—Ananías,

¿tikuꞌn ma txi tkꞌoꞌna ambil te Satanás tuꞌn tocx tuj tanmiya tuꞌn tnicꞌana yol twitz Xewbaj Xjan,

ma cyaj ttzyuꞌna mij twi txꞌotxꞌ?

4 ¿Naꞌnxtok t-xi tcꞌaꞌyina txꞌotxꞌ,

myapetzun teya?

ex tej t-xi tcꞌaꞌyina txꞌotxꞌ,

¿myapetzun tuj tcwenta taꞌ twiꞌ?

¿Tikuꞌn ma cub t-ximana tuj tanmiya icju?

Mya twitz xjal ma nicꞌana yol,

nok oꞌcx twitz Dios.

5 Tejtzun tbinte Ananías ju yol lu,

cub tzꞌak ex cyim.

Tzajtzun nim cyxobil cycyakil keju e binte jlu.

6 E ultzun junjun cuꞌxun,

ocx cybalkꞌiꞌn t-ximlal Ananías tuj jun xbalun,

ex cyiꞌn ex cuꞌx cymakuꞌn.

7 Matok ox or tbajlen jlu tej tul t-xuꞌjil Ananías,

ocx tuja mintiꞌ baꞌn tuꞌn ti otok baj tiꞌj tchmil.

8 Xitzun tkanin Pedro te:

—Kꞌmantza,

¿icpetzun twi txꞌotxꞌ xi cycꞌaꞌyine ic tzaꞌn ma cymaye?

Atzunte xuꞌj tma:

—Ictzun twiꞌju.

9 Xitzun tmaꞌn Pedro te:

—¿Tikuꞌn xbant tiꞌj cyuꞌne tuꞌn toc T-xew Kman tuj joybil tiꞌj cyuꞌne?

Binxa,

lu ma che ul ke cuꞌxun ttzi ja,

akeju ma cheꞌx aj makulte tchmila;

icxtzun cꞌelex kꞌiꞌna cyuꞌn.

10 Biꞌx cub tzꞌak naj ju xuꞌj t-xe tkan Pedro ex cyim.

Tejtzun cyocx ke cuꞌxun tuja,

otok cyim te xuꞌj;

etztzun cyiꞌn,

ex cuꞌx cymakuꞌn ttxlaj tchmil.

11 Tzajtzun nim cyxobil cycyakil ocslal,

ex tzaj cyxobil cycyakil xjal akeju e binte jlu.

12 Ex nimcu cybinchben apostl nim cyipumal ex nimcu ke señ cybincha cyxol xjal tuꞌn tipumal Dios;

ex junxtok cychmon cyib cycyakil twitz ja te Salomón tbi.

13 Atzun cye mastl xjal mintiꞌ oc cynimarin cyib tuꞌn toc cymojban cyib cyucꞌil apostl;

pero e yolin baꞌn cyiꞌj.

14 Ex nimcu xjal e ocslan tiꞌj Kajaw;

tcyakil kꞌij cucx in che ocslan tzaꞌnx ke xinak ax icx ke xuꞌj;

15 cyjaꞌtzun e jeꞌtz kꞌiꞌn ke yab ttzi be,

ex cub cykꞌoꞌn twitz watbil ex twitz coẍbil,

ichak nok t-xlecumal Pedro tzicꞌ aj cyibaj yab oc ticꞌ tuj be.

16 Ax icx nimcu xjal in che tzajtok cyuj ke tnam nikayin ttxlaj Jerusalén,

e ul tuj Jerusalén kꞌiꞌn ke yab cyuꞌn ex keju in che yajlanjtz cyuꞌn juꞌẍ,

ex cycyakil e banix.

17 Jawtzun weꞌ ju nejenel cye pal cyxol judiy cyucꞌix ke tucꞌil,

akeju jun cꞌloj xjal sadusey cybi,

ex tzaj tloꞌch cycꞌuꞌj cyiꞌj apostl;

18 ex e tzaj cytzyuꞌn ke apostl,

e ocx cykꞌoꞌn tuj pres tuj tnam.

19 Pero ul jun t-anjel Kman te konicꞌan,

e jaket ke pwert tuꞌn jatum ateꞌ ke pres,

e jeꞌtztzun tiꞌn ke apostl,

ex xi tmaꞌn cye:

20 —Cyxiꞌye,

ex che weꞌcuye tuj tja Dios,

ex cymanxe cye xjal tkanil yol te chwinklal,

chi anjel.

21 Tejtzun cybinte ke apostl ju yol lu,

e ocx tuj tja Dios te prim ex xi cykꞌoꞌn xnakꞌtzbil cye xjal.

Bajtzun cychmon cyib ke nejenel cye pal cyxol judiy cyucꞌix ke cyucꞌil,

ex e jeꞌx txocbaj ke Aj Sanjelal cye xjal judiy cyuꞌn,

ax icx cycyakil ke cytijil xjal aj Israel,

ex xitzun cysamaꞌn ke polisiy kꞌilte cye apostl tuj pres.

22 Tejtzun cypon ke polisiy mintiꞌ e cnet ke apostl cyuꞌn tuj pres;

e ajtztzun meltzꞌaj kꞌolte tkanil,

23 che chi cyjaꞌ:

—Ax toc aju cyja pres ma cnet kuꞌne lamoꞌnxix wen,

ex ke xkꞌukil pres ma che cnet kuꞌne waꞌl ke ttzi pwert;

pero tej xjaket kuꞌne,

mi jun xjal at tuj,

che chi.

24 Tejtzun tbinte nejenel cye xkꞌukil tja Dios aju yol lu,

cyucꞌix ke nejenel cye pal,

tzaj jun cyximbetz tiꞌj jatum cpol weꞌ tcyakil jlu.

25 Pero ul jun xjal cyucꞌil tzaj tmaꞌn tkanil cye,

chi cyjaꞌ:

—Akeju xinak ocx cykꞌoꞌne tuj pres,

lu ke ateꞌ tuj tja Dios,

in cykꞌoꞌn xnakꞌtzbil cye xjal,

chi xjal.

26 Xiꞌtzun aju nejenel cye polisiy cyucꞌix ke polisiy,

ex cheba e tzaj cyiꞌn,

porque tzaj cyxobil tuꞌn miꞌn cyoc xoꞌn tuꞌn abj cyuꞌn xjal.

27 E ultzun kꞌiꞌn apostl cywitz Aj Sanjelal cye xjal judiy,

ex xitzun tkanin nejenel cye pal cye apostl,

chi cyjaꞌ:

28 —¿Mintiꞌpe xi cybiꞌne aju orden xi kkꞌoꞌne cyeye tuꞌn miꞌn t-xi cykꞌoꞌntle xnakꞌtzbil tiꞌj xjal lu?

Atzun jaꞌlo ma cybi cycyakil xjal aju cyxnakꞌtzbile tuj tcyakil Jerusalén,

ex cyajbile tuꞌn toc cykꞌoꞌne te keye kil aju tcyimlen ju xjal lu,

che chi.

29 Xi cytzakꞌweꞌn Pedro ex ke mastl apostl:

—Tnejel ilxix tiꞌj tuꞌn t-xi knimane Dios,

ex mya ke xjal.

30 Aju Cydios kxeꞌchel jaw ankꞌin Jesús tuꞌn,

aju jaw cyyobine twitz jun crus,

ex cub cybyoꞌne.

31 Ate jlu ma jaw tnimsaꞌn Dios,

ma cub tkꞌoꞌn ttxlaj tuj bankꞌabaj tuꞌn toc te Nejenel ex Colol,

tuꞌntzun tajtz tiꞌj cyanmi aj Israel ex tuꞌn tnajset cyil.

32 Ex testiw koꞌye tiꞌj tcyakil jlu,

ax icx te Xewbaj Xjan testiw tiꞌj,

aju ma tzaj tkꞌoꞌn Dios cye keju in che niman te,

che chi apostl.

33 Tejtzun cybinte Aj Sanjelal jlu,

tzaj nimxix cykꞌoj,

ex o cyajbe tuꞌn cycub byoꞌn apostl cyuꞌn.

34 Pero at jun parisey cyxol Aj Sanjelal,

Gamaliel tbi,

chicꞌbal tiꞌj ley,

ex nimanxix cyuꞌn cycyakil xjal.

Cub weꞌ Gamaliel ex xi tmaꞌn tuꞌn cyetz kꞌiꞌn ke apostl ttxaꞌn peꞌn nok te chꞌin tuj.

35 Xitzun tmaꞌn cye Aj Sanjelal:

—Akeye xinak aj Israel,

cykꞌoꞌnque cwent tiꞌj ju oc cybinchaꞌye cyiꞌj xjal lu.

36 Porque naꞌn cyuꞌne,

elaꞌxi kꞌij ul jun xjal Teudas tbi,

tma ka maꞌ toclen.

Ex atlo cyaje syent xjal e oc lpeꞌ tiꞌj.

Pero cub byoꞌn Teudas ex cycyakil keju e oc lpeꞌ tiꞌj e jeꞌl sputj ex e cub naj.

37 Tbajlenxi jlu ul jun xjal Judas tbi,

aj Galiley;

ul tuj tkꞌijlalil tuꞌn ttzꞌibanjtz cybi xjal,

ex nim xjal e oc lpeꞌ tiꞌj.

Pero ax icx cub byoꞌn te jlu,

ex cycyakil keju e oc lpeꞌ tiꞌj e el sputj.

38 Jaꞌlotzun cxel nmaꞌne cyeye:

Miꞌn tzꞌoc cykꞌon cyibe cyiꞌj xjal lu,

ex miꞌn che labte cyiꞌj;

porque ka cyuꞌn xjal aju cyximbetz lu ex ju cyakꞌun,

cꞌoquel yupjtzun;

39 pero ka tuꞌn Dios,

mlay bant tuꞌn tyupj cyuꞌne;

atwit tchi tuj cywitze,

mya yajcu tiꞌj Dios in che kꞌojine,

chi Gamaliel.

40 Xitzun cyniman tyol Gamaliel;

e tzajtzun cytxcoꞌn ke apostl ex e baj cyasyalin,

ex xi cymaꞌn cye tuꞌn miꞌn cyyolintl tiꞌj Jesús,

ex e jeꞌxtzun cytzokpiꞌn.

41 E jeꞌtztzun ke apostl cywitz Aj Sanjelal in che tzalaj tuꞌnju baꞌn eꞌla tuj twitz Dios tuꞌn tcub cychꞌixwi cywitz xjal,

nok tuꞌn tlaj ocslal ke tiꞌj Jesús.

42 Ex tcyakil kꞌij mintiꞌ xi cycolin tuꞌn t-xi cykꞌoꞌn xnakꞌtzbil tuj tja Dios ex tujile cyja xjal ex tuꞌn t-xi cypacbaꞌn tkanil baꞌn tiꞌj Jesús aju at toclen tuꞌn Dios.