10
Erman,
ax toc tajbil wanmiye ex in chin cubsane twitz Dios cyiꞌj aj Israel,
tuꞌn cyclet.
2 Porque ma wile tzaꞌn cyten,
nim cygan tuꞌn cyajben te Dios,
pero mintiꞌ nneꞌl cynicꞌ tiꞌj alcye tumel tuꞌn cyajben te Dios,
3 porque mintiꞌ nneꞌl cynicꞌ tiꞌj tzaꞌn tten tuꞌn cyoc te tzꞌaklxix tuꞌn Dios,
nok oꞌcx nnoꞌc tilil cyuꞌn tuꞌn cyoc te tzꞌaklxix cyuꞌnx cybinchben,
ex mintiꞌ in xi cykꞌon cyib te Dios tuꞌn cyoc kꞌoꞌn te tzꞌaklxix.
4 Porque aju tley Moisés oꞌcx japun baj tiꞌj Crist,
tuꞌntzun cyoc kꞌoꞌn te tzꞌaklxix tuꞌn Dios cycyakil keju ma che ocslan tiꞌj Crist.
5 Porque cyaj ttzꞌiban Moisés tzaꞌn tten tuꞌn toc jun xjal te tzꞌaklxix tuꞌnju ley,
chi in tmaꞌn cyjaꞌ:
Ka ma japun tuꞌn xjal tcyakilju in tmaꞌn tuj ley,
oc cꞌankꞌil tuꞌn,
chi tuj ley.
6 Atzun tiꞌj ju tuꞌn koc tkꞌoꞌn Dios te tzꞌaklxix nok tuꞌn kocslabl in tmaꞌn cyjaꞌ:
Miꞌn tmaya tuj tanmiya:
¿Alcye cjawix tuj cyaꞌj?
(atzunte jlu taj tuꞌn tcuꞌtz Crist tuꞌn tzalu twitz txꞌotxꞌ);
7 ex miꞌn tmaya:
¿Alcye cbelex tuj cynajbil cyimni?
(atzunte jlu taj tuꞌn tjatz kꞌiꞌn Crist tuꞌn cyxol cyimni).
8 Pero ¿ti t-xilen ju yol lu?
Nikayin taꞌ ju yol ttxlaja,
tuj ttziꞌya taꞌ ex tuj tanmiya,
chi tuj Tuꞌjil.
Atzunju yol lu in xi kpacbaꞌne in yolin tiꞌj ocslabl:
9 Ka in tchicꞌbaꞌna tuꞌn ttziꞌya ka a Jesús Kajaw,
ex ka ma tocslaya tuj tanmiya ka tuꞌn Dios jatz ankꞌin Jesús cyxol cyimni,
oc cletela.
10 Porque tuj kanmi in xi kocslaꞌn tuꞌn koc te tzꞌaklxix tuꞌn Dios,
ex tuꞌn ktziꞌ in kchicꞌbaꞌn ka a Jesús Kajaw tuꞌn kclet.
11 Porque in tmaꞌn tuj Tuꞌjil:
Cycyakil keju ma che ocslan tiꞌj,
mlay che chꞌixwi,
chi tuj Tuꞌjil.
12 Tuj twitz Dios mya part cyxilen xjal judiy cyucꞌil ke xjal mya judiy,
porque axte Kajaw,
Cyajaw cycyakil,
ex in tzaj tkꞌoꞌn nimcu cye cycyakil keju in che cubsan twitz.
13 Porque in tmaꞌn tuj Tuꞌjil,
cycyakil keju in che cubsan twitz Kman,
oc che cletel.
14 Pero ¿tzaꞌntzun tten tuꞌn cycubsan twitz Kajaw ka naꞌnx cyocslan tiꞌj?
¿Ex tzaꞌntzun tten tuꞌn cyocslan tiꞌj ka naꞌnx cybinte tiꞌj?
¿Ex tzaꞌn tten tuꞌn cybinte ka mi aꞌl jun kꞌol tkanil cye?
15 ¿Ex tzaꞌn tten tuꞌn cykꞌonte tkanil tiꞌj ka mi ẍeꞌx samaꞌn?
Ic tzaꞌn in tmaꞌn tuj Tuꞌjil:
Tbanilxix cyqueꞌyinx keju [in che pacban tuꞌn cyten xjal tuj txubtxaj,
ex] in che pacban tkanil baꞌn.
16 Pero mya cycyakil in xi cybiꞌn aju tkanil colbil;
porque in tmaꞌn Isaías:
Tat,
¿Mape txi cyocslaꞌn xjal kpacbable?
Chi Isaías.
17 Cyjaꞌtzun in ko ocslan tuꞌnju yol in kbiꞌn,
ex aju yol in kbiꞌn tyol Crist.
18 Pero in xi nmaꞌne:
¿Maj mintiꞌ o cybi aju yol lu?
O cybi.
Porque in tmaꞌn tuj Tuꞌjil:
Tuj tcyakil twitz txꞌotxꞌ ma tzꞌex tkanil cyyol,
ex ma pon baj cyyol ttxaꞌnpun txꞌotxꞌ,
chi tuj Tuꞌjil.
19 Ex in xi nmaꞌne juntl maj:
¿Maj mintiꞌ baꞌn jlu cyuꞌn aj Israel?
Baꞌn cyuꞌn.
Porque tnejelxix in tmaꞌn Moisés cyiꞌj aju tzaj tmaꞌn Dios te:
Ctzajel tloꞌch cycꞌuꞌje wuꞌne tuꞌn tlaj juntl tnam aju in cymaꞌne tiꞌj ka mintiꞌ tajben;
ex che jawil kꞌojle wuꞌne tuꞌn tlaj jun tnam mintiꞌ tnabl,
chi Dios.
20 Ax icx te Isaías o yolin cyuwxix ex tma cyjaꞌ:
Ma chin cnete cyuꞌn keju mintiꞌ in che jyon wiꞌje.
Ma txi nyecꞌun wibe cye keju mintiꞌ in che kanin wiꞌje,
chi Dios.
21 Atzun cyiꞌj aj Israel in tmaꞌn Isaías cyjaꞌ:
Enter jun kꞌij ma txi nnukpiꞌn nkꞌabe txcol te jun tnam miban bin ex mojtzal yol,
chi Isaías.