Mintiꞌtl tajben il ke, porque itzꞌ koꞌ tuꞌn Crist
6
¿Titzun oc kmaꞌ?
¿Cucxpe ko binchal il tuꞌn ttzaj tkꞌoꞌn Dios nimxixtl t-xtalbil ke?
2 Miꞌn.
Porque mintiꞌtl tajben il ke,
porque ic tzaꞌn cyimni koꞌ te il.
¿Tzaꞌntzun tten cucx tuꞌn kbinchan il?
3 ¿Mintiꞌpe baꞌn cyuꞌne,
ic tzaꞌn ke o ko byan,
o ko oc mojbaꞌn tucꞌil Crist ex at koclen tiꞌj tcamic?
4 Porque tej tcyim Crist ex cuꞌx makuꞌn,
icxtzun ke tej kbyan,
mer ic tzaꞌn o ko cyim ex o ko cuꞌx makuꞌn junx tucꞌil,
porque o ko oc mojbaꞌn tucꞌil.
Ic tzaꞌn te Crist o jatz ankꞌin cyxol cyimni tuꞌn tipumal Mambaj,
ax icxtzun ke tuꞌn kbet tuj acꞌaj chwinklal.
5 Porque ka ma ko oc mojbaꞌn tucꞌil Crist tuꞌn kcyim junx tucꞌil,
ax icx oc ko jawil ankꞌin junx tucꞌil.
6 Baꞌn kuꞌn,
aju ojtxi kten o jaw kꞌoꞌn twitz crus junx tucꞌil Crist tuꞌn tnaj aju tipumal il tuj kximlal,
tuꞌntzun miꞌn ktentl te tmajen il.
7 Porque aju o cyim,
tzokpiꞌmajtl tjakꞌ tipumal il.
8 Ex ka o ko cyim junx tucꞌil Crist,
kꞌukl kcꞌuꞌj tiꞌj ka oc ko ankꞌil junx tucꞌil.
9 Porque baꞌn kuꞌn o jaw ankꞌin Crist cyxol cyimni,
mlay cyimtl;
mintiꞌtl toclen camic tiꞌj.
10 Porque tej tcyim Crist nok junx maj cyim tuꞌn tchjet kil;
atzun jaꞌlo tucꞌil Dios in ankꞌin.
11 Ax icxtzun cyeye,
che ximane ka ax toc mintiꞌtl toclen il cyiꞌje,
porque ic tzaꞌn cyimni keye,
pero itzꞌ keye te Dios tuꞌnju cymojbabl cyibe tucꞌil Jesucrist aju Kajaw.
12 Cyjaꞌtzun,
miꞌn txi cykꞌoꞌne ambil te il tuꞌn tcawin tuj cyximlale aju at tcyimel,
ex miꞌn txi cynimane aju tajbil cyximlale.
13 Ex miꞌn txi cykꞌoꞌne cyximlale te il tuꞌn tbinchet aju mya baꞌn;
oꞌcx cykꞌonx cyibe te Dios mer ic tzaꞌn cyimni keye nej pero itzꞌ keye jaꞌlo,
ex cykꞌonx cyximlale te Dios tuꞌn tbinchet aju tzꞌaklxix.
14 Porque ate il mintiꞌtl toclen tuꞌn tcawin cyiꞌje,
porque myatzun ateꞌye tjakꞌ ley,
nok oꞌcx tcub t-xtalbil Dios cyibaje.
Tmajen Dios koꞌ tuꞌn kbinchante aju baꞌn
15 ¿Chi toc cyuꞌne?
¿Ocpe ko binchal il tuꞌnju mya atoꞌ tjakꞌ ley,
nok oꞌcx tcub t-xtalbil Dios kibaj?
Miꞌn.
16 ¿Mintiꞌpetzun baꞌn cyuꞌne?
Ka ma txi cykꞌon cyibe te juntl tuꞌn cyoque te tmajen tuꞌn t-xi cynimane,
majen keye teju in xi cynimane;
ka ma txi cynimane aju il,
camic in tzaj tuꞌn;
ex ka ma txi cynimane tyol Dios,
che oquel kꞌoꞌne te tzꞌaklxix tuꞌn.
17 Pero chjonte te Dios,
masque majentok keye te il ojtxi,
atzun jaꞌlo ma txi cynimane tuj cyanmiye aju xnakꞌtzbil axix toc tzaj kꞌoꞌn cyeye.
18 Ex tzokpiꞌmajtl keye tjakꞌ tipumal il,
ma che oque te majen tuꞌn cybinchanteye aju tzꞌaklxix.
19 (In chin yoline ic tzaꞌn che yolin xjal tuꞌnju naꞌnx tel cynicꞌe tiꞌj.)
Cyjaꞌtzun,
ic tzaꞌn ojtxi xi cykꞌoꞌne cyximlale tuꞌn cyoque te tmajen mya baꞌn,
ex baj cytzꞌilsan cyibe tuꞌn cybinchbene mya baꞌn,
ax icxtzun jaꞌlo cykꞌonx cyximlale te Dios tuꞌn cybinchanteye aju tzꞌaklxix,
tuꞌntzun cyajbene oꞌcx te Dios.
20 Porque tej ateꞌxtoke te tmajen il,
myatzun majen keye tuꞌn cybinchanteye aju tzꞌaklxix.
21 ¿Atpe o cycambaye tiꞌj tcyakilju in che chꞌixwiye tiꞌj jaꞌlo?
Mintiꞌ,
porque cyuꞌntzun ke jlu in tzaj camic.
22 Atzun jaꞌlo ma che tzokpete tjakꞌ tipumal il ex ma che oque te tmajen Dios,
ex atzun ma cycambaye jlu:
Tuꞌn cyankꞌine cypaꞌn cyibe tiꞌj il,
ex tuꞌn tten cychwinklale te jumajx.
23 Porque aju chojbil ke in tzaj tkꞌoꞌn il,
atzun tuꞌn kcyim;
atzunju oyaj in tzaj tkꞌoꞌn Dios ke,
tuꞌn tten kchwinklal te jumajx tuꞌn kmojbabl kib tucꞌil Jesucrist aju Kajaw.