—¿Axpe toc ic tzaꞌn in cymaꞌn ke xjal lu?

2 Xi ttzakꞌweꞌn Esteban:

—Akeye erman ex akeye tat,

cybintze nyole.

Aju Dios maꞌxix toclen cub tyecꞌun tib twitz kxeꞌchel Abraham tej atxtok tuj txꞌotxꞌ Mesopotamia,

naꞌnxtok tpon tuj Harán,

3 ex tma Dios te:

Tetza tuj ttanmiya,

cyxol ke t-xjalila,

ex txiꞌya tuj txꞌotxꞌ cxel nyecꞌune teya,

chi Dios te.

4 Etztzun Abraham tuj cytxꞌotxꞌ aj Caldey ex pon tuj Harán.

Tcyimlenxitzun tman,

tzajtzun kꞌiꞌn Abraham tuꞌn Dios,

ul kꞌiꞌn tuj txꞌotxꞌ tzalu jatum najl keye jaꞌlo.

5 Pero mintiꞌ xi tkꞌoꞌn Dios tetzbil Abraham,

mi jun piẍ txꞌotxꞌ;

nok oꞌcx xi ttziyan Dios te tuꞌn t-xi tkꞌoꞌn aju txꞌotxꞌ te tetzbil ex te tibajxi te cyetzbil tiyjil,

masque naꞌnxtok titzꞌj jun tcꞌwaꞌl Abraham tej tyolin Dios tucꞌil.

6 Ex xi tmaꞌn Dios te cyjaꞌ:

Ke tiyjila che oquel te stranjer xjal tuj ttxꞌotxꞌ juntl nasyon,

ex che oquel te cymajen xjal,

ex che bajel yajlaꞌn cyuꞌn tuj cyaje syent abkꞌi.

7 Pero cbel nkꞌoꞌne tcastiw nasyon jatum che tel te majen;

tbajlenxitzun jlu che eletz ex che ajbel weye tuj lugar tzalu,

chi Dios.

8 Banttzun tiꞌj jun yol tuꞌn Dios tucꞌil Abraham,

ex tma tuꞌn tbant ju sircunsisyón te jun techal tiꞌj ju yol tzaj ttziyan Dios te.

Cyjaꞌtzun,

tej tul itzꞌj Isaac aju tcyꞌajal Abraham,

o sircunsidarinjtz tuꞌn Abraham tuj twajxakin kꞌij;

ax icx tej tul itzꞌj Jacob aju tcyꞌajal Isaac,

o sircunsidarinjtz tuꞌn Isaac;

ax icx tej cyul itzꞌj ke cablaj tcyꞌajal Jacob,

e sircunsidarinjtz tuꞌn Jacob;

akeju tcꞌwaꞌl Jacob atzun cyxeꞌchel cablaj cꞌloj aj Israel.

9 Atzun ke tcyꞌajal Jacob akeju kxeꞌchel tzaj tloꞌch cycꞌuꞌj tiꞌj José aju cyitzꞌin,

ex xi cycꞌayin cye xjal,

pontzun kꞌiꞌn José tuj txꞌotxꞌ Ejipt;

pero ate Dios attok tucꞌil,

10 ex o colin tiꞌj tuj tcyakilju yajbil te,

ex xi tkꞌoꞌn tnabl tuꞌn tel baꞌn tuj twitz Faraón aju rey cye aj Ejipt;

entons oc kꞌoꞌn José te gobernador tuj Ejipt tuꞌn rey ex tuꞌn tcawin José cyibaj cycyakil keju ateꞌ tuj tja rey.

11 Tzajtzun jun weꞌyaj cyibaj cycyakil xjal tuj txꞌotxꞌ Ejipt ax icx tuj txꞌotxꞌ Canaán,

ex nimxix yajbil tzaj cyibaj xjal,

atzun cye kxeꞌchel mintiꞌ cnet cywa.

12 Tejtzun tbinte Jacob ka at triw tuj Ejipt,

e jeꞌx t-samaꞌn ke tcyꞌajal tnejel maj,

akeju kxeꞌchel.

13 Tejtzun cyxi aj tcabmajiꞌn,

tzaj tyecꞌun tib José tuꞌn tel cynicꞌ ttzic tiꞌj,

ex tbitzun rey alcye tiyjil José.

14 E tzajtzun t-samaꞌn José ke xjal kꞌilte Jacob,

aju tman,

cyucꞌix cycyakil ke terman,

75 cybet.

15 Cyjaꞌtzun tten pon Jacob tuj Ejipt,

ex ax o cyim tuj Ejipt,

ax icx cye kxeꞌchel ax e cyim tuj Ejipt.

16 Atzun cybakil ajtz kꞌiꞌn tuꞌn tul tuj Siquem,

ocx cykꞌoꞌn aj Israel tuj toyꞌ pic tuj ju txꞌotxꞌ aju otok lakꞌet tuꞌn Abraham tuꞌn pwak cyucꞌil tcꞌwaꞌl Hamor tuj Siquem.

17 Tejtzun tul lakꞌeꞌ tkꞌijlalil tuꞌn tjapun aju tziyimaj tuꞌn Dios,

aju otok tma Dios tuꞌnx tib te Abraham,

chmettzun cyajlal kxjalil ex e chmet-xix tuj Ejipt.

18 Te yajxitl oc juntl rey tuj txꞌotxꞌ Ejipt,

aju mintiꞌ ojtzkiꞌn twitz José tuꞌn.

19 Aju rey lu oc ten sbul cye kxjalil,

ex e yajlanjtz kxeꞌchel tuꞌn ojtxi,

ex tma cye tuꞌn tex cyxoꞌn ke tal cycꞌwaꞌl tuꞌn cycyim.

20 Tujxtzunju tkꞌijlalil lu ul itzꞌj Moisés,

ex tbanilxix queꞌyin tuj twitz Dios;

ox xjaw o chꞌiysanjtz tuj tja tman.

21 Pero tej tex kꞌiꞌn tuꞌn tcyim,

aju tmeꞌjel rey xi kꞌinte ex o tchꞌiysa ic tzaꞌn tex tal.

22 Ex o xnakꞌtzanjtz Moisés tuꞌn toc tnabl tuj tcyakil ic tzaꞌn cye aj Ejipt;

ex at tipumal tyol ex takꞌunben.

23 Tej tjapun 40 abkꞌi tuꞌn Moisés,

ul tuj tanmi tuꞌn t-xiꞌ visitaril cye aj Israel,

akeju t-xjalil.

24 Tejtzun t-xi tqueꞌyin in cꞌixbisanjtz jun terman,

xi colil tiꞌj,

ex cub tbyoꞌn Moisés aju aj Ejipt tuꞌntzun t-xelin tiꞌj,

porque otok cꞌixbi ju aj Israel tuꞌn.

25 Tuj tnabl Moisés ka tuꞌn tel cynicꞌ t-xjalil tiꞌj ka ax Dios ctzokpil cye nok tuꞌn Moisés;

atzun cye mintiꞌ el cynicꞌ tiꞌj.

26 Te juntl kꞌij oc noj Moisés cyiꞌj cabe aj Israel in che kꞌojl,

ex o tajbe tuꞌn tbant cyten tuꞌn miꞌn cykꞌojintl,

ex xi tmaꞌn cye:

Tat,

cyitzꞌin cyibe,

¿tikuꞌn in che kꞌojine?

27 Atzun teju in cꞌixbisante tucꞌil,

ex lamoꞌn Moisés tuꞌn,

ex tma:

¿Alcye ma tzꞌoc kꞌonte teya te jwes tuꞌn tcawina kibaje?

28 ¿Tajpeya tuꞌn ncub tbyoꞌna,

ic tzaꞌn cub tbyoꞌna jun aj Ejipt ew?

Chi xjal.

29 Tej tbinte Moisés ju yol lu el ok,

ex xiꞌ tuj txꞌotxꞌ Madián,

oc te stranjer xjal tuj txꞌotxꞌ lu;

axtzun e itzꞌj cabe tcyꞌajal.

30 Tbajlenxitzun 40 abkꞌi,

cub tyecꞌun tib jun anjel twitz Moisés tuj jun lugar mintiꞌ cynajbil xjal tuj t-xe witz Sinaí,

cub tyecꞌun tib anjel tuj tkan kꞌakꞌ in cꞌant tiꞌj jun wiꞌ chꞌiꞌx.

31 Tejtzun tqueꞌyinte Moisés jlu,

jaw labin tiꞌj ju oc tqueꞌyin;

tejtzun t-xi lakꞌeꞌ queꞌyilte,

tbitzun tkꞌajkꞌajel twi Kman in tmaꞌn:

32 Akine Cydios ke t-xeꞌchela,

akine Tdios Abraham,

ex Tdios Isaac,

ex Tdios Jacob,

chi Dios.

Atzunte Moisés jaw luꞌlun ex tzaj t-xobil,

mintiꞌ xi tqueꞌyin tuꞌn tchi.

33 Tzajtzun tmaꞌn Kman te:

Kꞌiꞌmela t-xajbiya,

porque aju lugar jatum tcuba txꞌotxꞌ xjan.

34 Ax toc ma wile yajbil cye ke xjal etzan wuꞌne,

akeju ateꞌ tuj Ejipt,

ma nbiye in che ayin,

ex ma chin cuꞌtze tzokpil cye.

Jaꞌlotzun tzaja,

cxel nsamaꞌna tuj Ejipt,

chi Kman te.

35 Masque otok tzꞌel icꞌun Moisés cyuꞌn aj Israel ex otok cyma te cyjaꞌ:

¿Alcye ma tzꞌoc kꞌonte teya te jwes tuꞌn tcawina kibaje?

Che chi.

Pero axte Moisés xi t-samaꞌn Dios tzokpil cye ex tuꞌn tcawin cyibaj,

tuꞌnju otok tma anjel te,

aju cub tyecꞌun tib twitz tiꞌj jun wiꞌ chꞌiꞌx.

36 E jeꞌtztzun kꞌiꞌn ke kxeꞌchel tuꞌn Moisés tuj Ejipt,

ex tbincha Moisés ke binchben nim cyipumal ex ke señ tuj txꞌotxꞌ Ejipt,

ex tuj mar Cyak Queꞌyin,

ex tuj lugar mintiꞌ cynajbil xjal tuj,

jatum e ten 40 abkꞌi.

37 Axte Moisés o kꞌmante cye aj Israel:

Cjawil t-scꞌoꞌn Kman Dios jun t-sanjel ax cyxol ke cyermaniye tuꞌn tten cyucꞌile,

ic tzaꞌn kine.

38 Ex axte Moisés aju o ten cyxol aj Israel tuj lugar mintiꞌ cynajbil xjal tuj,

ex o ten aju anjel tucꞌil ex o yolin tucꞌil twi witz Sinaí,

ax icx o ten Moisés cyucꞌil ke kxeꞌchel,

ex o tcꞌam ju yol te chwinklal tuꞌn ttzaj tkꞌoꞌn ke.

39 Atzun cye kxeꞌchel mintiꞌ xi cyniman,

nok oꞌcx el cyicꞌun,

ex aju tajbil cyanmi tuꞌn cyaj meltzꞌaj juntl maj tuj Ejipt.

40 Xitzun cymaꞌn te Aarón:

Binchama junjun kdiose tuꞌn cycub nej kwitze;

porque mintiꞌ baꞌn kuꞌne ti ma baj tiꞌj Moisés aju etz kꞌinte ke tuj txꞌotxꞌ Ejipt,

che chi.

41 Cubtzun cybinchaꞌn jun tilbilal tal wacẍ,

ex cub cybyoꞌn ke alumaj te jun oyaj twitz,

ex e tzalajxix tiꞌj tilbilal tal wacẍ aju otok cub cybinchaꞌn.

42 Atzunte Dios el tpaꞌn tib cyiꞌj,

ex e jeꞌx ttzokpiꞌn tuꞌn cycꞌulun cywitz ke cheꞌw ateꞌ twitz cyaꞌj;

ic tzaꞌnx tzꞌiban tuj cyuꞌjil t-sanjel Dios,

in tmaꞌn cyjaꞌ:

44 Tej cyten kxeꞌchel tuj lugar mintiꞌ cynajbil xjal tuj,

ajben cyuꞌn jun ja xbalun te nabl Dios,

jatum cꞌuꞌn ke tzꞌlom abj tzꞌiban tley Dios cywitz.

O bant ja lu ic tzaꞌnx tzaj tmaꞌn Dios te Moisés,

tzaj tmaꞌn tuꞌn tbinchet ju ja ic tzaꞌnx otok tzaj yecꞌun te.

45 Cycꞌamtzun ke kxeꞌchel ju ja xbalun te nabl Dios,

ex tucꞌix Josué at cyucꞌil tej tul cyiꞌn ju ja lu tej ttzyet cytxꞌotxꞌ txkantl xjal cyuꞌn,

akeju e ex tlajoꞌn Dios cywitz kxeꞌchel ex cyjaꞌxtzun tten tej toc David te rey.

46 Baꞌn eꞌla tmod rey David tuj twitz Dios,

ex o tajbe David tuꞌn tbinchante jun ja te tnajbil Dios,

aju Tdios Jacob.

47 Pero ate Salomón jaw binchante tja Dios,

48 masque aju Dios maꞌxix toclen myatzun ax najl tuj jun ja cybinchben xjal,

ic tzaꞌn in tmaꞌn Dios tuꞌn t-sanjel chi cyjaꞌ:

51 Cyuw keye,

mintiꞌ in xi cybiꞌne,

ex mintiꞌ in xi cyocslaꞌne tuj cyanmiye,

ex mintiꞌ in xi cybiꞌne tuꞌn cyẍcyine.

Cucx ticꞌ nej cyrasone twitzju te Xewbaj Xjan.

Ic tzaꞌn o cybincha cyxeꞌchele ojtxi,

ax icxtzun cyeye in cybinchaꞌne.

52 ¿Atpe jun t-sanjel Dios mintiꞌ o yajlanjtz cyuꞌn cyxeꞌchele ojtxi?

Ex cyuꞌntzun e cub byoꞌn ke t-sanjel Dios,

akeju o cyma tkanil ojtxi ka attok tulel ju Crist aju Tzꞌaklxix,

atzun cyeye o txi cykꞌoꞌne tuj cykꞌab Aj Sanjelal,

ex o cub cybyoꞌne.

53 Akeye cycꞌame aju ley tzaj cykꞌoꞌn anjel,

pero mintiꞌ ma japun cyuꞌne,

chi Esteban.

54 Tejtzun cybinte xjal tcyakil tyol Esteban,

tzaj nimxix cykꞌoj tuj cyanmi ex o kitxꞌitxꞌin t-xeꞌ cyeꞌ tiꞌj.

55 Atzunte Esteban nojni tuj tanmi tuꞌn Xewbaj Xjan,

jaw tqueꞌyin twitz cyaꞌj ex o til t-spicꞌumal Dios tuj cyaꞌj tucꞌix Jesús waꞌl ttxlaj Dios tuj bankꞌabaj.

56 Tmatzun Esteban:

—Ma wile cyaꞌj catl,

ex lu Jesús waꞌl ttxlaj Dios tuj bankꞌabaj,

aju scꞌoꞌmaj tuꞌn Dios tuꞌn tten cyucꞌil xjal.

57 Atzun cye xjal jaw tkꞌajkꞌajel cywiꞌ cyuwxix,

ex oc cymaksiꞌn tuj cyẍcyin,

e pon tilj tiꞌj.

58 Extzun cyiꞌn tiꞌjxi tnam,

octzun cyxoꞌn tuꞌn abj;

atzun cye testiw nicꞌal yol tiꞌj el cyiꞌn cyẍjoꞌw toc cyiꞌj,

cyaj cykꞌoꞌn tuj tcwent jun cuꞌxun Saulo tbi.

59 Ex matok nnoꞌc xoꞌn Esteban tuꞌn abj cyuꞌn,

oc ten naꞌl Dios ex tma:

—Jesús Wajaw,

cꞌmonxa wanmiye,

chi Esteban.

60 Cubtzun ẍmejeꞌ ex jaw tkꞌajkꞌajel twiꞌ cyuw:

—Tat,

miꞌn tzꞌoc tkꞌoꞌna cybinchben xjal lu te jun il.

Tej tbaj tmaꞌn jlu,

cyimtzun.