꞌin.
41 Tejtzun tpon lakꞌeꞌ Jesús nikayin tibaj tnam Jerusalén,
xi tqueꞌyin ju tnam ex jaw okꞌ tiꞌj,
42 ex tma:
—Nokwit sel tnicꞌa tiꞌj jaꞌlo tzaꞌn tten tuꞌn ttena tuj txubtxaj.
Pero jaꞌlo ewan twitza ex mlay tzꞌel tnicꞌa tiꞌj.
43 Porque tzul jun tkꞌijlalil mya baꞌn tibaja,
ke aj kꞌoj tiꞌja cjawil cymontonin txꞌotxꞌ tiꞌjeleya,
che xel txoleꞌ soldad tiꞌjeleya,
ex che oquel tzokpaj tiꞌja tuj tcyakil ttxlaja.
44 Cbel xituna cyuꞌn,
ex che bel byoꞌn ke xjal ateꞌ tuja,
jumajx cbel xituna tcyakil,
porque mintiꞌ el tnicꞌa tiꞌj ju kꞌij tej tul Dios onil teya.
E jeꞌtz tlajoꞌn Jesús ke cꞌayil tuj tja Dios
45 Ocxtzun Jesús tuj tja Dios,
ex oc ten lajol cye xjal akeju in che cꞌayin tuj,
46 ex xi tmaꞌn cye:
—At jun yol in tmaꞌn tuj Tuꞌjil,
chi cyjaꞌ:
We nja,
ja te nabl Dios;
atzun cyeye ma tzꞌoc cykꞌoꞌne te cyjul elekꞌ.