CYBINCHBEN APOSTL
Tma Jesús ka attok tulel Xewbaj Xjan
1
Aya Teófilo,
tuj tnejel wuꞌje xi ntzꞌibane tiꞌj tcyakilju o tbincha Jesús ex tiꞌj ju xnakꞌtzbil xi tkꞌoꞌn t-xe tnejel.
2 Oꞌcxtzun weꞌ tuꞌn tkꞌonte xnakꞌtzbil tej taj kꞌiꞌn tuj cyaꞌj.
Ex naꞌnxtok taj tuj cyaꞌj e jaw t-scꞌoꞌn ke apostl,
ex tuꞌn Xewbaj Xjan xi tmaꞌn cye alcye tuꞌn cybinchante.
3 Ex tcyimlenxi Jesús,
cub tyecꞌun tib cywitz itzꞌ te;
ax toc jlu,
porque o cyil apostl,
nimcu maj cub tyecꞌun tib Jesús cywitz tuj 40 kꞌij,
ex in yolintok cyucꞌil tiꞌj tcawbil Dios.
4 Atxtok Jesús junx cyucꞌil apostl xi tmaꞌn cye tuꞌn miꞌn cyex tuj Jerusalén.
—Ax che ayone tiꞌj ju tziyimaj cyeye tuꞌn Nmane,
aju ma cybiye weye.
Jesús sube al cielo (Cybinchiben 1.4-11)
5 Porque ax toc ate Juan o che byan xjal tuꞌn tuj aꞌ;
atzun cyeye chꞌix tul canun kꞌij tuꞌn cybyane tuꞌn Xewbaj Xjan,
chi Jesús xi tmaꞌn cye.
Tej taj kꞌiꞌn Jesucrist tuj cyaꞌj
6 Atzun cye apostl cybuyintok cyib tucꞌil Jesús xi cykanin te:
—Tat,
¿apetzun tkꞌijlalil jaꞌlo tuꞌn ttzaj tkꞌoꞌntla cyoclen aj Israel tuꞌn cycawin juntl maj cyxolx?
Che chi.
7 Xi ttzakꞌweꞌn Jesús:
—Mintiꞌ cyoclene tiꞌj tuꞌn cybinteye jtoj tuꞌn tbant jlu ex alcye kꞌij;
ate Nmane tajaw ex ximamajtl tuꞌn alcye kꞌij tuꞌn tbinchante.
8 Pero oc tul Xewbaj Xjan cyucꞌile,
oc cycꞌmaꞌye cyipumale,
ex che oquele testiw wiꞌje tuj tnam Jerusalén,
tuj tcyakil txꞌotxꞌ Judey,
tuj txꞌotxꞌ Samaria,
ex tuj tcyakil twitz txꞌotxꞌ,
chi Jesús cye.
9 Tej tbaj tmaꞌn Jesús jlu,
matok in che queꞌyin apostl tiꞌj,
jaw kꞌiꞌn Jesús cywitz,
aj kꞌiꞌn tuj muj ex mintiꞌtl o cyil.
10 In che queꞌyintok twitz cyaꞌj cyjaꞌtok tjax lakꞌeꞌ Jesús,
o cyil cub cyyecꞌun cyib cabe xinak e cub weꞌ cytxlaj,
toc cyxbalun sak queꞌyin.
11 Cymatzun ke xinak cye:
—Akeye xinak aj Galiley,
¿tikuꞌn in xi cyqueꞌyine twitz cyaꞌj?
Axte Jesús aju xjaw kꞌiꞌn cywitze tuꞌn t-xiꞌ tuj cyaꞌj,
icxtzun tzul ic tzaꞌn xcyile xiꞌ tuj cyaꞌj.
Jaw scꞌet Matías te t-xel Judas
12 Atzun cye apostl e ajtz meltzꞌaj twi witz Olivos tbi,
e pon tuj Jerusalén,
nikayin cyxol,
balo jun kilómetro.
13 Tejtzun cypon tuj tnam e jax tuj tcab colin ja,
jatum in che posadiyintok cycyakil,
Pedro tucꞌix Jacobo,
tucꞌix Juan,
tucꞌix Andrés,
tucꞌix Felipe,
tucꞌix Tomás,
tucꞌix Bartolomé,
tucꞌix Mateo,
tucꞌix Jacobo aju tcyꞌajal Alfeo,
tucꞌix Simón aju toctok te tajlal cyxol jun partid xjal cananist cybi ex tucꞌix Judas aju titzꞌin Jacobo.
14 Cycyakil ke jlu cucx nnoꞌc cychmon cyib tuꞌn cynaꞌn Dios,
cyucꞌix ke xuꞌj,
tucꞌix Mariy aju ttxuꞌ Jesús,
ex cyucꞌix ke titzꞌin Jesús,
junx cyximbetz cycyakil.
15 Cyujx ke kꞌij lu jaw weꞌ Pedro cyxol ke erman,
atzun cyajlal baj cychmon cyib balo 120,
ex xi tmaꞌn Pedro:
16 —Akeye erman,
ilxix tiꞌj tuꞌn tjapun aju tzꞌiban tuj Tuꞌjil jatum o yolin David tuꞌn Xewbaj Xjan tiꞌj Judas,
ate Judas cub nej cywitz keju e tzaj tzyunte Jesús;
17 porque tucꞌix Judas oc te tajlal kxole,
ex tcꞌam toclen tuꞌn takꞌnan kucꞌile.
18 Ate jlu lakꞌet jun piẍ txꞌotxꞌ tuꞌn tuꞌnju twiꞌ tcꞌuꞌj tcꞌam tej tbinchante mya baꞌn;
ex tzaj t-xon tib pichꞌl tten,
biꞌx el sbitꞌj tcꞌuꞌj,
ex biꞌx etz chitpaj tcyakil tuj tcꞌuꞌj.
19 Ex el tkanil jlu cyxol cycyakil xjal najl tuj Jerusalén,
cyjaꞌtzun Acéldama tbi ju txꞌotxꞌ lu oc cykꞌoꞌn tuj cyex cyyol,
atzun in tmaꞌn ju yol lu:
Txꞌotxꞌ twiꞌ chicꞌ.
20 Porque at jun yol tzꞌiban tuj Salmo,
chi cyjaꞌ:
Tzꞌocwit tnajbil mintiꞌ xjal tuj,
ex mi junwt xjal ten tuj.
Ax icx in tmaꞌn:
Juntlxwit txi cꞌmonte toclen,
chi tuj Tuꞌjil.
21 Cyjaꞌtzun ilxix tiꞌj tuꞌn tjaw scꞌet jun erman cyxol ke xinak o che ten junx kucꞌil tcyakil kꞌij tej tten Kajaw Jesús kxol,
22 ex o che ten kucꞌil atxix tej tbyan Jesús tuꞌn Juan tuj aꞌ,
ex ateꞌx kucꞌil tej tjaw kꞌiꞌn Jesús kxol tuꞌn t-xiꞌ tuj cyaꞌj;
ilxixtzun tiꞌj tuꞌn tjaw scꞌet jun erman cyxol ke jlu tuꞌn toc te testiw junx kucꞌil tiꞌj tjawlen ankꞌin Crist,
chi Pedro xi tmaꞌn cye.
23 E yolintzun cyiꞌj cabe xinak alcye jun tuꞌn tcyaj:
A José Barsabás aju Justo tcabin tbi,
ex tucꞌix Matías.
24 Ex e naꞌn Dios,
cyma:
—Aya Tat,
ojtzkiꞌn tuꞌna cyanmi cycyakil xjal,
yecꞌuntza alcye scꞌoꞌmaj tuꞌna cyxol cabe xinak lu
25 tuꞌntzun tajben tuj akꞌuntl lu ex tuꞌn toc te apostl te t-xel Judas,
porque tuꞌn tlaj cub tzꞌak Judas tuj il el tpaꞌn tib tuꞌn tpon tuj tex tlugar,
che chi.
26 Jawtzun cyiꞌn swert tiꞌj alcye tuꞌn tcyaj,
ate Matías cyaj,
ex oc te tajlal cyxol junlajtl apostl.