Pon kꞌiꞌn Pedro tucꞌix Juan cywitz aj sanjelal
4
Matok in yolin Pedro tucꞌix Juan cyucꞌil ke xjal,
e ul tilj ke pal cye judiy tucꞌix nejenel cye polisiy xkꞌukil tja Dios ex cyucꞌix ke sadusey.
2 Tzaj cykꞌoj cyiꞌj tuꞌnju in cykꞌoꞌntok xnakꞌtzbil cye xjal,
ex tuꞌnju in cypacbaꞌn tuꞌn cyjaw ankꞌin ke cyimni ic tzaꞌn te Jesús jatz ankꞌin.
3 Tzyettzun Pedro cyuꞌn,
tucꞌix Juan,
ocx cykꞌoꞌn tuj pres,
texi juntl kꞌij e jeꞌtz kꞌiꞌn,
porque otok tzꞌoc kax.
4 Pero nimcu xjal cybi cyyol,
ex e ocslan;
japuntzun cyajlal xinak balo jweꞌ mil.
5 Texi juntl kꞌij baj cychmon cyib ke nejenel cyxol xjal judiy tuj Jerusalén,
cyucꞌix ke cytijil xjal,
ex cyucꞌix ke xnakꞌtzal tiꞌj ley,
6 ex tucꞌix Anás aju nejenel cye pal,
tucꞌix Caipás,
tucꞌix Juan,
tucꞌix Alejandro,
ex cyucꞌix cycyakil cyiyjil nejenel cye pal.
7 Tzajtzun kꞌiꞌn Pedro tucꞌix Juan ex cub cykꞌoꞌn cyxol,
ex xi cykanin cye:
—¿Ti cyoclene,
ex alcye saj kꞌmante cyeye tuꞌn cybinchanteye jlu?
8 Atzunte Pedro,
nojni tuj tanmi tuꞌn Xewbaj Xjan,
xi tmaꞌn cye:
—Akeye nejenel cyxol xjal ex cytijil aj Israel keye:
9 Ma ko oque tuj xjel cyuꞌne tiꞌj jun baꞌn xkbinchaye te jun xjal yab,
tzaꞌn tten xbanix.
10 Cxeltzun kchicꞌbaꞌne cyeye ex cye cycyakil xjal aj Israel:
Ate xjal lu aju waꞌl cywitze ma banix nok tuꞌn tipumal Jesucrist aj Nazaret,
aju jaw cykꞌoꞌne twitz crus,
pero o jatz ankꞌin cyxol cyimni tuꞌn Dios.
11 Ate Jesús aju abj el cyicꞌune akeye binchal ja,
pero ma tzꞌoc te scyini te simyent.
12 Ex mi aꞌl juntl clol ke;
porque tuj tcyakil twitz txꞌotxꞌ mintiꞌ ma tzaj tmaꞌn Dios ka at juntl tuꞌn kclet tuꞌn,
chi Pedro xi tmaꞌn cye.
13 Tejtzun cyqueꞌyinte aj sanjelal mintiꞌ cyxobil Pedro tucꞌix Juan,
e labin cyiꞌj,
porque baꞌn cyuꞌn ka mya xnakꞌtzamni ke tuj scwel,
ex tal akꞌnal xjal ke;
ex el cynicꞌ cyiꞌj ka otok che ten tucꞌil Jesús.
14 Ex oc cyqueꞌyin aju xjal otok banix waꞌl ttxlaj Pedro ex Juan,
ya mintiꞌtl tumel tuꞌn cyyolin mastl cyiꞌj.
15 Oꞌcx xi cymaꞌn aj sanjelal cye tuꞌn cyex lakꞌeꞌ cyxol;
ex e oc ten yolil tiꞌj cyxolx,
16 in cymaꞌn:
—¿Ti cꞌoquel cyiꞌj xjal lu?
Porque ma baj cybiꞌn cycyakil xjal,
akeju najl tuj Jerusalén,
tiꞌj jun señ nim tipumal ma cybincha,
ex mlay bant tuꞌn tcub kewan jlu.
17 Pero tuꞌn miꞌn tel mastl tkanil cyxol xjal,
kxobtzaꞌn oc ke tuꞌn miꞌn cyyolin mastl tiꞌj Jesús,
che chi.
18 E tzajtzun cytxcoꞌn ex xi cymaꞌn cye:
Miꞌn che yoline ex miꞌn txi cykꞌoꞌntle xnakꞌtzbil tiꞌj Jesús,
che chi.
19 Atzunte Pedro tucꞌix Juan xi cytzakꞌweꞌn:
—Cyximancuye ka baꞌn tuj twitz Dios tuꞌn t-xi knimane cyyole ex mya ate Dios tuꞌn t-xi knimane;
20 porque mlay bant tuꞌn t-xi kcoline tuꞌn t-xi kmaꞌne aju ma kile ex ma kbiye,
che chi.
21 Atzun cye aj sanjelal e oc cyxobtzaꞌn juntl maj,
e jeꞌtztzun cytzokpiꞌn,
mintiꞌ cnet tumel cyuꞌn tuꞌn tcub cysentens tuꞌn cylaj xjal,
porque cycyakil xjal in jaw cynimsaꞌn tbi Dios tiꞌj ju xjal cox otok banix.
22 Porque ate xjal lu otok japun 40 abkꞌi tuꞌn tej tbanix tuꞌn tipumal Dios.
Xi cykanin ocslal tuj naꞌj Dios tuꞌn ttzaj kꞌoꞌn cyipumal tuꞌn cyyolin
23 Tejtzun cyetz tzokpiꞌn Pedro tucꞌix Juan,
e jeꞌxtzun cyxol cyucꞌil,
ex xi cytxꞌolbaꞌn tcyakilju otok kꞌmanjtz cye cyuꞌn nejenel cye pal ex cyuꞌn cytijil xjal.
24 Tejtzun cybinte ke ocslal,
jaw tkꞌajkꞌajel cywiꞌ junx,
ex e yolin tucꞌil Dios ex cyma:
—Aya Tajaw Tcyakil,
ex aya Dios binchal cyaꞌj,
txꞌotxꞌ ex mar ex tcyakilju at cywitz.
25 Tuꞌn Xewbaj Xjan o tma tmajena David jun tyola chi cyjaꞌ:
¿Tikuꞌn ma che jaw tilj ke xjal?
¿Ex tikuꞌn in cub cyximan aju nokx gan?
26 Baj cytxolban cyib ke rey te twitz txꞌotxꞌ,
ex ke nejenel cyxol xjal baj cychmon cyib junx tuꞌn cykꞌojin tiꞌj Kman ex tiꞌj Crist aju at toclen tuꞌn Dios,
chi David tuj Tuꞌjil.
27 Porque ax toc tuj tnam lu cymojba cyyol Herodes tucꞌix Ponsio Pilat,
cyucꞌix ke xjal aj Israel ex cyucꞌix txkantl xjal,
tuꞌn cykꞌojin tiꞌj Jesús aju Tcꞌwaꞌla xjan,
aju oc tkꞌoꞌna toclen.
28 Ex ma cybincha tcyakilju ximamaj tuꞌna ojtxi tuꞌn tipumala,
ic tzaꞌnx tajbila.
29 Jaꞌlotzun Tat,
bintza cyyol te xobtzabl keye,
ex kꞌontza kipumale tuꞌn t-xi kmaꞌne tyola cye xjal,
ex tuꞌn miꞌn kxobe,
porque akoꞌye tmajena.
30 Ex kꞌontza tipumala tuꞌn cybanix ke yab ex tuꞌn cybinchet nimcu binchben nim cyipumal ex nimcu señ nok tuꞌn tipumal Jesús aju Tcꞌwaꞌla xjan,
che chi.
31 Ex tej cybaj naꞌn Dios,
tzaj yucch ja jatum cybuyin cyib;
ex cycyakil o noj tuj cyanmi tuꞌn Xewbaj Xjan,
ex xi cymaꞌn tyol Dios mintiꞌ cyxobil.
Ke nej ocslal, tcyakilju at cye in baj cysipan cyxolx
32 Ex cycyakil keju otok che ocslan,
junx cyximbetz ex junx tbis cycꞌuꞌj tuj cyocslabl;
ex mi jun in kꞌmante ka nok tecu aju at te,
nok oꞌcx in baj cysipan cyxolx tcyakilju at cye.
33 Ex nim tipumal cyyol apostl,
in cychicꞌbaꞌn ka axix toc otok jatz ankꞌin Kajaw Jesús;
ex nimxix t-xtalbil Dios cub ten cyibaj.
34 Cyjaꞌtzun mi aꞌl jun cye atxwit taj aju in ajben te;
porque cycyakil keju at cytxꞌotxꞌ ex ka cyja,
in xi cycꞌaꞌyintok,
ex tzaj cyiꞌn twiꞌ aju otok txi cycꞌaꞌyin,
35 ex xi cykꞌoꞌn tuj cykꞌab apostl;
atzun cye apostl xi cysipan cye keju at tajbenxix cye.
36 Attok jun xjal José tbi,
tiyjil Leví ex aj Chipre,
Bernabé juntl tbi oc cykꞌoꞌn apostl.
(Aju tnabl tbi,
Kꞌukbalte cycꞌuꞌj mastl.)
37 Ate xjal lu attok jun ttxꞌotxꞌ xi tcꞌaꞌyin,
ex tzaj tiꞌn twi txꞌotxꞌ,
ex xi tkꞌoꞌn tuj cykꞌab apostl.