Scꞌoꞌmaj ke aj Israel tuꞌn Dios
9
Ax toc in nmaꞌne porque ocslal kine tiꞌj Crist,
mintiꞌ in chin nicꞌane yol;
ax wanmiye in kꞌmante weye ka ax toc jlu ex in tzaj tyecꞌun Xewbaj Xjan.
2 Nim nbise at ex cucx tchyoꞌn tuj wanmiye.
3 Porque jacu wajbeye tuꞌn tcub nsentense tuꞌn nxiꞌye tuj najen ex tuꞌn wel paꞌne tiꞌj Crist,
nok tuꞌn cyclet ke wermaniye,
akeju nxjalile junx wiyjile cyucꞌil.
4 Aj Israel ke,
ex o tzaj kꞌoꞌn cyoclen te cꞌwaꞌlbaj.
O ten t-spicꞌumal Dios cyxol,
ex o bant tiꞌj jun yol tuꞌn Dios cyucꞌil,
ex o tzaj kꞌoꞌn tley Moisés cye,
tucꞌix aju ajbebl te Dios,
ex tcyakilju o tma Dios tuꞌn ttzaj tkꞌoꞌn cye.
5 Cycꞌwaꞌl kxeꞌchel ke,
ex tiꞌj cyiyjil el Crist tej toc te xjal.
Ate Crist ax Dioste tibaj tcyakil,
ex in jaw nimsaꞌn tbi te jumajx.
Icxwitju.
6 Pero aju yol xi ttziyan Dios cye aj Israel mintiꞌ cyaj ten nok cucx,
mintiꞌwt ma japun,
porque mya cycyakil keju elni itzꞌj tiꞌj Israel aj Israel ke.
7 Ex mya nok tuꞌnju tiyjil Abraham ke ocwit che oquel cycyakil te tcꞌwaꞌl;
porque otok txi tmaꞌn Dios te Abraham:
Oꞌcx ke tcꞌwaꞌl Isaac che oquel te tiyjila,
chi Dios te Abraham.
8 Cyjaꞌtzun tten,
mya cycyakil ke tcꞌwaꞌl Abraham che oquel kꞌoꞌn te tcꞌwaꞌl Dios;
nok oꞌcx che oquel te tcꞌwaꞌl ex te tiyjil Abraham akeju o che itzꞌj tuꞌnju yol tzaj ttziyan Dios te.
9 Porque atzun yol lu tzaj ttziyan Dios te Abraham:
Tuj juntl abkꞌi chin ule tucꞌila ex tzul itzꞌj jun tal Sara,
chi tuj Tuꞌjil.
10 Ex mya oꞌcxju,
ax icx te Rebeca oc ten cabe tal tuꞌn jun xinak Isaac tbi,
aju kxeꞌchel.
11-13 Ex naꞌnxtok cyitzꞌj ke tal ex naꞌnxtok cybinchante aju baꞌn ex ka aju mya baꞌn,
xi tmaꞌn Dios jun yol te Rebeca:
Aju tzicbaj cꞌoquel te tmajen tzꞌinbaj,
chi Dios.
Tma Dios icju tuꞌntzun cucx tten t-ximbetz aju otok cub t-ximan,
tuꞌn tjaw t-scꞌoꞌn jun cyxol cabe,
pero mya tuꞌn takꞌunben cꞌwaꞌl tuꞌn tjaw scꞌoꞌn,
nok oꞌcx tuꞌnju ax Dios o txconte te,
ex tuꞌntzun tjapun aju yol tzꞌiban tuj Tuꞌjil:
A Jacob o ncꞌujlaye,
atzunte Esaú el wicꞌune,
chi Dios.
14 ¿Titzun cxel kmaꞌn?
¿Myapelo tzꞌaklxix Dios?
Tzꞌaklxix.
15 Porque xi tmaꞌn Dios te Moisés cyjaꞌ:
Ka waje tuꞌn ttzaj kꞌakꞌan ncꞌuꞌje tiꞌj jun xjal,
ctzajel kꞌakꞌan ncꞌuꞌje tiꞌj;
ex ka waje tuꞌn ttzaj tzꞌeꞌy wanmiye tiꞌj jun xjal,
ctzajel tzꞌeꞌy wanmiye tiꞌj,
chi Dios.
16 Cyjaꞌtzun,
mya tuꞌnju tajbil xjal,
ex mya tuꞌnju in tipuman tib,
oꞌcx tuꞌnju in kꞌakꞌan tcꞌuꞌj Dios tiꞌj.
17 Porque in tmaꞌn Dios tuj Tuꞌjil te rey Faraón:
Tuꞌn jlu ma jaw nscꞌoꞌne tuꞌn toca te rey,
tuꞌntzun tyecꞌunjtz wipumale tiꞌja tiꞌj ju oc nbinchaꞌye,
ex tuꞌn tel tkanil nbiye tuj tcyakil twitz txꞌotxꞌ,
chi Dios.
18 Cyjaꞌtzun,
ka tajbil Dios tuꞌn ttzaj kꞌakꞌan tcꞌuꞌj tiꞌj junjun xjal,
in tzaj kꞌakꞌan tcꞌuꞌj cyiꞌj,
ex ka tajbil Dios tuꞌn tcyuwsante tanmi junjuntl xjal,
in cub tcyuwsaꞌn.
19 Pero oclo tmaꞌya weye:
Ka ic ttenju ¿tikuꞌntzun in tmaꞌn Dios ka at til xjal?
Porque,
¿alcye jacu weꞌ twitz ju tajbil?
20 Pero aya wucꞌil,
¿alcyetzuna tuꞌnju nnoꞌc tmojtzaꞌna yol tucꞌil Dios?
¿Jacupelo tma jun cꞌil teju binchal te:
¿Tikuꞌn ma chin cub tbinchaꞌna icju,
chiwt?
21 Aju binchal cꞌil ¿mintiꞌpelo toclen tiꞌj ax xokꞌl tuꞌn tbinchante jun xar mejorxix queꞌyin ex juntl myaxix mejor queꞌyin?
22 ¿Titzun cxel kmaꞌn?
Masque o tajbe Dios tuꞌn ttzaj tyecꞌun tkꞌoj ex tuꞌn tel cynicꞌ xjal tiꞌj ju tipumal,
pero icꞌx tiꞌj tuꞌn,
tuꞌnju at nim tpasens cyiꞌj keju at ttzajel tkꞌoj cyiꞌj ex banimaj ke tuꞌn cyxiꞌ tuj najen.
23 Icꞌx tiꞌj tuꞌn Dios nok tuꞌn ttzaj tyecꞌun tajwalil maꞌxix cye keju in kꞌakꞌan tcꞌuꞌj cyiꞌj ex banin tiꞌj tuꞌn tuꞌn cyten tucꞌil tuj t-spicꞌumal.
24 A jlu in tmaꞌn kiꞌj,
akoꞌ txcoꞌmajtl koꞌ tuꞌn,
mya oꞌcx cyxol xjal judiy,
ax icx cyxol xjal mya judiy ke.
25 Ic tzaꞌn in tmaꞌn tuj uꞌj tuꞌn Oseas:
Ke xjal mya etzan wuꞌne che oquel nkꞌoꞌne te weye,
ex akeju mya cꞌujlaꞌn wuꞌne,
oc che cꞌujlanjtzel wuꞌne.
26 Ex tuj lugar jatum o kꞌmanjtz cye:
Akeye xjal mya etzan keye wuꞌne nchiye,
axtzun cꞌoquel cybi tcꞌwaꞌl Dios itzꞌ,
chi Dios tuj Tuꞌjil.
27 Ax icx te Isaías in jaw tkꞌajkꞌajel twiꞌ cyuwxix cyiꞌj aj Israel,
in tmaꞌn:
Masque ic cyajlal aj Israel ic tzaꞌn ttxa tzꞌaꞌn ttzi mar,
pero nok nicꞌxi junjun oc che cletel.
28 Porque jurat cjapunel tyol Kman tuꞌn cycyaj xjal tjakꞌ cysentens,
ex tuj tumelxix cjapunel tuꞌn,
chi Isaías.
29 Ic tzaꞌn o tma Isaías ojtxi:
Nokwit mintiꞌ cyaj kꞌoꞌn kiyjil tuꞌnju Tajaw Tcyakil,
mawtlo ko oc ic tzaꞌn tnam Sodoma,
ex ic tzaꞌn tnam Gomorra,
chi Isaías.
Ke aj Israel ex aju tkanil colbil
30 ¿Titzun oc kmaꞌ tiꞌj jlu?
Ke xjal mya judiy ke mintiꞌtok in che ximan tiꞌj tuꞌn cyoc te tzꞌaklxix,
atzun keju ma che oc te tzꞌaklxix,
nok tuꞌn cyocslabl ma che oc kꞌoꞌn te tzꞌaklxix.
31 Atzun cye aj Israel lepch keꞌctok tiꞌj jun ley tuꞌn cyoc te tzꞌaklxix tuꞌn,
pero mintiꞌ e xcyeꞌ tiꞌj tuꞌn tjapun cyuꞌn.
32 ¿Tikuꞌn?
Porque lepch keꞌctok tiꞌj,
mya tuꞌn cyocslabl,
nok oꞌcx tuꞌnju cyakꞌunben,
ic tzaꞌn in tmaꞌn ley.
Cyjaꞌtzun e jaw tolj tiꞌj ju abj tcub cywitz,
33 ic tzaꞌn in tmaꞌn tuj Tuꞌjil:
Cbel nkꞌoꞌne jun abj tuj tnam Sión tuꞌn cyjaw tolj xjal tiꞌj ex tuꞌn cycub tzꞌak;
alcyetzunju ma tzꞌocslan tiꞌj,
mlay tzaj tchꞌixwi,
chi tuj Tuꞌjil.