Miꞌn yolina mya baꞌn tiꞌj termaniya
14
Ka at jun erman mya cyuw tten tuj tocslabl,
cycꞌmome,
pero miꞌn baj cykanine tzaꞌn tten t-ximbetz.
2 Porque at junjun erman baꞌn tuj cywitz tuꞌn t-xi cychyoꞌn tcyakil;
atzun junjuntl mya cyuw cyten tuj cyocslabl,
mintiꞌ in xi cychyoꞌn chibj,
oꞌcx mastl nicꞌbebl in xi cyuꞌn.
3 Ka at jun erman in xi tchyoꞌn tcyakil,
miꞌn tzꞌel ticꞌun aju mintiꞌ in xi tchyoꞌn tcyakil;
ex ka at jun mintiꞌ in xi tchyoꞌn tcyakil,
miꞌn yolin tiꞌj ju in xi tchyoꞌn tcyakil;
porque o cꞌmet xjal lu tuꞌn Dios.
4 ¿Yajtzun teya,
ti toclena tuꞌnju in yolina mya baꞌn tiꞌj tmajen juntl?
Porque tuj tcwent tpatrón taꞌ ka waꞌl ex ka cubni tzꞌak;
pero cbel wabanxix,
porque at tipumal Kajaw tuꞌn tweꞌxix.
5 At junjun erman in ximan tiꞌj ka at jun kꞌij mas baꞌn twitz juntl;
atzun juntl in ximan tiꞌj ka junx cyxilen tcyakil kꞌij.
Teyle junjun tuꞌn t-ximan tiꞌj alcye baꞌn tuj twitz.
6 Alcye jun xjal niman jun kꞌij tuꞌn,
niman tuꞌn porque taj tuꞌn tniman te Kajaw,
ex alcye jun xjal mya niman jun kꞌij tuꞌn,
mya niman tuꞌn porque ax icx taj tuꞌn tniman te Kajaw.
Alcye jun xjal in xi tchyoꞌn tcyakil,
in xi tchyoꞌn porque taj tuꞌn tniman te Kajaw,
ex in xi tkꞌoꞌn chjonte te Dios;
ex alcye jun xjal mintiꞌ in xi tchyoꞌn tcyakil,
mintiꞌ in xi tchyoꞌn porque ax icx taj tuꞌn tniman te Kajaw,
ex in xi tkꞌoꞌn chjonte te Dios.
7 Porque mi aꞌl jun ke in ankꞌin tuꞌn tajben teju tex tajbil,
ex mi aꞌl jun in cyim tuꞌn tex tajbil.
8 Porque ka in ko ankꞌin,
in ko ankꞌin tuꞌn kajben te Kajaw;
ex ka ma ko cyim,
tuꞌn tajbil Kajaw ko cymel.
Cyjaꞌtzun,
ka in ko ankꞌin ex ka ma ko cyim,
te Kajaw koꞌ.
9 Tuꞌntzunju cyim Crist ex jaw ankꞌin,
tuꞌn toc te Cyajaw cyimni ax icx cye itzꞌ.
10 ¿Yajtzun teya,
tikuꞌn in yolina ka mya baꞌn termaniya?
ex ¿tikuꞌn nneꞌl ticꞌuna termaniya?
Porque kcyakil ko pol twitz Crist tuꞌn koc tuj xjel.
11 Porque in tmaꞌn tuj Tuꞌjil:
Akine Dios in xi nmaꞌne jun nyole axix toc,
che bel ẍmejeꞌ cycyakil xjal nwitze,
ex cycyakil xjal oc cymaꞌ ka akine Dios,
chi tuj Tuꞌjil.
12 Cyjaꞌtzun,
teyle junjun ke oc tkꞌaꞌ tajlal twitz Dios tiꞌj tbinchben.
Miꞌn cub tkꞌoꞌna jun tolsabl twitz termaniya
13 Cyjaꞌtzun,
miꞌn ko yolin mya baꞌn tiꞌj juntl kxolx,
nok oꞌcx ko ximan tiꞌj tuꞌn miꞌn tcub kkꞌoꞌn jun tolsabl twitz jun kerman ex tuꞌn miꞌn tcub tzꞌak tuj il kuꞌn.
14 Tuꞌnju ocslal kine tiꞌj Kajaw Jesús,
cyjaꞌtzun baꞌn wuꞌne ex ma tzꞌel nnicꞌe tiꞌj,
mintiꞌ jun chibj mibanwt tchyoꞌnjtz,
pero ka at jun erman in ximan tiꞌj ka mya baꞌn tuꞌn t-xi tchyoꞌn nok alcyex,
entons miꞌn txi tchyoꞌn,
porque mya baꞌn tuj twitz.
15 Katzun ma bisun termaniya tuꞌn tlaj ju in xi tchyoꞌna,
entons mintiꞌtl tcꞌujlalila tiꞌj termaniya icju.
Miꞌnwt tzꞌel tzpet termaniya tuꞌn tlaj ju in xi tchyoꞌna,
porque o cyim Crist tuꞌn tclet.
16 Miꞌn cyakꞌe ambil tuꞌn tyolinjtz mya baꞌn tiꞌj ju baꞌn nneꞌla tuj cywitze.
17 Porque aju tcawbil Dios myatzun a tnabl tiꞌj kchiꞌ ex ka tiꞌj kcꞌa,
nok oꞌcx tuꞌn kten tzꞌaklxix ex tuj kmojbabl kib kxol ex tuj tzalajbil tuꞌn Xewbaj Xjan.
18 Porque alcye in ajben te Crist ic tzaꞌn jlu,
in tzalaj Dios tiꞌj,
ex nnicꞌ cywitz xjal tiꞌj ka baꞌn.
19 Cyjaꞌtzun,
ko lpeꞌc tiꞌj ju in tzaj kꞌinte kmojbabl kib kxolx ex aju in ajben te chꞌisbil knabl kxolx.
20 Miꞌn cub t-xituna takꞌunben Dios tuꞌn tlaj ju in xi tchyoꞌna.
Ax toc tcyakil chibj sak taꞌ;
pero mya baꞌn tuꞌn tcub tzꞌak juntl erman tuj il tuꞌn tlaj ju in xi tchyoꞌna.
21 Baꞌn tuꞌn miꞌn t-xi tchyoꞌna chibj ex tuꞌn miꞌn t-xi tcꞌaꞌna vin ex mi jun tuꞌn tbinchanteya aju jacu jaw tolj termaniya tuꞌn,
tuꞌntzun miꞌn tcub tzꞌak tuj il,
ex tuꞌn miꞌn tcub numj tuj tocslabl.
22 Ka at tocslabla,
tenx tocslabla twitz Dios.
At tzalajbil teju xjal mintiꞌ in tmaꞌn tanmi ka at til tiꞌj jun tiꞌxti aju otok tzicꞌ twitz tiꞌj ka baꞌn.
23 Atzunju xjal in jolpajeꞌ tcꞌuꞌj tiꞌj ju in xi tchyoꞌn,
atzun ilju,
porque ma txi tchyoꞌn ex mya kꞌukl tcꞌuꞌj tiꞌj ka baꞌn;
ex tcyakilju in kbinchaꞌn ka mya kꞌukl kcꞌuꞌj tiꞌj ka baꞌn,
atzunte ilju.