O banix jun xjal cox
3
At jun kꞌij cyjaꞌtok tjax Pedro ex Juan tuj tja Dios tuj or te nabl Dios,
te las tres te kale.
2 Ex cyjaꞌtok t-xi kꞌiꞌn jun xinak cox titzꞌjlenx,
aju in pon cyiꞌn xjal tcyakil kꞌij ttzi tja Dios aju toc tbi Tbanilxix,
tuꞌn tkanin tcotz cye xjal in che ocx tuj tja Dios.
3 Tejtzun t-xi tqueꞌyin cox cyjaꞌtok tocx Pedro tucꞌix Juan tuj tja Dios xi tkanin tcotz cye.
4 Oc tqueꞌyin Pedro ex Juan tiꞌj,
ex xi tmaꞌn Pedro te:
—Ko tqueꞌyintza.
5 Atzunte cox toc twiꞌ tiꞌj ju yol,
in ayon tiꞌj alcye chꞌin tuꞌn t-xi kꞌoꞌn te.
6 Xitzun tmaꞌn Pedro te:
—Mintiꞌ sak pwak at wucꞌile,
mi kꞌan pwak,
pero aju at wucꞌile atzunju cxel nkꞌoꞌne teya:
Tuꞌn tipumal Jesucrist aj Nazaret,
weꞌctza ex beta.
7 Jawtzun ttzyuꞌn Pedro tbankꞌab cox,
ex jaw twaban;
ex jurat e cyuwix naj ke tkan ex cymopil tkan.
8 Jawtzun tꞌicpaj cox,
cub weꞌ,
ex oc ten betel;
ex ocx cyucꞌil tuj tja Dios in bet ex in tꞌicpaj,
ex in tkꞌoꞌn chjonte te Dios.
9 Cycyakil xjal e queꞌyinte in bet cox ex in tkꞌoꞌn chjonte te Dios.
10 Ex tzaj nim cyxobil,
ex e jaw secꞌpaj tuꞌnju otok banix cox,
porque el cynicꞌ tiꞌj ka ateju in cub keꞌtok kanil tcotz ttzi tja Dios,
aju Tbanilxix tbi.
Tej tpacban Pedro twitz tja Dios
11 Matok tzyuꞌn Pedro ex Juan tuꞌn cox aju otok banix,
baj cychmon naj cyib xjal cyiꞌj twitz ja toc tbi te Salomón,
otok naj cynabl xjal.
12 Tej t-xi tqueꞌyin Pedro jlu,
xi yolin cye xjal:
—Akeye xinak aj Israel,
¿tikuꞌn in che labine tiꞌj jlu,
ex tikuꞌn oꞌcx nnoꞌc baj cywitze kiꞌje?
Baka tuꞌn kipumale xbant tbet jlu,
tuꞌnpetzunju nimal Dios koꞌye.
13 Aju Tdios kxeꞌchel Abraham,
Isaac ex Jacob,
ate xjaw nimsante Tcꞌwaꞌl aju Jesús tbi,
ate jlu xi cykꞌoꞌne tuj tkꞌab Pilat,
ex el cyicꞌune,
ex otok tma Pilat tuꞌn tetz ttzokpiꞌn.
14 Atzun cyeye el cyicꞌune Jesús aju Xjan ex Tzꞌaklxix,
ex xi cykanine te Pilat tuꞌn tetz ttzokpiꞌn jun byol xjal.
15 Cyjaꞌtzun cub cybyoꞌne aju Tajaw chwinklal,
pero jatz ankꞌin tuꞌn Dios cyxol cyimni,
ex ma ko oque te testiw tiꞌj.
16 Ate xjal lu,
aju nnoꞌc cyqueꞌyine ex ojtzkiꞌn cyuꞌne,
ma tzꞌoc tipun tkan nok tuꞌn tipumal Jesús,
tuꞌnju ma ocslan tiꞌj.
Ex tuꞌnju ma ocslan tiꞌj Jesús,
biꞌx ma cyaj banix cox ic tzaꞌn ma cyile cycyakile.
17 Atzun jaꞌlo erman,
baꞌn wuꞌne,
cub cybyoꞌne Jesús tuꞌnju mintiꞌ el cynicꞌe tiꞌj aju o cybinchaye,
icx ke nejenel cyxole mintiꞌ el cynicꞌ tiꞌj.
18 Cyjaꞌtzun ma japun tuꞌn Dios aju tyol aju kꞌmaꞌmaj ojtxi cyuꞌn cycyakil ke t-sanjel,
tuꞌn tcyim ju Crist aju tzaj t-samaꞌn.
19 Tajtztzun tiꞌj cyanmiye,
ex cyajtz meltzꞌaje tucꞌil Dios tuꞌn tcub najset cyile;
tuꞌntzun ttzaj tkꞌoꞌn Kman tkꞌijlalil chewsabl,
20 ex tuꞌn ttzaj samaꞌn Jesús aju Crist,
aju scꞌoꞌmaj atxix ojtxi tuꞌn toc te Clol ke.
21 Ilxix tiꞌj tuꞌn tcyaj ten Jesús tuj cyaꞌj acutzun in japun tkꞌijlalil tuꞌn tbinchet tcyakil juntl maj te acꞌaj,
ic tzaꞌn o tma Dios tuꞌn cyyol ke t-sanjel xjan e ten atxix ojtxi.
22 Porque o tma Moisés cye kxeꞌchel ojtxi:
Cjawil t-scꞌoꞌn Kman Dios jun t-sanjel ax cyxol cyermaniye,
tuꞌn tten cyucꞌile ic tzaꞌn weye.
Cybinxe tcyakilju oc tmaꞌ cyeye,
23 porque alcye jun xjal mintiꞌ ma txi tbiꞌn tyol aju t-sanjel Dios tzul t-samaꞌn,
biꞌx cnajel tuꞌn miꞌn ttentl cyxol aj Israel,
chi Moisés.
24 Cyjaꞌtzun cycyakil t-sanjel Dios o che yolin,
tzajnix xeꞌt tiꞌj Samuel,
ex ke txkantl,
o tzaj cymaꞌn tkanil tiꞌj tkꞌijlalil jaꞌlo.
25 Te cyeye aju yol tzaj ttziyan Dios cye t-sanjel,
ex at cyoclene tiꞌj ju yol cyaj bant tiꞌj tuꞌn Dios cyucꞌil kxeꞌchel,
o tma Dios te Abraham cyjaꞌ:
Nok tuꞌn tiyjila che bel cyꞌiwlaꞌn cycyakil cyiyjil xjal twitz txꞌotxꞌ,
chi Dios.
26 Ate Dios jaw ankꞌin Tcꞌwaꞌl tuꞌn,
ex tzaj t-samaꞌn tnejelxix te cyeye tuꞌn cycyꞌiwlanjtze tuꞌn,
ex tuꞌn tajtz meltzꞌaj teyle junjun cyeye tuꞌn miꞌn ttentl tuj til,
chi Pedro cye.