Nimcu in tzaj tkꞌoꞌn Dios ke, tuꞌnju ma bant kten tucꞌil
5
Cyjaꞌtzun ma ko oc te tzꞌaklxix tuꞌn Dios nok tuꞌn kocslabl,
ex ma bant kten tucꞌil Dios nok tuꞌn Kajaw Jesucrist.
2 Ma tzaj tkꞌoꞌn Dios t-xtalbil ke nok tuꞌn Jesucrist,
porque ma ko ocslan tiꞌj,
ex waꞌl koꞌxix tuj t-xtalbil,
ex in ko tzalaj tuꞌnju kꞌukl kcꞌuꞌj tiꞌj tuꞌn kten tucꞌil Dios tuj tajwalil.
3 Ex mya nok oꞌcx jlu;
ax icx in ko tzalaj tuj yajbil ke,
porque baꞌn kuꞌn,
aju yajbil ke in tkꞌoꞌn kpasens tuꞌn ticꞌx kuꞌn;
4 ex tuꞌn kpasens,
cyuw kten tuꞌn ticꞌx kuꞌn;
ex tuꞌnju nnicꞌx kuꞌn,
mas in keꞌ kcꞌuꞌj tiꞌj Dios;
5 ex tuꞌnju kꞌukl kcꞌuꞌj tiꞌj Dios,
mlay ko el tuj kchꞌixwi;
porque in knaꞌn tuj kanmi aju tcꞌujlalil Dios kiꞌj tuꞌnju Xewbaj Xjan tzaj tkꞌoꞌn ke.
6 Porque tej mintiꞌtok kipun tuꞌn kclet kuꞌnx kib,
cyjaꞌtzun cyim Crist tuꞌn klaj tujxix tkꞌijlalil,
porque aj il koꞌ.
7 Porque mlaylo txi tkꞌon tib jun xjal tuꞌn tcyim tuꞌn tlaj jun xjal tzꞌaklxix;
ex katzunlo ka at jun xjal jacu takꞌ tib tuꞌn tcyim tuꞌn tlaj jun xjal baꞌn.
8 Pero in tzaj tyecꞌun Dios ka at tcꞌujlalil kiꞌj,
tuꞌnju o cyim Crist te kxel tej aj ilxtok koꞌ.
9 Ic tzaꞌn ma ko oc kꞌoꞌn te tzꞌaklxix tuꞌn Dios tuꞌnju cyim Crist,
cyjaꞌtzun mas in keꞌxix kcꞌuꞌj tiꞌj,
ko cletel tuꞌn oc ttzaj cycastiw xjal tuꞌn Dios.
10 Ma bant kten tucꞌil Dios tuꞌnju tcyimlen Tcꞌwaꞌl tej aj kꞌojtok koꞌ tiꞌj,
cyjaꞌtzun mas in keꞌxix kcꞌuꞌj tiꞌj ka oc ko cletel tuꞌn,
tuꞌnju banin kten tucꞌil Dios ex tuꞌnju jatz ankꞌin Jesucrist ex itzꞌ jaꞌlo.
11 Ex mya oꞌcx jlu;
ax icx nim in ko tzalaj tiꞌj Dios tuꞌn Kajaw Jesucrist,
porque tuꞌn Crist ma bant kten tucꞌil Dios.
Aju tbincha Adán ex aju tbincha Crist
12 Cyjaꞌtzun,
ic tzaꞌn nok tuꞌn jun xinak ocx il cyxol cycyakil xjal,
ex tuꞌnju il tzaj camic,
cyjaꞌtzun ilxix tiꞌj tuꞌn cycyim cycyakil xjal tuꞌnju cycyakil e binchan il.
13 Porque naꞌnxtok tkꞌonjtz ley,
attok il cyxol xjal,
pero mlay kꞌmanjtz ka at cyil xjal naꞌnxtok tul ley.
14 Masque icju,
pero ate camic cucx cycyim xjal tuꞌn;
ttzajlenx tiꞌj Adán ul tiꞌj Moisés e cyim xjal masque mya icx tten cyil ic tzaꞌn til Adán,
porque ate Adán icꞌ tibaj jun mandamyent tzaj tkꞌoꞌn Dios te.
Ate Adán jun techal tiꞌj Crist,
aju attok tulel.
15 Pero aju toyaj Dios ma tzaj tkꞌoꞌn ke mya ic tten ic tzaꞌn til Adán.
Porque nok tuꞌn til junx xjal cycyakil xjal in che cyim;
pero mas nim aju t-xtalbil Dios in tzaj tkꞌoꞌn ke,
porque nok cucx ma tzaj tkꞌoꞌn colbil cye nimcu xjal nok tuꞌn t-xtalbil junx xjal,
a Jesucrist.
16 Ex mya ic tten toyaj Dios ic tzaꞌn til Adán o bant,
porque nok tuꞌn jun il tbincha Adán cub cysentens xjal tuꞌn cynaj;
pero aju toyaj Dios tzaj tkꞌoꞌn,
in che oc xjal te tzꞌaklxix tuꞌn masque nim il otok cybincha.
17 Porque nok tuꞌn jun il tbincha jun xjal in che cyim cycyakil xjal;
ax icx nok tuꞌn jun xjal,
a Jesucrist,
oc ko ankꞌil ex oc ko cawil akoꞌ ma kcꞌam nimxix t-xtalbil Dios,
ex ma ko oc te tzꞌaklxix tuꞌn;
jun oyaj jlu ma tzaj kꞌoꞌn ke.
18 Cyjaꞌtzun,
ic tzaꞌn e cub kꞌoꞌn cycyakil xjal tjakꞌ sentens tuꞌn cynaj nok tuꞌn til jun xjal,
ax icxtzun nok tuꞌn jun xjal tbincha aju tzꞌaklxix,
jacu che oc cycyakil xjal te tzꞌaklxix tuꞌn Dios ex tuꞌn tten cychwinklal.
19 Porque ic tzaꞌn e oc nimcu xjal aj il nok tuꞌn tlaj jun xinak mintiꞌ xi tniman tyol Dios,
ax icxtzun nimcu xjal oc che oquel te tzꞌaklxix tuꞌn Dios nok tuꞌn jun xinak xi tniman tyol Dios.
20 Tzaj tkꞌoꞌn Dios tley tuꞌn telxix cynicꞌ xjal tiꞌj ka aj il ke twitz Dios,
pero ic tzaꞌn o chmet-xix cyil xjal,
ax icxtzun mas nimxix t-xtalbil Dios tzaj tkꞌoꞌn.
21 Ic tzaꞌn e cyaj xjal tjakꞌ tipumal il ex e cyim tuꞌn,
ax icxtzun te Dios t-xtalbil at tipumal tuꞌn koc te tzꞌaklxix tuꞌn,
ex tuꞌn tten kchwinklal te jumajx nok tuꞌn Jesucrist aju Kajaw.