Tej cyjaw scꞌet wuk diácono
6
Tbajlenxi jlu chꞌiy cyajlal ocslal.
Ex tzaj jun cyyol ke judiy baꞌn che yolin tuj grieg cyiꞌj ke judiy baꞌn che yolin tuj ebrey,
tuꞌnju mintiꞌ pon cꞌaꞌchbil cye meba xuꞌj ateꞌ cyxol oc in sipanjtz wabj junjun kꞌij.
2 Atzun cye cablaj apostl oc cychmoꞌn cycyakil ocslal ex xi cymaꞌn cye:
—Mya tuj tumel tuꞌn tcyaj tuj kcwente aju cꞌaꞌchbil cye ocslal ex tuꞌn t-xi kcoline tuꞌn t-xi kpacbaꞌne tyol Dios.
3 Cyjaꞌtzun erman,
cyscꞌoꞌn jawe wuk xinak cyxole,
baꞌnxix cyten,
ex nojni tuj cyanmi tuꞌn Xewbaj Xjan,
ex at cynabl,
tuꞌntzun cyoc kkꞌoꞌne tiꞌj ju akꞌuntl lu.
4 Atzun keye,
oꞌcx kakꞌune tuꞌn knaꞌne Dios ex tuꞌn t-xi kkꞌoꞌne xnakꞌtzbil tiꞌj tyol Dios,
che chi apostl.
5 Baꞌntzun eꞌla ju yol lu tuj cywitz cycyakil ocslal;
ex jaw scꞌoꞌn Esteban cyuꞌn,
at-xix tocslabl xinak lu ex nojni tuj tanmi tuꞌn Xewbaj Xjan,
tucꞌix Pelip,
tucꞌix Prócoro,
tucꞌix Nicanor,
tucꞌix Timón,
tucꞌix Parmenas,
ex tucꞌix Nicolás aju aj Antioquiy,
aju otok tocsla cyley xjal judiy.
6 E pontzun cyiꞌn cywitz apostl;
atzun cye apostl e oc ten naꞌl Dios cyiꞌj,
ex cub cykꞌoꞌn cykꞌab tibaj cywiꞌ.
7 Ex in chꞌiyxi tyol Kajaw,
ex in chmet-xi nimxix cyajlal ocslal tuj Jerusalén;
ax icx nimcu pal cye judiy xi cyocslaꞌn aju ocslabl lu.
Tej ttzyet Esteban cyuꞌn xjal
8 Atzunte Esteban nim t-xtalbil Dios tcub tibaj ex at tipumal Dios tucꞌil,
ex e tbincha ke binchben nim cyipumal ex ke señ cyxol xjal.
9 E jaw tzokpaj junjun xinak at cyoclen tuj ja te cꞌulbil toc tbi ja cye xjal Tzokpiꞌmaj ke,
cyucꞌix junjun aj Cirén,
ex cyucꞌix junjun aj Alejandriy,
cyucꞌix junjun aj Cilicia ex cyucꞌix junjun aj Asia,
e oc ten yolil tiꞌj tley Moisés tucꞌil Esteban.
10 Pero mintiꞌ bant tuꞌn tmaket tyol Esteban cyuꞌn,
porque tzaj tkꞌoꞌn Xewbaj Xjan tnabl tzaꞌn tten tuꞌn tyolin.
11 Entons e chjet junjun xjal cyuꞌn tuꞌn t-xi cymaꞌn cyjaꞌ:
Ma kbiye in yolin jlu mya baꞌn tiꞌj Moisés ex tiꞌj Dios,
che chi.
12 Cyjaꞌtzun e jaw tilj xjal cyuꞌn cyucꞌix ke cytijil xjal ex cyucꞌix ke xnakꞌtzal tiꞌj ley;
e pon tilj tiꞌj Esteban,
tzyettzun cyuꞌn,
ex xi cyiꞌn cywitz Aj Sanjelal cye xjal judiy.
13 Ex oc cykꞌoꞌn junjun testiw nicꞌal yol tuꞌn t-xi cymaꞌn cyjaꞌ:
—Ate xjal lu cucx tyolin ex cucx t-xmayin tiꞌj tja Dios xjan te ex tiꞌj tley Moisés.
14 Porque ma kbiye in tmaꞌn ka tuꞌn tcub xitj tja Dios lu tuꞌn Jesús aj Nazaret ex tuꞌn cychꞌexpet ke costumr tuꞌn,
akeju e cyaj tkꞌoꞌn Moisés ke,
che chi testiw nicꞌal yol.
15 Cycyakiltzun aj sanjelal kꞌukl keꞌtok,
tej toc cyqueꞌyin twitz Esteban,
o cyil twitz ic tzaꞌn twitz jun anjel.