Jun xnakꞌtzbil nneꞌl kꞌiꞌn tiꞌj mejebleꞌn
7
Erman,
in chin yoline cyeye akeye ojtzkiꞌn ley cyuꞌne,
ex baꞌn cyuꞌne ate ley at toclen tiꞌj xjal itzꞌxcu xjal.
2 Porque ic tzaꞌn jun xuꞌj at tchmil,
toc tuj tcwent tchmil tuꞌn ley itzꞌxcu tchmil;
pero ka ma cyim tchmil,
tzokpiꞌntl te xuꞌj twitz ju ley otok tzꞌoc mojbante cye.
3 Cyjaꞌtzun,
ka ma mojeꞌ xuꞌj tucꞌil juntl xinak itzꞌxcu tchmil,
cꞌoquel tbi aj pajil;
katzun ma cyim tchmil,
tzokpiꞌntl te xuꞌj twitz ley;
masquetzun mojeꞌ tucꞌil juntl tchmil mlay tzꞌoc kꞌoꞌn tbi aj pajil.
4 Ax icxtzun cyeye erman,
mintiꞌtl toclen ley cyiꞌje,
porque o cyim Crist tuꞌn cytzokpete,
baꞌntzun tuꞌn cymojeꞌye tucꞌil Crist aju jatz ankꞌin cyxol cyimni,
tuꞌntzun kbinchante aju baꞌn tuj twitz Dios.
5 Tej naꞌnxtok kocslan,
in kbinchaꞌntok aju tajbil kchibjal;
masque in tmaꞌn ley tuꞌn miꞌn kbinchante il,
pero mas nnoꞌc tilil kuꞌn tuꞌn kbinchante,
mer ic tzaꞌn at jun toꞌyil ke.
Cyjaꞌtzun tzaj camic kiꞌj.
6 Atzun jaꞌlo tzokpiꞌntl koꞌ,
mintiꞌ toclen ley kiꞌj,
ic tzaꞌn cyimni ma ko oc twitz ley jatum tzyuꞌntok koꞌ nej;
cyjaꞌtzun tzokpiꞌntl koꞌ tuꞌntzun kajben te Dios tuj acꞌaj chwinklal tuꞌn Xewbaj,
ex mya tuꞌn kten tjakꞌ ojtxi ley aju tzꞌiban.
Aju il at tuj kanmi
7 ¿Titzun oc kmaꞌ?
¿Ilpe aju ley?
Miꞌn.
Pero mintiꞌwtlo sel nnicꞌe tiꞌj il nokwit mintiꞌ saj tyecꞌun ley;
ex mintiꞌwtlo sel nnicꞌe tiꞌj ka mya baꞌn tuꞌn tpon ncꞌuꞌje tiꞌj jun tiꞌxti te juntl nokwit mintiꞌ in tmaꞌn ley:
Miꞌn pon tcꞌuꞌja tiꞌj.
8 Ate il axju mandamyent ajben tuꞌn,
porque tcyakilju mya baꞌn in pon ncꞌuꞌje tiꞌj,
el tuj kꞌanchaꞌl tuꞌnju mandamyent;
porque nokwit mintiꞌ ley,
ate il mintiꞌ tipun,
mer ic tzaꞌn cyimni.
9 Naꞌnxtok tel nnicꞌe tiꞌj ley,
baꞌn ntene nnaꞌne;
pero tej tel nnicꞌe tiꞌj mandamyent,
maxitzun el nnicꞌe tiꞌj ka at wile,
ex cub nsentense tuꞌn ncyime.
10 Cyjaꞌtzun ma tzꞌel nnicꞌe tiꞌj jlu,
aju mandamyent tzaj kꞌoꞌn tuꞌn tten kchwinklal,
atzun weye,
axju mandamyent cub kꞌonte nsentense tuꞌn ncyime.
11 Porque ate il,
axju mandamyent ajben tuꞌn te sbubl weye,
ex ma chin cub byoꞌne tuꞌn il nok tuꞌnju mandamyent.
12 Cyjaꞌtzun,
ate ley ax toc xjan te,
ex aju mandamyent xjan te,
ex tzꞌaklxix ex baꞌn te.
13 Baꞌn te ley.
¿Apetzunju baꞌn cub byonte weye?
Miꞌn.
Ate il cub byonte weye nok tuꞌnju ley baꞌn,
tuꞌn tyecꞌunjtz aju il,
ka ilte,
ex tuꞌn toc il puro ilxix tuꞌnju mandamyent.
14 Porque baꞌn kuꞌn,
aju ley te Dios te;
atzun weye in nbinchaꞌne aju tajbil nchibjale,
cꞌaꞌyimaj kine tjakꞌ tipumal il.
15 Porque aju in nbinchaꞌne,
mintiꞌ nneꞌl nnicꞌe tiꞌj;
aju wajbile,
mintiꞌ in bant wuꞌne;
ex aju ncꞌiꞌye,
atzunju in bant wuꞌne.
16 Pero ka ma bant wuꞌne aju ncꞌiꞌye;
cyjaꞌtzun nneꞌl nnicꞌe tiꞌj ax toc baꞌn te ley.
17 Cyjaꞌtzun,
mya akine in chin binchante jlu,
ate il at wuje in binchante.
18 Porque baꞌn wuꞌne mintiꞌ jun baꞌn at wuje tuj nchibjale;
wajbile tuꞌn nbinchanteye aju baꞌn,
pero mintiꞌ wipumale tuꞌn tbant wuꞌne.
19 Porque aju baꞌn wajbile tuꞌn tbant,
mintiꞌ in bant wuꞌne;
atzunju mya baꞌn,
aju miꞌn wajbile tuꞌn tbant,
atzunju in bant wuꞌne.
20 Katzun ma nbinchaye aju miꞌn wajbile,
mya akine in chin binchante,
ate il at wuje in binchante.
21 Cyjaꞌtzun ma tzꞌel nnicꞌe wiꞌje tzaꞌn ntene:
wajbile tuꞌn nbinchanteye aju baꞌn,
pero aju mya baꞌn tcub nwitze.
22 Porque in chin tzalaje tiꞌj Dios tuj wanmiye;
23 pero in nnaꞌne juntl ley tuj nximlale in kꞌojin tiꞌj tley nnable,
ex in chin ocx presine tuꞌn tjakꞌ tley il aju at tuj nximlale.