2 Aju tkanil lu tzaj ttziyan atxix ojtxi cyuꞌn ke t-sanjel ex in tmaꞌn cyuj ke xjan Tuꞌjil.

3 Aju tkanil colbil lu in yolin tiꞌj Tcꞌwaꞌl Dios,

aju Kajaw Jesucrist;

oc Jesucrist te xjal tej tul itzꞌj tiꞌj tiyjil David.

4 Pero el chicꞌeꞌ tuꞌn tipumal Dios ka Tcꞌwaꞌl Dioste.

Ate Xewbaj Xjan tzaj chicꞌbante tej tjatz ankꞌin Jesús cyxol cyimni.

5 Ex nok tuꞌn Jesucrist ma ncꞌame jun xtalbil ex ma tzaj tkꞌoꞌn woclene tuꞌn woque te apostl,

tuꞌntzun t-xi cyniman xjal tyol Jesucrist ex tuꞌn cyocslan tiꞌj cyuj cycyakil nasyon,

tuꞌntzun tnimanjtz aju tbi.

6 Ax icx cyeye ateꞌye cyxol ke jlu,

ex o che txconjtze tuꞌn cyoque tuj tcwent Jesucrist.

7 In xi ntzꞌibane cyeye cycyakile akeye ateꞌye tuj tnam Rom,

cꞌujlaꞌn keye tuꞌn Dios,

ex ma che txconjtze tuꞌn cyoque oꞌcx te Dios.

Awt Kman Dios tucꞌix Kajaw Jesucrist che tzaj kꞌonte xtalbil cyeye ex tuꞌn tkeꞌxix cycꞌuꞌje.

8 Tnejelxix in xi nkꞌoꞌne chjonte te Dios aju in chin ajbene te,

in xi nkꞌoꞌne chjonte cyiꞌje cycyakile nok tuꞌn Jesucrist,

porque tuj tcyakil twitz txꞌotxꞌ ma tzꞌel tkanil cyocslable.

9 Porque in chin ajbene te Dios tuꞌn tcyakil wanmiye,

in chin pacbane tkanil baꞌn in yolin tiꞌj Tcꞌwaꞌl,

ex ax Dios testiw wiꞌje ka cucx in che tzaj nnaꞌne tuj nnaꞌj Diose.

10 In chin cubsane twitz Dios alcye jun tumel tuꞌn npone cyucꞌile,

baꞌnwt npone ka ic tajbil Dios.

11 Porque wajbile tuꞌn toc nqueꞌyine cywitze,

tuꞌn t-xi nkꞌoꞌne jun onbil cyeye tuj cyocslable,

tuꞌntzun cyweꞌxixe.

12 Cyjaꞌtzun oc npone cyucꞌile,

cbajel kcyuwsan kib kxolx nok tuꞌn kocslabl,

tuꞌn cyocslable ex tuꞌn wocslable.

13 Erman waje tuꞌn cybinteye,

nimcu maj o wajbeye tuꞌn nxiꞌye queꞌyil cyeye pero mintiꞌ in ten ambil tuꞌnju at nim wakꞌune,

o wajbeye tuꞌn nxiꞌye akꞌnal cyxole tuꞌn cyocslan mastl xjal,

ic tzaꞌn o bant wuꞌne cyuj mastl nasyon cyxol xjal mya judiy ke.

14 In nnaꞌne ka il tiꞌj tuꞌn t-xi nmaꞌne tkanil baꞌn cye cycyakil xjal:

cye xjal grieg ex cye xjal mya grieg ke,

cye xjal aj nabl ex cye xjal mya aj nabl.

15 Cyjaꞌtzun,

ic tzaꞌn weye,

ma cub nximane tuj wanmiye tuꞌn t-xi nmaꞌne tkanil colbil ax icx te cyeye akeye ateꞌ tuj tnam Rom.

16 Mlay chin chꞌixwiye tuꞌn t-xi nmaꞌne tkanil baꞌn aju evangelio,

porque tipumal Dioste tuꞌn cyclet cycyakil xjal akeju ma che ocslan,

tnejelxix cye xjal judiy ax icx cye xjal mya judiy ke.

17 Porque tuꞌn tkanil baꞌn in yecꞌunjtz tzaꞌn tten tuꞌn koc te tzꞌaklxix tuꞌn Dios;

nok oꞌcx tuꞌn kocslabl tuꞌn koc te tzꞌaklxix ic tzaꞌn in tmaꞌn tuj Tuꞌjil:

Aju xjal tzꞌaklxix,

tuꞌn tocslabl cꞌankꞌil.

18 Porque max tuj cyaꞌj in tzaj tkꞌoꞌn Dios castiw cyibaj xjal mintiꞌ tchi Dios tuj cywitz ex binchal mya baꞌn ke,

tuꞌnju cybinchben mya baꞌn makoꞌn cyuꞌn aju yol ax toc.

19 Cycyakil xjal jacu tzꞌel cynicꞌ tiꞌj ka at Dios,

porque o tzaj tyecꞌun Dios cye.

20 Masque mintiꞌ kꞌanchaꞌl te Dios,

pero jacu tzꞌel knicꞌ tiꞌj ka ma ko cub ten ximal tiꞌj tcyakilju o tbincha.

Cyjaꞌtzun,

chicꞌlxix taꞌ,

atxix tej tbant twitz txꞌotxꞌ nneꞌl knicꞌ tiꞌj ka at Dios ex aju tipumal mintiꞌ bajsbil te.

Cyjaꞌtzun mintiꞌ cycolbil cyib xjal tuꞌnju mintiꞌ in che niman te Dios.

21 Masque el cynicꞌ tiꞌj Dios,

pero mintiꞌ jaw cynimsaꞌn tbi,

ic tzaꞌn mya Dioste tuj cywitz;

ex mintiꞌ xi cykꞌoꞌn chjonte te;

nok oꞌcx cub cyximan aju nokx gan,

ex e oc mintiꞌ cynabl,

ex aju cyanmi tuj klolj taꞌ.

22 Oc cykꞌon cyib te aj nabl,

pero e oc mintiꞌ cynabl.

23 Cyaj cycolin tuꞌn cycꞌulun twitz ju Dios maꞌxix toclen ex mlay naj,

ex e cꞌulun twitz tilbilal xjal aju cnajel ex twitz cyilbilal chyuꞌj,

ex twitz cyilbilal jil cyaje cykan,

ex twitz cyilbilal lobaj.

24 Tuꞌntzunju,

e jeꞌx ttzokpiꞌn Dios tuꞌn cybinchante mya baꞌn,

tuꞌn tbaj cytzꞌilsan cyib ic tzaꞌnx tajbil cyanmi;

cyjaꞌtzun cub cykꞌoꞌn tchꞌixwi cyximlal cyxolx.

25 Cyaj cykꞌoꞌn aju tyol Dios axix toc ex xi cyniman aju nicꞌaj yol,

e cꞌulun cywitz ke tchꞌisben Dios ex e ajben cye;

mintiꞌ e cꞌulun twitz Dios aju binchalte tcyakil,

aju baꞌn tuꞌn tnimanjtz tbi te jumajx.

Icxwitju.

26 Tuꞌntzunju,

e jeꞌx ttzokpiꞌn Dios tuꞌn cybinchante aju tajbil cychibjal elni tiꞌj cwent;

ke xuꞌj cyaj cykꞌoꞌn cymojbabl cyib tucꞌil cychmil,

ex cybincha aju mya kꞌoꞌn cye xjal tuꞌn cybinchante.

27 Ax icx cybincha xinak,

cyaj cykꞌoꞌn cymojbabl cyib tucꞌil cyxuꞌjil,

pon tcꞌuꞌj jun tiꞌj juntl,

ex cybincha cyxolx aju chꞌixbajil tbinx,

e yaẍin xinak tucꞌil juntl xinak,

cyjaꞌtzun cub tkꞌoꞌn Dios cycastiw tuꞌnju otok che el tzpet.

28 Ex tuꞌnju mintiꞌ cub tuj cywitz tuꞌn t-xi cyniman Dios,

axte Dios cyaj kꞌonte cye tuꞌn tel tzpet cynabl tuꞌn cybinchante aju mya tuj tumel.

29 Nojni tuj cyanmi tuꞌn tcyakil mya baꞌn,

[aj pajil ke],

nimcu mya baꞌn in cybinchaꞌn,

in pon cycꞌuꞌj tiꞌj nimcu,

mya baꞌn ke,

at tloꞌch cycꞌuꞌj cyiꞌj xjal,

byol xjal ke,

jawni che kꞌojin,

sbul ke,

cucx in che yolin cyiꞌj cyucꞌil ka mya baꞌn ke,

ẍtakꞌil yol ke,

30 siꞌmil yol ke,

icꞌun Dios cyuꞌn,

yasul ke,

jawni ke,

in jaw cyniman cyib,

oꞌcx in che ximan tiꞌj alcye mastl mya baꞌn tuꞌn tbant cyuꞌn,

miban che niman te cyman,

31 mintiꞌ cynabl,

mintiꞌ in japun cyyol cyuꞌn,

mintiꞌ cycꞌujlalil cyiꞌj xjal,

cycꞌiꞌ cub cynajsaꞌn til juntl,

mintiꞌ tkꞌakꞌbil cycꞌuꞌj tiꞌj juntl.

32 Masque baꞌn tley Dios cyuꞌn jatum in tmaꞌn ka il tiꞌj tuꞌn cycyim cycyakil keju in che binchante tcyakil jlu,

mya nok oꞌcx in cybinchaꞌn tcyakil mya baꞌn,

ax icx in che tzalaj cyiꞌj txkantl xjal in che binchante mya baꞌn.