In cheꞌx tkꞌolbeꞌn Pablo teyle junjun ocslal
16
Biꞌx cyile chꞌin erman Febe,
aju diaconis cyxol ocslal tuj tnam Cencrea.
2 Cycꞌmome tuj tbi Kajaw,
ic tzaꞌnx in bant cyxol ocslal,
ex che onine tucꞌil tiꞌj ju at tajben te;
porque ate o tzꞌonin cye nimcu,
ax icx o tzꞌonin weye.
3 Cykꞌonxe nkꞌolbeble te Priscila ex te Aquila,
akeju wucꞌile tuj takꞌun Jesucrist,
4 chꞌixmi ẍe cub byoꞌn tuꞌn nclete cyuꞌn;
tuꞌntzunju in xi nkꞌoꞌne chjonte cye,
mya oꞌcx kine,
ax icx cycyakil ocslal ateꞌ tuj junjun tnam cyxol xjal mya judiy ke.
5 Ax icx cykꞌonxe nkꞌolbeble cye ocslal nnoꞌc cychmon cyib tuj tja Priscila ex Aquila.
Ex cykꞌonxe nkꞌolbeble te Epéneto,
aju at ncꞌuꞌje tiꞌj,
tnejel ocslal tiꞌj Crist tuj lugar Acaya.
6 Cykꞌonxe nkꞌolbeble te Mariy,
aju o tzꞌakꞌnan nim cyxole.
7 Cykꞌonxe nkꞌolbeble te Andrónico ex te Junias,
nxjalile ke jlu,
ex junx e ten wucꞌile tuj pres,
at cyoclen cyxol apostl,
ex nej e ocslan ke tiꞌj Crist nwitze.
8 Cykꞌonxe nkꞌolbeble te Amplias aju at ncꞌuꞌje tiꞌj porque ocslal tiꞌj Kajaw.
9 Cykꞌonxe nkꞌolbeble te Urbano,
aju kucꞌil tuj takꞌun Jesucrist,
ax icx cykꞌonxe nkꞌolbeble te Estaquis,
aju at ncꞌuꞌje tiꞌj.
10 Cykꞌonxe nkꞌolbeble te Apeles,
atzun jun ocslal tiꞌj Crist waꞌlxix.
Cykꞌonxe nkꞌolbeble cye keju ateꞌ tuj tja Aristóbulo.
11 Cykꞌonxe nkꞌolbeble te nxjalile Herodión.
Cykꞌonxe nkꞌolbeble cye keju ateꞌ tuj tja Narciso,
ocslal ke tiꞌj Kajaw.
12 Cykꞌonxe nkꞌolbeble cye erman xuꞌj Trifena ex Trifosa,
akeju in che akꞌnan tuj takꞌun Kajaw.
Cykꞌonxe nkꞌolbeble te erman xuꞌj Pérsida,
aju at ncꞌuꞌje tiꞌj,
aju nim o tzꞌakꞌnan tuj takꞌun Kajaw.
13 Cykꞌonxe nkꞌolbeble te Rufo,
cyxol cycyakil atzun jun mejor ocslal tiꞌj Kajaw,
ex cykꞌonxe nkꞌolbeble te ttxuꞌ,
ic tzaꞌn ax ntxuꞌye.
14 Cykꞌonxe nkꞌolbeble te Asíncrito,
te Flegonte,
te Hermas,
te Patrobas,
te Hermes ex cye ke erman ateꞌ cyucꞌil.
15 Ex cykꞌonxe nkꞌolbeble te Filólogo,
te Julia,
te Nereo ex te tanb,
te Olimpas ex cye cycyakil ocslal ateꞌ cyucꞌil.
16 Cykꞌolbem cyibe cyxolxe ex cytzꞌuban el cywitze tucꞌil tcyakil cycꞌujlalile.
In cheꞌx kꞌolbeꞌne cyuꞌn cycyakil ocslal tuj junjun tnam etzan ke tuꞌn Crist.
17 In chin cubsane cywitze erman,
tzꞌelx cynicꞌe cyiꞌj keju in che el paꞌnte cye ocslal ex in cub cykꞌoꞌn jun tolsabl tuꞌn cyjaw tolje tiꞌj;
aju in cybinchaꞌn mya ic tten ic tzaꞌn ju xnakꞌtzbil ma cycꞌame;
cypaꞌmil cyibe cyiꞌj ke jlu.
18 Porque ke xjal lu mintiꞌ in che ajben te Kajaw Jesucrist,
nok oꞌcx in cybinchaꞌn aju in pon cycꞌuꞌj tiꞌj,
in cub cysbuꞌn keju nok chꞌin cynabl,
tuꞌnju cye che xmoxin ex mejor tbinx cyyol.
19 Atzun cyeye,
cycyakil xjal ma cybi cyiꞌje ma txi cynimane tyol Dios;
cyjaꞌtzun in chin tzalaje cyiꞌje;
ex wajbile tuꞌn cyoque aj nabl tuꞌn cybinchanteye aju baꞌn,
pero mya tuꞌn cybinchanteye aju mya baꞌn.
20 Ex aju Dios kꞌolte kmojbabl kib,
jurat naj cbel pachꞌuꞌn Satanás tjakꞌ cykane tuꞌn.
Aju t-xtalbil Kajaw Jesucrist tenwt cyucꞌile.
21 In cheꞌx kꞌolbeꞌne tuꞌn Timotey aju wucꞌile tuj akꞌuntl,
ex tuꞌn Lucio,
ex tuꞌn Jasón,
ex tuꞌn Sosípater;
nxjalile ke jlu.
22 Akine Tercio tzꞌibalte ju uꞌj lu,
in cheꞌx nkꞌolbeꞌne tuj tbi Kajaw.
23 In cheꞌx kꞌolbeꞌne tuꞌn Gayo,
aju kꞌol nposadiye ex kꞌolte ja jatum nnoꞌc cꞌulbil cyuꞌn ocslal.
In cheꞌx kꞌolbeꞌne tuꞌn Erasto,
aju cꞌuꞌl pwak te tnam,
ex tuꞌn kerman Cuarto.
24 [Aju t-xtalbil Kajaw Jesucrist tenwt cyucꞌile cycyakile.
Icxwitju.]
In jaw tnimsaꞌn Pablo tbi Dios
25 Chjonte te Dios at tipumal tuꞌn cyweꞌxixe tuꞌn,
ic tzaꞌnx aju tkanil colbil in xi npacbaꞌne,
aju in pacbanjtz tiꞌj Jesucrist.
Atzunju yol lu ma tzaj tyecꞌun Dios,
aju cꞌuꞌntok tuꞌn tuj ewaj atxix tej naꞌnxtok tbant twitz txꞌotxꞌ,
26 atzun jaꞌlo ma tzaj tyecꞌun aju yol lu,
aju cyaj cytzꞌiban ke t-sanjel Dios,
ma tzaj yecꞌun ju yol lu jaꞌlo cye cycyakil xjal,
tuꞌn t-xi cyniman ex tuꞌn t-xi cyocslaꞌn,
ic tzaꞌnx ju mandamyent o tma Dios,
ate Dios at te jumajx.
27 Oꞌcx te Dios at tnabl.
Nimanxwit ju tbi te jumajx nok tuꞌn Jesucrist.
Icxwitju.