13
Cycyakile il tiꞌj tuꞌn t-xi cynimane ke aj sanjelal te gobierni.
Porque mlay ten cawbil nokwit mya tuꞌn Dios;
ex keju in che cawin,
ax Dios in tzaj kꞌonte cyoclen.
2 Cyjaꞌtzun,
alcye jun xjal tcꞌiꞌ niman cye aj sanjelal,
entons mintiꞌ in xi tniman tley Dios;
ex alcye miban niman,
at til ex ctzajel tcastiw.
3 Porque ke cawil myatzun cyakꞌun te xobtzal cye xjal in cybinchaꞌn baꞌn,
nok oꞌcx cye keju in cybinchaꞌn mya baꞌn.
Ka cyaje tuꞌn cyankꞌine mintiꞌ cyxobile twitz ju cawil,
cybinchame aju baꞌn ex octzun che yolil baꞌn cyiꞌje;
4 Porque ke aj sanjelal ajbel ke te Dios tuꞌn cytene tuj baꞌn.
Katzun ma cybinchaye mya baꞌn,
che xobtzune cywitz;
porque mya nokx gan at cyoclen tuꞌn cycub xjal tuj castiw,
porque ajbel ke te Dios tuꞌn cykꞌonte castiw tuj tumelxix cye keju in cybinchaꞌn mya baꞌn.
5 Tuꞌntzunju,
ilxix tiꞌj tuꞌn t-xi cynimane ke aj sanjelal,
mya nok oꞌcx tuꞌn miꞌn ttzaj cycastiwoye,
ax icx tuꞌnju in tmaꞌn cyanmiye ka baꞌn tuꞌn t-xi cynimane.
6 Tuꞌntzunju,
ilxix tiꞌj tuꞌn cychjet ke chojenj te gobierni cyuꞌne;
porque ke aj sanjelal ajbel ke te Dios,
ex atzun cyakꞌun jlu.
7 Cychjonxe cye cycyakil aju cꞌasbeꞌnan cyuꞌne.
Cychjonxe tcyakil txcaj chojenj te gobierni,
ka tiꞌj txꞌotxꞌ ex ka tiꞌj cꞌaẍjel ex ka tiꞌj juntl;
atwit tchi tuj cywitze keju at cyoclen;
cykꞌonxe nimbil teju at tuꞌn tnimanjtz.
8 Miꞌn che cyaj tene tuj cꞌas,
nok oꞌcx tuꞌn cycꞌujlante cyibe cyxolxe;
porque alcyeju cꞌujlaꞌn tucꞌil tuꞌn,
in japun ley tuꞌn.
9 Porque atzun ke mandamyent jlu:
Miꞌn cybinchaye aj pajil,
miꞌn che biyune,
miꞌn che elkꞌane,
miꞌn che nicꞌane yol tiꞌj juntl,
miꞌn pon cycꞌuꞌje tiꞌj jun tiꞌxti at te cyucꞌile;
ex ka at juntl mandamyent,
pero junx cytzuylaj cyib tiꞌj ju yol lu:
Cycꞌujlame ke cyucꞌile ic tzaꞌn cyeye in cycꞌujlan cyibe.
10 Ka at cycꞌujlalile mlay cybinchaye mya baꞌn tiꞌj cyucꞌile;
cyjaꞌtzun tuꞌnju at cycꞌujlalile in japun ju ley cyuꞌne.
11 Ax icx tzꞌelx cynicꞌe tiꞌj tzaꞌn tten tkꞌijlalil jaꞌlo,
ma pon or tuꞌn tel kwatl.
Porque jaꞌlo mas nikaꞌ taꞌ ju kꞌij te colbil ke twitz tej t-xi kocslaꞌn tyol Dios.
12 Chꞌix kskix,
ex chꞌix tjawil kꞌij.
Kkꞌoncjtzun tcyakilju mya baꞌn in binchanjtz tuj klolj,
ex kkꞌoꞌnc kiꞌj aju in ajben tuj kꞌojbil,
ic tzaꞌn cye soldad,
ex ko bet tuj spicꞌun.
13 Ko bet tuj tumelxix ic tzaꞌn in ko bet kꞌijl.
Miꞌn ko bet tuj achbil,
miꞌn ko cꞌan kꞌeꞌn,
miꞌn ko yaẍin,
miꞌn ko oc ic tzaꞌn ke xjal mintiꞌ in cyjacꞌuꞌn cyib tiꞌj mya baꞌn,
miꞌn ko kꞌojin ex miꞌn tzaj tloꞌch kcꞌuꞌj tiꞌj juntl.
14 Ate Jesucrist ic tten ic tzaꞌn jun makbil kiꞌj tuꞌn kclet,
atzunju cykꞌoꞌnque cyiꞌje,
ex miꞌn cyakꞌe ambil teju tajbil cychibjale mya baꞌn.