Aju acꞌaj kchwinklal tuꞌn Xewbaj Xjan
8
Cyjaꞌtzun,
mlay cub kꞌoꞌn cysentens tuꞌn cyxiꞌ tuj najen akeju at cymojbabl cyib tucꞌil Jesucrist,
[akeju mintiꞌ in che bet ic tzaꞌnx tajbil cychibjal,
oꞌcx ic tzaꞌn tajbil Xewbaj Xjan.]
2 Porque ma ko tzokpet tjakꞌ tipumal il ex tjakꞌ tipumal camic tuꞌn tipumal T-xew Dios,
aju in kꞌonte kchwinklal nok tuꞌnju kmojbabl kib tucꞌil Jesucrist.
3 Porque mintiꞌ xcyeꞌ tley Moisés tiꞌj tuꞌn ktzokpet tjakꞌ tipumal il,
tuꞌnju mintiꞌ tipun ley,
tuꞌn tlaj tajbil kchibjal mya baꞌn,
atzun jaꞌlo ma ko tzokpet tuꞌn Dios tuꞌnju tzaj t-samaꞌn acu Tcꞌwaꞌl,
oc t-ximlal Tcꞌwaꞌl ic tzaꞌn t-ximlal xjal aj il,
ex tzaj t-samaꞌn tuꞌn tchjet kil;
cyjaꞌtzun cyaj il tjakꞌ sentens tej tcyim t-ximlal Crist,
4 tuꞌntzun tjapun kuꞌn aju tzꞌaklxix ic tzaꞌn in tmaꞌn ley,
akekoꞌ mintiꞌ in ko bet ic tzaꞌnx tajbil kchibjal,
nok oꞌcx ic tzaꞌnx tajbil Xewbaj Xjan.
5 Porque akeju in cybinchaꞌn tajbil cychibjal,
oꞌcx in che ximan tiꞌj ju tajbil cychibjal;
atzun keju in cybinchaꞌn tajbil Xewbaj Xjan,
oꞌcx in che ximan tiꞌj ju tajbil Xewbaj Xjan.
6 Porque ka ma ko ximan tiꞌj ju tajbil kchibjal,
camic in tzaj tuꞌn;
pero ka ma ko ximan tiꞌj ju tajbil Xewbaj Xjan,
tuꞌn jlu in tzaj kꞌoꞌn kchwinklal ex kmojbabl kib tucꞌil Dios.
7 Porque aju xjal oꞌcx in ximan tiꞌj tajbil tchibjal,
aj kꞌoj tiꞌj Dios,
porque mintiꞌ in xi tniman aju tley Dios,
ex mlay bant tuꞌn.
8 Ex akeju in che ankꞌin ic tzaꞌnx tajbil cychibjal,
mlay bant cyuꞌn aju in tzalaj Dios tiꞌj.
9 Atzun cyeye myatzun in che ankꞌine ic tzaꞌnx tajbil cychibjale,
nok oꞌcx ic tzaꞌnx tajbil Xewbaj Xjan,
ka ax toc najl T-xew Dios tuj cyanmiye.
Ex ka at jun mintiꞌ T-xew Crist tuj tanmi,
myatzun te Cristju.
10 Katzun najl Crist tuj cyanmiye,
masque ic tzaꞌn cyimni cyximlale tuꞌn tlaj il,
pero aju cyanmiye at tchwinklal tuꞌnju ma che oc kꞌoꞌne te tzꞌaklxix tuꞌn Dios.
11 Katzun najl T-xew Dios tuj cyanmiye,
aju Dios jatz ankꞌin Jesús tuꞌn cyxol cyimni,
ax icx cyeye cjawil ankꞌin cyximlale tuꞌn,
aju at tcyimel.
Nok tuꞌnju T-xew Dios najl tuj cyanmiye,
cjawil ankꞌin cyximlale,
ic tzaꞌn o jatz ankꞌin Jesucrist tuꞌn cyxol cyimni.
12 Cyjaꞌtzun erman,
mya il tiꞌj tuꞌn t-xi kniman tajbil kchibjal,
ex mya il tiꞌj tuꞌn kankꞌin ic tzaꞌnx tajbil;
13 porque ka ma che ankꞌine ic tzaꞌnx tajbil cychibjale,
che cymele;
katzun ma cub cyxitune aju takꞌunben cychibjale nok tuꞌn Xewbaj Xjan,
octzun che ankꞌile.
14 Porque cycyakil keju ẍaklun tuꞌn T-xew Dios,
atzun ke tcꞌwaꞌl Diosju.
15 Porque ma cycꞌame aju Xewbaj Xjan,
mya tuꞌn cytene juntl maj te majen ex mya tuꞌn cytene juntl maj tuj xobajil;
nok oꞌcx ma cycꞌame Xewbaj Xjan tuꞌn cyoque te tcꞌwaꞌl Dios;
tuꞌntzunju nnoꞌc kmaꞌn te Kman Dios:
Tat,
ko chi.
16 Porque axte Xewbaj Xjan tucꞌix kanmi in cymaꞌn ka tcꞌwaꞌl Dios koꞌ.
17 Ex ka tcꞌwaꞌl Dios koꞌ,
ax icx at koclen tuꞌn ttzaj kꞌoꞌn ketzbil;
tuꞌn Dios ctzajel kꞌoꞌn ketzbil,
ex at koclen tiꞌj etzbil ctzajel kꞌoꞌn te Crist;
ka ma tzicꞌx kuꞌn junx tucꞌil Crist,
ax icx ko tel junx tucꞌil tuj tajwalil tuj cyaꞌj.
18 Porque ma cub nximane,
aju yajbil ke tuj tkꞌijlalil jaꞌlo mya junx taꞌ tucꞌil ju nimbil ke tzul,
aju ctzajel tkꞌoꞌn Dios ke.
19 Porque tcyakil tchꞌisben Dios cucx in che ayonxix tiꞌj ex in cyajbeꞌn tuꞌn cytzaj tyecꞌun Dios alcye ke tcꞌwaꞌl.
20 Porque aju tchꞌisben Dios oc te mintiꞌ tajben,
mya tuꞌnju tex tajbil,
nok oꞌcx tuꞌnju atzun tajbil Diosju;
ex ax Dios kꞌukbante tcꞌuꞌj tuꞌn tayon tiꞌj ju oybil te.
21 Porque ax icx ax tchꞌisben Dios ctzokpetel tuꞌn miꞌn ttentl tjakꞌ tipumal najen,
oꞌcx tuꞌn tten junx cyucꞌil tcꞌwaꞌl Dios tuj tzokpibl cye maꞌ t-xilen.
22 Porque baꞌn kuꞌn,
tcyakil tchꞌisben Dios junx ateꞌ tuj cꞌixcꞌoj ex cucx cy-ayin jaꞌlo ic tzaꞌn jun xuꞌj nnuꞌl itzꞌj tal.
23 Ex mya oꞌcx ke jlu,
ax icx ke nimxix in ko ayin tuj kanmi,
masque ma kcꞌam Xewbaj Xjan ic tzaꞌn jun señ tiꞌj ju ctzajel kꞌoꞌn ke,
ex in ko ayon tiꞌj tuꞌn kcꞌmonte koclen te cꞌwaꞌlbaj,
ex tuꞌn jlu ccolpetel kximlal.
24 Porque tej kclet,
biꞌx keꞌ kcꞌuꞌj tiꞌj jlu ex in ko ayon tiꞌj;
pero ka ma kil aju in ko ayon tiꞌj,
mlay ko ayon mastl;
porque ka ma kil ¿ti tten tuꞌn kayontl?
25 Katzun in ko ayon tiꞌj ju naꞌnx klonte,
baꞌn tuꞌn kayon tiꞌj tucꞌil kpasens.
26 Ax icx te Xewbaj Xjan in onin kucꞌil tuꞌnju mintiꞌ kipun;
porque mintiꞌ baꞌn kuꞌn tzaꞌn tten tuꞌn knaꞌn Dios;
pero axte Xewbaj Xjan in cubsan kiꞌj twitz Dios tuꞌnju nimxix tajbil kiꞌj ex tuꞌnju mintiꞌ in cnet tumel kuꞌn tuꞌn kyolin.
27 Atzunte Dios in xpichꞌun tuj kanmi ex ojtzkiꞌn tuꞌn alcye t-ximbetz Xewbaj Xjan kiꞌj;
porque in cubsan Xewbaj Xjan cyiꞌj ocslal ic tzaꞌn tajbil Dios.
In cub tiꞌj tcyakil kuꞌn nok tuꞌn Crist
28 Ex baꞌn kuꞌn,
tuj tcyakil in akꞌnan Dios tuꞌn tel baꞌn cye keju in che cꞌujlan te,
cye keju txcoꞌmajtl ke ic tzaꞌnx t-ximbetz Dios.
29 Porque akeju ojtzkiꞌmaj tuꞌn Dios ojtxi,
ax icx cub t-ximan Dios ojtxi tuꞌn cyoc ic tzaꞌnx ju Tcꞌwaꞌl,
tuꞌntzun toc Tcꞌwaꞌl te nej cꞌwaꞌl cyxol nimcu tzꞌinbaj.
30 Ex akeju o che el tpaꞌn Dios ojtxi,
ax icx e tzaj ttxcoꞌn;
ex akeju e tzaj ttxcoꞌn,
ax icx ma che oc tkꞌoꞌn te tzꞌaklxix;
ex akeju ma che oc tkꞌoꞌn te tzꞌaklxix,
ax icx tzaj tkꞌoꞌn Dios cyoclen tuꞌn cyten tucꞌil tuj tajwalil.
31 ¿Titzun oc kmaꞌ tiꞌj jlu?
Ka a Dios kucꞌil,
¿alcyetzun baꞌn tkꞌojl kiꞌj?
32 Mintiꞌ cub t-xcꞌayin Dios tuꞌn ttzaj tkꞌoꞌn Tcꞌwaꞌl,
nok oꞌcx xi tkꞌoꞌn tuꞌn tcyim tuꞌn tlaj kil kcyakil.
Ka ma tbincha ke icju,
¿tzaꞌntzun tten tuꞌn miꞌn ttzaj tkꞌoꞌn tcyakil ke junx tucꞌil Tcꞌwaꞌl?
33 ¿Alcye baꞌn ttxꞌolbante cyil keju scꞌoꞌmaj tuꞌn Dios?
Mi aꞌl jun porque a Dios ma tzꞌoc kꞌonte cye te tzꞌaklxix.
34 ¿Alcye baꞌn tcub kꞌonte cysentens?
Mi aꞌl jun porque o cyim Crist ex jaw ankꞌin cyxol cyimni,
at ttxlaj Dios tuj bankꞌabaj,
ex ax in cubsan kiꞌj.
35 ¿Alcye baꞌn tel paꞌnte ke tiꞌj tcꞌujlalil Crist?
¿Apelo ju cꞌixcꞌoj in tzaj kiꞌj,
ex ka tuꞌn yajbil ke,
ex ka tuꞌnju in ko yajlanjtz tuꞌn tlaj tyol Dios,
ex ka tuꞌn weꞌyaj,
ex ka tuꞌn kxbalun mintiꞌ,
ex ka tuꞌn xobajil,
ex ka tuꞌn kcub byoꞌn?
36 Ic tzaꞌn in tmaꞌn tuj Tuꞌjil:
Tcyakil kꞌij nneꞌljeꞌ kiꞌje tuꞌn kcub byoꞌne nok tuꞌn tlaja;
in ko oc kꞌoꞌne ic tzaꞌn ke ẍneꞌl in che cub byet,
chi tuj Tuꞌjil.
37 Masque icju,
pero tuj tcyakil jlu in cubxix cyiꞌj kuꞌn nok tuꞌn Crist aju o ko tcꞌujla.
38 Cyjaꞌtzun kꞌukl ncꞌuꞌje tiꞌj,
mi aꞌl jun baꞌn tel paꞌnte ke tiꞌj tcꞌujlalil Dios;
mi camic,
mi ju kchwinklal tzalu twitz txꞌotxꞌ,
mi ke anjel,
mi ke nejenel mintiꞌ kꞌanchaꞌl,
mi keju at cyipumal,
mi ju at jaꞌlo,
mi ju tzul,
39 mi keju ateꞌ twitz cyaꞌj,
mi keju ateꞌ tjakꞌxi txꞌotxꞌ,
ex mi jun tchꞌisben Dios jacu ko el cypaꞌn tiꞌj tcꞌujlalil Dios,
aju ma tzaj kꞌoꞌn ke tuꞌn Jesucrist aju Kajaw.