Tuj tumelxix aju jwisi tuꞌn Dios
2
Tuꞌntzunju mintiꞌ tcolbil tiba,
aya wucꞌil,
nok alxcyeya in yolina tiꞌj juntl ka aj ilxix;
tuꞌnju in yolina tiꞌj juntl ka aj ilxix,
tibajxa in cub tzꞌak,
porque in tmaꞌna ka aj ilxix juntl,
ex ax icx teya in tbinchaꞌna mya baꞌn.
2 Ex baꞌn kuꞌn,
tuj tumelxix cbel cysentens xjal tuꞌn Dios,
akeju in che binchan il.
3 Yajtzun teya wucꞌil,
in yolina cyiꞌj keju in che binchan il ex ax icx teya in tbinchaꞌna mya baꞌn,
¿maj in ximana tiꞌj ka tuꞌn ttzokpaja tuj jwisi tzul tuꞌn Dios?
4 ¿Mujka nneꞌl ticꞌuna Dios tuꞌnju baꞌnxix ex at tpasens ex apaꞌnx tuꞌn?
¿Mintiꞌpe baꞌn tuꞌna ate Dios in txocon teya tuꞌn tajtz tiꞌj tanmiya tuꞌnju at nim t-xtalbil?
5 Pero tuꞌnju cyuw tanmiya ex mintiꞌ nnaꞌjtz tiꞌj,
cyjaꞌtzun mas in chꞌiy tcastiwoya aju oc tcꞌmaꞌya tuj kꞌij oc ttzaj tcastiwoya tuꞌn Dios,
ex oc ttzaj jwisi tuj tumelxix tuꞌn Dios.
6 Porque ctzajel tkꞌoꞌn Dios chojbil te teyle junjun ic tzaꞌnx takꞌunben.
7 Ctzajel tkꞌoꞌn Dios chwinklal te jumajx cye keju cucx toc tilil cyuꞌn tuꞌn cybinchante baꞌn,
nnoꞌc tilil cyuꞌn tuꞌn cycambante jun nimbil cye tuj cyaꞌj ex tuꞌn tten cychwinklal te jumajx.
8 Atzun cye keju cycꞌiꞌ che bin ex mintiꞌ in xi cyniman aju yol ax toc,
nok oꞌcx in xi cyniman aju mya tuj tumel,
tzul tkꞌoj Dios cyiꞌj ex ctzajel tkꞌoꞌn cycastiw.
9 Tzul yajbil ex cꞌixcꞌoj cyibaj cycyakil xjal in che binchan mya baꞌn,
tnejelxix cye xjal judiy,
ax icx cye xjal mya judiy.
10 Atzun cye keju in cybinchaꞌn baꞌn,
ctzajel tkꞌoꞌn Dios nimbil cye tuj cyaꞌj,
ex che tel tuj txubtxaj,
tnejelxix cye xjal judiy,
ax icx cye xjal mya judiy.
11 Porque mintiꞌ nnoꞌc tqueꞌyin Dios ti cyxilen xjal.
12 Porque cycyakil keju o che binchan il ex mintiꞌtok biꞌn tley Moisés cyuꞌn,
oc che najel mintiꞌ toclen ley cyiꞌj;
ex cycyakil keju o che binchan il ex biꞌntok tley Moisés cyuꞌn,
che oquel tuj xjel ex cbel cysentens tuꞌnxju ley.
13 Porque mlay che oc tkꞌoꞌn Dios ke xjal te tzꞌaklxix ka nok in che bin tiꞌj ley ex mintiꞌ in japun cyuꞌn;
nok oꞌcx che oquel te tzꞌaklxix tuꞌn,
akeju in japun ley cyuꞌn.
14 Porque ke xjal mya judiy ke,
akeju mintiꞌ tley Moisés cyucꞌil,
ka ma cybincha aju in tmaꞌn ley,
ax cynabl in kꞌmante alcye tuꞌn cybinchante masque mintiꞌ jun ley cyucꞌil,
cyjaꞌtzun cyleyx cyib.
15 Ax cybinchben in yecꞌunte ka at jun ley tzꞌiban tuj cyanmi,
aju ley lu in tmaꞌn tuꞌn tjapun cyuꞌn ic tzaꞌn in tmaꞌn tuj tley Moisés,
ex ax cyanmi in kꞌmante ka ax toc jlu,
ex tuj cyximbetz at maj in cymaꞌn ka at cyil ex at maj in cymaꞌn ka mintiꞌ.
16 Tcyakil jlu cꞌelel tuj kꞌanchaꞌl tuj tkꞌijlalil oc cyoc xjal tuj xjel twitz Dios tuꞌn Jesucrist,
ic tzaꞌnx tkanil colbil in xi npacbaꞌne,
ex tcyakil cybinchben xjal mya baꞌn ewan cyuꞌn,
cꞌelel chicꞌeꞌ.
Ke xjal judiy ex aju tley Moisés
17 Aya toc tbiya xjal judiy ex kꞌukl tcꞌuꞌja tiꞌj tley Moisés ex in jaw tniman tiba tuꞌnju ojtzkiꞌn Dios tuꞌna.
18 Ojtzkiꞌn tajbil Dios tuꞌna,
ex icꞌni twitza tiꞌj aju baꞌnxix,
porque xnakꞌtzaꞌmaja tiꞌj ley.
19 Ex kꞌukl tcꞌuꞌja tiꞌj ka aya ẍaklul cye moẍ ex ka aya kꞌol spicꞌun cye keju in che bet tuj klolj.
20 Tuj tnabla ka aya kꞌol xnakꞌtzbil cye keju mintiꞌ baꞌn cyuꞌn,
ex xnakꞌtzala cye cꞌwaꞌl,
porque at ttxuylal ojtzkibl tucꞌila tuj ley,
ax icx ttxuylal ju yol axix toc.
21 Katzun aya xnakꞌtzal te juntl,
¿tikuꞌn mintiꞌ in t-xnakꞌtzan tiba?
Aya in pacban cye xjal tuꞌn miꞌn cyelkꞌan,
¿yajtzun teya,
tikuꞌntzun in elkꞌaꞌna?
22 Aya in kꞌmante tuꞌn miꞌn cybinchante xjal aj pajil,
¿yajtzun teya,
tikuꞌntzun in tbinchaꞌna aj pajil?
Ex aya icꞌun ke tilbilal tuꞌna,
¿tikuꞌntzun nneꞌtz telkꞌaꞌna kꞌinumabl tuj cyja ke tilbilal?
23 Aya in jaw tniman tiba tuꞌnju at tley Dios tucꞌila,
pero in cub tkꞌoꞌna tchꞌixwi Dios tuꞌnju nnicꞌa tibaj tley.
24 Tuj tumelxix in tmaꞌn tuj Tuꞌjil cyjaꞌ:
Ke xjal mya judiy ke in che yolin mya baꞌn tiꞌj Dios nok tuꞌn cylaje,
chi tuj Tuꞌjil.
25 Ax toc at tajben sircunsisyón ka ma japun tley Moisés tuꞌna;
pero ka ma tzicꞌa tibaj ley,
cꞌoquela ic tzaꞌn mya sircunsidarimaja.
26 Atzunju xjal mya sircunsidarimaj pero ka ma japun tuꞌn aju in tmaꞌn ley,
junx taꞌ ic tzaꞌn otok sircunsidarinjtz.
27 Ex aju xjal mya sircunsidarimaj tiꞌj tchibjal,
ka ma japun ley tuꞌn,
cꞌoquel kꞌoꞌna te aj il tuꞌn,
porque at tley Dios tzꞌiban tucꞌila ex o sircunsidarinjtza,
pero nnicꞌa tibaj ley.
28 Porque mya ax toc judiyte xjal nok tuꞌnju in tyecꞌun tib ka judiy xjalte;
ex mya ax toc sircunsisyón aju in bant tiꞌj kchibjal.
29 Aju xjal axix toc judiy,
atzun teju at tley Dios tuj tanmi;
ex aju sircunsisyón axix toc,
atzun tuꞌn tten tuj kanmi,
mya tuꞌn ley tzꞌiban in bant jlu,
nok oꞌcx tuꞌn T-xew Dios in tbinchaꞌn.
Ate xjal lu cjawil nimsaꞌn tuꞌn Dios,
mya cyuꞌn xjal.