Kbincham aju baꞌn tuꞌn tajben te jun onbil te kucꞌil
15
Cyjaꞌtzun,
akekoꞌ aju at kipun tuj kocslabl,
tzicꞌxwit kuꞌn aju cypaltil keju mintiꞌ cyipun,
ex miꞌn kbincha aju kex kajbil tuꞌn ktzalaj tiꞌj.
2 Teyle junjun ke kbincham aju baꞌn,
tuꞌn tajben te jun onbil te kucꞌil ex tuꞌn ttzalaj tiꞌj,
ex tuꞌn tchꞌiy tnabl.
3 Porque ic tzaꞌn te Crist mintiꞌ tbincha tex tajbil tuꞌn ttzalaj tiꞌj;
nok oꞌcx icꞌx tuꞌn ic tzaꞌn in tmaꞌn tuj Tuꞌjil:
Aju yasbil cyuꞌn keju in che yasun tiꞌja cub tzꞌak wibaje.
4 Porque tcyakil aju o tzꞌibanjtz tuj Tuꞌjil ojtxi,
o tzꞌibanjtz te xnakꞌtzbil ke,
tuꞌn tten kpasens ex tuꞌn tkeꞌ kcꞌuꞌj tuꞌnju yol tzꞌiban tuj Tuꞌjil,
tuꞌntzun tkeꞌxix kcꞌuꞌj tiꞌj Dios.
5 Aju Dios kꞌol cypasense ex kꞌukbal cycꞌuꞌje,
awt Dios tzꞌonin cyeye tuꞌn cytene junx cynable cyxolxe ic tzaꞌnx tajbil Jesucrist,
6 tuꞌntzun tjaw cynimsaꞌne tbi Dios,
aju Tman Kajaw Jesucrist,
junx cynable cycyakile ex junx cyyole.
Pacbanjtz tkanil baꞌn cye xjal mya judiy ke
7 Cyjaꞌtzun cycꞌmom cyibe cyxolxe ic tzaꞌn te Crist ma ko tcꞌam,
tuꞌn tjaw nimset tbi Dios.
8 Cyjaꞌtzun cxel nmaꞌne cyeye,
ate Jesucrist oc tkꞌon tib te ajbel cye aj Israel tuꞌn tyecꞌunjtz ka ax toc tyol Dios,
tuꞌntzun tjapun aju tyol Dios tziyimaj tuꞌn ojtxi cye kxeꞌchel,
9 ex tuꞌn tjaw nimsaꞌn tbi Dios cyuꞌn xjal mya judiy ke,
tuꞌnju ma tzaj kꞌakꞌan tcꞌuꞌj Dios cyiꞌj,
ic tzaꞌn in tmaꞌn tuj Tuꞌjil:
Tuꞌntzunju cjawil nnimsaꞌne tbiya cyxol txkantl xjal cyuj mastl nasyon,
ex chin bitzale tuꞌn tjaw nimset tbiya.
10 Ex juntl maj in tmaꞌn:
Akeye txkantl xjal cyuj mastl nasyon,
che tzalajxe tucꞌil ju tnam etzan tuꞌn Dios.
11 Ex juntl maj in tmaꞌn:
Cynimsaꞌnctze tbi Kman,
akeye txkantl xjal cycyakile cyuj mastl nasyon,
ex cycyakile akeye tnam cynimsaꞌnctze tbi.
12 Ex at jun yol in tmaꞌn Isaías cyjaꞌ:
Ctzajel jun tiyjil Isaí.
Tzul te cawil cyibaj txkantl xjal cyuj mastl nasyon;
ex ckebel cycꞌuꞌj txkantl xjal tiꞌj,
chi tuj Tuꞌjil.
13 Ate Dios in tzaj kꞌukbante kcꞌuꞌj,
awt nojsante cyanmiye tuꞌn tcyakil tzalajbil,
ex awt kꞌonte cymojbabl cyibe nok tuꞌn cyocslable,
tuꞌntzun tkeꞌxix cycꞌuꞌje tiꞌj tuꞌn tipumal Xewbaj Xjan.
14 Kꞌukl ncꞌuꞌje cyiꞌje,
erman,
tuꞌnju baꞌn cymodiye,
ex at nim cyojtzkible,
ex baꞌn che kꞌon cynable cyxolxe.
15 Pero clarxix ma txi ntzꞌibane cyeye erman tiꞌj junjun yol,
tuꞌn miꞌn ticꞌ tnaꞌl cyuꞌne.
Ma txi nmaꞌne tuꞌnju at woclene tzaj tkꞌoꞌn Dios,
16 tuꞌn woque ajbel te Jesucrist cyxol xjal mya judiy.
Aju wajbeble,
tuꞌn t-xi npacbaꞌne tkanil colbil aju ma tzaj tkꞌoꞌn Dios,
tuꞌntzun cycꞌmet txkantl xjal tuꞌn Dios ic tzaꞌn jun oyaj baꞌn nneꞌla tuj twitz,
paꞌmaj ke tuꞌn Xewbaj Xjan tuꞌn cyajben oꞌcx te Dios.
17 Tuꞌnju ocslal kine tiꞌj Jesucrist,
cyjaꞌtzun in chin tzalaje tiꞌj wajbeble te Dios.
18 Porque mlay chin yoline tiꞌj juntl tiꞌxti,
oꞌcx tiꞌj ju ma tbincha Crist,
tuꞌn nyole ex tuꞌn wakꞌunbene tuꞌn t-xi cyniman xjal mya judiy tyol Dios.
19 Ma bant jlu wuꞌne nok tuꞌn cyipumal ke señ ex tuꞌn cyipumal ke binchben maꞌxix cyxilen,
ex tuꞌn tipumal T-xew Dios;
cyjaꞌtzun,
ma pon baj npacbaꞌne tkanil colbil tuꞌn Crist,
tzajnix tuj tnam Jerusalén ex max ma pon baj tuj txꞌotxꞌ Ilírico.
20 Ex cyjaꞌtzun nnoꞌc tilil wuꞌne tuꞌn t-xi nmaꞌne tkanil colbil jatum naꞌnxtok cybinte xjal tkanil tiꞌj Crist,
tuꞌntzun miꞌn wakꞌnane jatum otok xeꞌt tuꞌn juntl xjal,
21 ic tzaꞌn in tmaꞌn tuj Tuꞌjil:
Akeju bajx cybi tkanil tiꞌj,
oc cyilaꞌ,
ex akeju naꞌnxtok cybinte tkanil tiꞌj,
cꞌelel cynicꞌ tiꞌj,
chi tuj Tuꞌjil.
Cub t-ximan Pablo tuꞌn tpon tuj Rom
22 Cyjaꞌtzun,
nimcu maj o chin weꞌye tuꞌn miꞌn nxiꞌye cyucꞌile.
23 Pero jaꞌlo,
mintiꞌtl jatum tuꞌn wakꞌnane cyuj lugar tzalu,
ex ma bet-xi abkꞌi in wajbeꞌne tuꞌn nxiꞌye cyucꞌile.
24 Cyjaꞌtzun,
oc nxiꞌye tuj España,
chin icꞌele cyucꞌile;
porque ximan wuꞌne oc wilaꞌye cywitze oc wicꞌe,
ex tuꞌn ttzaj cykꞌoꞌne chꞌin onbil weye tuꞌn tajben tuj nbeye,
otokxi chin tzalaj chꞌine cyucꞌile nej.
25 Atzun jaꞌlo ma chinxe tuj tnam Jerusalén tuꞌn t-xi wiꞌne jun onbil cye ocslal.
26 Porque baꞌn eꞌla tuj cywitz aj Macedonia ex ke aj Acaya tuꞌn tjaw chmet jun oyaj tuꞌn t-xi kꞌot cye meba ateꞌ cyxol ocslal tuj Jerusalén.
27 Porque baꞌn eꞌla tuj cywitz aj Macedonia tuꞌn t-xi cykꞌoꞌn jun oyaj cye ocslal tuj Jerusalén,
oc cykꞌoꞌn mer ic tzaꞌn at cycꞌas cyucꞌil;
porque ic tzaꞌn ma cycꞌam xjal mya judiy ju tcyꞌiwbil Dios nok cyuꞌn ocslal judiy,
ax icxtzun il tiꞌj tuꞌn cyonin xjal mya judiy tiꞌj ju at tajben cye ocslal judiy.
28 Cyjaꞌtzun,
oc tjapun jlu wuꞌne,
t-xilenxi nkꞌoꞌne aju oyaj lu cye,
chin icꞌele visitaril cyeye oc nxiꞌye tuj España.
29 Ex baꞌn wuꞌne,
oc nxiꞌye cyucꞌile,
oc cycꞌmaꞌye nimxix t-xtalbil Crist oc npone cyucꞌile.
30 Chin cubsaltzune cywitze erman,
nok tuꞌnju ocslal koꞌ tiꞌj Kajaw Jesucrist,
ex tuꞌnju at cycꞌujlalile tuꞌn Xewbaj Xjan,
che onine wiꞌje tuj cynaꞌj Diose,
ex che cubsane twitz Dios wiꞌje,
31 tuꞌn ncolpaje cywitz ke xjal miban che bin ateꞌ tuj Judey,
ex aju oyaj cxel wiꞌne cye ocslal tuj Jerusalén baꞌnwt tzꞌeꞌla tuj cywitz;
32 ex tuꞌn npone cyucꞌile tucꞌil tzalajbil nok tuꞌn tajbil Dios,
ex tuꞌn wojlan chꞌine cyucꞌile.
33 Awt Dios ten cyucꞌile cycyakile,
aju kꞌolte kmojbabl kib.
Icxwitju.