Alcye keju che cletel cyxol aj Israel
11
Cyjaꞌtzun in xi nmaꞌne:
¿Maj o tzꞌel ticꞌun Dios aju tnam Israel etzan tuꞌn?
Miꞌn.
Porque icx weye aj Israel kine,
tiyjil Abraham kine,
tiyjil Benjamín kine.
2 Mintiꞌ o tzꞌel ticꞌun Dios tnam Israel aju etzan tuꞌn ex jaw t-scꞌoꞌn atxix ojtxi.
¿Mintiꞌpetzun baꞌn cyuꞌne aju in tmaꞌn tuj Tuꞌjil tiꞌj Elías aju t-sanjel Dios,
tzaꞌn tten o yolin tucꞌil Dios cyiꞌj aj Israel ka mya baꞌn ke?
Ex tma:
3 Nman,
ma che cub cybyoꞌn ke t-sanjela,
ex ma cub cyxitun ke t-altara;
ex njunalxe ma chin cyaj tene,
ex nnoꞌc tilil cyuꞌn tuꞌn ncub cybyoꞌn,
chi Elías.
4 Pero,
¿titzun tzaj ttzakꞌweꞌn Dios?
Atx wuk mil xinak cꞌuꞌnx wuꞌne te weye,
naꞌnx cycub ẍmejeꞌ twitz tilbilal Baal,
chi Dios.
5 Ax icxtzun tuj tkꞌijlalil jaꞌlo atx junjun scꞌoꞌmaj ke tuꞌn t-xtalbil Dios.
6 Katzun tuꞌn t-xtalbil Dios,
myatzun tuꞌn cyakꞌunben;
porque nokwit tuꞌn cyakꞌunben,
entons aju t-xtalbil Dios myawtlo jun xtalbil.
7 ¿Tzaꞌntzun tten jlu?
Mintiꞌ e canun aj Israel tiꞌj ju in cyjyoꞌn;
atzun keju scꞌoꞌmaj ke cyxol,
ma che canun tiꞌj,
ex txkantl cyuwix cyanmi;
8 ic tzaꞌn in tmaꞌn tuj Tuꞌjil:
Ax Dios jpunte cynabl tuꞌn miꞌn cylonte tuꞌn cywitz ex tuꞌn miꞌn cybinte tuꞌn cyẍcyin,
ex cucx cyten jaꞌlo,
chi tuj Tuꞌjil.
9 Ax icx in tmaꞌn David:
Aju nintz waꞌn nnoꞌc cyuꞌn cyucꞌil cyamiw,
tzꞌocwit te cꞌobil cye ex te tzuybil cye,
tuꞌntzun cyjaw tolj ex tuꞌn tcub cycastiw.
10 Tzꞌocwit sjumj tiꞌj cywitz tuꞌn miꞌn tbant cyqueꞌyin,
ex cubxwit tzeꞌjix ttzal cyiꞌj te jumajx,
chi David tuj Tuꞌjil.
Aju colbil cye xjal mya judiy ke
11 Cyjaꞌtzun in xi nmaꞌne:
¿Ope che jaw tolj aj Israel tuꞌn cycub tzꞌak te jumajx?
Miꞌn.
Pero tuꞌnju otok che cub tzꞌak aj Israel,
ul colbil cye xjal mya judiy ke,
tuꞌntzun ttzaj cynaꞌn cyib aj Israel ex tuꞌn cyoc lpeꞌ cyiꞌj txkantl xjal.
12 Katzun ma tzaj kꞌoꞌn xtalbil cye cycyakil xjal nok tuꞌnju cycublen tzꞌak aj Israel,
ex ka tuꞌnju e el txalpuj aj Israel,
ke xjal mya judiy ke ma cycꞌam xtalbil,
yajtzun oc cyjaw weꞌ juntl maj cycyakil aj Israel,
¿myapelo mas nim xtalbil oc cycꞌmaꞌ ke xjal?
13 Pero at jun nyole cyeye,
akeye xjal mya judiy keye.
Nok tuꞌnju apostl kine cye xjal mya judiy,
cyjaꞌtzun aju wakꞌune tzaj kꞌoꞌn maꞌxix toclen tuj nwitze,
14 nnoꞌc tilil wuꞌne tuꞌn ttzaj cynaꞌn cyib ke nxjalile ex tuꞌn cyoc lpeꞌ cyiꞌje,
tuꞌntzun cyclet junjun cye.
15 Katzun ma bant cyten mastl xjal tucꞌil Dios nok tuꞌnju e el icꞌun aj Israel tuꞌn,
yajtzun oc cycꞌmet juntl maj aj Israel tuꞌn Dios,
¿myapelo jun ankꞌibl jlu cye keju ic tzaꞌn cyimni ke jaꞌlo?
16 Porque ka xjansaꞌmaj aju tnejel pan in xi kꞌot te Dios,
ax icx tcyakil tkꞌotjil pan xjansaꞌmaj.
Ex ka xjansaꞌmaj tlocꞌ tzeꞌ,
ax icx ke tkꞌab xjansaꞌmaj.
17 Pero at junjun aj Israel ic cyten ic tzaꞌn tkꞌab tzeꞌ olivo ma che el txꞌemin,
ex akeye ic cytene ic tzaꞌn tkꞌab tzeꞌ olivo tuj cꞌul,
ma che oc txꞌapoꞌne te cyxel.
Cyjaꞌtzun ma cycꞌame cyipumale tiꞌj tlocꞌ olivo ex tiꞌj tlechil.
18 Pero miꞌn jaw cyniman cyibe cywitz keju mer tkꞌab tzeꞌ;
katzun ma jaw cyniman cyibe,
cynaꞌntze mya akeye cꞌaꞌchalte tlocꞌ tzeꞌ,
ate tlocꞌ tze cꞌaꞌchal cyeye.
19 Oclo cymaꞌye:
Icloju,
pero ma che el txꞌemin ke tkꞌab tzeꞌ tuꞌn koc txꞌapoꞌne te cyxel,
che chiloye.
20 Ax toc;
pero ma che el txꞌemin tuꞌnju mintiꞌ cyocslabl,
atzun cyeye nok tuꞌn cyocslable ma che oc txꞌapoꞌne te cyxel.
Miꞌntzun jaw cyniman cyibe,
oꞌcx che xobe twitz Dios.
21 Porque ka mintiꞌ cyaj tcloꞌn Dios aju tecuxix tzeꞌ tkꞌab,
ax icx cyeye mlay che cyaj cloꞌne tuꞌn.
22 Pero tzꞌelx cynicꞌe tiꞌj,
ate Dios baꞌn,
pero ax icx cyuw te Dios;
ax toc cyuw tyol cye keju e cub tzꞌak,
pero tbanilxix tyol cyeye,
ka cucx ma keꞌ cycꞌuꞌje tiꞌj ka baꞌn te Dios;
katzun miꞌn,
ax icx cyeye oc che elel txꞌemine tuꞌn.
23 Ax icx ke aj Israel,
ka ma tzꞌajtz tiꞌj cyanmi ex ka ma che ocslan,
oc che oquel txꞌapoꞌn juntl maj,
porque ate Dios at tipumal tuꞌn cyoc txꞌapoꞌn juntl maj.
24 Porque ka ma che el txꞌemine tiꞌj jun tzeꞌ olivo tajx in tzaj chꞌiy tuj cꞌul,
ex ka ma che oc txꞌapoꞌne tiꞌj jun tzeꞌ olivo awaꞌn in cuꞌx ex tbanil,
myatzun ẍe el chꞌiye tiꞌj,
yajtzunlo cye keju mer tkꞌab olivo tbanil,
¿mlaypelo che oc txꞌapoꞌn juntl maj tiꞌj cyximlalx?
Oc che cꞌmetel juntl maj aj Israel tuꞌn Dios
25 Erman,
waje tuꞌn cybinteye aju yol lu ewantok nej tuꞌn Dios,
tuꞌntzun miꞌn tcub cyximane ka mas at cynable:
ax toc ma cyuwix cyanmi aj Israel,
pero mya te jumajx,
ma cyuwix chꞌin acutzun in tzꞌaket cyajlal txkantl xjal mya aj Israel ke,
akeju che cletel.
26 Ex cyjaꞌxtzun che cletel cycyakil aj Israel,
ic tzaꞌn in tmaꞌn tuj Tuꞌjil:
Tuj tnam Sión ctzajel aju tzokpil cye,
cꞌelel tiꞌn ju mya baꞌn cyxol tiyjil Jacob.
27 Atzunwe nyol jlu cyjel bant tiꞌj wuꞌne cyucꞌil oc tel wiꞌne cyil,
chi Dios.
28 Tuj jun tumel,
aj kꞌoj ke aj Israel tiꞌj Dios tuꞌn tlaj mintiꞌ xi cyocslaꞌn tkanil colbil;
cyjaꞌtzun ma tzaj kꞌoꞌn ambil cyeye tuꞌn cyocslane,
akeye xjal mya judiy;
pero tuj juntl tumel,
cꞌujlaꞌn ke aj Israel tuꞌn Dios tuꞌn cylaj ke cyxeꞌchel scꞌoꞌmaj ke tuꞌn Dios.
29 Porque mlay tzꞌel tiꞌn Dios aju t-xtalbil o tzaj tkꞌoꞌn cye,
ex mlay chꞌexpet aju tyol tiꞌj ju txocbil cye.
30 Ic tzaꞌn cyeye,
ojtxi mintiꞌ xi cynimane Dios,
atzun jaꞌlo ma tzaj kꞌakꞌan tcꞌuꞌj Dios cyiꞌje tuꞌnju mintiꞌ xi cyniman aj Israel,
31 ax icxtzun cye jlu mintiꞌ ma txi cyniman jaꞌlo,
pero tzul kꞌakꞌan tcꞌuꞌj Dios cyiꞌj,
ic tzaꞌn cyeye ma tzaj kꞌakꞌan tcꞌuꞌj cyiꞌje.
32 Porque cycyakil xjal miban che niman,
tzaꞌnx ke xjal judiy ex ke xjal mya judiy,
junx ma che oc tkꞌoꞌn Dios mer ic tzaꞌn cyocx ke tuj pres,
tuꞌntzun ttzaj kꞌakꞌan tcꞌuꞌj cyiꞌj cycyakil.
33 Maꞌxix t-xilen tnabl Dios ex ju tojtzkibl.
Mlay tzꞌel knicꞌ tiꞌj t-ximbetz ex mlay cnet tumel tbe kuꞌn.
34 Porque ¿atpe jun xjal o tzꞌel tnicꞌ tiꞌj t-ximbetz Kman?
Ex ¿atpe jun xjal o kꞌonte tnabl?
35 Ex ¿atpe jun xjal o txi kꞌonte jun tiꞌxti nej te Dios tuꞌn tajtz t-xel tuꞌn?
Mintiꞌ.
36 Porque tucꞌil Dios in tzaj tcyakil,
ex tuꞌn Dios o bant tcyakil,
ex tete Dios tcyakil.
Nimanxwit ju tbi te jumajx.
Icxwitju.