—Xnakꞌtzal,

baꞌn ke kuꞌn ka aya jun xnakꞌtzal ma tzaj samaꞌna tuꞌn Dios,

porque mi aꞌl jun xjal jacu bant jun señ tuꞌn ic tzaꞌn ke señ in che bant tuꞌna,

ka mintiꞌ Dios tucꞌil,

chi Nicodemo.

3 Xi ttzakꞌweꞌn Jesús:

—Ax toc cxel nmaꞌne teya,

alcye mintiꞌ ma tzꞌitzꞌj tcabmajiꞌn,

mlayx tzꞌel tnicꞌ tiꞌj tcawbil Dios.

4 Xi tkanin Nicodemo te:

—¿Tzaꞌn tten tuꞌn titzꞌj jun xjal otok tijin?

¿Jacupe tzꞌocx juntl maj tuj talbil ttxuꞌ ex tuꞌn titzꞌj tcabmajiꞌn?

5 Xi ttzakꞌweꞌn Jesús:

—Ax toc cxel nmaꞌne teya,

mlay tzꞌocx jun xjal tuj tcawbil Dios ka mintiꞌ ma tzꞌitzꞌj tiꞌj aꞌ ex tiꞌj Xewbaj Xjan.

6 Aju in itzꞌj tiꞌj xjal,

ax xjalte,

ex aju in itzꞌj tiꞌj T-xew Dios,

ax xewbajte.

7 Miꞌn labina tiꞌj ju ma txi nmaꞌne teya:

Ilxix tiꞌj tuꞌn cyitzꞌje tcabmajiꞌn.

8 Aju cykꞌikꞌ in xumin nok jachak ex in tbiꞌna tkꞌajkꞌajel,

pero mintiꞌ baꞌn tuꞌna jatum in tzaj ex tzaꞌn t-xiꞌ;

cyjaꞌtzun cyten cycyakil keju in che itzꞌj tiꞌj T-xew Dios,

chi Jesús.

9 Xitzun tkanin Nicodemo juntl maj:

—¿Tzaꞌntzun tten tuꞌn tbant jlu?

Chi Nicodemo.

10 Xi ttzakꞌweꞌn Jesús:

—¿Aya xnakꞌtzal cye aj Israel maj mintiꞌ nneꞌl tnicꞌa tiꞌj jlu?

11 Ax toc cxel nmaꞌne teya,

aju baꞌn kuꞌne in xi kmaꞌne;

ex aju ma kile atzunju in xi ktxꞌolbaꞌne;

atzun cyeye mintiꞌ in xi cyocslaꞌne aju yol in xi kmaꞌne.

12 Ma txi nmaꞌne cyeye aju at twitz txꞌotxꞌ,

ex mintiꞌ in xi cyocslaꞌne,

¿tzaꞌntzun tten tuꞌn t-xi cyocslaꞌne ka ma txi nmaꞌne aju te tuj cyaꞌj?

13 Mi aꞌl jun o japun tuj cyaꞌj,

nok oꞌcx akine scꞌoꞌmaj kine tuꞌn Dios tuꞌn ntene cyucꞌil xjal ma chin cuꞌtze tuj cyaꞌj,

[ex atine tuj cyaꞌj.]

14 Ic tzaꞌn te Moisés jax tkꞌoꞌn jun tilbilal lobaj twi tzeꞌ tuj lugar mintiꞌ cynajbil xjal tuj,

icxtzun weye ilxix tiꞌj tuꞌn njax kꞌoꞌne,

akine scꞌoꞌmaj kine tuꞌn Dios tuꞌn ntene cyucꞌil xjal,

15 tuꞌntzun miꞌn cynaj cycyakil keju ma che ocslan wiꞌje,

nok oꞌcx tuꞌn tten cychwinklal te jumajx.

16 Tuꞌnju nimxix tcꞌujlalil Dios cyiꞌj xjal,

cyjaꞌtzun ma chin tzaj samaꞌne tuꞌn,

akine oꞌcxcu jun Tcꞌwaꞌl,

tuꞌntzun miꞌn cynaj cycyakil keju ma che ocslan wiꞌje,

nok oꞌcx tuꞌn tten cychwinklal te jumajx.

17 Porque mintiꞌ ma chin tzaj samaꞌne tuꞌn Dios cyxol xjal tuꞌn tcub cysentens xjal,

nok oꞌcx tuꞌn cyclet xjal wuꞌne,

akine Tcꞌwaꞌl.

18 Alcye ma tzꞌocslan wiꞌje,

mlay cub t-sentens;

atzun keju mintiꞌ in che ocslan,

ya ma cub cysentens,

porque mintiꞌ in xi cyocslaꞌn nyole,

akine oꞌcxcu jun Tcꞌwaꞌl Dios.

19 Ex tuꞌntzun jlu,

ma cub cysentens xjal;

porque ul ju spicꞌun cyxol xjal,

atzun cye xjal mas e tzalaj tiꞌj tuꞌn cyten tuj klolj,

cycꞌiꞌ tuꞌn cyten tuj spicꞌun,

porque mya baꞌn cybinchben.

20 Porque cycyakil keju in che binchan mya baꞌn,

nneꞌl cyicꞌun aju spicꞌun,

ex miꞌn cyaj tuꞌn cyul tuj spicꞌun,

tuꞌntzun miꞌn tel tuj kꞌanchaꞌl aju cybinchben mya baꞌn.

21 Atzun ke xjal in che oc lpeꞌ tiꞌj ju yol axix toc ex in japun cyuꞌn,

in che ul tuj spicꞌun tuꞌntzun tel tuj kꞌanchaꞌl ka in cybinchaꞌn tcyakil ic tzaꞌnx tajbil Dios,

chi Jesús.

22 Tbajlenxi jlu,

xiꞌ Jesús tuj txꞌotxꞌ Judey cyucꞌix ke t-xnakꞌtzben,

ex axtzun o ten cyucꞌil,

ex in che byantok xjal tuꞌn tuj aꞌ.

23 Ax icx te Juan in che byantok xjal tuꞌn tuj jun lugar Enón tbi,

nikayin ttxlaj lugar Salim,

porque attok nim aꞌ tuj Enón,

ex ke xjal in che ultok tucꞌil tuꞌn cybyan tuj aꞌ.

24 Porque naꞌnxtok tocx kꞌoꞌn Juan tuj pres.

25 Jawtzun jun yol cyxol ke t-xnakꞌtzben Juan cyucꞌil ke xjal judiy tiꞌj ju txꞌajbil te tcyakil tzaꞌn tten tuꞌn t-sakix ic tzaꞌnx in tmaꞌn cyley.

26 E ultzun tucꞌil Juan ex xi cymaꞌn te:

—Xnakꞌtzal,

aju o ten tucꞌila jlajxi nima Jordán,

aju tzaj tmaꞌna keye,

lu in che byan xjal tuꞌn,

ex cycyakil xjal in cheꞌx tucꞌil.

27 Tzaj ttzakꞌweꞌn Juan:

—Mintiꞌ jun jacu tcꞌam jun xjal,

ka mya tuꞌn Dios in tzaj tkꞌoꞌn te.

28 Ax keye testiw wiꞌje,

ex o cybiye ju yol xi nmaꞌne:

Myawe kin aju Crist aju at toclen tuꞌn Dios,

nok oꞌcx ma chin tzaj samaꞌne tuꞌn ncub neje twitz,

nchitzune.

29 Oc toc jun mejebleꞌn,

aju xinak tcub xuꞌj ttxlaj,

atzunte chmilbajju;

atzunju tamiw chmilbaj tcub ttxlaj ex in bin tiꞌj tyol chmilbaj,

nimxix in tzalaj tiꞌj tyol chmilbaj;

cyjaꞌtzun tten nimxix in chin tzalaje tiꞌj jlu.

30 Cyjaꞌtzun ilxix tiꞌj tuꞌn tten mas toclen,

atzun weye tuꞌn tten nok chꞌin woclene.

31 Aju tzajni tuj cyaꞌj at toclen cyibaj cycyakil;

atzunju tcub twitz txꞌotxꞌ,

ax tcubte twitz txꞌotxꞌ ex in yolin tiꞌj ju te twitz txꞌotxꞌ;

aju tzajni tuj cyaꞌj at toclen tibaj tcyakil.

32 Aju o til ex o tbi,

atzunju in tzaj tchicꞌbaꞌn;

pero mi aꞌl jun in xi tocslaꞌn aju tyol.

33 Pero ka at jun xjal ma txi tocslaꞌn aju tyol,

in tcyuwsaꞌn ka ate Dios axix toc tyol.

34 Porque aju ma tzaj samaꞌn tuꞌn Dios,

atzunju in yolin tiꞌj tyol Dios;

porque te Dios mya maloꞌn T-xew in tzaj tkꞌoꞌn.

35 Ate Dios Mambaj cꞌujlaꞌn Tcꞌwaꞌl tuꞌn,

ex o tzaj tkꞌoꞌn Mambaj tcyakil tuj tkꞌab Tcꞌwaꞌl.

36 Alcye ma tzꞌocslan tiꞌj Tcꞌwaꞌl Dios,

at tchwinklal te jumajx;

atzunju tcꞌiꞌ tzꞌocslan tiꞌj Tcꞌwaꞌl Dios,

mlayx ten tchwinklal,

nok oꞌcx cbel jun tcastiw maꞌxix tuꞌn Dios.