Jun yecꞌbil te ke tiꞌj Abraham
4
¿Ti oc kmaꞌ?
¿Ti o tcamba kxeꞌchel Abraham jatum elni koꞌ tiꞌj?
2 Nokwit tuꞌn takꞌunben Abraham o tzꞌoc kꞌoꞌn te tzꞌaklxix tuꞌn Dios,
atwitlo tumel tuꞌn tjaw tniman tib cywitz xjal,
pero mya twitz Dios.
3 Chi in tmaꞌn tuj Tuꞌjil:
Xi tocslaꞌn Abraham tyol Dios;
cyjaꞌtzun oc kꞌoꞌn te tzꞌaklxix tuꞌn Dios nok tuꞌn tocslabl,
chi tuj Tuꞌjil.
4 Pero aju in akꞌnan,
mlay kma ka nok jun oyaj aju twi tcꞌuꞌj,
a jlu chojbil te.
5 Atzun teju mintiꞌ nnoꞌc keꞌ tcꞌuꞌj tiꞌj tbinchben,
nok oꞌcx nnoꞌc keꞌ tcꞌuꞌj tiꞌj Dios aju nnoꞌc kꞌonte cye xjal aj il te tzꞌaklxix,
atzunju nnoꞌc kꞌoꞌn te tzꞌaklxix tuꞌn Dios nok tuꞌn tocslabl.
6 Ic tzaꞌn in tmaꞌn David,
at tzalajbil te xjal aju nnoꞌc kꞌoꞌn te tzꞌaklxix tuꞌn Dios mya tuꞌn takꞌunben.
7 Porque chi David:
At tzalajbil cye xjal in cub najsaꞌn cyil,
ex in cub maksiꞌn cyil.
8 At tzalajbil te xjal aju mlay tzaj naꞌntl til tuꞌn Kman,
chi tuj Tuꞌjil.
9 ¿Alcyetzun ke xjal tuꞌn tten tzalajbil cye?
¿Oꞌcxpe keju sircunsidarimaj ke,
ex ka icx keju mya sircunsidarimaj ke?
Porque ma kmaye,
o tzꞌoc kꞌoꞌn Abraham te tzꞌaklxix tuꞌn Dios nok tuꞌn tocslabl.
10 Katzun icju,
¿alcyetzun kꞌij toc kꞌoꞌn Abraham te tzꞌaklxix?
¿Otokpe sircunsidarinjtz,
ex ka naꞌnxtok?
Pwes naꞌnxtok t-sircunsidarinjtz.
11 Te tibajxi o sircunsidarinjtz Abraham tuꞌn toc te jun techal ka otok tzꞌoc kꞌoꞌn te tzꞌaklxix tuꞌn Dios,
nok tuꞌn tocslabl tej naꞌnxtok t-sircunsidarinjtz;
cyjaꞌtzun ma tzꞌoc te mambaj cye cycyakil ocslal mya sircunsidarimaj ke,
ax icx cye tuꞌn cyoc te tzꞌaklxix tuꞌn Dios nok tuꞌn cyocslabl.
12 Ax icx oc Abraham te mambaj cye keju sircunsidarimaj ke,
pero mya oꞌcx sircunsidarimaj ke,
ax icx at cyocslabl,
ic tzaꞌn tocslabl kxeꞌchel Abraham tej naꞌnxtok t-sircunsidarinjtz.
Tuꞌn tocslabl Abraham o tcꞌam aju tziyimaj tuꞌn Dios
13 Porque tzaj ttziyan Dios te Abraham ex cye tiyjil tuꞌn cyoc te etzal te tcyakil twitz txꞌotxꞌ,
mya tuꞌnju otok txi tniman Abraham ju ley tzaj ttziyan Dios jlu,
nok oꞌcx tuꞌnju otok tzꞌocslan Abraham;
cyjaꞌtzun oc kꞌoꞌn Abraham te tzꞌaklxix tuꞌn Dios nok tuꞌn tocslabl.
14 Porque ka oꞌcx ke xjal in xi cyniman ju ley at cyoclen tiꞌj ju etzbil,
entons nokxlo gan tuꞌn kocslan tiꞌj Jesucrist,
ex aju yol tzaj ttziyan Dios,
mintiꞌwtlo tajben.
15 Porque ate ley at castiw tuꞌn;
katzun mintiꞌ jun ley,
ax mlay cub cycastiw xjal,
porque mlay tzꞌel knicꞌ tiꞌj ka otok che icꞌ xjal tibaj ley.
16 Cyjaꞌtzun,
nok tuꞌnju at tocslabl Abraham tzaj ttziyan Dios jun tyol te,
tuꞌn toc te jun xtalbil,
tuꞌntzun tcyuwsanjtz ju yol tzaj ttziyan Dios cye cycyakil tiyjil Abraham.
Mya oꞌcx cye keju in xi cyniman ju ley tzaj ttziyan Dios ju yol lu,
ax icx cye keju in che ocslan ic tzaꞌn te Abraham ocslan;
cyjaꞌtzun ma tzꞌoc Abraham te mambaj ke kcyakil,
17 ic tzaꞌn in tmaꞌn tuj Tuꞌjil:
Ma tzꞌoc nkꞌoꞌne te mambaj cye nimcu nasyon,
chi tuj Tuꞌjil.
Ate Abraham kman twitz Dios,
porque xi tocslaꞌn tyol Dios,
aju Dios in che jatz ankꞌin cyimni tuꞌn,
ex oc tyolin Dios in bant aju mintiꞌtok at nej.
18 Masque mintiꞌ tumel tuj twitz Abraham tuꞌn titzꞌj jun tcꞌwaꞌl,
pero xi tocslaꞌn tyol Dios ex cub tyoꞌn ex o keꞌxix tcꞌuꞌj tiꞌj tuꞌn toc te mambaj cye nimcu xjal,
ic tzaꞌnx o tma Dios te:
Ictzun cꞌoquel cyajlal tiyjila,
chi Dios.
19 Ex mintiꞌ cub numj Abraham tuj tocslabl,
mintiꞌ cub t-ximan ka otok tijin t-ximlal,
porque chꞌixtok tjapun jun syent abkꞌi tuꞌn,
ex mintiꞌ cub t-ximan ka miban alin Sara.
20 Ex mintiꞌ jolpajeꞌ tcꞌuꞌj tiꞌj ju yol tzaj ttziyan Dios te;
oꞌcx tcyuwsa tib tuj tocslabl ex xi tkꞌoꞌn chjonte te Dios.
21 O keꞌxix tcꞌuꞌj tiꞌj ka at tipumal Dios tuꞌn tbinchante tcyakilju otok tzaj ttziyan Dios te.
22 Cyjaꞌtzun oc kꞌoꞌn te tzꞌaklxix tuꞌn Dios nok tuꞌnju tocslabl.
23 Ex mya nok oꞌcx tiꞌj Abraham o tzꞌibanjtz ka otok tzꞌoc kꞌoꞌn te tzꞌaklxix tuꞌn Dios,
24 ax icx o tzꞌibanjtz kiꞌj,
porque icx ke in ko oc kꞌoꞌn te tzꞌaklxix tuꞌn Dios nok tuꞌn kocslabl,
akoꞌ in ko ocslan tiꞌj Dios aju jatz ankꞌin Kajaw Jesús tuꞌn cyxol cyimni.
25 Ate Jesús xi kꞌoꞌn tuj cykꞌab xjal tuꞌn tcyim tuꞌn tlaj kil,
ex jatz ankꞌin tuꞌn koc te tzꞌaklxix twitz Dios.