Scꞌoꞌmaj koꞌ tuꞌn Dios tuꞌn kajben oꞌcx te
12
Erman,
ma tzaj kꞌakꞌan tcꞌuꞌj Dios kꞌij,
cyjaꞌtzun chin cubsale cywitze tuꞌn t-xi cykꞌoꞌne cyximlale te Dios ic tzaꞌn jun oyaj itzꞌ,
tecuxix Dios ex baꞌn nneꞌla tuj twitz,
atzun cycꞌulbile axix toc twitz Dios.
2 Ex miꞌn che oc lpeꞌye tiꞌj cynabl xjal mya baꞌn,
nok oꞌcx cychꞌexpum cynable tuꞌn cyoque te acꞌaj,
tuꞌntzun cyojtzkinteye alcye tajbil Dios,
tuꞌn tel cynicꞌe tiꞌj alcye baꞌn,
ex alcye in tzalaj Dios tiꞌj ex alcye ju tzꞌaklxix.
3 Nok tuꞌn t-xtalbil Dios ma tzaj kꞌoꞌn woclene,
cyjaꞌtzun cxel nmaꞌne cyeye cycyakile,
mi jun tuꞌn t-ximan tiꞌjx ka at mas toclen ex balo mintiꞌ,
nok oꞌcx tuꞌn t-ximan tiꞌjx tujxix tumel,
ic tzaꞌnx tocslabl junjun tzaj tmaloꞌn Dios.
4 Porque ic tzaꞌn kximlal nimcu ikan tuꞌn ex mya junx taꞌ cyakꞌun,
5 icxtzun kten,
masque nimcu kbaj pero nok jun kximlal tuꞌnju kmojbabl kib tucꞌil Crist,
ex kcyakil ktzuylaj kib tiꞌj jun kximlal.
6 Cyjaꞌtzun,
junxilchak toclen junjun ke ma tzaj tkꞌoꞌn Dios ic tzaꞌnx tajbil,
baꞌn tuꞌn kajben tuj tumelxix.
Alcye at toclen tuꞌn t-xi tpacbaꞌn tyol Dios,
baꞌn tuꞌn t-xi tpacbaꞌn ic tzaꞌnx tocslabl tzaj tmaloꞌn Dios.
7 Alcye at toclen tuꞌn tajben cye mastl,
baꞌn tuꞌn tajben.
Alcye at toclen tuꞌn tkꞌonte xnakꞌtzbil,
baꞌn tuꞌn t-xi tkꞌoꞌn xnakꞌtzbil.
8 Alcye at toclen tuꞌn t-xi tkꞌoꞌn cynabl mastl,
baꞌn tuꞌn t-xi tkꞌoꞌn cynabl.
Alcye baꞌn kꞌon cotzbaj,
kꞌonx tuꞌn tcyakil tcꞌuꞌj.
Alcye baꞌn toc te nejenel,
baꞌn tuꞌn toc tkꞌoꞌn cwent tiꞌj;
ex alcye in kꞌakꞌan tcꞌuꞌj tiꞌj juntl,
oninx tuꞌn tcyakil tzalajbil.
Aju tuꞌn cybinchante ocslal
9 Aju cycꞌujlalile myawt nok tten.
Cyicꞌun ele aju mya baꞌn,
che lpeꞌque tiꞌj ju baꞌn.
10 Cycꞌujlam cyibe cyxolxe porque cyitzꞌin cyibe;
tzꞌoc tililx cyuꞌne tuꞌn cynimanjtz ke mastl ocslal ex mya oꞌcx akeye tuꞌn cynimanjtze.
11 Tzꞌoc tililx cyuꞌne ex miꞌn che oque cyꞌaj;
tenwt t-secꞌal cyanmiye ex che ajbene te Kajaw.
12 Che tzalajxe tuꞌnju kꞌukl cycꞌuꞌje tuꞌn cytene tucꞌil Kajaw;
tzicꞌxwit yajbil cyuꞌne;
ex miꞌn che kꞌajene tuꞌn cynaꞌne Dios.
13 Che onine cyiꞌj ocslal tiꞌj ju atx taj cye;
ex cykꞌonxe cyposad ocslal.
14 Che cubsane twitz Dios tuꞌn cycub cyꞌiwlaꞌn keju in che yajlan cyeye;
cykaninxe cyꞌiwbil cyibaj,
ex miꞌn txi cykanine mya baꞌn cyibaj.
15 Che tzalajxe cyucꞌil keju in che tzalaj;
che okꞌe cyucꞌil keju in che okꞌ.
16 Junxwit cynable cyxolxe;
miꞌn jaw cyniman cyibe;
cymojban oc cyibe cyucꞌil keju nok chꞌin cyoclen.
Miꞌn che ximane tiꞌj ka mas at cynable.
17 Ka ma binchanjtz mya baꞌn cyiꞌje,
miꞌn tzꞌaj cykꞌoꞌne t-xel mya baꞌn;
tzꞌoc tililx cyuꞌne tuꞌn tbant aju baꞌn tuj cywitz cycyakil xjal.
18 Ka jacu bant cyuꞌne,
tzꞌoc tililx cyuꞌne tuꞌn cytene baꞌn cyucꞌil cycyakil xjal.
19 Akeye erman at ncꞌuꞌje cyiꞌje,
miꞌn tzꞌaj cykꞌoꞌne t-xel mya baꞌn,
nok oꞌcx cykꞌoncje tuj tcwent Dios;
porque in tmaꞌn tuj Tuꞌjil:
Wuꞌne cꞌajel t-xel;
akine chin kꞌolte castiw,
chi Kman.
20 Cyjaꞌtzun,
aju aj kꞌoj tiꞌja,
ka at weꞌyaj tiꞌj,
kꞌonxa twa;
ex ka at txketleꞌn tiꞌj,
kꞌonxa tcꞌa;
ka ma tbinchaya icju ctzajel tchꞌixwi,
chi tuj Tuꞌjil.
21 Miꞌnwt cub tiꞌja tuꞌnju mya baꞌn,
nok oꞌcx tuꞌn tcub tiꞌj mya baꞌn tuꞌna tuꞌnju tbinchbena baꞌn.