AJU TNEJEL UꞌJ XI TTZꞌIBAN APOSTL PABLO CYE AJ CORINT
Xi ttzꞌiban apostl Pablo jun uꞌj cye ocslal tuj tnam Corint
1
Akine Pablo,
txcoꞌmaj kine tuꞌn woque apostl te Jesucrist nok tuꞌn tajbil Dios,
ex tucꞌix erman Sóstenes at wucꞌile.
2 In xi ntzꞌibane cyeye,
akeye ocslal ateꞌye tuj tnam Corint,
etzan keye tuꞌn Dios tuꞌnju cymojbabl cyibe tucꞌil Jesucrist ex txcoꞌmaj keye oꞌcx tuꞌn cyajbene te Dios,
cyucꞌix cycyakil keju in che cubsan twitz Kajaw Jesucrist nok jachak,
ate Jesucrist Kajaw ex Cyajaw.
3 Awt Kman Dios tucꞌix Kajaw Jesucrist che tzaj kꞌonte xtalbil cyeye ex tuꞌn tkeꞌxix cycꞌuꞌje.
In kcꞌmoꞌn t-xtalbil Dios nok tuꞌn Crist
4 Cucx in xi nkꞌoꞌne chjonte te Dios cyiꞌje tuꞌnju t-xtalbil Dios tzaj kꞌoꞌn cyeye tuꞌnju cymojbabl cyibe tucꞌil Jesucrist.
5 Porque ma che oque kꞌinun tuj tcyakil tuꞌn Crist,
ma tzꞌaket-xix cynable,
ex ma bant cypacbane tiꞌj tyol Dios.
6 Cyjaꞌtzun ma cyuwsanjtz ju yol cyuꞌne,
aju yol ax toc xi nchicꞌbaꞌne tiꞌj Crist.
7 Cyjaꞌtzun ma cycꞌame tcyakil cyoclene,
mintiꞌ jun atx taj cyeye,
in che ayone tiꞌj tkꞌijlalil tulel Kajaw Jesucrist;
8 ex axte ccyuwsal cyeye tuꞌn cyweꞌxixe max te bajsbil,
tuꞌntzun cytene mintiꞌ cypaltile tuj tkꞌijlalil oc tul Kajaw Jesucrist.
9 Ate Dios in japunxix tyol ex mlay tzicꞌx tiꞌj,
axte ma txcon cyeye tuꞌn cymojbante cyibe tucꞌil Tcꞌwaꞌl aju Kajaw Jesucrist.
Cub ten pabl tib cyxol ocslal
10 Erman,
tuꞌnju woclene ma tzaj tkꞌoꞌn Kajaw Jesucrist,
chin cubsale cywitze,
junxwit cyyole cycyakile ex tuꞌn miꞌn tten jun pabl tib cyxole,
nok oꞌcx tuꞌn cymojbante cyibe junx cynable ex junx cyximbetze.
11 Porque at jun tkanil ma nbiye cyiꞌje erman cyuꞌn keju ateꞌ tuj tja Cloé,
at jun kꞌoj cyxole,
che chi.
12 Atzun jlu in xi nmaꞌne cyeye porque mya junx taꞌ cyyole.
At junjun in tmaꞌn:
Te Pablo kine,
ex junjuntl in tmaꞌn:
Te Apolos kine,
ex junjuntl in tmaꞌn:
Te Pedro kine,
ex junjuntl in tmaꞌn:
Te Crist kine.
13 ¿Baka tpaꞌn tib Crist?
¿Apelo Pablo jaw kꞌoꞌn twitz crus tuꞌn cyclete?
¿Ex baka tuj tbi Pablo o che byane tuj aꞌ?
14 Cxel nkꞌoꞌne chjonte te Dios,
mi jun cyeye o byan wuꞌne,
nok oꞌcx Crispo tucꞌix Gayo.
15 Cyjaꞌtzun,
mi jun cyeye tuꞌn tmante ka tuj nbiye o byan.
16 Ax icx wuꞌne o che byan keju ateꞌ tuj tja Estéfanas,
pero mintiꞌ naꞌn wuꞌne ka at juntl o byan wuꞌne cyxol mastl.
17 Porque mintiꞌ ma chin tzaj samaꞌne tuꞌn Crist tuꞌn cybyan xjal wuꞌne,
nok oꞌcx tuꞌn t-xi npacbaꞌne tkanil colbil,
ex mya tuꞌn nmak yol ma txi nmaꞌne,
tuꞌntzun miꞌn tel wiꞌne tipumal yol in xi nmaꞌne tiꞌj tcyimlen Crist twitz crus.
Ate Crist tipumal Dios ex tnabl Dios
18 Porque aju yol in xi nmaꞌne tiꞌj tcyimlen Crist twitz crus,
mintiꞌ ttxolil yol lu nneꞌl tuj cywitz xjal in cheꞌx tuj najen;
atzun ke tuj kwitz,
akoꞌ ma ko clet,
aju yol lu tipumal Dios te,
19 porque in tmaꞌn tuj Tuꞌjil:
Cnajel aju nabl cye aj nabl wuꞌne,
ex cꞌelel wiꞌne cynabl keju sacꞌ cynabl,
chi Tuꞌjil.
20 ¿Jatumtzun taꞌ ju aj nabl?
¿Jatumtzun taꞌ ju xnakꞌtzal tiꞌj ley?
¿Jatumtzun taꞌ ju xjal at nim tnabl in yolin tiꞌj ju at tuj tkꞌijlalil jaꞌlo?
¿Myapetzun ma tzꞌoc cynabl xjal te tzcaj tuꞌn Dios?
21 Porque nim te Dios tnabl,
cyjaꞌtzun cub t-ximan Dios tuꞌn miꞌn tel cynicꞌ xjal tiꞌj tuꞌn cyex cynabl;
cyjaꞌtzun mas baꞌn ela tuj twitz Dios tuꞌn cyclet ke ocslal tuꞌnju yol in pacbanjtz,
masque mintiꞌ ttxolil nneꞌl tuj cywitz mastl xjal.
22 Porque ke xjal judiy in cykanin tuꞌn cybant ke señ,
ex ke xjal grieg in che jyon cynabl;
23 atzun keye in xi kpacbaꞌne tbi Crist aju jaw kꞌoꞌn twitz crus.
Ke xjal judiy mya baꞌn nneꞌla ju yol lu tuj cywitz,
atzun ke txkantl xjal mya judiy ke,
mintiꞌ ttxolil yol lu nneꞌla tuj cywitz;
24 atzun tuj cywitz keju txcoꞌmaj ke tuꞌn Dios,
ke xjal judiy ax icx ke xjal grieg,
ate Crist tipumal Dios ex tnabl Dios.
25 Porque aju cub t-ximan Dios mas at tnabl twitz cynabl xjal,
masque in cymaꞌn xjal ka mintiꞌ ttxolil yol;
ex aju tbincha Dios at mas tipun cywitz xjal,
masque in cymaꞌn xjal ka mintiꞌ tipun.
26 Porque cyximancuye erman,
tej cytxconjtze mya nim at cyxole at cynabl ic tzaꞌn in cymaꞌn xjal,
ex mya nim at cyxole at cyipun,
ex mya nim at cyxole cycꞌwaꞌl xjal maꞌ cyoclen;
27 nok oꞌcx e jaw t-scꞌoꞌn Dios keju mintiꞌ cynabl tuj cywitz xjal tuꞌntzun ttzaj cychꞌixwi keju at cynabl;
ex e jaw t-scꞌoꞌn Dios keju mintiꞌ cyipun tuj cywitz xjal tuꞌntzun ttzaj cychꞌixwi keju at cyipun.
28 Ex e jaw t-scꞌoꞌn Dios ke tal meba xjal ex keju icꞌun ke ex mintiꞌ cyajben tuj cywitz xjal,
tuꞌntzun cyex xoꞌn keju at cyoclen tuj cywitz,
29 tuꞌntzun mi aꞌl jun xjal tuꞌn tjaw tniman tib twitz Dios.
30 Tuꞌn Dios ma che oc mojbaꞌne tucꞌil Jesucrist,
ex ma tzaj kꞌoꞌn tnabl Crist ke tuꞌn Dios,
ex nok tuꞌn Crist ma ko oc kꞌoꞌn te tzꞌaklxix tuꞌn Dios,
ex ma ko el tpaꞌn tuꞌn kajben oꞌcx te,
ex ma ko colpet tuꞌn.
31 Cyjaꞌtzun:
Alcye taj tuꞌn tjaw tniman tib,
mas baꞌn tuꞌn tjaw tnimsaꞌn tbi Kajaw,
ic tzaꞌn in tmaꞌn tuj Tuꞌjil.