Tej tul Xewbaj Xjan
2
Tejtzun tjapun tkꞌijlalil ninkꞌij Pentecostés,
junx cybuyin cyib cycyakil ex junx cyximbetz.
2 Ex minabencu tzaj jun tkꞌajkꞌajel tuj cyaꞌj,
ic tzaꞌn jun cykꞌikꞌ in xumin wen,
ex nimxix tkꞌajkꞌajel ul tuja jatum kꞌukl keꞌtok.
3 Ex o cyil jun señ ic queꞌyin ic tzaꞌn kꞌakꞌ in julin,
cub ten tibaj cywiꞌ cycyakil.
4 Ex cycyakil baj noj tuj cyanmi tuꞌn Xewbaj Xjan,
ex e oc ten yolil tuj cyyol junxitl xjal,
ic tzaꞌnx in tkꞌoꞌn Xewbaj Xjan tuꞌn cyyolin tiꞌj.
5 Ex cyuj ke kꞌij lu ateꞌtok xjal judiy tuj Jerusalén,
nimal Dios ke,
otok che tzaj tuj tcyakil tnam twitz txꞌotxꞌ.
6 Tejtzun cybinte aju tkꞌajkꞌajel tzaj tuj cyaꞌj,
baj cychmon cyib ke xjal;
ex biꞌx jaw naj cynabl porque teyle junjun xjal in tbiꞌntok tex tyol,
aju in che yolintok apostl tiꞌj.
7 Ex biꞌx jaw naj cynabl ex e labin tiꞌj,
cyma cyxolx:
—¿Ti cyten jlu?
¿Myapetzun aj Galiley cycyakil keju in che yolin?
8 ¿Tzaꞌntzun tten in kbiꞌn in che yolin tiꞌj kyol teyle junjun ke jatum xko itzꞌj?
9 At junjun aj Partia,
aj Media,
aj Elam,
ex at junjun ke najl tuj Mesopotamia,
tuj Judey,
tuj Capadocia,
tuj Ponto,
tuj Asia,
10 tuj Frigia,
tuj Panfilia,
tuj Ejipt,
ex tuj junjun tnej txꞌotxꞌ te Africa tiꞌjxi Cirene.
Ex at junjun ke aj Rom ax najl tzalu ex at junjun ke ax toc judiy xjal,
ex at junjun ke ma tzꞌoc te judiy xjal nok tuꞌnju ma tocsla cyley judiy.
11 Ex at junjun ke aj Cret,
ex junjun aj Arabia,
pero in cheꞌx kbiꞌn in che yolin tiꞌj tyol junjun ke,
in che yolin tiꞌj tbinchben Dios nim tipumal.
12 Ex biꞌx jaw naj cynabl cycyakil in che labin tiꞌj,
in cymaꞌn cyxolx:
—¿Ti t-xilen tcyakil jlu?
13 Pero at txkantl in che xmayin cyiꞌj:
—Cꞌal kꞌeꞌn ke jlu,
che chi.
Tej tpacban Pedro cye xjal
14 Jawtzun weꞌ Pedro cyucꞌix ke junlajtl apostl,
jaw tkꞌajkꞌajel twiꞌ cyuw,
xi tmaꞌn cye xjal:
—Akeye xjal judiy ex cycyakile akeye najl tuj Jerusalén,
lu jun tkanil cxel nmaꞌne cyeye,
cybintze.
15 Ke xinak lu mya cꞌal kꞌeꞌn ke,
ic tzaꞌn cyeye in cymaꞌne,
porque ma las nueve te prim.
16 Atzun jlu aju o kꞌmanjtz tuꞌn Joel aju t-sanjel Dios:
17 Chi Dios:
Tuj mancbil kꞌij ctzajel nkꞌoꞌne Nxewe tuj cyanmi cycyakil xjal;
ke cycyꞌajale ex ke cymeꞌjele che oquel te nsanjele tuꞌn t-xi cypacbaꞌn nyole cye xjal,
ex ke cuꞌxun ateꞌ cyxole at ctzajel yecꞌun cye mer ic tzaꞌn tuj witzicꞌ,
ex ke tij xjal cyxole cꞌelel cynicꞌ tiꞌj tuj witzicꞌ aju wajbile cye.
18 Ax icx ctzajel nkꞌoꞌne Nxewe tuj cyanmi ke nmajene xinak ex ke nmajene xuꞌj tuj tkꞌijlalil tzul,
ex che oquel te nsanjele tuꞌn t-xi cypacbaꞌn nyole.
19 Ctzajel nyecꞌune ke nbinchbene maꞌ cyxilen twitz cyaꞌj,
ex che tzajel nkꞌoꞌne ke señ twitz txꞌotxꞌ:
Chicꞌ,
tucꞌix kꞌakꞌ,
tucꞌix sib in bukin.
20 Cmeltzꞌajel ju kꞌij tuꞌn toc te klolj,
ex aju xjaw cꞌoquel queꞌyin ic tzaꞌn chicꞌ naꞌnxtok tul tkꞌijlalil tuꞌn tul Kman,
jun kꞌij nim toclen ex ckoptzꞌajelxix.
21 Ex cycyakil keju in che cubsan twitz Kman che cletel,
chi tuj Tuꞌjil.
22 Cybintze nyole akeye xinak aj Israel:
Ate Jesús aj Nazaret,
tej tten cyxole baꞌn eꞌla tuj twitz Dios,
ex o cyile ke tbinchben nim cyipumal ex ke señ e bant tuꞌn,
ax Dios o kꞌonte tipumal,
ex baꞌn tcyakil jlu cyuꞌne.
23 Ate jlu xi tkꞌoꞌn Dios tuj cykꞌabe,
porque ximamajtl tuꞌn Dios ex ojtzkiꞌmajtl tuꞌn,
tzaj cytzyuꞌne ex xi cykꞌoꞌne tuj cykꞌab aj il tuꞌn tjaw cykꞌoꞌn twitz crus ex tuꞌn tcub cybyoꞌn.
24 Pero jatz ankꞌin tuꞌn Dios ex etz tcoꞌpin tjakꞌ tipumal camic,
porque mintiꞌ xcyeꞌ camic tiꞌj tuꞌn tcub ttzyuꞌn.
25 Porque o yolin rey David tiꞌj Jesús,
chi cyjaꞌ:
Cucx toc nqueꞌyine Kman tcub nwitze;
mlay chin yucche,
porque at ntxlaje tuj nbankꞌabe.
26 Cyjaꞌtzun in tzalaj wanmiye,
ex in chin yoline tuꞌnju in chin tzalaje.
Ex kꞌukl ncꞌuꞌje tiꞌj,
icx nximlale cjawil ankꞌin;
27 porque mlay cyaj tkꞌoꞌna wanmiye tuj cynajbil cyimni,
ex mlay chin cyaj tkꞌoꞌna tuꞌn ttzuwix nximlale,
akine tmajena nimal teya.
28 Ma tzaj tyecꞌuna weye ke be te chwinklal,
ex ctzajel tkꞌoꞌna tzalajbil nim weye oc ntene tucꞌila,
chi David tuj Tuꞌjil.
29 Akeye erman,
axix toc cxel nmaꞌne cyeye tiꞌj kxeꞌchel David o cyim ex o cuꞌx makuꞌn,
ex aju tpantyón atx kxol jaꞌlo.
30 Pero tuꞌnju t-sanjel Dios te David,
ex baꞌn tuꞌn otok tzaj ttziyan Dios jun yol axix toc te,
ka tiꞌj tiyjil tuꞌn titzꞌj ju Crist aju at toclen tuꞌn Dios,
ex tuꞌn tcub keꞌ Crist tuj tkꞌukbil David tuꞌn tcawin.
31 Biꞌmajtl jlu tuꞌn David,
cyjaꞌtzun o yolin tiꞌj tuꞌn tjatz ankꞌin Crist aju at toclen tuꞌn Dios,
ex o yolin tiꞌj tuꞌn miꞌn tcyaj ten tanmi tuj cynajbil cyimni,
ex tuꞌn miꞌn ttzuwix tchibjal.
32 Ate Jesús jatz ankꞌin tuꞌn Dios,
ex kcyakile ma ko oque testiw tiꞌj.
33 Ma jaw nimsaꞌn Jesús ex ma pon ttxlaj Dios tuj bankꞌabaj,
ex ma tcꞌam Jesús Xewbaj Xjan,
aju tziyimaj te tuꞌn Dios Mambaj,
cyjaꞌtzun ma cuꞌtz tchitun jlu aju ma cyile ex ma cybiye.
34 Porque mya ate David jax tuj cyaꞌj;
pero ax o kꞌmante ju yol lu:
Tma Kman te Wajawe:
Keꞌcuya tuj nbankꞌabe,
35 acutzun in cub cyiꞌj ke aj kꞌoj tiꞌja wuꞌne,
chi David tuj Tuꞌjil.
36 Cybintze cycyakile jun yol axix toc,
akeye aj Israel:
Ate Jesús aju jaw cykꞌoꞌne twitz crus,
ma tzꞌoc tkꞌoꞌn Dios te Kajaw ex ma tzaj tkꞌoꞌn toclen tuꞌn toc te Crist,
chi Pedro cye.
37 Tejtzun cybinte xjal jlu,
biꞌx oc taꞌw yol tiꞌj cyanmi,
ex xi cymaꞌn te Pedro ex cye txkantl apostl:
—Akeye erman,
¿alcye oc kbinchaꞌye?
38 Atzunte Pedro xi tmaꞌn cye:
—Tajtz tiꞌj cyanmiye ex tuꞌn tbyan teyle junjun cyeye tuj tbi Jesucrist tuꞌntzun tnajset cyile;
ex ctzajeltzun tkꞌoꞌn Dios Xewbaj Xjan te jun oyaj cyeye.
39 Porque te cyeye tzaj ttziyan Dios jlu,
icx cye cycꞌwaꞌle,
ex cye cycyakil keju ateꞌ najchak;
aju yol lu cye cycyakil keju che txconjtzel tuꞌn Kman aju Kdios,
chi Pedro.
40 Xi tchicꞌbaꞌn Pedro aju yol axix toc,
xi tkꞌoꞌn cynabl,
ex xi tmaꞌn nimcu yol cye:
—Cyclom cyibe cyxol ke xjal ateꞌ jaꞌlo jumajx mya baꞌn ke,
chi Pedro.
41 Cyjaꞌtzun e byan ke xjal akeju xi cyocslaꞌn aju yol tma Pedro;
ax kꞌij e ocslan balo ox mil xjal.
42 Ex ax e cyaj ten cycyakil tuj xnakꞌtzbil cyuꞌn apostl,
ex at cymojbabl cyib,
ex cucx nnoꞌc cychmon cyib tuꞌn tcub cysipan wabj cyxol,
ex cucx in che naꞌn Dios.
Tzaꞌn tten cychwinklal nej ocslal
43 Ex tzaj nim t-xobil cyiꞌj cycyakil xjal;
ex o cybincha apostl nimcu binchben maꞌxix cyxilen tuꞌn tipumal Dios.
44 Cycyakil keju otok che ocslan ateꞌ junx,
ex tcyakilju at cye in baj cysipan cyxolx.
45 In xi cycꞌayin cytxꞌotxꞌ ex ju at cye,
ex in xi cysipan pwak cye cycyakil,
nok alcye at tajbenxix te junjun.
46 Tcyakil kꞌij in che pon tuj tja Dios,
in cub cysipan wabj tuj cyja ex in che waꞌn junx tucꞌil tzalajbil ex mans cyanmi.
47 In cykꞌoꞌn chjonte te Dios,
ex baꞌn e jeꞌl tuj cywitz cycyakil xjal.
Ex tcyakil kꞌij in che chmet-xi ocslal tuꞌn Kajaw,
akeju in che clet-xi junjun kꞌij.