Bant jun mejebleꞌn tuj tnam Caná tuj txꞌotxꞌ Galiley
2
Tuj toxin kꞌij bant jun mejebleꞌn tuj tnam Caná tuj txꞌotxꞌ Galiley;
ex otok pon ttxuꞌ Jesús.
2 Ax icx te Jesús o txconjtz tuj mejebleꞌn cyucꞌix ke t-xnakꞌtzben.
3 Ex tej tcub baj cycꞌa xjal vin,
xi tmaꞌn ttxuꞌ Jesús te:
—Mintiꞌtl cyvin xjal.
4 Pero xi tmaꞌn Jesús te:
—¿Tikuꞌn in tzaj tmaꞌna jlu weye,
nan?
Naꞌnx tpon tkꞌijlalil tuꞌn t-xi nyecꞌune cye xjal alcye kine.
El milagro en Caná (Juan 2.1-12)
5 Pero xi tmaꞌn ttxuꞌ cye keju in che sipan cꞌabj:
—Cybinchame tcyakilju ctzajel tmaꞌn cyeye.
6 Ex attok kak abj binchaꞌmaj ic tzaꞌn ẍokꞌ tcubil aꞌ te txꞌajbil cye xjal judiy ic tzaꞌnx cyley;
tuj junjun tcubil aꞌ in xiꞌ jweꞌ ẍokꞌ aꞌ tuj ex ka wuk.
7 Entons xi tmaꞌn Jesús cye keju in che sipan cꞌabj:
—Cynojsame ke ẍokꞌ lu tuꞌn aꞌ.
—Cyiꞌntze chꞌin jaꞌlo,
ex cyiꞌnxe teju nejenel cye sipal cꞌabj.
Xitzun cyiꞌn.
9 Atzunte nejenel cye sipal cꞌabj xi tnicꞌbeꞌn ju aꞌ otok tzꞌoc te vin,
mintiꞌ baꞌn tuꞌn jatum otok tzaj,
atzun cye sipal cꞌabj baꞌn cyuꞌn jatum otok jatz cyiꞌn ju aꞌ.
Tzajtzun ttxcoꞌn nejenel ju chmilbaj,
10 ex xi tmaꞌn te:
—Cycyakil xjal nej in tzaj cykꞌoꞌn aju vin baꞌn;
octzun cybaj cꞌan keju otok che txconjtz tuj mejebleꞌn,
in tzajtzun cykꞌoꞌn aju vin myaxix baꞌn;
atzun teya ma txi tcꞌuꞌna aju vin baꞌn te jaꞌlo,
chi nejenel.
11 Atzun tnejel señ jlu bant tuꞌn Jesús,
o tbincha tuj tnam Caná tuj txꞌotxꞌ Galiley,
ex xi tyecꞌun Jesús tipumal;
ex e ocslan ke t-xnakꞌtzben tiꞌj.
12 Tbajlenxitzun jlu xiꞌ Jesús tuj tnam Capernaum,
tucꞌix ttxuꞌ,
cyucꞌix ke terman ex ke t-xnakꞌtzben;
ex axtzun e ten mya nim kꞌij.
E jeꞌtz tlajoꞌn Jesús ke cꞌayil tuj tja Dios
13 Chixtok tul canun aju ninkꞌij cye xjal judiy,
aju Xjan Kꞌij tbi;
jaxtzun Jesús tuj Jerusalén,
Jesús en el patio del templo (Juan 2.13-25)
14 ex oc noj cyiꞌj xjal tuj ttxaꞌn tpeꞌn tja Dios,
in che cꞌayin boys,
ex in che cꞌayin ẍneꞌl tucꞌix paloma,
ex cyucꞌix ke chꞌexpul twitz pwak kꞌukl keꞌtok.
15 Tej tlonte Jesús jlu,
baj tbinchaꞌn jun asyal cyꞌjaj,
ex e jeꞌtz tlajoꞌn cycyakil tuj ttxaꞌn tpeꞌn tja Dios,
cyucꞌix ke cyẍneꞌl ex ke cyboys;
ex baj tchitun cypwak ke chꞌexpul twitz pwak,
ex e jaw tpichꞌkꞌuꞌn ke cymes.
16 Ex xi tmaꞌn cye keju in che cꞌayin paloma:
—Cyiꞌn exe jlu tzalu,
ex miꞌn tzꞌoc cykꞌoꞌne tja Nmane ja te cꞌaybil.
17 Tzajtzun cynaꞌn ke t-xnakꞌtzben aju yol in tmaꞌn tuj Tuꞌjil cyjaꞌ:
Ma tzaj taꞌw tuj wanmiye tuꞌn tlaj at ncꞌuꞌje tiꞌj tjaya,
chi tuj Tuꞌjil.
18 Xitzun cymaꞌn ke xjal judiy te Jesús:
—¿Alcyetzun señ ctzajel tyecꞌuna keye tuꞌnju in tbinchaꞌna jlu?
Che chi.
19 Xi ttzakꞌweꞌn Jesús:
—Cyxituncuye aju tja Dios lu,
ex tuj ox kꞌij cjawil nbinchaꞌne juntl maj.
20 Xitzun cymaꞌn xjal judiy te:
Tuj 46 abkꞌi o bant tja Dios lu,
¿atzun teya tuj ox kꞌij tuꞌn tjaw tbinchaꞌna?
Che chi te Jesús.
21 Pero o yolin Jesús tiꞌj t-ximlalx,
ka a t-ximlal tja Dios.
22 Cyjaꞌtzun,
tej tjatz ankꞌin Jesús cyxol cyimni,
ul tiꞌj cycꞌuꞌj ke t-xnakꞌtzben ka otok tma jlu;
xi cyocslaꞌn aju in tmaꞌn tuj Tuꞌjil ex aju yol otok tma Jesús cye.
Ojtzkiꞌn tuꞌn Jesús tuj cyanmi cycyakil xjal
23 Attok Jesús tuj Jerusalén tuj ju ninkꞌij Xjan Kꞌij tbi,
ex nimcu xjal e ocslan tiꞌj tej cylonte in che bant ke señ tuꞌn.
24 Pero mintiꞌ oc keꞌ tcꞌuꞌj Jesús cyiꞌj xjal,
porque el tnicꞌ cyiꞌj cycyakil,
25 ex mya il tiꞌj tuꞌn ttzaj kꞌmaꞌn te tzaꞌn cyten xjal,
porque ojtzkiꞌn tuꞌn alcye cyximbetz xjal tuj cyanmi.